མཚོ་སྔོན་གྱི་ལྗང་མདོག་རྩིས་ནུས་ཐོན་ལས་འཕེལ་རྒྱས་འོས་སྦྱོར་ཚོགས་འདུ་སྐབས་གཉིས་པ་པེ་ཅིང་དུ་བསྡུ་རྒྱུ་རེད།

ཟླ3པའི་ཚེས20ཉིན། གསར་འགོད་པས་ཞིང་ཆེན་སྲིད་གཞུང་གསར་འགྱུར་གཞུང་སྒྲུབ་ཁང་ནས་སྤེལ་བའི་མཚོ་སྔོན་གྱི་ལྗང་མདོག་རྩིས་ནུས་ཐོན་ལས་འཕེལ་རྒྱས་འོས་སྦྱོར་ཚོགས་འདུ་སྐབས་གཉིས་པའི་གསར་འགྱུར་སྒྲོག་སྤེལ་ཚོགས་འདུའི་སྟེང་རྒྱུས་ལོན་བྱུང་བ་ལྟར་ན། མཚོ་སྔོན་གྱི་ལྗང་མདོག་རྩིས་ནུས་ཐོན་ལས་འཕེལ་རྒྱས་འོས་སྦྱོར་ཚོགས་འདུ་སྐབས་གཉིས་པ་ཟླ3པའི་ཚེས28ཉིན་པེ་ཅིང་དུ་བསྡུ་རྒྱུ་རེད། འདི་ནི་རྒྱལ་ཡོངས་ཚོགས་ཆེན་གཉིས་ཀྱི་རྗེས་སུ། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་ཐོག་དང་པོར་ཕྱི་རུ་ཚོང་འགུག་དངུལ་འདྲེན་གྱི་བྱ་བ་སྤེལ་ནས། འཕེལ་རྒྱས་གྲུབ་འབྲས་འགྲེམ་སྟོན་དང་། འཕེལ་རྒྱས་གོ་སྐབས་མཉམ་སྤྱོད། ཕྱོགས་སོ་སོའི་མཉམ་ལས་ཚུར་འགུག་བྱེད་པ་དང་། རྒྱལ་ཡོངས་དང་ཐ་ན་གོ་ལ་ཧྲིལ་བོར་མཚོ་སྔོན་གྱི་ལྗང་མདོག་རྩིས་ནུས་ཐོན་ལས་འོས་སྦྱོར་བྱས་ནས། ཁེ་ལས་དང་འཇོན་མི། ཐོན་ཁུངས་བཅས་མཚོ་སྔོན་དུ་བཀུག་སྟེ། ཐོན་ལས་མུ་མཐུད་དུ་སྤུས་ཚད་མཐོན་པོས་འཕེལ་རྒྱས་གཏོང་བར་སྐུལ་འདེད་གཏོང་ཆེད་རེད།

ཐེངས་འདིའི་འོས་སྦྱོར་ཚོགས་འདུས་ལྗང་མདོག་རྩིས་ནུས་མཉམ་སྐྲུན་དང་སྤུས་གསར་འབྱུང་འགྱུར་མཉམ་བསུ་ཞེས་པ་བརྗོད་གཞིར་བཟུང་ནས། མཚོ་སྔོན་ཞིང་ཆེན་གྱིས་མཚོ་སྔོན་གྱི་ཆེས་ཆེ་བ་གསུམ་གྱི་ཞིང་ཆེན་གྱི་ངེས་གནས་དང་སྔར་ལས་གལ་ཆེ་བ་གསུམ་གྱི་འཐབ་ཇུས་གོ་གནས་གཙིགས་སུ་བཟུང་ནས། འཕེལ་རྒྱས་ཀྱི་འདུ་ཤེས་གསར་པ་ཕྱོགས་ཡོངས་ནས་ལག་བསྟར་བྱེད་པ་དང་། འཕེལ་རྒྱས་ཀྱི་རྣམ་པ་གསར་པའི་མྱུར་དུ་འདྲེས་པར་བྱེད་པ། སྤུས་ཚད་མཐོ་བའི་འཕེལ་རྒྱས་ལ་ཏན་ཏིག་གིས་སྐུལ་འདེད་གཏོང་དགོས་པ་དང་། མཚོ་སྔོན་གྱི་ལྗང་མདོག་རྩིས་ནུས་ཀྱི་ཟོང་རྟགས་མུ་མཐུད་བསྐྲུན་པར་བརྩོན་ལེན་བྱ་རྒྱུ་རེད། འོས་སྦྱོར་བྱ་འགུལ་གྱིས་མཚོ་སྔོན་གྱི་ལྗང་མདོག་རྩིས་ནུས་ཐོན་ལས་ཀྱི་མིང་བྱང་གལ་ཆེན་དྲིལ་སྒྲོག་བྱ་རྒྱུ་རེད།

འོས་སྦྱོར་ཚོགས་འདུ་ལས་ཡོན་ཧྲི་གྲགས་ཅན་དང་ཁེ་ལས་གཙོ་བོའི་འགན་འཁུར་བ་གདན་ཞུ་བྱས་ནས་གཏམ་བཤད་སྤེལ་རྒྱུ་ཡིན་ལ། དེ་དང་མཉམ་དུད་རུང་གཞི་གྲངས་ཀྱིས་མཚོ་སྔོན་ལ་རོགས་སྐྱོར་བྱེད་པའི་ཁ་གཏད་ཞིང་ཆེན་དང་གྲོང་ཁྱེར་གྱི་སྲིད་གཞུང་། ཚན་རིག་ཞིབ་འཇུག་ཁང་། མཐོ་རིམ་སློབ་གླིང་བཅས་ཀྱི་འགན་འཁུར་བློ་མཐུན་དང་། ཀྲུང་དབྱང་ཁེ་ལས་དང་གཞི་གྲངས་མཆན་འགོད་ཁེ་ལས། རླངས་འཁོར་དྲ་འབྲེལ་དང་རིག་ནུས་རླངས་འཁོར་ཁེ་ལས། རྩིས་འཁོར་དང་འཕྲིན་སྐྱེལ་སྒྲིག་ཆས་འདོན་སྤྲོད་ཁེ་ལས། གཞི་གྲངས་དཔལ་འབྱོར་ཁྱབ་ཁོངས་ཀྱི་ཁེ་ལས་གྲགས་ཅན་ཉིས་བརྒྱ་ལྷག་གི་འགན་འཁུར་བློ་མཐུན་གདན་ཞུ་བྱ་རྒྱུ་རེད།

འོས་སྦྱོར་ཚོགས་འདུས་ལྗང་མདོག་རྩིས་ནུས་ཁྱབ་ཁོངས་ཀྱི་མཉམ་ལས་ལས་གཞིར་གཅིག་བསྡུས་ཀྱིས་གན་རྒྱ་འགོད་པའི་མཛད་སྒོ་བསྡུས་ནས། རྩིས་ནུས་ཁེ་ལས་གཙོ་གྲས་དང་གཞི་གྲངས་དཔལ་འབྱོར་ཁྱབ་ཁོངས་ཀྱི་སྣེ་ཁྲིད་ཁེ་ལས་ཀྱི་མཚོན་རྟགས་རང་བཞིན་ལྡན་པའི་ལས་གཞི་སྐོར་ཞིག་གིས་གཅིག་བསྡུས་སྒོས་གན་རྒྱ་འཇོག་རྒྱུ་ཡིན་པ་དང་། གན་རྒྱའི་དངུལ་གྲངས་ཀྱི་གཞི་རྒྱ་དེ་ན་ནིང་ལས་བརྒལ་བར་བརྩོན་ལེན་བྱ་རྒྱུ་རེད། འགྲེམ་སྟོན་གྱི་ཕྱོགས་ནས། ཚོགས་ཆེན་གྱིས་ཚད་གཞི་མཐོ་བའི་དྲིལ་སྒྲོག་བརྙན་ཐུང་བཟོ་བ་དང་། ཡུལ་དངོས་ཀྱི་འགྲེམ་ཁུལ་འཛུགས་པ། རྣམ་པ་གསར་བ་བཏོད་ནས། ཤུགས་རྐྱེན་ལྡན་ཞིང་ཁྱད་ཆོས་ཡོད་ལ། ཉིན་རེར་ཡར་ཐོན་དང་གཟི་བརྗིད་ཀྱི་ཕྱོགས་སུ་བརྩོན་ལེན་བྱེད་པའི་མཚོ་སྔོན་གྱི་སྣང་བརྙན་བརྩོན་ལེན་བྱ་རྒྱུ་རེད།