མཚོ་བྱང་བོད་རིགས་རང་སྐྱོང་ཁུལ་བཙུགས་ནས་ལོ་འཁོར70ལོན་པའི་རྟེན་འབྲེལ་བྱེད་སྒོའི་བརྗོད་དོན་མཚོན་རྟགས（LOGO）ཀྱི་སྤྱི་བསྒྲགས།

རྩོམ་སྒྲིག་པ། ཕག་མོ་ཚེ་བརྟན། 2023-06-30 17:06:35 ཀློག་གྲངས།2837

མཚོ་བྱང་བོད་རིགས་རང་སྐྱོང་ཁུལ་བཙུགས་ནས་ལོ་འཁོར70ལོན་པའི་རྟེན་འབྲེལ་བྱེད་སྒོའི་བརྗོད་དོན་མཚོན་རྟགས（LOGO）ཀྱི་སྤྱི་བསྒྲགས།

མཚོ་བྱང་བོད་རིགས་རང་སྐྱོང་ཁུལ་བཙུགས་ནས་ལོ་འཁོར70ལོན་པའི་རྟེན་འབྲེལ་བྱེད་སྒོའི་བརྗོད་དོན་མཚོན་རྟགས（LOGO）དྲ་ཐོག་ནས་བསྡུ་རུབ་དང་། ཡོངས་བསྒྲགས། ཆེད་མཁས་པས་རིགས་པས་ཁུངས་སྐྱེལ་བྱས་པ་དང་། རྟེན་འབྲེལ་བྱེད་སྒོའི་གྲ་སྒྲིག་མགོ་ཁྲིད་ཚན་ཆུང་གིས་ཞིབ་བཤེར་གཏན་འབེབས་བྱས་ནས་མོས་མཐུན་བྱུང་རྗེས། ད་ལྟ་དབང་སྤྲོད་སྤྱི་བསྒྲགས་བྱས་པ་གཤམ་གསལ་ལྟར།

གཅིག བརྗོད་དོན་མཚོན་རྟགས（LOGO）ཀྱི་དཔེ་རིས།

དཔེ་རིས་ལེན་སའི་སྦྲེལ་གནས།

http://www.haibeinews.com/system/2023/06/29/030044890.shtml（མཚོ་བྱང་གསར་འགྱུར་དྲ་བ།）

http://jinrizangxiang.com/xinwentupian/540.html（གངས་ལྗོངས་འཕྲིན་གསར་དྲ་བ།）

བརྗོད་དོན་མཚོན་རྟགས（LOGO）ཀྱི་གོ་དོན།

མཚོ་བྱང་བོད་རིགས་རང་སྐྱོང་ཁུལ་བཙུགས་ནས་ལོ་འཁོར70ལོན་པའི་བརྗོད་དོན་མཚོན་རྟགས（LOGO）ཀྱིས་ཏང་གི་ཚོགས་ཆེན་ཉི་ཤུ་པའི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ཏེ་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་འཛུགས་རྒྱུ་གཙོ་རྐང་དུ་འཛིན་པ་འབུར་དུ་ཐོན་པར་བྱས་ཡོད་ལ། མཚོ་བྱང་བོད་རིགས་རང་སྐྱོང་ཁུལ་གྱི་མི་རིགས་རིག་གནས་དང་ས་ཁོངས་རིག་གནས་མངོན་རྒྱུ་ནི་ཇུས་འགོད་ཀྱི་གཙོ་གནད་དུ་བཟུང་སྟེ་བསམ་གཞིགས་ཐེངས་མང་དང་སྒྱུ་རྩལ་ལས་སྣོན་གང་མང་བརྒྱུད་ཇུས་འགོད་བྱས་པ་ནི་མིག་ལ་མཛེས་ཤིང་དཔལ་གྱིས་ཕྱུག་པའི་ཨང་ཀི70ཡིན་པ་རེད། དེའི་ནང་ཨང་ཀི7གྱིས་རི་ཚོགས་རྨང་གཞི་བྱས་ནས་ལྷབ་ལྷུབ་ཏུ་གཡོ་བའི་དར་དམར་ཞིག་བསྒྲེངས་ཡོད་ལ། དེས་མཚོ་བྱང་གི་རིགས་སོ་སོའི་བུ་དང་བུ་མོ་ཚོས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་རླབས་ཆེན་དར་ཆ་མཐོན་པོར་སྒྲེང་བ་དང་། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་ཁྲིད་སྟོན་དུ་བྱེད་པ། ཏང་གི་ཚོགས་ཆེན་ཉི་ཤུ་པ་དང་ཞིང་ཆེན་ཏང་གི་འཐུས་མིའི་ཚོགས་ཆེན་བཅུ་བཞི་པའི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ཏེ་ནུས་ཤུགས་ཡོད་རྒུས་དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་བྱེད་པའི་མཚོ་བྱང་གི་ལེའུ་གཏོད་པའི་ཡིད་ཆེས་དང་ཆོད་སེམས་མཚོན་ཡོད། དར་ཆའི་མཐིལ་གྱི་རི་ཡིས་མཚོ་བྱང་གི་མངའ་ཁོངས་སུ་གནས་པའི་བརྗིད་ཉམས་ཆེ་བའི་མདོ་ལ་རི་བོ་དང་། མི་རིགས་ཀྱི་བླ་སྲོག་གཏོད་པའི་སྨོན་ལམ་མཐོན་པོ། སྤྲིན་གྱི་ན་བཟའ་མནབ་པའི་ཨ་མྱེས་སྟོང་སོ་སོགས་རི་ཚོགས་མཚོན་གྱིན་ཡོད་ལ། དེས་མཚོ་བྱང་གི་རིགས་སོ་སོའི་བུ་དང་བུ་མོ་ཚོར་རི་བོ་ལྟར་བློ་བརྟན་འགྱུར་མེད་དང་འབད་འབུངས་ཡར་བརྩོན་གྱི་བསམ་པའི་གཤིས་རྒྱུད་མངའ་བ་མཚོན་གྱིན་ཡོད། དར་ཆའི་ནང་བྱ་འཕུར་བ་ལྟར་སྐྱོད་པའི་རྟ་མཆོག་གིས་མཚོ་སྔོན་གྱོ་རྒྱ་འཇུ་ལག་རྟ་མཆོག་མཚོན་གྱིན་ཡོད་ལ། དེས་ཏང་གི་དར་ཆའི་ཁྲིད་སྟོན་འོག་ལས་ལ་བརྩོན་ཞིང་བབ་ཆགས་པའི་མཚོ་བྱང་གི་བུ་དང་བུ་མོ་ཚོའི་རྟ་ཕོའི་རྨིག་སྒྲ་འཇགས་པ་མེད་པར་རྟ་མཆོག་སྟོང་གི་འགྲོས་བཟང་བཞིན་ལེ་བར་བརྒྱ་ཕྲག་ཡུད་ཀྱིས་བགྲོད་པའི་མདུན་བསྐྱོད་ཀྱི་སྙིང་སྟོབས་མཚོན་གྱིན་ཡོད། ཨང་ཀི0ནི་མཛེས་སྡུག་ལྷད་མེད་ཀྱི་མཚོ་སྔོན་པོ་དང་གསེར་ཉ་ལས་གྲུབ་ཡོད་ལ། དེའི་ཐོག་པར་རིས་ཁྲོད་ཀྱི་གསེར་ཉ་བཞི་བསྣན་ན་ཁྱོན་ཡོངས་ལ་གསོན་ཤུགས་ཀྱིས་ཁེངས་པ་དང་གསོན་ཉམས་དོད་པའི་རྣམ་པ་ཞིག་མངོན་གྱིན་ཡོད། འཁྱུག་རྩལ་སྐྱེན་ལ་སྣང་བར་མཛེས་པའི་གསེར་ཉ་ཡིས་མཚོ་བྱང་གི་རིགས་སོ་སོའི་བུ་དང་བུ་མོ་ཚོ་དཀའ་ངལ་ལ་མི་སྐྲག་པ་དང་དཔའ་ངར་ཆེན་པོས་མདུན་སྐྱོད་བྱེད་པའི་འབད་འཐབ་ཀྱི་སྙིང་སྟོབས་མཚོན་པ་དང་། འཁྱུག་རྩལ་ངོམ་པའི་གསེར་ཉ་དང་དལ་བར་གཡོ་བའི་མེ་ཏོག་གིས་མཚོ་བྱང་གི་རིགས་སོ་སོ་གཅིག་ལ་གཅིག་འདྲེས་ཀྱིས་མཉམ་དུ་མཐུན་སྒྲིལ་ཡར་ཐོན་ཡོང་བའི་ཁྲོད་སྟོབས་ཤུགས་ཆེན་པོ་གཅིག་ཏུ་སྒྲིལ་ནས་འབད་འབུངས་མདུན་སྐྱོད་དང་མ་འོངས་འབྱུང་འགྱུར་ཕྱོགས་ལ་བསྐྱོད་པར་མཚོན། ཨང་ཀི“1953-2023”དང་དེ་བཞིན་རི་མོའི་འོག་གི་བོད་རྒྱ་ཡིག་རིགས་གཉིས་ཀྱི་ཐོག་ནས་བྲིས་པའི་མཚོ་བྱང་བོད་རིགས་རང་སྐྱོང་ཁུལ་བཙུགས་ནས་ལོ་འཁོར70ལོན་པ་ཞེས་པ་དེས་མཚོ་བྱང་བོད་རིགས་རང་སྐྱོང་ཁུལ་བཙུགས་ནས་ལོ་འཁོར70ལོན་པའི་བར་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་མགོ་ཁྲིད་དང་འོད་སྟོང་འབར་བའི་ཏང་གི་མི་རིགས་སྲིད་ཇུས་འོག་བསྐྱོད་པའི་གཟི་བརྗིད་ལྡན་པའི་ལོ་རྒྱུས་དེ་མཚོན་ཡོད།

ཁ་དོག་གི་ཆ་ནས་གཙོ་བོ་དམར་པོ་དང་སེར་པོ། སྔོན་པོ། ལྗང་ཁུ། དཀར་པོ་བཅས་རིགས5བདམས་ཡོད་པ་དེས་ལོ་རྒྱུས་ཀྱི་དོན་སྙིང་ཟབ་མོ་ལྡན་ལ་མཚོ་བྱང་གི་རྣམ་པར་བཀྲ་བའི་མི་རིགས་རིག་གནས་མཚོན་པ་དང་ཆབས་ཅིག་གསེར་མདོག་གིས་འཇུ་ལག་དང་ལྗང་མདོག་གིས་མདོ་ལ། སྔོན་པོ་ཡིས་རྐང་ཚ། དམར་པོས་མདའ་བཞི་བཅས་ཀྱི་ཁྱད་ཆོས་མངོན་ཡོད། དེའི་ཁྲོད་སྒམ་བརླིང་ལྡན་ལ་འཁྲུག་ཆ་དོད་པའི་མཚོན་རྟགས་དམར་པོས་མཚོ་བྱང་གི་རིགས་སོ་སོའི་ལས་བྱེད་མང་ཚོགས་ཀྱིས“མདེལ་གཉིས་སྐར་གཅིག”གི་སྙིང་སྟོབས་རྒྱུན་འཛིན་དང་གསར་བརྗེའི་ཁྲག་རྒྱུན་རྒྱུན་འཛིན། ཏང་གི་བཀའ་དྲིན་ཚོར་བ་དང་ཏང་གི་བཀའ་ལ་ཉན་པ། ཏང་གི་རྗེས་སུ་འབྲང་བ་བཅས་ཀྱི་བློ་བརྟན་འགྱུར་མེད་ཀྱི་དད་སེམས་མཚོན་ཡོད། དྲོ་སྐྱིད་ལྡན་པའི་སེར་པོས་རིགས་སོ་སོའི་བུ་དང་བུ་མོ་ཚོའི་འཚོ་བ་ནི་མཛེས་སྡུག་ལྡན་པའི་མེ་ཏོག་དང་འདྲ་བར་མཛེས་སྡུག་དང་བདེ་སྐྱིད། ཁམས་བདེ་བཅས་མཚོན་པར་མ་ཟད། མཚོ་བྱང་གི་མ་འོངས་པ་དེ་བས་འོད་སྟོང་འཕྲོ་བའི་མཚོན་ཚུལ་ཞིག་ཀྱང་ཡིན། ཁ་དོག་དཀར་པོ་དང་སྔོན་པོ། ལྗང་ཁུ་བཅས་ནི་མཚོ་བྱང་གི་དྭངས་གཙང་གི་གངས་རི་དང་གཡའ་དག་པའི་ནམ་མཁའ། ལྗང་མདོག་གི་རྩྭ་ཐང་བཅས་ཀྱི་བསྡུས་རིས་ཡིན་པ་དེའི་ཐོག་ནས་མཚོ་བྱང་འདི་ཉིད་ཀྲུང་གོའི་ནུབ་རྒྱུད་ཀྱི་སྐྱེ་ཁམས་སྲུང་ཡོལ་གལ་ཆེན་ཞིག་ཡིན་པའི་ངོས་ནས་རང་བྱུང་ཐོན་ཁུངས་ཕུན་སུམ་ཚོགས་པོ་ཡོད་པ་དང་སྐྱེ་ཁམས་ཀྱི་ལེགས་ཆ་མངོན་གསལ་དོད་པོ་ཡོད་པས་མཚོ་བྱང་གི་རིགས་སོ་སོའི་བུ་དང་བུ་མོ་ཚོས“ཆེས་ཆེ་བ་གསུམ”གྱི་ཞིང་ཆེན་གྱི་གནས་བབ་བརྟན་པོ་བཟུང་ནས་རང་བྱུང་ལ་བརྩི་འཇོག་དང་རང་བྱུང་དང་བསྟུན་པ། རང་བྱུང་སྲུང་སྐྱོབ་བཅས་བྱས་ཏེ་བློ་བརྟན་འགྱུར་མེད་ངང་སྐྱེ་ཁམས་སྔོན་ལ་འཇོག་པ་དང་ལྗང་མདོག་འཕེལ་རྒྱས་ཀྱི་ལམ་བུའི་ཐོག་བསྐྱོད་རྒྱུའི་ཡིད་ཆེས་དང་ཆོད་སེམས་མཚོན་པར་བྱས་ཡོད།

གཉིས། བཀོལ་སྤྱོད་གསལ་བཤད།

སྤྱད་འཐུས་ཁྱབ་ཁོངས།

1.མཚོ་བྱང་བོད་རིགས་རང་སྐྱོང་ཁུལ་བཙུགས་ནས་ལོ་འཁོར70ལོན་པར་རྟེན་འབྲེལ་ཞུ་བའི་བྱེད་སྒོ་དང་འབྲེལ་ཡོད་བྱེད་སྒོ་གཞན་དག་ལ་སྤྱོད་ཆོག

2.རྟེན་འབྲེལ་བྱེད་སྒོའི་ཁོར་ཡུག་བཀོད་སྒྲིག་དང་། མགྲོན་ཤོག དཔང་ཡིག ཤེས་བྱ། འབྱོར་ཐོ་འགོད་དེབ་སོགས་ཀྱི་སྟེང་སྤྱོད་ཆོག

3. མང་ཚོགས་རང་བཞིན་གྱི་བརྗོད་དོན་སློབ་གསོའི་བྱེད་སྒོར་སྤྱོད་པའི་རྒྱབ་ལྗོངས་དང་། རྟགས་མཚན། དར་ཚོན་སོགས་རིག་གནས་གསར་གཏོད་ཐོན་རྫས་སྟེང་སྤྱོད་ཆོག

4. གསར་འགྱུར་འཕྲིན་སྤེལ་ཆེད་བསྒྲིགས་ལེ་ཚན་དང་། ཆེད་དོན་དྲ་ངོས། དྲིལ་སྒྲོག་ཡིག་རིགས། དྲིལ་སྒྲོག་ཤོག་ལྷེ། དྲིལ་སྒྲོག་སྦྱར་ཡིག སྤྱི་ཕན་བརྡ་ཁྱབ་སོགས་བཟོ་བར་སྤྱོད་ཆོག

5. རྟེན་འབྲེལ་བྱེད་སྒོའི་མཚན་རྟགས་དང་། དུས་ཐོག་སྦྱར་བྱང། བྲང་རྟགས། དཔུང་རྟགས་སོགས་བཟོས་ནས་མང་ཚོགས་ལ་དྲན་རྟེན་འདོགས་པར་མཁོ་འདོན་བྱེད་དགོས།

བེད་སྤྱོད་རེ་འདུན།

1. བརྗོད་དོན་མཚོན་རྟགས་བེད་སྤྱོད་སྐབས་གཟབ་ནན་དང་བབ་བརླིང་ཡིན་དགོས་པ་ལས་གང་འདོད་དུ་བཟོ་བཅོས་དང་དབྱིབས་སྒྱུར་བ། མདོག་སྒྱུར་བ་སོགས་བྱ་མི་ཆོག་པ་དང་། མཚོན་རྟགས་ཆེ་རུ་གཏོང་བའམ་ཡང་ན་ཆུང་དུ་གཏོང་མི་ཆོག

2. བརྗོད་དོན་མཚོན་རྟགས་དེ་ཚོང་ལས་བརྡ་ཁྱབ་དང་། ཚོང་རྟགས་བཟོ་བའམ་ཡང་ན་ཚོང་ལས་རང་བཞིན་གྱི་སྤྱོད་སྒོ་གཞན་གང་རུང་ལ་སྤྱོད་མི་ཆོག་པ་དང་། སྒེར་གྱི་རྟེན་འབྲེལ་མཛད་སྒོ་དང་མྱ་ངན་ཞུ་བའི་བྱེད་སྒོར་སྤྱོད་མི་ཆོག

3. བརྗོད་དོན་མཚོན་རྟགས་གཞི་རྒྱུའི་བཟོས་པའི་མཁོ་ཆས་ནི་མཚོ་བྱང་བོད་རིགས་རང་སྐྱོང་ཁུལ་བཙུགས་ནས་ལོ་འཁོར70ལོན་པར་རྟེན་འབྲེལ་ཞུ་བའི་བརྗོད་དོན་དང་འབྲེལ་བ་དམ་ཟབ་ཡོད་པ་ལས་གང་བྱུང་དུ་སྤྱོད་མི་ཆོག

བེད་སྤྱོད་དོ་དམ།

1. བརྗོད་དོན་མཚོན་རྟགས་ཀྱི་བདག་དབང་ཀྲུང་གུང་མཚོ་བྱང་ཁུལ་ཨུའི་དྲིལ་སྒྲོག་པུའུ་ལ་དབང་།

2. ས་ཁུལ་སོ་སོ་དང་སྡེ་ཁག་སོ་སོས་ཁོངས་གཏོགས་ཁུལ་དང་གཙོ་གཉེར་བྱེད་སྒོར་ལྟ་སྐུལ་བྱས་ཏེ་བླང་བྱ་ལྟར་མཚོན་རྟགས་མི་སྤྱོད་པ་སོགས་ཀྱི་གནད་དོན་ལ་དུས་ཐོག་ཏུ་དམིགས་སའི་རང་བཞིན་གྱི་བྱེད་ཐབས་སྤྱད་དེ་བཅོས་སྒྲིག་བྱེད་དགོས།

མཚོ་བྱང་བོད་རིགས་རང་སྐྱོང་ཁུལ་བཙུགས་ནས་ལོ་འཁོར70ལོན་པར་རྟེན་འབྲེལ་ཞུ་བའི་བྱེད་སྒོའི་དྲིལ་སྒྲོག་ཚན་ཆུང་ནས།