གཅིག་སྒྲིལ་གྱི་རིག་གནས་ཡུལ་སྐོར་འོས་སྦྱོར་ཚོགས་འདུ་ཁྲིན་ཏུའུ་རུ་འཚོགས།

ཟླ11པའི་ཚེས16ཉིན། མགོ་ལོག་བོད་རིགས་རང་སྐྱོང་ཁུལ་གཅིག་སྒྲིལ་རྫོང་ཏང་ཨུ་དང་རྫོང་སྲིད་གཞུང་གིས་གཙོ་སྒྲུབ་བྱས་པའི2024ལོའི་གཅིག་སྒྲིལ་རྫོང་གི་རིག་གནས་ཡུལ་སྐོར་འོས་སྦྱོར་ཚོགས་འདུ་དང་གེ་སར་རིག་གནས་སྐྱེ་ཁམས་སྲུང་སྐྱོང་ཁུལ་འཛུགས་སྐྲུན་གྱི་གྲུབ་འབྲས་འགྲེམས་སྟོན་དེ་སི་ཁྲོན་ཞིང་ཆེན་ཁྲིན་ཏུའུ་གྲོང་ཁྱེར་དུ་འཚོགས་འགོ་བརྩམས།

ཐེངས་འདིའི་འོས་སྦྱོར་ཚོགས་འདུའི་ཐོག “ཆུ་བོའི་འགོ་ཁུངས·མཛེས་སྡུག་གི་མཚོ་སྔོན”ཡུལ་སྐོར་ཟོང་རྟགས་གཙོ་གནད་དུ་བཟུང་ནས་འགྲེམས་སྟོན་བྱས།

འོས་སྦྱོར་ཚོགས་འདུའི་ཡུལ་དངོས་སུ། རིག་གནས་ཡུལ་སྐོར་གྱི་དྲིལ་བསྒྲགས་པར་གཞི་འགྲེམས་སྟོན་དང་།    ཁྱད་ལྡན་རིག་གནས་ཡུལ་སྐོར་གྱི་ཐོན་རྫས་འགྲེམས་སྟོན།   གཟུགས་འདས་ཤུལ་བཞག་རིག་གནས་ཀྱི་གླུ་གར་འཁྲབ་སྟོན།    མྱུར་འཆར་བརྙན་རིས་པར་ལེན་སོགས་ཀྱི་རྣམ་པའི་ཐོག་ནས་ཡུལ་དངོས་སུ་ཡོད་པའི་ཁྲིན་ཏུའུ་ཡི་གྲོང་མི་དང་ཡུལ་སྐོར་བར་གཅིག་སྒྲིལ་རྫོང་གི་གཏིང་ཟབ་པའི་རིག་གནས་ཀྱི་ནང་དོན་དང་།    ཕུན་སུམ་ཚོགས་པའི་རང་བྱུང་ཐོན་ཁུངས།    སྐྱེ་ཁམས་ཡུལ་སྐོར་ལམ་ཐིག་གསར་ཤོས།   དེ་མིན་གེ་སར་རིག་གནས་སྐྱེ་ཁམས་སྲུང་སྐྱོབ་ཁུལ་འཛུགས་སྐྲུན་གྱི་གཡུར་ཟའི་གྲུབ་འབྲས་འགྲེམས་སྟོན་བྱས།

འོས་སྦྱོར་ཚོགས་འདུའི་ཐོག་གཅིག་སྒྲིལ་རྫོང་གིས་བཏོན་པའི་སྐྱེ་ཁམས་ཡུལ་སྐོར་ལམ་ཐིག་རྩེ་གྲ4ལ་ཚད་མཐོའི་འོས་སྦྱོར་བྱས།     གཅིག་སྒྲིལ་རྫོང་སྲིད་གཞུང་དང་ཁྲིན་ཏུའུ་གྲོང་ཁྱེར་གྱི་གྲོང་གསེབ་ཡུལ་སྐོར་མཐུན་ཚོགས་བར་འཐབ་ཇུས་མཉམ་ལས་ཀྱི་གྲོས་མཐུན་ལ་མིང་རྟགས་བཀོད།     གཅིག་སྒྲིལ་གཉན་པོ་གཡུ་རྩེའི་རིག་གནས་ཡུལ་སྐོར་གསར་སྤེལ་འཛུགས་སྐྲུན་ཚད་ཡོད་འགན་འཁྲི་ཀུང་སི་དང་ཁྲིན་ཏུའུ་ཡི་ཡུལ་སྐོར་ལས་སྒྲུབ་ཁང10ཡི་བར་ཡུན་རིང་གི་མཉམ་ལས་གྲོས་མཐུན་ལ་མིང་རྟགས་བཀོད་པ་དང་། ཟླ12པར་གན་རྒྱ་བཞག་པའི་ཡུལ་སྐོར་ལས་སྒྲུབ་ཁང་གིས་ཡུལ་སྐོར་ཚོགས་པའི་སྣེ་ཁྲིད་དེ་གཅིག་སྒྲིལ་དུ་སྐྱེ་ཁམས་རིག་གནས་ཡུལ་སྐོར་ཉམས་ལེན་བྱ་རྒྱུ་རེད།

མཚམས་སྦྱོར་བྱས་པ་ལྟར་ན། གཅིག་སྒྲིལ་རྫོང་གིས་རྒྱལ་སྤྱིའི་སྐྱེ་ཁམས་ཡུལ་སྐོར་དམིགས་ས་བསྐྲུན་པར་ཤུགས་བསྣན་ཏེ། གཞུང་ཁོངས་རིག་གནས་ཡུལ་སྐོར་ཁེ་ལས་དང་ས་གནས་ཀྱི་ཡུལ་སྐོར་སྣེ་ལེན་ཁང་སྔ་རྗེས་སུ་བཙུགས་ནས། རྨ་ཆུའི་ཆུ་མགོའི་མཛེས་ལྗོངས་ཁུལ་བསྐྲུན་ཏེ་རྒྱ་ཆེའི་ཡུལ་སྐོར་བར་རིག་གནས་ཡུལ་སྐོར་གྱི་ཉམས་ལེན་སྤུས་ལེགས་ཧུར་ཐག་གིས་འདོན་སྤྲོད་བྱས།  གཅིག་སྒྲིལ་རྫོང་གིས་ཐེངས་འདིའི་འོས་སྦྱོར་ཚོགས་འདུ་དེ་གོ་སྐབས་སུ་བྱས་ནས་འོས་སྦྱོར་བྱས་པ་བརྒྱུད་། ཁྲིན་ཏུའུ་དང་ཁྲུང་ཆིང་ས་ཁུལ་གྱིས་གཅིག་སྒྲིལ་རིག་གནས་ཡུལ་སྐོར་ཐོན་ཁུངས་ལ་རྒྱུས་ལོན་གཏིང་ཟབ་བྱས་ནས། ས་གནས་གཉིས་ཀྱི་རིག་གནས་ཡུལ་སྐོར་ཐོན་ལས་ཀྱི་མཉམ་ལས་འཕེལ་རྒྱས་ལ་གསོན་ཤུགས་གསར་པ་བསྣན།