བྱང་ཆུབ་དབང་མོ་དང་བྱང་ཆུབ་ཆོས་སྒྲོན་རྣམ་གཉིས་ལ་རྟེན་འབྲེལ་ཞུ།

བྱང་ཆུབ་དབང་མོ་དང་བྱང་ཆུབ་ཆོས་སྒྲོན་རྣམ་གཉིས་ལ་རྟེན་འབྲེལ་ཞུ།

ཟླ་11ཚེས་12ཉིན།ཀྲུང་གོ་རྒྱ་གྲམ་དམར་པོ་ཚོགས་པའི་སྤྱི་ཁྱབ་ཚོགས་པའི་གཞུང་ལས་ཁང་དང་། རྒྱལ་ཁབ་འཕྲོད་བསྟེན་བདེ་ཐང་ཨུ་ཡོན་ལྷན་ཁང་གཞུང་དོན་ཐིང་། རྒྱལ་ཁབ་རླུང་འཕྲིན་བརྙན་འཕྲིན་སྤྱི་ཁྱབ་ཅུས་གཞུང་དོན་ཐིང་བཅས་ཀྱིས་2024ལོ་འཁོར་གྱི“རོགས་སྐྱོབ་པ་ཡག་ཤོས”ཀྱི་མིང་ཐོ་ཁྱབ་བསྒྲགས་བྱས་པ་རེད། སི་ཁྲོན་འཕྲོད་བསྟེན་དྲག་སྐྱེད་ལས་རིགས་སློབ་གླིང་གི་2024ལོའི་སློབ་ཐོན་སློབ་མ་བྱང་ཆུབ་དབང་མོ་དང་བྱང་ཆུབ་ཆོས་སྒྲོན་རྣམ་གཉིས་སྤྱི་ཚོགས་རོགས་སྐྱོབ་ཚོགས་སྤྱིའི་ངོས་ནས་གཟི་བརྗིད་ལྡན་པའི་ངང་མིང་ཐོ་དེའི་ནང་ཚུད་འདུག

བྱང་ཆུབ་ཆོས་སྒྲོན་དང་བྱང་ཆུབ་དབང་མོ་གཉིས་ནི་དཀར་མཛེས་ཁུལ་འབའ་ཐང་རྫོང་ནས་ཡིན་ཞིང་། སི་ཁྲོན་འཕྲོད་བསྟེན་དྲག་སྐྱེད་ལས་རིགས་སློབ་གླིང་ནད་སྐྱོང་སློབ་གླིང་གི་2024ལོའི་སློབ་ཐོན་སློབ་མ་ཡིན། 2023ལོའི་ཟླ་11ཚེས་3ཉིན་གྱི་དགོང་མོར། ཁོང་གཉིས་ཁྲེང་ཏུའུ་གྲོང་ཁྱེར་ཝུའུ་ཧོའུ་ཆུས་ཀའོ་ཧྲེང་ཆའོ་ཉེ་འགྲམ་གྱི་ཅིན་ཝེ་ལྟེ་བའི་ཐང་ཆེན་དུ་སྒོར་གཞས་འཁྲབ་ནས་ཁྱིམ་དུ་ལོག་རྩིས་བྱེད་སྐབས། སྐྱེས་པ་དར་མ་ཞིག་གློ་བུར་དུ་དྲན་པ་འཐོར་ནས་ཐང་ལ་འགྱེལ་བ་མཐོང་། ཁོང་གཉིས་ཀྱིས་གནས་ཚུལ་དེ་མཐོང་རྗེས་ལམ་སེང་པུས་མོ་ས་ལ་བཙུགས་ནས་ཆུ་ཚོད་ཕྱེད་ཀའི་རིང་མི་དེར་གློ་སྙིང་སླར་གསོ་སོགས་ཀྱི་བྱེད་ཐབས་སྤྱད་དེ་མྱུར་སྐྱོབ་བྱས། མྱུར་སྐྱོབ་རླངས་འཁོར་སླེབས་ནས་མི་དེ་སྨན་ཁང་དུ་ཁྲིད་རྗེས་ཁོང་གཉིས་ད་གཟོད་ཁྱིམ་དུ་ལོག་པ་རེད། 

ཁོང་གཉིས་པོས་དུས་རབས་གསར་པའི་ཤེས་དཔལ་གྱི་སྤྱོད་བཟང་དར་སྤེལ་གཏོང་བའི་བྱེད་སྤྱོད་ལ་སྤྱི་ཚོགས་ཐོག་ལན་ཆ་དྲག་པོ་བྱུང་བ་དང་། མི་དམངས་ཉིན་རེའི་ཚགས་པར་ཁང་དང་འོད་སྣང་ཉིན་རེའི་ཚགས་པར་ཁང་། སི་ཁྲོན་ཉིན་རེའི་ཚགས་པར་ཁང་སོགས་ཞིང་ཆེན་གྱི་གཙོ་རྒྱུན་སྨྱན་སྦྱོར་བཅུ་ལྷག་ཙམ་གྱིས་ཆ་འཕྲིན་དེ་སྤེལ་བའི་རྗེས། དྲ་གྲོགས་ཁྲི་སྟོང་མང་པོས་ཁོང་གཉིས་པོའི་དགེ་སྒྲུབ་བྱ་སྤྱོད་ལ་བསྔགས་བརྗོད་བྱས་པ་མ་ཟད། སློབ་གྲྭ་དང་དངོས་སྦྱོང་སྨན་ཁང་གིས་ཀྱང་ཁོང་གཉིས་ལ་ཡོངས་བསྒྲགས་སུ་གཟེངས་བསྟོད་བྱས་ཡོད་ལ།ཁོང་གཉིས་པོར་ད་དུང་ 2023ལོའི་“འབའ་ཐང་མི་བཟང”（གཞན་ཕན་དགེ་སྒྲུབ）གི་གཟི་བརྗིད་མཚན་སྙན་ཐོབ་པ་རེད།