དགའ་ཞེན་ཁྲོད་ཀྱི་མཛེས་སྡུག་རྣམ་པར་བཀྲ་བའི་མི་ཚེ།--དཔའ་མཁར་ཚེ་བརྟན་གྱི་ཐང་གའི་སྒྱུ་རྩལ་ལམ་བུ།

ཐང་ག་བཞེངས་པའི་ལས་ལ་གཞོལ་བའི་དཔའ་མཁར་ཚེ་བརྟན།

དཔའ་མཁར་ཚེ་བརྟན་གྱིས་གྲོགས་པོ་ཆུང་ཆུང་ལ་ཐང་གའི་སྒྱུ་རྩལ་ངོ་སྤྲོད་བྱེད་བཞིན་པ།

མི་སོ་སོ་བའི་འཇིག་རྟེན་ལ་གྲངས་ལས་འདས་པའི་རེ་བ་ཡོད་ལ།　ཁྱབ་ཁོངས་མི་འདྲ་བ་དང་རྣམ་པ་མི་འདྲ་བའི་འོག་ཏུ་འཚོ་བ་རོལ་བཞིན་ཡོད་མོད།　འོན་ཀྱང་ཁོང་གི་འཇིག་རྟེན་འདིར་ཐང་ག་ནི་འཚོ་བའི་ཁྲོད་ཀྱི་གྲུབ་ཆ་གལ་ཆེན་ཞིག་ཏུ་གྱུར་ཡོད།　ཁོ་བོ་གཅིག་པུས་ཁུ་སིམ་མེར་རི་མོ་ཁང་སྲུང་ཞིང་།　རི་མོའི་རས་ཀྱི་སྟོང་ཆ་དེ་རིམ་གྱིས་གཟུགས་ཀྱི་རྣམ་པ་ཡོད་པར་གྱུར་རྗེས།　དེར་ཚོན་བྱུགས་ཏེ་མདངས་མངོན་པ་དང་།　ཚོན་རྫས་སྣ་གཅིག་གི་སྡེབ་སྦྱོར་མི་འདྲ་བ་ལས་བློ་ཡུལ་ལས་འདས་པའི་སྤྲོ་སྣང་ཞིག་སྦྱིན་འོང་།

ངས་བྲིས་པ་དེ་དག་ནི་ཐང་ག་ཁོ་ན་མ་ཡིན་པར་དཔའ་མཁར་ཚེ་བརྟན་གྱི་མི་ཚེའི་མཚོན་ཚུལ་ཞིག་ཀྱང་ཡིན།

“ལོ་རབས་དགུ་བཅུ་པའི་ནང་སྐྱེས་མཁན”ཐང་གའི་སྒྱུ་རྩལ་གྱི་འཇིག་རྟེན་ནང་ཞུགས་པ།

དཔའ་མཁར་ཚེ་བརྟན།　1991ལོར་མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་གུང་ཧོ་རྫོང་དུ་སྐྱེས་ཤིང་།　ཁོང་གིས་དམའ་རིམ་སློབ་འབྲིང་ནི་གུང་ཧོ་རྫོང་མི་རིགས་སློབ་འབྲིང་ནས་སློབ་སྦྱོང་བྱས་པ་དང་།　མཐོ་རིམ་སློབ་འབྲིང་ནི་མཚོ་ལྷོ་ཁུལ་མི་རིགས་མཐོ་རིམ་སློབ་འབྲིང་དང་པོར་སློབ་སྦྱོང་བྱས་ཡོད།　སློབ་གྲྭར་འགྲོ་བའི་སྐབས་སུ་ཁོང་ཉིད་རི་མོའི་སྒྱུ་རྩལ་ལ་སྤྲོ་བ་ཆེན་པོ་སྐྱེས་པ་དང་།　རི་མོའི་སྨྱུག་གུ་དང་ཚོན་རྫས་ནི་ཁོང་ལ་མཚོན་ན་འཇིག་རྟེན་གཞན་ཞིག་ལ་སླེབས་པའི་ལྡེ་མིག་དང་འདྲ་བས།　ཁོང་ལ་ནང་སེམས་ཀྱི་བསམ་ཚུལ་དང་བརྩེ་དུང་རང་དབང་གིས་མཚོན་དུ་འཇུག་པ་རེད།

ཐང་ག་ནི་བོད་རིགས་ཀྱི་རིག་གནས་ཁྲོད་དམིགས་བསལ་ཁྱད་ཆོས་ལྡན་པའི་རི་མོའི་སྒྱུ་རྩལ་གྱི་རྣམ་པ་ཅིག་ཡིན་ལ།　དེ་རིགས་ལ་མངོན་གསལ་དོད་པའི་མི་རིགས་ཀྱི་ཁྱད་ཆོས་དང་།　ཆོས་ལུགས་ཀྱི་རྣམ་པ།　དམིགས་བསལ་ཁྱད་ཆོས་ལྡན་པའི་སྒྱུ་རྩལ་གྱི་ཉམས་འགྱུར་བཅས་ལྡན་པས་བོད་རིགས་ཀྱི“ཤེས་བྱ་ཀུན་ཁྱབ”ཅེས་བརྗོད་བཞིན་ཡོད་ལ། ཀྲུང་ཧྭ་མི་རིགས་ཀྱི་དམངས་ཁྲོད་སྒྱུ་རྩལ་ཁྲོད་ཧ་ཅང་རྩ་ཆེ་བའི་གཟུགས་འདས་ཤུལ་བཞག་རིག་གནས་ཤིག་ཀྱང་རེད།　ཐང་གའི་ཚོན་གཞི་ནི་གསེར་དང་དངུལ།　མུ་ཏིག　མཆོང་། བྱུ་རུ།　སྤང་མ།　རྒྱ་མཚལ་སོགས་རྩ་ཆེའི་གཏེར་དངོས་ནོར་བུའི་རིགས་དང་།　ཁ་ཆེ་གུར་གུམ།　ལྕུམ་རྩ།　མཐིང་སོགས་རྩི་ཤིང་གི་ཚོན་རྫས་དག་ཡིན་པ་རེད།

2011ལོར་གོ་སྐབས་ཤིག་ལ་དཔའ་མཁར་ཚེ་བརྟན་ནི་གོ་རིམ་ལྡན་པའི་སྒོ་ནས་ཐང་ག་བཞེངས་པའི་ལས་ལ་གཞོལ་ཞིང་། 　དེའི་ཁྱད་ཆོས་ལྡན་པའི་ཚོན་མདངས་དང་ཕྲ་ཞིང་ཞིབ་པའི་ཐིག་རིས།　གཏིང་ཟབ་པའི་ནང་དོན་བཅས་ནི་ཁོའི་ནང་སེམས་སུ་བྱིན་རླབས་འཕྲོས་པ་དང་འདྲ་བར་ཡིད་འགུལ་ཐེབས་སུ་བཅུག　ཁྱིམ་མིས་ཁོ་བོའི་ཐང་གའི་ཐད་འཛིན་པའི་འདུན་པ་ཤེས་རྟོགས་བྱུང་བས་བསམ་བློ་ཡང་ཡང་བཏང་ནས་ཁོ་རང་ཉིད་ཀྱི་ཕུགས་འདུན་ལེགས་འགྲུབ་ཡོང་བར་རོགས་རམ་བྱེད་རྒྱུའི་སེམས་ཐག་བཅད།　དེ་ལྟར་དཔའ་མཁར་ཚེ་བརྟན་གྱིས་སྔ་རྗེས་སུ་རེབ་གོང་རྐ་གསར་སྡེ་བའི་དམངས་ཁྲོད་བཟོ་རྩལ་མཛེས་རྩལ་ཆེ་མོ་བ་འབྲུག་རྩེ་རྒྱལ་དང་།　རེབ་གོང་སེང་གེ་གཤོང་སྨད་པ་སྡེ་བའི་སངས་རྒྱས་འབུམ་སོགས་དགེ་རྒན་གྱི་རྗེས་སུ་འབྲངས་ནས་སྲོལ་རྒྱུན་གྱི་ཐང་གའི་རི་མོ་དང་དེ་བཞིན་ཤེས་བྱའི་རིགས་པའི་གཞུང་ལུགས་ཁྱོན་ཡོངས་ནས་སློབ་སྦྱོང་བྱེད་མགོ་ཚུགས།

དཔའ་མཁར་ཚེ་བརྟན་གྱིས་དགེ་རྒན་གཉིས་ཀྱི་རྗེས་འབྲངས་ནས་ལོ་དྲུག་ལ་སློབ་སྦྱོང་བྱས་ཤིང་།　ལོ་དྲུག་རིང་ཁོང་གིས་དགེ་རྒན་དང་མཉམ་དུ་རིགས་པའི་གཞུང་ལུགས་ཀྱི་ཤེས་བྱ་དང་རི་མོའི་འབྲི་རྩལ་སློབ་སྦྱོང་ནན་ཏན་བྱས་པ་མ་ཟད།　འབྲེལ་ཡོད་ཀྱི་ལོ་རྒྱུས་དཔྱད་གཞི་དང་དཔེ་དེབ་ལྟ་ཀློག་བྱས་ནས་ཐང་གའི་སྐོར་གྱི་ཤེས་བྱ་རྒྱུན་ཆད་མེད་པར་ཁོང་དུ་ཆུད་པར་བྱས་ཡོད།　རྗེས་སུ་ཁོང་གིས་ཐང་གའི་བརྩམས་ཆོས་གསར་རྩོམ་བྱེད་མགོ་ཚུགས་ཏེ།　སྐབས་རེར་བརྩམས་ཆོས་ཤིག་ཇི་ལྟར་མཚོན་པར་བསམ་བློ་གཏོང་སྐབས་ཉིན་མཚན་མེད་པར་བསམ་གཞིགས་བྱས་པ་དང་ཟ་འཐུང་མེད་པར་རི་མོ་འབྲི་སྦྱོང་བྱས་ནས་རང་ཉིད་ཀྱི་འཇོན་ཐང་ཆེ་རུ་གཏོང་བཞིན་ཡོད།　རི་མོ་འབྲི་བའི་སྐབས་སུ་ཁོང་གིས“བདག་གིས་ནམ་ཡང་ཡོད་ཚད་བརྗེད་སོང་བ་དང་།　འཇིག་རྟེན་གྱི་དངོས་པོ་གཞན་པ་ང་དང་འབྲེལ་བ་ཅི་ཡང་མེད་པར་འདོད།　བདག་གིས་མཚམས་མི་ཆད་པར་རང་ཉིད་ཀྱི་བརྩམས་ཆོས་ལ་དགག་བརྒྱག་བྱས་ནས་རང་ཉིད་ཡང་ཡང་སྡུག་ལ་གཏོད།　ཐེངས་གཅིག་ལ་བྲིས་མ་ལེགས་ན་ཐེངས་མ་བཅུ་རེར་བྲིས་པ་བརྒྱུད།　དུས་ཡུན་རིང་བོར་སོང་རྗེས་རང་ཉིན་ཀྱི་བྲིས་རྩལ་ཇེ་ལེགས་སུ་ཕྱིན་པ་དང་དགེ་རྒན་རྣམ་པའི་ཆུ་ཚད་ལ་སླེབས་ཡོད”ཟེར།

སྒྱུ་རྩལ་གྱི་ལམ་བུ་ནི་རྒྱུན་ཆད་མེད་པར་མཐོ་རུ་གཏོང་བའི་བརྒྱུད་རིམ་ཞིག་ཡིན།

ཐང་ག་འབྲི་སྦྱོང་གི་ལས་ལ་ཞུགས་རྗེས་དཔའ་མཁར་ཚེ་བརྟན་གྱིས་ཚོགས་པའི་རང་བཞིན་གྱི་ལོ་རྒྱུས་ཐང་ག་འབྲི་བའི་བྱེད་སྒོའི་ཁྲོད་ནས་ཐང་གའི་སྒྱུ་རྩལ་པ་ཁག་གཅིག་ངོ་ཤེས་པ་དང་།　ཚང་མ་དང་མཉམ་དུ་རི་མོ་འབྲི་བའི་དུས་ཚོད་ནང་ལག་རྩལ་རྩེར་སོན་པའི་ཐང་གའི་སྒྱུ་རྩལ་པ་མང་པོ་ཞིག་དང་འཕྲད།　ཁོ་བོས་རྩེར་སོན་གྱི་ལག་རྩལ་མི་ཉུང་བ་ཞིག་ཤེས་ནས་ཁོང་ཚོའི་ལུས་ཐོག་ནས་སྒྱུ་རྩལ་ལ་བཅངས་པའི་གུས་སེམས་དང་སྲོལ་རྒྱུན་ལ་བཅངས་པའི་སྙིང་སྟོབས་དེ་བས་ཚོར་ཐུབ་པ་བྱུང་ཡོད།
ཐང་ག་ནི་བོད་རིགས་ཀྱི་སྲོལ་རྒྱུན་རི་མོའི་སྒྱུ་རྩལ་གྱི་མཆོག་ནོར་ཞིག་ཡིན་པ་དང་།　རྒྱུན་དུ་ཆོས་ལུགས་དང་ཆོས་ལུགས་ཀྱི་གཏམ་རྒྱུད་སོགས་འབྲི་གི་ཡོད་ལ་སྤྱི་ཚོགས་ཀྱི་འཚོ་བ་མཚོན་པའི་བརྩམས་ཆོས་ཁག་གཅིག་ཀྱང་ཡོད།　ཐང་གའི་སྒྱུ་རྩལ་ལ་གོ་བ་གཏིང་ཟབ་ལེན་ཆེད།　2015ལོ་ནས2016ལོ་བར།　དཔའ་མཁར་ཚེ་བརྟན་གྱིས་མཚོ་ལྷོ་བོད་རིགས་རང་སྐྱོང་ཁུལ་གུང་ཧོ་རྫོང་གི་དགོན་སྡེ་ཁག་གཅིག་ཏུ་ཐང་གའི་སློབ་ཁྲིད་ཀྱི་འགན་ཁུར་ནས་ཚང་མར་རི་མོའི་གཞི་རྩའི་རྩལ་ནུས་དང་ཐང་གའི་ལག་རྩལ་བསླབས་ཤིང་། སློབ་ཁྲིད་བྱེད་རིང་ཁོང་རང་ཉིད་ཀྱིས་ཀྱང་བསམ་བློ་ཟམ་མི་ཆད་པར་གཏོང་གི་ཡོད་པས་ཁོ་བོའི་བརྩམས་ཆོས་སླར་ཡང་ཇེ་ལེགས་སུ་ཕྱིན་ཡོད།

2016ལོ་ནས2020ལོའི་བར་ལོ་མང་འབད་བརྩོན་དང་རྒྱུན་འཁྱོངས་བྱས་པ་བརྒྱུད།　དཔའ་མཁར་ཚེ་བརྟན་གྱི་རི་མོ་འབྲི་རྩལ་ལ་ཚང་མའི་ཁས་ལེན་ཐོབ་ནས་ཁོང་གི་རི་མོ་འབྲི་བའི་ཕུགས་འདུན་མངོན་འགྱུར་བྱུང་ཡོད་ཅེས་བརྗོད་ཆོག་མོད།　འོན་ཀྱང་ཁོང་གི་སློབ་གཉེར་གྱི་ཕུགས་འདུན་སེམས་སུ་བརྟན་པོར་གནས་ཡོད་ཕྱིར།　སློབ་ཁྲིད་ས་ཚིགས་སུ་རི་མོ་འབྲི་བ་དང་སློབ་ཁྲིད་བྱེད་པའི་ཞོར་དུ།　ཁོས་སྤོབས་པ་ཆེན་པོས་སློབ་གྲྭ་ཆེན་མོར་སོང་ནས་རི་མོའི་སྒྱུ་རྩལ་ལ་སློབ་སྦྱོང་བྱེད་པའི་སེམས་ཐག་བཅད།　བསམ་གཞིག་བྱས་པ་བརྒྱུད　།དཔའ་མཁར་ཚེ་བརྟན་མཚོ་སྔོན་མི་རིགས་སློབ་ཆེན་སྒྱུ་རྩལ་འཆར་འགོད་ཀྱི་ཆེད་ལས་ཐང་གའི་ཚན་ཁག་ཏུ་ཞུགས་ཤིང་།　སློབ་ཆེན་དུ་ཁོང་གིས་གོ་རིམ་ལྡན་པ་དང་གཏིང་ཟབ་པའི་སྒོ་ནས་སྒྱུ་རྩལ་དང་ཐང་གའི་མ་ལག་གཉིས་སྦྱངས་པ་དང་དེ་བས་གཏིང་ཟབ་པའི་སྒོ་ནས་སྒྱུ་རྩལ་ཕོ་བྲང་ལ་གཟིགས་ནས་སྒྱུ་རྩལ་ཐད་ཀྱི་ཤེས་རྟོགས་དང་ངོས་འཛིན་སྔར་བས་གཏིང་ཟབ་ཏུ་ཕྱིན་པ་མ་ཟད།　ཐང་གའི་སྒྱུ་རྩལ་མཚོན་ཐབས་ཐད་ལའང་ཁྱོན་ཡོངས་དང་གཏིང་ཟབ་པའི་བསམ་གཞིག་བྱས་ཡོད།　སློབ་སྦྱོང་དང་བསམ་གཞིག་རྒྱུན་ཆད་མེད་པར་བྱས་པ་བརྒྱུད་ཁོང་གིས་འབྲི་རྩལ་ཐད་ཀྱི་དཀའ་ངལ་ལས་སྒྲོལ་ཚེ་གཞི་ནས་ཐང་གའི་འཇིག་རྟེན་དུ་རང་ཉིད་ཀྱི་བསམ་ཚུལ་མཚོན་པར་བྱེད་ཐུབ་པ་ཤེས་རྟོགས་བྱུང་།
ཐང་གའི་སྒྱུ་རྩལ་མེ་ཏོག ཡུན་རིང་བཞད་པའི་སྨོན་ལམ།

ལོ་རབས་དགུ་བཅུ་པའི་ནང་སྐྱེས་པའི་དཔའ་མཁར་ཚེ་བརྟན་གྱིས་ཐང་ག་ནི་ཕུལ་བྱུང་གི་སྲོལ་རྒྱུན་རིག་གནས་སྒྱུ་རྩལ་གྱི་ཆ་ཤས་ཤིག་ཡིན་པ་གསལ་པོ་ཤེས་ཀྱི་ཡོད་ལ་རྒྱུན་འཛིན་བྱེད་དཀའ་བའི་གནད་དོན་ཡང་འཕྲད་མྱོང་ཡོད།　མི་མང་པོ་ཞིག་ལ་ངང་རྒྱུད་རིང་པོ་མེད་པ་དང་གྲུབ་འབྲས་མཐོང་རྒྱུ་མེད་པར་དུས་ཚོད་ཐུང་ངུའི་ནང་དཔལ་འབྱོར་གྱི་ཡོང་འབབ་རག་ཐུབ་པའི་ལས་རིགས་དག་འཚོལ་གྱི་ཡོད།　རྣམ་པ་དེ་རིགས་ལ་འགྱུར་ལྡོག་བཏང་ནས་གཟུགས་འདས་ཤུལ་བཞག་རིག་གནས་རིགས་སྔར་བས་སྲུང་སྐྱོབ་ཡག་པོ་བྱས་ནས་དར་སྤེལ་ཡག་པོ་གཏོང་ཆེད།　2021ལོར་དཔའ་མཁར་ཚེ་བརྟན་གྱིས་མཚོ་སྔོན་བྱིན་རླབས་རིག་གནས་ཐོན་ལས་ཚད་ཡོད་ཀུང་སི་བཙུགས་ནས་ཐང་ག་སྦྱོང་མཁན་ལ་ལས་ཞུགས་ཀྱི་གོ་སྐབས་སྤྲད་པ་དང་འབྲེལ་དགེ་ཕྲུག་སྒྲིག་འཛུགས་བྱས་ནས་ཐང་ག་ཆེ་གྲས་འབྲི་བའི་ནང་ཞུགས་པ་རེད།

ད་ཆ་དཔའ་མཁར་ཚེ་བརྟན་གྱི་ཐང་གའི་སྒྱུ་རྩལ་གྱི་ལམ་བུ་རིང་དུ་སྲིང་བཞིན་ཡོད།　འགྲོ་ལམ་དེའི་ཐོག་ཁོང་གིས་རྒྱུན་འཛིན་དང་གསར་གཏོད་ཀྱི་གལ་ཆེའི་རང་བཞིན་ལ་སྔར་བས་དོ་ཁུར་གནངབཞིན་ཡོད་ལ།　ཐང་ག་འབྲི་བའི་བརྒྱུད་རིམ་ནང་ཁོང་གིས་སྲོལ་རྒྱུན་གྱི་འབྲི་རྩལ་གྱི་རྨང་གཞིའི་ཐོག་འབྲི་རྩལ་གསར་གཏོད་བྱས་ནས་བརྩམས་ཆོས་འཚོ་བ་དང་ཉེ་བར་བཅར་ཡོད།　ལོ་འདི་དག་ནང་དཔའ་མཁར་ཚེ་བརྟན་གྱིས་ཚོགས་པ་མི་ཉུང་བ་ཞིག་གི་བརྩམས་ཆོས་འབྲི་བའི་ནང་ཞུགས་ནས་ལོ་རྒྱུས་ཀྱི་ཚོན་རིས་རི་མོ་ཆེ་བའི་བམ་པོ་རིང་པོ་བརྒྱད་ཅུ་ལྷག་ཙམ་གསར་རྩོམ་བྱས་ཡོད་པ་དང་དགེ་ཕྲུག་ཀྱང་ཇེ་མང་དུ་ཕྱིན་ཡོད།　སློབ་ཁྲིད་ཀྱི་སྐབས་སུ།　ཁོས་ཧུར་ཐག་གིས་སློབ་མ་རྣམས་ལ་བསམ་གཞིགས་དང་འཚོལ་ཞིབ་བྱེད་པར་སྐུལ་མ་བཏང་སྟེ་རང་རྐྱ་འཕེར་བའི་གསར་གཏོད་ནུས་པ་གསོ་སྐྱོང་བྱས་ཡོད།

དཔའ་མཁར་ཚེ་བརྟན་གྱིས“ཐང་གའི་ཆེས་གལ་ཆེ་ཤོས་ནི་རྒྱུན་འཛིན་བྱ་རྒྱུ་དེ་ཡིན་མོད།　འོན་ཀྱང་བརྗོད་བྱ་གཙོ་བོ་དང་མཚོན་སྟངས་ཐད་གསར་གཏོད་བྱེད་དགོས་པ་དེ་ནི་ངའི་སྔར་ནས་ད་བར་གྱི་འདོད་ཚུལ་ཞིག་ཀྱང་ཡིན།　ངས་ཀྱང་ངའི་དགེ་ཕྲུག་ཚོར་དེ་གཉིས་མཉམ་འདྲེས་ཡག་པོ་བྱས་ནས་ཕུལ་བྱུང་གི་བརྩམས་ཆོས་རྒྱུན་ཆད་མེད་པར་གསར་རྩོམ་བྱེད་དགོས་པའི་སྐུལ་ལྕག་བྱེད་བཞིན་ཡོད”ཅེས་བཤད།
གཟི་བརྗིད་གཅིག་རྗེས་གཉིས་མཐུད་དུ་ཐོན།　2019ལོའི་ལོ་མཇུག་ཏུ་དཔའ་མཁར་ཚེ་བརྟན་གྱི་བརྩམས་ཆོས“ཙན་དན་གྱི་ལག་བྲིས་ཐང་ག”ལ་རྒྱལ་ཁབ་ཤེས་བྱའི་ཐོན་དབང་ཅུའུ་ཡིས་ཕྱི་ཚུལ་ཇུས་འགོད་ཀྱི་ཁེ་བེད་བདག་ཐོབ་ལག་ཁྱེར་སྤྲད་པ་དང་།　2021ལོར་ཁོང་རང་ཉིད་ལ་མཚོ་སྔོན་ཞིང་ཆེན་གྱི་རིམ་པ་གཉིས་པའི་དམངས་ཁྲོད་བཟོ་རྩལ་པའི་གཟི་བརྗིད་མཚན་སྙན་ཐོབ་པ་མ་ཟད།　མཚོ་ལྷོ་ཁུལ་གྱི་ཁུལ་རིམ་པའི་གཟུགས་འདས་ཤུལ་བཞག་ཤུལ་བཞག་སྲུང་སྐྱོང་རྣམ་གྲངས་ཀྱི་ཐང་གའི་མཚོན་བྱེད་རང་བཞིན་གྱི་རྒྱུན་འཛིན་པར་ཡང་གྱུར།

ད་ཆ་དཔའ་མཁར་ཚེ་བརྟན་ལ་རི་མོའི་ཁྱབ་ཁོངས་ཐད་གྲུབ་འབྲས་ངེས་ཅན་ཐོབ་པ་མ་ཟད།　ད་དུང་ཐང་གའི་སྒྱུ་རྩལ་རྒྱུན་འཛིན་དང་དར་སྤེལ་གཏོང་བའི་འགན་འཁྲི་ཡང་ཕྲག་ཐོག་ཏུ་འཁུར་ཡོད།　ཁོང་གིས“ངས་རང་ཉིད་ཀྱི་འབད་བརྩོན་ལ་བརྟེན་ནས་མི་དེ་བས་མང་བས་ཐང་གའི་སྒྱུ་རྩལ་ལ་ཤེས་རྟོགས་དང་དགའ་བ་དང་། གནའ་བོའི་སྒྱུ་རྩལ་གྱི་རྣམ་པ་དེར་དུས་རབས་གསར་པར་གསོན་ཤུགས་གསར་པ་འཕེལ་བར་རེ་བ་བྱེད་བཞིན་ཡོད།　འབྱུང་འགྱུར་གྱི་ལམ་བུ་ད་དུང་ཧ་ཅང་རིང་པོ་ཡོད་མོད།　འོན་ཀྱང་རང་ཉིད་ཀྱིས་སྒྱུ་རྩལ་ལ་བཅངས་པའི་དགའ་ཞེན་དང་ཕུགས་འདུན་རྒྱུན་འཁྱོངས་བྱས་ཚེ་ཐང་གའི་སྒྱུ་རྩལ་ལམ་བུའི་ཐོག་དེ་བས་རྒྱང་རིང་དུ་བསྐྱོད་ཐུབ་ངེས་ཡིན་པ་ང་ལ་ཡིད་ཆེས་ཡོད”ཅེས་བཤད།།