བོད་ལུག་གསོ་སྤེལ་ལ་གྲུབ་འབྲས་མངོན། ལུ་གུ་ཕྱིར་འཚོང་བྱས་ཏེ་ཁེ་ཕོག་ལོན་པའི་གཏམ་བཟང་བསྒྲགས།
ཞོགས་པར། ལུ་གུ་སྐྱེལ་བའི་ཟོང་འདྲེན་རླངས་འཁོར་ཆུང་ཆུང་མང་པོ་དལ་གྱིས་མཚོ་སྔོན་ཞིང་ཆེན་མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་མཚོ་འཁྱིལ་ཡུལ་ཚོ་ཉིན་ཞ་སྡེ་བའི་སྐྱེ་ཁམས་ཕྱུགས་ལས་མཉམ་ལས་ཁང་གི་ཕྱོགས་སུ་བསྐྱོད་ཅིང་། ཡུལ་ཚོའི་ཕྱུགས་སྨན་ཁང་གི་ལས་སྒྲུབ་མི་སྣ་དང་སྡེ་བའི“ཨུ་ལྷན་གཉིས”ཀྱིས་སྔ་མོ་ནས་མཉམ་ལས་ཁང་གི་སྒོ་ཁར་སྒུག་ནས་བསྡད་ཡོད། འབྲོག་པ་མང་ཚོགས་ཀྱི་གདོང་ལ་དགའ་སྤྲོའི་འཛུམ་གྱིས་ཁེངས། དེ་རིང་ནི་ཉིན་ཞ་སྡེ་བའི་གཅིག་བསྡུས་སྒོས་ལུ་གུ་ཕྱིར་འཚོང་བྱེད་པའི་ཉིན་མོ་རེད།
“ཉེ་བའི་ལོ་འགའི་རིང་། ཉིན་ཞ་སྡེ་བས་ཧུར་ཐག་གིས་བོད་ལུག་གི་ཕན་འབྲས་མཐོ་བའི་གསོ་སྤེལ་ལག་རྩལ་འཚོལ་ཞིབ་བྱས་ཤིང་།‘གཅིག་གྱུར་བརྒྱད’དེ། གཅིག་གྱུར་གྱིས་ཨ་བྲ་གསོད་པ་དང་། གཅིག་གྱུར་གྱིས་ཕྱུགས་རིགས་གཏན་འཁེལ་བྱེད་པ། གཅིག་གྱུར་གྱིས་ཕྱུགས་ཁྱུ་དགར་བ། གཅིག་གྱུར་གྱིས་རྒྱུད་སྤེལ་བ། གཅིག་གྱུར་གྱིས་གཟན་ཆས་ཉོ་བ། གཅིག་གྱུར་གྱིས་ལུ་གུ་བཙའ་བ། གཅིག་གྱུར་གྱིས་འོ་མ་གཅོད་པ། གཅིག་གྱུར་གྱིས་ལུ་གུ་ཕྱིར་འཚོང་བྱེད་པ་བཅས་དམ་དུ་བཟུང་ནས། གསོ་སྤེལ་ལས་ཕྱོད་དང་ལུ་གུའི་སྤུས་ཚད་གཉིས་མཐོར་འདེགས་མངོན་འགྱུར་བྱུང་ཡོད། ཐེངས་འདིར་གཅིག་བསྡུས་ཀྱིས་ལུ་གུ་ཕྱིར་འཚོང་བྱེད་བཞིན་པ་ནི་ཉིན་ཞ་སྡེ་བའི་བོད་ལུག་གི་ལྟེ་བའི་ལུག་ཁྱུ་ལས་ཐོན་སྐྱེད་བྱས་པའི་ལུ་གུ་རེད”ཅེས་ཉིན་ཞ་སྡེ་བའི་སྡེ་དམངས་ཨུ་ལྷན་གྱི་ཀྲུའུ་རེན་ཀུན་བྱམས་ཚེ་རིང་གིས་བཤད།
མཚོ་འཁྱིལ་ཡུལ་ཚོས་རྫོང་ཨུའི་ཞིང་ཕྱུགས་ལས་ལྔ་ཅན་བཅོས་བསྒྱུར་གྱི་བླང་བྱ་གཞིར་བཟུང་སྟེ། སྲིད་གཞུང་གིས་སྟེགས་བུ་བཙུགས་པ་དང་ཉིན་ཞ་སྡེ་བས་དཔེ་སྟོན་སྣེ་ཁྲིད་བྱས་པ་བརྒྱུད་ནས་སྡེ་བ་སོ་སོས་ཧུར་ཐག་གིས་སློབ་སྦྱོང་བྱས་ཏེ་བོད་ལུག་གི་ཕན་འབྲས་མཐོ་བའི་གསོ་སྤེལ་ལག་རྩལ་ཁྱབ་གདལ་ཤུགས་ཆེན་བཏང་ལ། འབྲོག་པ་མང་ཚོགས་ཀྱིས་ནོར་ལུག་ཕྱིར་འཚོང་དཀའ་བའི་དུས་ཚིགས་དམ་དུ་འཛིན་པར་གྲོས་འདོན་བྱས་ཏེ། ཁྲོམ་རའི་དགོས་མཁོ་དང་རིན་གོང་མཐོ་བའི་གོ་སྐབས་དང་བསྟུན་ནས་མྱུར་དུ་ཕྱིར་འཚོང་བྱེད་པ་དང་། ནོར་ལུག་དུས་བཞི་ཁྱད་མེད་དུ་ཕྱིར་འཚོང་ཐུབ་པ་མངོན་འགྱུར་བྱུང་ཡོད། དེ་དང་ཆབས་ཅིག བྱེད་ཐབས་དེས་རྩྭ་ཐང་སྐྱེ་ཁམས་ཁོར་ཡུག་སྲུང་སྐྱོབ་ནུས་ལྡན་བྱས་པ་དང་བོད་ལུག་སྤུས་རྟགས་ཀྱི་ཕན་འབྲས་ཆེ་རུ་ཕྱིན་པར་མ་ཟད། མང་ཚོགས་ཀྱི་དཔལ་འབྱོར་ཡོང་འབབ་དང་སྐྱེ་ཁམས་ཕན་འབྲས་ཅུང་ལེགས་པོ་མངོན་ཡོད།
“འདི་སྤྱི་རྒྱ17ཡིན་པས་ཚད་ལྡན་རེད། ཁྱོད་ཀྱིས་རྣ་རྟགས་བརྒྱབ་སྟེ་ཐོ་འགོད་བྱས་ནས་རླངས་འཁོར་ནང་འཇུག་རོགས། རྗེས་མ་ཚད་དུ་ཤོག་ཡ”ཞེས་མཚོ་སྔོན་སློབ་ཆེན་ཕྱུགས་སྨན་ཆེད་ལས་ཀྱི་སློབ་གྲོགས་ཚོས་དགེ་རྒན་གྱི་སྣེ་ཁྲིད་འོག་གོ་རིམ་ལྡན་པའི་སྒོ་ནས་ལུ་གུའི་བདེ་ཐང་དང་ལུས་པོའི་ལྗིད་ཚད་ལ་ཞིབ་བཤེར་བྱེད་པར་རོགས་རམ་བྱེད་ཀྱིན་འདུག ལུ་གུ་རེ་རེ་གོ་རིམ་ལྡན་པའི་སྒོ་ནས་ཞིབ་བཤེར་བྱས་པ་དང་བསྟུན་ནས། ཕྱིར་འཚོང་ནང་ཞུགས་པའི་འབྲོག་པ་ཚོའི་གདོང་ལ་ཡང་རིམ་བཞིན་བློ་ཡིད་ཚིམ་པའི་འཛུམ་མདངས་མངོན་ཡོད།
“དེ་རིང་ཉིན་ཞ་སྡེ་བའི་སྐྱེ་ཁམས་ཕྱུགས་ལས་མཉམ་ལས་ཁང་གིས་ཆ་སྙོམས་རིན་གོང་སྒོར600ལྟར་ཕྱིར་བཙོང་བྱས་པ་དང་། གཅིག་སྡུད་སྒོས་སྤྱི་རྒྱ14ནས19བར་གྱི་སྤུས་ལེགས་ལུ་གུ500ལྷག་ཙམ་ཕྱིར་བཙོང་བྱས་ཟིན་ལ། ལུ་གུ་གསོ་སྤེལ་བྱེད་མཁན་གྱི་དུད་ཁྱིམ10ལ་ཁེ་ཕན་སྒོར་ཁྲི30ཐོབ་ཡོད། ཉིན་འདི་དག་གི་རིང་སྡེ་བ་ཡོངས་ནས་ལུ་གུ5000ལྷག་ཙམ་ཕྱིར་བཙོང་བྱས་པ་དང་ན་ནིང་ལས900ལྷག་ཙམ་གྱིས་མང་བ་ཕྱིར་འཚོང་བྱས་ཡོད”ཅེས་ཉིན་ཞ་སྡེ་བའི་ཏང་ཀྲི་པུའི་ཧྲུའུ་ཅི་གཞོན་པ་ཚེ་བྷོས་ངོ་སྤྲོད་བྱས།
ཐེངས་འདིའི་ལུ་གུའི་གཟུགས་སྟོབས་ཆེ་བར་མ་ཟད། ཉོ་མཁན་ཁེ་པའང་དགའ་བཞིན་ཡོད། “ཉིན་འདི་འགར་ངས་སྡོམ་པའི་ལུ་གུ320ཕྱིར་བཙོང་བྱས་ཟིན་ལ། ད་ལོའི་ལུ་གུའི་རིན་གོང་ན་ནིང་ལས་ཧ་ཅང་མཐོ། ད་ལོར་ངའི་ཡོང་འབབ་སྔོན་དཔག་བྱས་ན་སྒོར་ཁྲི17ཟིན་རྒྱུ་རེད”ཅེས་འབྲོག་པ་བསམ་གཏན་གྱིས་དགའ་སྤྲོའི་ངང་བཤད།
ལུ་གུ་སྐྱེལ་བའི་ཟོང་འདྲེན་རླངས་འཁོར་མཐའ་མ་བདེ་བླག་ངང་ལྗིད་ཚད་འཇལ་རྗེས་བུད་སོང་ལ། མཉམ་ལས་ཁང་གི་སྒོ་ཁར་དགའ་སྤྲོའི་དགོད་སྒྲས་ཁེངས་འདུག ད་ལོར་ཉིན་ཞ་སྡེ་བའི་བོད་ལུག་གི་ཕན་འབྲས་མཐོ་བའི་གསོ་སྤེལ་ལ་གྲུབ་འབྲས་མངོན་གསལ་བྱུང་ཡོད། ཕན་འབྲས་མཐོ་བའི་གསོ་སྤེལ་ལག་རྩལ་གྱི་ཚད་མཐོ་རུ་ཕྱིན་པར་མ་ཟད། ད་དུང་སྤུས་རྟགས་ཀྱང་ཐོན་ཡོད་པས་སྡེ་མི་ཚོ་མ་འོངས་པའི་འཕེལ་རྒྱས་ལ་ཡིད་ཆེས་ཀྱིས་ཁེངས་ཡོད།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注