མཉམ་འབྲེལ་རྒྱལ་ཚོགས་འགྲོ་མིའི་ཐོབ་ཐང་ལས་འཛིན་ལྷན་ཚོགས་ཀྱིས་དབྱི་སི་རལ་གྱིས་ཅཱ་ཧྲ་ས་ཁུལ་གྱི་རིགས་རྒྱུད་ཚར་གཅོད་བྱ་སྤྱོད་སྔོན་འགོག་བྱེད་དགོས་པའི་སྐུལ་མ་བཏང་།

མཉམ་འབྲེལ་རྒྱལ་ཚོགས་འགྲོ་མིའི་ཐོབ་ཐང་ལས་འཛིན་ལྷན་ཚོགས་ཀྱི་གྲོས་ཚོགས་སྐབས་ང་བརྒྱད་པས་ཚེས2ཉིན་གྲོས་ཆོད་བཀོད་དེ། དབྱི་སི་རལ་གྱིས་ཅཱ་ཧྲ་ས་ཁུལ་གྱི་རིགས་རྒྱུད་ཚར་གཅོད་བྱ་སྤྱོད་མཚམས་འཇོག་དགོས་པའི་རེ་བ་བཏོན།

གྲོས་ཆོད་དེར་འདེམ་ཤོག་ཉེར་བདུན་ཡིད་འཐད་བྱུང་བ་དང་། འདེམ་ཤོག་བཞི་ཡིས་ངོ་རྒོལ་བྱེད་པ། འདེམ་ཤོག་བཅུ་དྲུག་གིས་དབང་ཆ་བསྐྱུར་བའི་མཇུག་འབྲས་ཀྱིས་གྲོས་འཆམ་བྱུང་བ་རེད། གྲོས་ཆོད་ལས་དབྱི་སི་རལ་གྱིས་འཁྲུག་རྩོད་མཚམས་འཇོག་པའི་གྲོས་མཐུན་དང་འགལ་བའི་བྱ་སྤྱོད་སྤེལ་བར་རྒོལ་གཏམ་བཏང་ནས། དེས་དམ་བཅའ་ལག་བསྟར་བྱས་ཏེ་ཕྱོགས་ཡོངས་ནས་འཁྲུག་རྩོད་མཚམས་འཇོག་པའི་གྲོས་མཐུན་ལག་བསྟར་བྱེད་པའི་སྐུལ་མ་བཏང་། གྲོས་ཆོད་ལས་དབྱི་སི་རལ་གྱི་དཔོན་རིགས་རེ་འགས་རིགས་རྒྱུད་ཚར་གཅོད་ལ་ངན་སྐུལ་བྱེད་པའི་གཏམ་བཤད་སྤེལ་སེམས་ཁུར་ཆེན་པོ་བྱེད་པའི་ཚུལ་བསྟན་པ་དང་། དབྱི་སི་རལ་གྱིས་རིགས་རྒྱུད་ཚར་གཅོད་ལ་སྔོན་འགོག་བྱེད་པའི་བཅའ་ཁྲིམས་འགན་འཁྲི་ལག་བསྟར་བྱེད་དགོས་པའི་རེ་བ་བཏོན།

གྲོས་ཆོད་ལས་དབྱི་སི་རལ་གྱིས་ཅཱ་ཧྲ་ས་ཁུལ་དུ་མི་ཆོས་རིང་ལུགས་ཀྱི་རོགས་སྐྱོར་དངོས་རྫས་སྐྱེལ་འདྲེན་བྱེད་པར་ཁས་ལེན་མ་བྱས་པ་དང་། བསམ་བཞིན་དུ་རྒུད་སྐྱོབ་དངོས་རྫས་ཀྱི་མཁོ་འདོན་ལ་བར་ཆད་བཟོས་ནས། མི་སེར་དཀྱུས་མའི་གཞི་རྩའི་འཚོ་བའི་མཁོ་དངོས་འཕྲོག་པར་རྒོལ་གཏམ་བཏང་བ་དང་། དབྱི་སི་རལ་གྱིས་མི་ཆོས་རིང་ལུགས་ཀྱི་རྒུད་སྐྱོབ་བཀག་མེད་ཡོང་བར་འགན་སྲུང་བྱེད་དགོས་ལ། ཅཱ་ཧྲ་ས་ཁུལ་གྱི་ཕཱ་ལེ་སི་ཐན་གྱི་མིའི་གཞི་རྩའི་འཚོ་བའི་མཁོ་དངོས་ཀྱི་མཁོ་འདོན་མྱུར་དུ་སླར་གསོ་བྱེད་དགོས་པའི་རེ་བ་བཏོན་པར་མ་ཟད། ཡུལ་འཁྱམ་བྱེད་པའི་ཕཱ་ལེ་སི་ཐན་གྱི་མི་རྣམས་ཕྱིར་ཅཱ་ཧྲའི་ས་ཁུལ་གང་རུང་དུ་ལོག་ཆོག་པར་བྱེད་དགོས་ཟེར།

གྲོས་ཆོད་ལས་ད་རུང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ནས་རྒྱུན་མཐུད་ཀྱི་རྒྱལ་སྤྱིའི་དྲང་བདེན་སྒེར་ཚུགས་རྐྱེན་སྲོལ་ཞིག་བཙུགས་ནས། འཁྲུག་རྩོད་ཁྲོད་རྒྱལ་སྤྱིའི་བཅའ་ཁྲིམས་དང་འགལ་བའི་ནག་ཉེས་ཚབས་ཆེན་གྱི་འགན་ཁུར་བར་རྟོག་ཞིབ་དང་ཞུ་གཏུག་བྱེད་དགོས་པའི་འབོད་སྐུལ་བཏང་།