འཇིག་རྟེན་གྱི་གཏིང་མཐའ་དཔོག་པ། གཡེ་རུས་རྐང་། རྔ་བ།

ཡོང་ཁུངས། མཚོ་སྔོན་བོད་ཡིག་གསར་འགྱུར། རྩོམ་སྒྲིག་པ། ཀླུ་མགོན་རྒྱལ། 2024-07-11 11:41:33 ཀློག་གྲངས།7056

འཇིག་རྟེན་གྱི་གཏིང་མཐའ་དཔོག་པ།

དབུགས་ཀྱི་རྒྱུ་བ་འགག་པའི་སྐད་ཅིག་མའི་དུས་ཡུན།

སེམས་ཀྱིས་ཐེག་པར་དཀའ་བའི་ནམ་མཁའི་ཤུལ་ལམ་རིང་མོ་དེ་རེད།

གློ་བུར་དུས་ཚོད་ཀྱི་ཐག་སྒྲ་འཇགས་པ་དེ།

ཤིན་ཏུ་ཡང་བའི་ཚེ་སྲོག་ཅིག་ལ་རྫོགས་ཚིག་བཀོད་པ་དང་མཚུངས།

དུས་ཚོད་ཉེར་བཞི་ལ་གཟུགས་མེད་ཀྱི་ཚོར་བ་ཞིག་གིས་དེད།

སུན་སྣང་མཐའ་ཡས་པས་གཙེས་ཏེ།

སྐམ་རིད་དུ་གྱུར་པའི་རང་གི་གྲིབ་མའི་སྟེང་དུ་ཡང་ཡང་སྤོས།

སྐབས་རེར་སེམས་ཀྱི་ཟབ་སར་ལོག་ཅིང་།

སྐབས་རེར་བར་ཐག་རིང་དུ་བཞག་སྟེ་མི་ཚེ་མཇུག་རྫོགས་འགྲོ་བའི།

ཆ་མི་སྙོམ་པའི་གཞོན་ནུ་ཕོ་མོ་འགའི་སྣང་བའི་འགལ་འདུ།

མ་གཞི་ནས།

འཇིག་རྟེན་འདིར་གྱེས་བྲལ་ཞེས་པའི་མིང་ཡིག་ཅིག་མེད་ནའང་།

མི་རེ་རེའི་ངོ་གདོང་ལ་སྐྱོ་བ་བཙགས་བྱེད་ཀྱི་མེ་ལོང་རེ་མངོན་འདུག

ལོ་རྒྱུས་ཀྱི་གས་སྲུབས་སུ།

ཡུན་རིང་ལ་ཆགས་པའི་ས་རྡུལ་དག་ཡར་འཁྲིགས་ཀྱིན་འདུག

ཉི་རྡུལ་བྱེ་བས་བཏེགས་པའི་ནམ་མཁའ་སྔོན་པོ་ཤིན་ཏུ་ཡངས་འདུག

དུས་ཚིགས་དག་རིམ་བཞིན་ཡལ་འགྲོ་བ།

རྣམ་ཤེས་ལ་སྐྱོ་གདུང་གི་བསིལ་བ་བྲན་པ་དང་ཤིན་ཏུ་མཚུངས།

རེ་སྒུག ཐུག་འཕྲད མ་འོངས་པ་ཞེས་པ་ཞིག་ཡོད་པས།

ངས་རང་གི་ཁེར་རྐྱང་ལ་བདེན་ཁ་བསྩལ་མ་མྱོང་།

འཆི་བ་ཡོད་པས་ལས་འབྲས་ཀྱི་མེ་ལོང་ཤིན་ཏུ་དག་འདུག

ཡིན་ཡང འཇིག་རྟེན་བདེ་བའི་གནས་ཙམ་དཀོན་པས།

སྐད་ཅིག་ཙམ་གྱི་རིང་ལ།

མི་རྣམས་རང་རང་གི་རྨོངས་པའི་གྲིབ་གཟུགས་ནང་དུ་འགྱེལ་བཞིན་འདུག

ལུས་ངག་གི་སྨྲ་སྒོ་ཅི་རིགས་དབེན་པར་གཏོང་དགོས་བསམ་དུས།

གནས་གང་ཞིག་ནས།

རླུང་འཚུབ་ཅིག་ལྡང་སྟེ།

སེམས་ཁོང་དུ་གནས་པའི་ལྷིང་འཇགས་མེ་རུ་སྦར་སོང་།

ས་རུབ་ཁར ཕྱོགས་ཕྱོགས་ནས་མཆེད་འོང་བའི་མུན་པ་དག

ངའི་ནང་སེམས་དང་འབྲེལ་བ་ངེས་ཅན་ཞིག་མེད་ནའང་།

དོ་ནུབ ངས་རང་གི་ལས་དབང་གི་ཁ་ཕྱོགས་དང་མཚུངས་འདུག་སྙམ།

དོ་ནུབ ངས་མཐོང་སྣང་གི་ཁ་ཕྱོགས་ལ་དབྱེ་འབྱེད་ཤིན་ཏུ་དཀའ་འདུག