ཆུང་མར་ཕུལ་བའི་སྐད་ཆ་འགའ། ལྡོང་ཆུ་ཤེལ།

ཆུང་མར་ཕུལ་བའི་སྐད་ཆ་འགའ།

ལྡོང་ཆུ་ཤེལ།

གློ་བུར་ཁ་པར་ཐང་ལ་བཞག་སྟེ་ཡུལ་ལ་སེམས་ཁྲལ་བྱེད་མགོ་བརྩམས།།
ཆུང་མའི་ཡུལ་ནི་རྟའུའི་ཕྱོགས་ཏེ་མི་ཉག་མགར་ཐར་ཟེར་ས་ལགས།།
ཏཱ་རེ་འདོན་བཞིན་ཕྲེང་བ་བགྲང་ཞིང་མིག་མཐར་མཆི་མ་འཁྱིལ་ཙམ་བྱེད།།
ཡར་ལ་ལངས་ཤིང་ཕར་འགྲོ་ཚུར་འོང་འདུག་བཟོད་མེད་པའི་རྣམ་འགྱུར་སྟོན།།

རང་གི་ཁྱིམ་ནས་འདུག་ལོང་མེད་པར་དེ་དག་ཤི་ས་འགྲོ་འམ་ཅི།།
ལན་རེར་སྒྲོལ་མའི་གཟུངས་སྔགས་ཟློ་བཞིན་ནད་པའི་སྟེང་ལ་ཡང་ཡང་སྡིཊ།།
དུས་ལྟར་སྔོན་འགོག་ལེགས་པོ་མི་བྱེད་གཞུང་གི་མི་རྣམས་ཤི་སོང་ངམ།།
སྐབས་རེར་ལག་ཟུང་ཐལ་མོ་སྦྱོར་བཞིན་གཞུང་གི་མི་སྣའི་ཐོག་ལ་གཤེ།།

འགལ་འདུའི་སྒྲོག་ཏུ་ཚུད་པའི་ཆུང་མ་ལགས།།
དེ་འདྲའི་སེམས་ཁྲལ་མ་གནང་བཞུགས་རོགས་ཀྱེ།།
ཆེད་མཁས་སྨན་པའི་གསུང་ལ་ཉན་ན་འང་།།
དེ་ཙམ་སྐྲག་དགོས་མི་འདུག་དྲག་འགྲོ་ཟེར།།

དུས་ཐོག་སྨན་བཅོས་ལེཊ་པོ་བྱས་ན་རིམས་ནད་རྩད་ནས་འཇོམས་ཐུབ་ཟེར།།
རོགས་སྐྱོར་མང་པོ་ཕུལ་བ་ཐོས་བྱུང་ཕལ་ཆེར་འབྱོར་ཀྱང་ཡོད་ལས་ཆེ།།
ལྷ་དང་མི་ཡི་སྨན་པ་དག་ཀྱང་རྟའུ་རྫོང་ལ་སླེབས་ཡོད་སྐད།།
སེམས་གསོའི་སྙན་ངག་མང་པོ་ཞིག་ཀྱང་ཆར་ལྟར་འཇོ་ཞིང་འབྲུག་ལྟར་གྱེར།།

ང་ཚོར་གཟུངས་སྔགས་ཟབ་མོ་ཡོད་ལ་སྲུང་འཁོར་གཉན་པོ་ཅི་བས་མང་།།
ཆམ་པ་ལྟ་བུའི་རིམས་ནད་འདི་ལ་རིན་ཆེན་སྨན་སྣ་གང་དགོས་ཡོད།།
ནད་པ་ཤི་བ་གཅིག་ཀྱང་མ་ཐོས་སེམས་ཁྲལ་མི་དགོས་ཁོ་ཐག་རེད།།
གལ་ཏེ་རེ་གཉིས་ཤི་བ་བྱུང་ཡང་རྣམ་ཤེས་འདྲེན་པའི་བླ་མ་བཞུགས།།

ལས་ཀྱིས་འཕངས་པའི་གནམ་རྡོ་ཡིན་ན་སུ་ཡང་གཟུར་ཐབས་མི་འདུག་སྟེ།།
གློ་བུར་རྐྱེན་ངན་ལམ་འཕྲད་ཡིན་ན་མྱུར་མོར་བཟློག་པར་ཡིད་ཆེས་ཡོད།།
འདང་རེ་བརྒྱབ་ན་ཁྱོད་ལ་ཅི་ཁག་ལྟེ་ཁྲག་དམར་པོ་ཐོར་ས་རེད།།
ཁ་སང་དེ་རིང་བོད་མི་ཡོངས་ཀྱི་སེམས་པ་རྟའུའི་ཕྱོགས་ལ་འཁོར།།

བོད་སྨན་སྐོར་ཞིག་སྦྲགས་སྲིད་ཁང་ནས་ཡུལ་ལ་བསྐུར་དུ་མ་བཅུག་པས།།
དེ་རིང་ཡུལ་གྱི་སེམས་ཁྲལ་སྟེང་ལ་སྙིང་རླུང་ལངས་པ་ཁག་མི་འདུག།
སྤྱིར་ན་ནད་ཡམས་འཐབ་རྩོད་འཁྲུག་ལོང་འགྲོ་བ་མི་ཡི་ཆག་སྒོ་སྟེ།།
གཏན་ཏུ་འབྱུང་བ་མེད་པར་ཤོག་ཅེས་སྐྱེས་ཆེན་དག་གིས་སྨོན་ལམ་འདེབས།།

ལུས་ཀྱི་ཆ་ཤས་དུག་མདས་ཟིན་ཚེ་བལྟས་ནས་འདུག་ཚུལ་མེད་པ་བཞིན།།
གང་ན་སྡུག་གིས་མནར་བ་གོ་དུས་སེམས་ཁྲལ་བྱེད་པ་བོད་མིའི་སྲོལ།།
རྒྱང་ནས་སེམས་ཁྲལ་བྱས་པ་ཙམ་གྱིས་རང་གཞན་སུ་དང་གང་ལ་འང་།།
ཕན་འབྲས་ཏིལ་ཙམ་མེད་པ་ཤེས་མོད་སེམས་ཡོད་མི་ཡི་འགྲོ་ལུགས་ཤིག།

རྟའུ་རྟའུ་ཟེར་བའི་མིང་བརྡ་འདི།།
སྔོན་ཆད་གོ་མྱོང་མེད་པ་དག་གིས་ཀྱང་།།
ད་ཐེངས་ནད་ངན་འདི་ཡིས་རྐྱེན་བྱས་ཏེ།།
ཡིད་ལ་འཁོར་ཞིང་ཞེ་ལ་ཐོགས་འདུག་གོ།།

དྲ་ངོས་ཁྱབ་པའི་སྒྲ་བརྙན་ཡིག་ཚོགས་ལ།།
ཕྱེད་བདེན་ཕྱེད་རྫུན་ཡིད་རྟོན་བྱེད་དཀའ་བས།།
ད་དུང་བོད་ཡུལ་སྟོད་སྨད་བར་གསུམ་གྱིས།།
རིམས་འགོག་རང་སྲུང་བྱེད་རྒྱུ་ཅི་བས་ལེགས།།

ཁོ་བོས་སྨྲས་པའི་སྐད་ཆ་དག་ནི་ཆུང་མའི་རྣ་རྒྱབ་ལྷགས་པ་བཞིན།།
ཚོར་བའི་རྣམ་འགྱུར་ཅི་ཡང་མི་སྟོན་ཤུ་སྒྲ་དང་བཅས་འབོལ་ཁྲིར་བསྡད།།
གཉེན་ཉེའི་ཚོམ་དང་གྲོཊ་གཅེས་ཚོཊ་པས་ཁོ་མོ་རྒྱང་ནས་འབོད་དམ་ཅི།།
སླར་ཡང་ཁ་པར་ལག་ཏུ་བླངས་ཏེ་སྐད་འཕྲིན་སྒྲ་ལ་རིམ་གྱིས་ཉན།།

མི་ཡི་སེམས་འདི་སྒང་གི་དར་ལྕོག་སྟེ།།
ཞེ་འདོད་རླུང་བུ་ཁོ་ནའི་ཕྱོགས་སུ་གཡོ།།
དེ་ལྟ་བས་ན་འཁོར་བའི་ཉིན་སྲིབ་ཏུ།།
སུ་ཡིས་སུ་ལ་སེམས་གསོ་བྱེད་ཅིང་འགྲོ།།

 2020.2.20 དགོང་མོར།