ཁྲིན་ཀང་དང་ཝུའུ་ཞའོ་ཅུན་གཉིས་ཀྱིས་བརྒྱད་གཅིག་སྐབས་སུ་མཚོ་སྔོན་དུ་སྡོད་པའི་དམག་དཔུང་ལ་གཟིགས་སྐྱོང་འཚམས་འདྲི་གནང་བ།

ཁྲིན་ཀང་དང་ཝུའུ་ཞའོ་ཅུན་གཉིས་ཀྱིས་བརྒྱད་གཅིག་སྐབས་སུ་མཚོ་སྔོན་དུ་སྡོད་པའི་དམག་དཔུང་ལ་གཟིགས་སྐྱོང་འཚམས་འདྲི་གནང་བ།

ཟླ8པའི་ཚེས1ཉིན། མཚོ་སྔོན་ཞིང་ཆེན་ཏང་ཨུའི་ཧྲུའུ་ཅིའམ་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རིན་ཁྲིན་ཀང་དང་། ཞིང་ཆེན་ཏང་ཨུའི་ཧྲུའུ་ཅི་གཞོན་པའམ་ཧྲིན་ཀྲང་ཝུའུ་ཞའོ་ཅུན་གཉིས་ཀྱིས་ཞིང་ཆེན་ཏང་ཨུ་དང་སྲིད་གཞུང་། ཞིང་ཆེན་ཡོངས་ཀྱི་མི་རིགས་སོ་སོའི་མང་ཚོགས་ཀྱི་ཚབ་མཛད་ནས་མཚོ་སྔོན་དུ་སྡོད་པའི་དམག་དཔུང་ལ་གཟིགས་སྐྱོང་འཚམས་འདྲི་གནང་ཞིང་། དཔོན་དམག་ཡོངས་ལ་དུས་ཆེན་གྱི་འཚམས་འདྲི་དང་རྟེན་འབྲེལ་ཞུས།

ཁྲིན་ཀང་ཟི་ལིང་རྒྱབ་འབྲེལ་འགན་ལེན་ལྟེ་གནས་ཀྱི་དམག་སྒར་ག་གེ་མོར་ཕེབས་པ་དང་། དཔོན་དམག་དང་སྙིང་ཉེ་བའི་གླེང་མོལ་མཛད་ནས། དམག་དཔུང་འཛུགས་སྐྱོང་དང་དམག་དོན་སྦྱོར་བརྡར། སློབ་སྦྱོང་འཚོ་བ། གཟི་བརྗིད་གྲུབ་འབྲས་སོགས་ཀྱི་གནས་ཚུལ་ལ་རྒྱུས་ལོན་ཞིབ་མོ་གནང་། ཁོང་གིས་དུས་རབས་གསར་པར་བསྐྱོད་པ་དང་། མཚོ་སྔོན་གྱི་རྒྱལ་ཁོངས་བདེ་འཇགས་གོ་གནས་སྔར་ལས་གལ་ཆེ་བ་མངོན་གསལ་ཡིན། མཚོ་སྔོན་དུ་སྡོད་པའི་དམག་དཔུང་གིས་ཞི་ཅིན་ཕིང་གི་དམག་དཔུང་སྟོབས་ལྡན་དགོངས་པའི་ཁྲིད་སྟོན་འོག མདོ་དབུས་མཐོ་སྒང་གི་སྙིང་སྟོབས་དང་མདེལ་གཉིས་སྐར་གཅིག་གི་སྙིང་སྟོབས་རྒྱུན་འཛིན་བྱས་པ་དང་། མི་དམངས་དམག་དཔུང་གི་གཟི་བརྗིད་སྲོལ་རྒྱུན་དང་སྤྱོད་ཚུལ་ལེགས་པོའི་རྒྱུན་བསྐྱངས་པ། མང་ཚོགས་གཉེན་མིར་བལྟས་པ་དང་སྡོད་གནས་ཕ་ཡུལ་དུ་བཟུང་བ། ཡོམ་འགོག་རྒུད་སྐྱོབ་སོགས་བྲེལ་དཀའ་ཉེན་ལྗིད་བཅས་དང་ལྡན་པའི་ལས་འགན་གྱི་ཡུལ་དངོས་དང་པོར་གདོང་མཆོང་བྱས་ནས། མཚོ་སྔོན་གྱི་བཅོས་སྒྱུར་འཕེལ་རྒྱས་བརྟན་བརླིང་དང་སྤྱི་ཚོགས་ཡུན་སྐྱོང་གཏན་བདེ་ལ་གཡས་སྐྱོར་གཡོན་འདེགས་བྱས། མིག་སྔར། ཞིང་ཆེན་ཡོངས་ཀྱི་གོང་འོག་ཚང་མས་ཏང་གི་སྐབས་ཉི་ཤུ་པའི་ཚང་འཛོམས་གྲོས་ཚོགས་ཐེངས་གསུམ་པ་དང་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཚོ་སྔོན་གཟིགས་ཞིབ་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ལ་སློབ་སྦྱོང་ལག་བསྟར་ཟབ་མོ་བྱེད་བཞིན་ཡོད་པ་དང་། སྔར་ལས་ལྷག་པར་ཕྱོགས་ཡོངས་ནས་བཅོས་སྒྱུར་ཟབ་སྤེལ་བྱེད་པ། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལེའུ་འབད་པས་འབྲི་བཞིན་ཡོད་པས། དེར་མཚོ་སྔོན་དུ་སྡོད་པའི་དམག་དཔུང་གི་རྒྱབ་སྐྱོར་ཆེན་པོ་དང་ཟབ་ཞུགས་ལ་ཁ་འབྲལ་ཐབས་མེད། མཚོ་སྔོན་གྱི་རིམ་པ་སོ་སོའི་ཏང་ཨུ་སྲིད་གཞུང་གིས་དམག་བཀུར་ཁྱིམ་སྐྱོང་གི་སྲོལ་རྒྱུན་བཟང་པོ་སྔར་སྲོལ་འགྱུར་མེད་སྒོས་དར་སྤེལ་གཏོང་བ་དང་། རྒྱལ་སྲུང་དང་དམག་དཔུང་འཛུགས་སྐྱོང་ལ་སྟོབས་ཤུགས་ཡོད་རྒུས་རྒྱབ་སྐྱོར་བྱས་ཏེ། དམག་བཀུར་དམག་གཅེས་ཀྱི་མཁའ་དབུགས་སྟུག་པོ་བསྐྲུན་རྒྱུ་ཡིན་ཞེས་གསུངས།

ཝུའུ་ཞའོ་ཅུན་དམག་དཔུང31658ལ་ཕེབས་ནས། དཔོན་དམག་གི་ཉིན་རྒྱུན་འཚོ་བ་དང་དམག་དཔུང་འཛུགས་སྐྲུན་འཕེལ་རྒྱས་ཀྱི་གནས་ཚུལ་ལ་རྒྱུས་ལོན་ཞིབ་མོ་གནང་། ཁོང་གིས་དམག་དཔུང31658ནི་ལོ་རྒྱུས་ཕུན་སུམ་ཚོགས་པ་དང་འཐབ་འབྲས་རྨད་དུ་བྱུང་བ། གཟི་བརྗིད་སྲོལ་རྒྱུན་ཡོད་པའི་དམག་དཔུང་ཞིག་ཡིན། མིག་སྔར། ཞིང་ཆེན་ཡོངས་ཀྱི་གོང་འོག་ཚང་མས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁྲིད་སྟོན་གནང་བའི་ཁ་ཕྱོགས་དེད་ནས་ཡིད་ཆེད་བརྟན་པོས་མདུན་དུ་སྐྱོད་བཞིན་ཡོད། མཚོ་སྔོན་དུ་སྡོད་པའི་དམག་དཔུང་གིས་དུས་དང་རྣམ་པ་ཀུན་ཏུ་ཞི་ཅིན་ཕིང་གི་དམག་དཔུང་སྟོབས་ལྡན་དགོངས་པ་ཁྲིད་སྟོན་དུ་འཛིན་པའི་འོག དུས་རབས་གསར་པའི་ཆབ་སྲིད་དམག་སྐྱོང་འཐབ་ཇུས་མཐའ་གཅིག་ཏུ་ལག་བསྟར་དངོས་འབེབས་བྱས་ནས། ཏང་ལ་མཐའ་གཅིག་ཏུ་བློ་དཀར་བ་དང་མཐའ་གཅིག་ཏུ་དྭངས་གཙང་ཡིན་པ། མཐའ་གཅིག་ཏུ་ཡིད་བརྟན་ཁེལ་བ་བཅས་ཁག་ཐེག་བྱེད་པ། དམག་འཁྲུག་རྒྱག་གྲབས་ལ་དུས་དང་རྣམ་པ་ཀུན་ཏུ་དམིགས་པ་དང་། དམག་དོན་སྦྱོང་བརྡར་ཀྱི་དངོས་འཐབ་ཅན་གྱི་ཆུ་ཚད་ཕྱོགས་ཡོངས་ནས་མཐོར་འདེགས་པ། རྒྱལ་ཁབ་ཀྱི་བདག་དབང་དང་བདེ་འཇགས། འཕེལ་རྒྱས་ཁེ་ཕན་བཅས་མཐའ་གཅིག་ཏུ་སྲུང་བ། མཚོ་སྔོན་གྱི་དཔལ་འབྱོར་སྤྱི་ཚོགས་འཕེལ་རྒྱས་ལ་སྔར་སྲོལ་འགྱུར་མེད་ཀྱིས་རྒྱབ་སྐྱོར་བྱེད་པ་དང་། བཀུར་གཅེས་མཉམ་སྐྱོང་མུ་མཐུད་དུ་ཟབ་མོར་སྤེལ་ནས། དམག་སྲིད་དམག་དམངས་མཐུན་སྒྲིལ་འབད་འཐབ་ཀྱི་ལེའུ་གསར་པ་མཉམ་དུ་འབྲི་རྒྱུའི་རེ་བ་ཡོད་ཅེས་གསུངས།

ཞིང་ཆེན་མགོ་ཁྲིད་ཝང་ལིན་ཧུའུ་དང་ཀྲུའུ་ཞང་ཧྥེང་གཉིས་མཉམ་ཞུགས་བྱས།