ནད་པའི་ཁྱིམ་མི་སྨན་ཁང་གི་བཅོས་ཐབས་ལ་ཡིད་མ་ཚིམ་པར་སྨན་ཁང་དུ་མཆོད་དངུལ་སྒྲོན་པ་དང་འཕྲེད་ཡིག་འཐེན་པའི་བྱ་སྤྱོད་འདི་རིགས་ཁྲིམས་མཐུན་ཡིན་ནམ།

གྱོད་དཔེ།

འབྲུག་ཐར་ལ་གློ་བུར་དུ་ནད་ཞིག་ཕོག་སྟེ་སྨན་ཁང་དུ་ཚེ་ལས་འདས། ཁོའི་ཁྱིམ་མིས་སྨན་ཁང་གིས་བརྟག་བཤེར་མང་པོ་ནི་དགོས་མེད་ཡིན་པར་སྙམ་པར་མ་ཟད། སྐྱོབ་བཅོས་ཀྱི་གོ་རིམ་ཁྲོད་ཐག་གཅོད་འོས་འགྲིག་མ་བྱས་པའི་རྐྱེན་གྱིས་འབྲུག་ཐར་ཚེ་ལས་འདས་པའི་མཇུག་འབྲས་བྱུང་བར་འདོད། ཁྱིམ་མིས་འབྲུག་ཐར་གློ་བུར་དུ་ཚེ་ལས་འདས་པའི་དོན་དངོས་དང་ལེན་བྱས་མ་ཐུབ་པས། ཐེངས་མང་པོར་སྨན་ཁང་དུ་སོང་སྟེ་ཁ་རྩོད་བྱས། སྨན་ཁང་གིས་སྐྱོབ་བཅོས་ཀྱི་གོ་རིམ་ཧྲིལ་པོ་དང་བརྟག་བཤེར་གྱི་རྣམ་གྲངས་གསལ་བཤད་བྱས་པ་དང་། རྗེས་སུ་གསོ་རིག་དང་སྨན་བཅོས་ཆེད་མཁས་པས་གསལ་འབྱེད་བྱས་པ་བརྒྱུད། ཚད་འདས་བརྟག་བཤེར་དང་འབྲེལ་ཡོད་ཀྱི་སྨན་བཅོས་དོན་རྐྱེན་གྱི་གནས་ཚུལ་བྱུང་མེད་པ་བདེན་དཔང་བྱས། ཁྱིམ་མིས་གྱོང་གསབ་འབོར་ཆེན་ལེན་ཆེད་སྨན་ཁང་གི་ཚོམས་ཆེན་དུ་མཆོད་མེ་སྒྲོན་པ་དང་འཕྲེད་ཡིག་འཐེན་པས། སྨན་ཁང་གི་རྒྱུན་ལྡན་གྱི་འཁོར་སྐྱོད་ཚོང་གཉེར་ལ་ཤུགས་རྐྱེན་ཚབས་ཆེན་བཟོས། འབྲུག་ཐར་གྱི་ཁྱིམ་མིའི་བྱ་སྤྱོད་འདི་རིགས་ཁྲིམས་མཐུན་ཡིན་ནམ།

གྱོད་དོན་དབྱེ་ཞིབ།

གྱོད་དོན་འདི་ནི་སྨན་བཅོས་ལས་ཁུངས་དང་སྨན་དོན་མི་སྣའི་ཁྲིམས་མཐུན་ཁེ་དབང་ལ་སྲུང་སྐྱོབ་བྱེད་པའི་གནད་དོན་དང་འབྲེལ་ཡོད། དམངས་དོན་ཁྲིམས་གཞུང་གི་གཏན་འབེབས་ལྟར་ན། སྨན་བཅོས་ལས་ཁུངས་དང་སྨན་དོན་མི་སྣས་བརྟག་བཅོས་ཚད་གཞི་དང་འགལ་བའི་སྒོ་ནས་དགོས་ངེས་མིན་པའི་བརྟག་བཤེར་བྱེད་མི་ཆོག གྱོད་དོན་འདིའི་ནང་དུ། འབྲུག་ཐར་གྱི་ཁྱིམ་མིས་སྨན་ཁང་གིས་དགོས་མེད་ཀྱི་བརྟག་བཤེར་མང་པོ་བྱས་འདུག་པར་མ་ཟད། སྐྱོབ་བཅོས་ཀྱི་བྱེད་ཐབས་འོས་འཚམ་མིན་པར་སྙམ། དོན་དག་བྱུང་རྗེས་གསོ་རིག་དང་སྨན་བཅོས་ཆེད་མཁས་པས་གསལ་འབྱེད་བྱས་པ་བརྒྱུད། སྨན་ཁང་གིས་ཚད་འདས་བརྟག་བཤེར་བྱས་མེད་པ་བདེན་དཔང་བྱས་ཡོད་པས། སྨན་ཁང་གིས་དེ་མཐུན་གྱི་འགན་འཁྲི་འཁུར་མི་དགོས་པ་རེད། ཁྱིམ་མིས་སྨན་ཁང་དུ་མཆོད་དངུལ་སྒྲོན་པ་དང་འཕྲེད་ཡིག་འཐེན་པ་སོགས་བྱ་སྤྱོད་ཀྱིས་སྨན་ཁང་གི་རྒྱུན་ལྡན་གྱི་སྒྲིག་ལམ་ལ་ཤུགས་རྐྱེན་ཚབས་ཆེན་བཟོས་ཡོད་པ་དང་། ནད་པ་གཞན་གྱིས་ནད་ལ་ལྟ་བ་དང་སྨན་དོན་མི་སྣས་སྐྱོབ་བཅོས་བྱ་བ་སྤེལ་བར་ཡང་ཤུགས་རྐྱེན་བཟོས་ཡོད། དམངས་དོན་ཁྲིམས་གཞུང་གི་གཏན་འབེབས་ལྟར་ན། སྨན་བཅོས་ཀྱི་སྒྲིག་ལམ་ལ་གཏོར་བརླག་གཏོང་བ་དང་། སྨན་དོན་མི་སྣའི་བྱ་བ་དང་འཚོ་བར་འགོག་རྐྱེན་བཟོ་བ། སྨན་དོན་མི་སྣའི་ཁྲིམས་མཐུན་ཁེ་དབང་ལ་གནོད་འཚེ་གཏོང་བ་བཅས་བྱས་ན། ཁྲིམས་ལྟར་བཅའ་ཁྲིམས་ཀྱི་འགན་འཁྲི་འཁུར་དགོས། གོང་དུ་བརྗོད་པར་ཕྱོགས་བསྡུས་སུ་བལྟས་ན། འབྲུག་ཐར་གྱི་ཁྱིམ་མིའི་བྱ་སྤྱོད་ནི་བཅའ་ཁྲིམས་ཀྱི་གཏན་འབེབས་དང་མི་མཐུན་པས། དེ་མཐུན་གྱི་འགན་འཁྲི་འཁུར་དགོས།

འབྲེལ་ཡོད་ཁྲིམས་ཚན།

《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་དམངས་དོན་ཁྲིམས་གཞུང》གི་དོན་ཚན1228པ། སྨན་བཅོས་ལས་ཁུངས་དང་སྨན་དོན་མི་སྣའི་ཁྲིམས་མཐུན་ཁེ་དབང་ལ་བཅའ་ཁྲིམས་ཀྱི་སྲུང་སྐྱོབ་ཐོབ་པ་ཡིན།

སྨན་བཅོས་སྒྲིག་ལམ་ལ་གཏོར་བརླག་དང་སྨན་དོན་མི་སྣའི་བྱ་བ་དང་འཚོ་བར་འགོག་རྐྱེན་བཟོ་བ། སྨན་དོན་མི་སྣའི་ཁྲིམས་མཐུན་ཁེ་དབང་ལ་གནོད་འཚེ་གཏོང་བ་སོགས་ཀྱིས། ཁྲིམས་ལྟར་བཅའ་ཁྲིམས་ཀྱི་འགན་འཁྲི་འཁུར་དགོས།

ཁྲིམས་ཚན་ཞིབ་འགྲེལ།

ཁྲིམས་ཚན་འདི་ནི་དམངས་དོན་ཁྲིམས་གཞུང་ལས་སྨན་བཅོས་ལས་ཁུངས་དང་སྨན་དོན་མི་སྣའི་ཁྲིམས་མཐུན་ཁེ་དབང་ལ་སྲུང་སྐྱོང་བྱེད་པའི་ཐད་ཀྱི་གཏན་འབེབས་རེད།

ཉེ་བའི་ལོ་འདི་འགར་རྒྱུན་པར་འབྱུང་བཞིན་པའི་སྨན་པར་གནོད་པའི་དོན་རྐྱེན་ལ་ཁ་གཏད་དེ། དམངས་དོན་ཁྲིམས་གཞུང་གིས་སྨན་དོན་མི་སྣའི་ཁྲིམས་མཐུན་ཁེ་དབང་ལ་འགན་སྲུང་གང་ལེགས་བྱས་ཡོད་ལ། སྨན་བཅོས་ལས་ཁུངས་དང་སྨན་དོན་མི་སྣའི་ཁྲིམས་མཐུན་ཁེ་དབང་ལ་བཅའ་ཁྲིམས་ཀྱི་སྲུང་སྐྱོབ་བྱས་ཡོད་པར་མ་ཟད། སྨན་བཅོས་སྒྲིག་ལམ་ལ་གཏོར་བརླག་དང་། སྨན་དོན་མི་སྣའི་བྱ་བ་དང་འཚོ་བར་འགོག་རྐྱེན་བཟོ་བ། སྨན་དོན་མི་སྣའི་ཁྲིམས་མཐུན་ཁེ་དབང་ལ་གནོད་འཚེ་གཏོང་མཁན་གྱི་མི་སྣས་དེ་མཐུན་གྱི་བཅའ་ཁྲིམས་འགན་འཁྲི་འཁུར་དགོས་པ་གཏན་འབེབས་བྱས་ཡོད། བྱེ་བྲག་ཏུ་བཤད་ན། “སྨན་བཅོས་དོན་རྐྱེན”གྱི་བྱ་སྤྱོད་སྤེལ་མཁན་གྱིས་བཅའ་ཁྲིམས་རིགས་གང་ཞིག་ལ་འགལ་རྐྱེན་བཟོས་ན། བཅའ་ཁྲིམས་རིགས་གང་དེའི་བཅའ་ཁྲིམས་ཀྱི་འགན་འཁྲི་འཁུར་དགོས། དེར་དམངས་དོན་འགན་འཁྲི་དང་སྲིད་འཛིན་འགན་འཁྲི་དང་ཉེས་དོན་འགན་འཁྲི་བཅས་འདུ་ལ། ཁོ་ཚོའི་བྱ་སྤྱོད་ལ་ཉེས་ཆད་བཅད་དེ། སྨན་བཅོས་ལས་ཁུངས་དང་སྨན་དོན་མི་སྣའི་ཁྲིམས་མཐུན་ཁེ་དབང་ལ་དངོས་གནས་འགན་སྲུང་ཐོབ་པར་བྱས་ཡོད།