ང་ཚོས་མཉམ་དུ《དམངས་དོན་ཁྲིམས་གཞུང》སློབ།

ང་ཚོས་མཉམ་དུ《དམངས་དོན་ཁྲིམས་གཞུང》སློབ།

དོན་ཚན་བརྒྱ་དང་རེ་དགུ་པ། ལས་ཚབ་པས་མི་གསུམ་པར་ལས་ཚབ་མངགས་བཅོལ་སྐོར་སྒྱུར་བྱེད་དགོས་བྱུང་ན། ལས་ཚབ་བྱ་ཡུལ་མོས་མཐུན་བྱུང་བའམ་རྗེས་བྱུང་ཁས་ལེན་ཐོབ་དགོས།

ལས་ཚབ་མངགས་བཅོལ་སྐོར་སྒྱུར་བྱེད་པར་ལས་ཚབ་བྱ་ཡུལ་གྱིས་མོས་མཐུན་བྱས་པའམ་རྗེས་བྱུང་ཁས་ལེན་བྱས་པ་ཡིན་ན། ལས་ཚབ་བྱ་ཡུལ་གྱིས་ལས་ཚབ་དོན་ཚན་གྱི་ཆར་མངགས་བཅོལ་སྐོར་སྒྱུར་བྱ་ཡུལ་མི་གསུམ་པར་ཐད་ཀར་མཛུབ་སྟོན་བྱས་ཆོག་པ་དང་། ལས་ཚབ་པས་མི་གསུམ་པ་འདེམས་བསྐོ་དང་མི་གསུམ་པར་མཛུབ་སྟོན་གང་བྱས་ཁོ་ནར་འགན་འཁུར་དགོས།

ལས་ཚབ་ཀྱི་མངགས་བཅོལ་སྐོར་སྒྱུར་བྱེད་རྒྱུ་དེ་ལས་ཚབ་བྱ་ཡུལ་མོས་མཐུན་མ་བྱུང་བའམ་རྗེས་བྱུང་ཁས་ལེན་མ་བྱས་ན། ལས་ཚབ་པས་མངགས་བཅོལ་སྐོར་སྒྱུར་བྱ་ཡུལ་མི་གསུམ་པའི་བྱ་སྤྱོད་ལ་འགན་འཁུར་དགོས། ཡིན་ན་ཡང་ཛ་དྲག་གི་གནས་ཚུལ་འོག་ལས་ཚབ་པས་ལས་ཚབ་བྱ་ཡུལ་གྱི་ཁེ་ཕན་སྲུང་སྐྱོང་བྱེད་ཆེད་མི་གསུམ་པར་ལས་ཚབ་མངགས་བཅོལ་སྐོར་སྒྱུར་བྱེད་པ་འདིའི་ཁོངས་སུ་མི་ཚུད།

དོན་ཚན་བརྒྱ་དང་བདུན་ཅུ་པ། ཁྲིམས་མི་དང་ཡང་ན་ཁྲིམས་མི་མིན་པའི་རྩ་འཛུགས་ཀྱི་ལས་འགན་སྒྲུབ་མཁན་མི་སྣས་སོ་སོའི་འགན་དབང་གི་ཁྱབ་ཁོངས་ནང་གི་དོན་ཚན་གྱི་ཆར། ཁྲིམས་མིའམ་ཁྲིམས་མི་མིན་པའི་རྩ་འཛུགས་ཀྱི་མིང་ཐོག་ནས་དམངས་དོན་བཅའ་ཁྲིམས་བྱ་སྤྱོད་སྤེལ་ན། ཁྲིམས་མི་དང་ཁྲིམས་མི་མིན་པའི་རྩ་འཛུགས་ལ་ནུས་པ་ཐོན་པ་ཡིན།

ཁྲིམས་མིའམ་ཁྲིམས་མི་མིན་པའི་རྩ་འཛུགས་ཀྱིས་སོ་སོའི་ལས་འགན་སྒྲུབ་མཁན་མི་སྣའི་འགན་དབང་གི་ཁྱབ་ཁོངས་ལ་ཚོད་འཛིན་བྱེད་སྐབས། སེམས་བཟང་བལྟོས་བཅས་མིར་འགྲན་རྒོལ་བྱས་མི་ཆོག

དོན་ཚན་བརྒྱ་དང་དོན་གཅིག་པ། བྱ་སྤྱོད་སྤེལ་མཁན་ལ་ལས་ཚབ་བྱེད་དབང་མེད་པ་དང་ལས་ཚབ་བྱེད་དབང་ལས་བརྒལ་བའམ་ལས་ཚབ་བྱེད་དབང་མཇུག་བསྒྲིལ་རྗེས་སྔར་བཞིན་ལས་ཚབ་བྱ་སྤྱོད་སྤེལ་བ་ཡིན་ན། ལས་ཚབ་བྱ་ཡུལ་གྱིས་དེར་རྗེས་བྱུང་ཁས་ལེན་མ་བྱས་ཚེ། ལས་ཚབ་བྱ་ཡུལ་གྱི་མི་ལ་ནུས་པ་མི་ཐོན་པ་ཡིན།

བལྟོས་བཅས་མིས་ལས་ཚབ་བྱ་ཡུལ་ལ་བརྡ་སྦྱོར་འབྱོར་ཉིན་ནས་ཉིན་སུམ་ཅུའི་ནང་ཚུན་དུ་རྗེས་བྱུང་ཁས་ལེན་བྱེད་དགོས་པའི་སྐུལ་བརྡ་བཏང་ཆོག ལས་ཚབ་བྱ་ཡུལ་གྱིས་འདོད་བློ་མ་བསྟན་ན་རྗེས་བྱུང་ཁས་ལེན་བྱས་པར་རྩི་དགོས། བྱ་སྤྱོད་སྤེལ་མཁན་གྱིས་སྤེལ་བའི་བྱ་སྤྱོད་ལ་རྗེས་བྱུང་ཁས་ལེན་མ་བྱས་གོང་དུ། སེམས་བཟང་བལྟོས་བཅས་མིར་ཕྱིར་འཐེན་བྱེད་པའི་ཁེ་དབང་ཡོད། ཕྱིར་འཐེན་བྱེད་དུས་བརྡ་སྦྱོར་གྱི་རྣམ་པའི་ཐོག་ནས་བསྒྲུབ་དགོས།

བྱ་སྤྱོད་སྤེལ་མཁན་གྱིས་སྤེལ་བའི་བྱ་སྤྱོད་ལ་རྗེས་བྱུང་ཁས་ལེན་བྱས་པ་ཡིན་ན། སེམས་བཟང་བལྟོས་བཅས་མིར་བྱ་སྤྱོད་སྤེལ་མཁན་གྱིས་བུན་འགན་འཁུར་དགོས་པའམ་རང་ཉིད་ལ་གྱོང་གུན་གང་ཕོག་ལ་བྱ་སྤྱོད་སྤེལ་མཁན་གྱིས་སྐྱིན་གསབ་བྱེད་དགོས་པའི་རེ་འདུན་འདོན་དབང་ཡོད། ཡིན་ཡང་སྐྱིན་གསབ་སྤྲོད་པའི་ཁྱབ་རྒྱ་དེ་ལས་ཚབ་བྱ་ཡུལ་གྱིས་རྗེས་བྱུང་ཁས་ལེན་བྱེད་དུས་ཀྱི་བལྟོས་བཅས་མིར་ཐོབ་ཐུབ་པའི་ཁེ་ཕན་ལས་བརྒལ་མི་ཆོག

བལྟོས་བཅས་མི་ཡིས་བྱ་སྤྱོད་སྤེལ་མཁན་ལ་ལས་ཚབ་བྱེད་དབང་མེད་པ་ཤེས་པའམ་ཤེས་དགོས་པ་ཡིན་ན། བལྟོས་བཅས་མི་དང་བྱ་སྤྱོད་སྤེལ་མཁན་གཉིས་ཀས་སོ་སོའི་ནོར་འཁྲུལ་ལྟར་དུ་འགན་འཁུར་དགོས།

                                               (མུ་འགོད།)