ཉི་ཟླ་རི་བོར་རོ་སྦས་ལག་དམར་ལ་སྲོག་ཁྲིམས་ལག་བསྟར་བྱས།

ཉི་ཟླ་རི་བོར་རོ་སྦས་ལག་དམར་ལ་སྲོག་ཁྲིམས་ལག་བསྟར་བྱས།

2024ལོའི་ཟླ5པའི་ཚེས13ཉིན། མཚོ་སྔོན་ཞིང་ཆེན་མཚོ་ལྷོ་བོད་རིགས་རང་སྐྱོང་ཁུལ་འབྲིང་རིམ་མི་དམངས་ཁྲིམས་ཁང་གིས་ཆེས་མཐོའི་མི་དམངས་ཁྲིམས་ཁང་གིས་བཏང་བའི་སྲོག་ཁྲིམས་ལག་བསྟར་བཀའ་རྒྱ་གཞིར་བཟུང་སྟེ། “8· 07”ཉི་ཟླ་རི་བོར་རོ་སྦས་གྱོད་གཞིའི་ལག་དམར་མཱ་ཁྲེང་ལ་སྲོག་ཁྲིམས་ལག་བསྟར་བྱས་པ་དང་། མཚོ་ལྷོ་ཁུལ་མི་དམངས་ཞིབ་དཔྱོད་ཁང་གིས་ཁྲིམས་ལྟར་མི་མངགས་ནས་ལྟ་སྐུལ་བྱས་པ་རེད།

2020ལོའི་ཟླ10པའི་ཚེས30ཉིན། མཚོ་ལྷོ་ཁུལ་འབྲིང་རིམ་མི་དམངས་ཁྲིམས་ཁང་གིས་མཱ་ཁྲེང་གིས་ནག་ཚོགས་ཀྱི་ངོ་བོ་ལྡན་པའི་རྩ་འཛུགས་སྒྲིག་འཛུགས་དང་མགོ་ཁྲིད་བྱས་པའི་ནག་ཉེས་བསགས་པར་དུས་བཙོན་ལོ12དང་། ཆབ་སྲིད་ཁེ་དབང་ལོ3ལ་བླངས་ལ། མི་སྒེར་གྱི་རྒྱུ་ནོར་ཡོངས་རྫོགས་གཞུང་བཞེས་གཏོང་བ་བཅས་ཀྱི་ཆད་པ་བཅད་ཅིང་། བསམ་གཟས་ནས་མི་བསད་པའི་ནག་ཉེས་བསགས་པར་སྲོག་ཁྲིམས་བཅད་ནས་ཆབ་སྲིད་ཁེ་དབང་ཚེ་གང་བོར་བླངས། བསམ་གཟས་ནས་གནོད་འཚེ་བཏང་བའི་ནག་ཉེས་ལ་དུས་བཙོན་ལོ6གི་ཉེས་ཆད་དང་བསྙད་རྐོ་ཟིང་སློང་བྱས་པའི་ནག་ཉེས་ལ་དུས་བཙོན་ལོ6གི་ཉེས་ཆད་དང་དངུལ་ཆད་སྒོར་ཁྲི40མཉམ་དུ་བཅད། བསྙད་འདོགས་རྒྱུ་འཕྲོག་བྱས་པའི་ནག་ཉེས་ལ་དུས་བཙོན་ལོ14དང་དངུལ་ཆད་སྒོར་ཁྲི50མཉམ་དུ་བཅད། ཁྲིམས་འགལ་ངང་བཀག་ཉར་བྱས་པའི་ནག་ཉེས་ལ་དུས་བཙོན་ལོ3གྱི་ཉེས་ཆད་དང་བཙན་ཤེད་ཀྱིས་ཉོ་འཚོང་བྱས་པའི་ནག་ཉེས་ལ་དུས་བཙོན་ལོ2ཀྱི་ཉེས་ཆད་དང་དངུལ་ཆད་སྒོར་ཁྲི20མཉམ་དུ་བཅད། ཤོ་ཁང་བཙུགས་པའི་ནག་ཉེས་ལ་དུས་བཙོན་ལོ3གྱི་ཉེས་ཆད་དང་དངུལ་ཆད་སྒོར་ཁྲི5མཉམ་དུ་བཅད། ཉེས་མེད་ཉེས་འགེལ་གྱི་ནག་ཉེས་ལ་དུས་བཙོན་ལོ1གི་ཉེས་ཆད་དང་གཉེན་རྩེག་སྒྲིག་གི་ནག་ཉེས་ལ་དུས་བཙོན་ལོ1གི་ཉེས་ཆད་བཅས་ནག་ཉེས་མང་པོར་ཉེས་ཆད་མཉམ་དུ་བཅད་ནས་སྲོག་ཁྲིམས་ལག་བསྟར་བྱ་རྒྱུ་དང་། ཆབ་སྲིད་ཁེ་དབང་ཚེ་གང་བོར་ལེན་རྒྱུར་མ་ཟད།    མི་སྒེར་གྱི་རྒྱུ་ནོར་ཡོངས་རྫོགས་གཞུང་བཞེས་གཏོང་རྒྱུའི་ཐག་བཅད། 

མཱ་ཁྲེང་གིས་གོང་གཏུག་བྱས་རྗེས། མཚོ་སྔོན་ཞིང་ཆེན་མཐོ་རིམ་མི་དམངས་ཁྲིམས་ཁང་གིས་ཐོག་མའི་དཔྱད་མཚམས་རྒྱུན་འཁྱོངས་བྱ་རྒྱུའི་དཔྱད་མཚམས་བཏང་བར་མ་ཟད། ཁྲིམས་ལྟར་ཆེས་མཐོའི་མི་དམངས་ཁྲིམས་ཁང་ལ་ཞིབ་མཆན་འགོད་དུ་བཅུག ཆེས་མཐོའི་མི་དམངས་ཁྲིམས་ཁང་གིས་བསྐྱར་ཞིབ་བྱས་པ་བརྒྱུད། འདྲི་གཅོད་དང་པོའི་དཔྱད་མཚམས་དང་འདྲི་གཅོད་གཉིས་པའི་དཔྱད་མཚམས་ནང་གཏན་འཁེལ་བྱས་པའི་མཱ་ཁྲེང་གི་ཁྲིམས་འགལ་ཉེས་གསོག་གི་དོན་དངོས་གཙོ་བོ་གསལ་པོར་ཡོད་པ་དང་། དཔང་རྟགས་ཁུངས་བཙན་ཞིང་འདང་ངེས་ཡིན་པ། ནག་ཉེས་གཏན་འཁེལ་ཡང་དག་ཡིན་པ། ཉེས་ཆད་འོས་འཚམ་བཅས་ཡིན་པར་ངོས་འཛིན་བྱས་ཤིང་། འདྲི་གཅོད་ཀྱི་གོ་རིམ་ཁྲིམས་མཐུན་ཡིན་པས་ཁྲིམས་ལྟར་མཱ་ཁྲེང་ལ་སྲོག་ཁྲིམས་གཅོད་པར་ཞིབ་མཆན་བཀོད། 

མཚོ་ལྷོ་ཁུལ་འབྲིང་རིམ་མི་དམངས་ཁྲིམས་ཁང་གིས་སྲོག་ཁྲིམས་མ་བཅད་གོང་ལ། མཱ་ཁྲེང་རང་གི་གཉེན་ཉེ་དང་ཐུག་འཕྲད་བྱ་རྒྱུའི་བཀོད་སྒྲིག་བྱས་ནས་ཁྲིམས་མཐུན་ཁེ་དབང་ལ་འགན་སྲུང་གང་ལེགས་བྱས་པ་རེད།