གཞན་གྱི་འདྲ་པར་བཙོག་པོར་བཏང་སྟེ་སྐད་འཕྲིན་དུ་སྤེལ་ཆོག་གམ།

གཞན་གྱི་འདྲ་པར་བཙོག་པོར་བཏང་སྟེ་སྐད་འཕྲིན་དུ་སྤེལ་ཆོག་གམ།

གྱོད་དཔེ།

གཅོད་པ་དང་དབང་གྲགས་གཉིས་ནི་ཁྱིམ་མཚེས་ཡིན་པ་དང་།གཅོད་པའི་མི་གཤིས་བཟང་ཞིང་བྱ་བ་ཅི་ཞིག་བསྒྲུབ་ཀྱང་ཤིན་ཏུ་ནན་ཏན་ཡིན་པའི་ཁར།རང་ལས་གཞན་གཅེས་ཀྱི་བསམ་བློར་སྡེ་མི་ཀུན་གྱིས་བསྟོད་པའི་མཐེ་བོང་སྒྲེང་བཞིན་ཡོད།དབང་གྲགས་ཀྱི་གཤིས་རྒྱུད་གྱོང་པོ་ཡིན་ལ་རྟག་ཏུ་དོན་དག་ཆུང་ཆུང་ཞིག་ཀྱང་ཆེ་རུ་བཏང་ནས་སྡེ་མི་ཀུན་ལ་འཁོན་འཛིང་བྱེད་པས།སྡེ་ཆེན་མཚོ་འདྲ་བའི་ནང་དུ་ཁོ་ལ་གྲོགས་པོ་བསྒྲིགས་མཁན་གཅིག་ཀྱང་མེད།2022ལོའི་ཟླ4པའི་ཚེས27ཉིན།སྡེ་བའི་སྡེ་དམངས་ཨུ་ཡོན་ལྷན་ཁང་གི་སྐབས་རྗེས་མའི་འདེམ་བསྐོའི་ཚོགས་འདུ་འཚོགས་དུས།འདེམ་ཤོག་འཕངས་ནས་གཅོད་པ་སྡེ་དམངས་ཨུ་ཡོན་ལྷན་ཁང་གི་ཁོངས་མིར་བདམས་ཐོན་བྱུང་བས།དབང་གྲགས་དེར་གཏན་ནས་མ་འཐད་པར་ཕྲག་དོག་བྱས་ནས་གཅོད་པའི་འདྲ་པར་བཙོག་སྒྱུར་བཏང་སྟེ་སྐད་འཕྲིན་དུ་སྤེལ།

བཅའ་ཁྲིམས་དབྱེ་ཞིབ།

འདྲ་པར་གྱི་བདག་དབང་ནི་མིའི་ཐོབ་ཐང་གི་ཁེ་དབང་རིགས་ཤིག་ཡིན་པ་དང་།དེ་ནི་ང་ཚོའི་ལྷན་སྐྱེས་ཀྱི་ཁེ་དབང་ཞིག་ཡིན་ཞིང་།མི་སུ་དང་གང་གིས་ཀྱང་དེར་གནོད་འཚེ་བཏང་མི་ཆོག རང་རྒྱལ་གྱི《དམངས་དོན་ཁྲིམས་གཞུང》གི་དོན་ཚན1019པའི་ཚན་པ1པོའི་གཏན་འཁེལ་ལྟར་ན།“རྩ་འཛུགས་གང་དང་མི་སྒེར་སུ་ཞིག་གིས་ཀྱང་གཞན་པའི་འདྲ་པར་གྱི་བདག་དབང་ལ་དམའ་འབེབས་དང་བཙོག་སྒྱུར་བཏང་མི་ཆོག ཆ་འཕྲིན་ལག་རྩལ་གྱི་བྱེད་ཐབས་སྤྱད་དེ་རྫུན་བཟོ་སོགས་ཀྱི་རྣམ་པས་གནོད་པ་བཟོས་མི་ཆོག འདྲ་པར་བདག་དབང་འཛིན་མཁན་གྱི་མོས་མཐུན་མ་ཐོབ་པར།འདྲ་བཟོ་དང་བེད་སྤྱོད།ཁྱབ་བསྒྲགས་བཅས་བྱ་མི་ཆོག ཡིན་ན་ཡང་བཅའ་ཁྲིམས་འདིའི་གཏན་འཁེལ་ལས་གཏན་འཁེལ་གཞན་ཡོད་པ་ཕུད”ཅེས་བཀོད་ཡོད།ཡང་ཅིག་བཤད་ན། རྩ་འཛུགས་གང་དང་མི་སྒེར་སུ་ཞིག་གིས་ཀྱང་གཞན་པའི་འདྲ་པར་གྱི་བདག་དབང་ལ་དམའ་འབེབས་དང་བཙོག་སྒྱུར་གཏོང་བའམ་ཆ་འཕྲིན་ལག་རྩལ་གྱི་བྱེད་ཐབས་སྤྱད་དེ།མི་གཞན་གྱི་འདྲ་པར་རྫུན་བཟོ་བྱེད་པའི་བྱ་སྤྱོད་ནི་གཞན་པའི་འདྲ་པར་བདག་དབང་ལ་གནོད་འཚེ་བཏང་བའི་བྱ་སྤྱོད་ཀྱི་ཁོངས་སུ་གཏོགས།དེར་མ་ཟད་འདྲ་པར་བདག་དབང་འཛིན་མཁན་གྱི་མོས་མཐུན་མ་ཐོབ་པར།གཞན་པའི་དམངས་དོན་བྱེད་པོས་འདྲ་བཟོ་དང་བེད་སྤྱོད།ཁྱབ་བསྒྲགས་བཅས་བྱ་མི་ཆོག ཡིན་ན་ཡང་བཅའ་ཁྲིམས་འདིའི་གཏན་འཁེལ་ལས་གཏན་འཁེལ་གཞན་ཡོད་པ་ཕུད།

གོང་གི་གྱོད་དོན་འདིའི་ཁྲོད་དུ།དབང་གྲགས་ཀྱིས་བཙོག་སྒྱུར་གྱི་བྱེད་ཐབས་ལ་བརྟེན་ནས་གཅོད་པའི་འདྲ་པར་བདག་དབང་ལ་གནོད་འཚེ་བཏང་བར་མ་ཟད།ད་དུང་གཅོད་པའི་མོས་མཐུན་མ་ཐོབ་པར་འདྲ་པར་སྐད་འཕྲིན་དུ་སྤེལ་བ་རེད།སྐད་འཕྲིན་ནི་ཁྲིམས་མེད་པ་ཞིག་མ་ཡིན་ཏེ།དབང་གྲགས་ཀྱི་བྱ་སྤྱོད་ཀྱིས་གཅོད་པའི་མཚན་སྙན་དང་འཚོ་བར་བར་ཆད་བཟོས་པ་དེས།གཅོད་པའི་སྤྱི་ཚོགས་ཀྱི་གདེང་འཇོག་ལ་མི་ལེགས་པའི་མཇུག་འབྲས་བཟོས་པས།འདྲ་པར་བདག་དབང་ལ་གནོད་འཚེ་ཚབས་ཆེན་བཏང་ཡོད་དོ།