མཚོ་སྔོན་གྱིས་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་སྟོན་ཁུལ་གསར་འཛུགས་བྱེད་པའི་བྱ་བ་བརྟན་བརླིང་ངང་སྤེལ།

 ཟླ1ཚེས8ཉིན། གསར་འགོད་པས་མཚོ་སྔོན་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་ནས་ཤེས་རྟོགས་བྱུང་བ་ལྟར་ན། 2024ལོར་ཞིང་ཆེན་མི་རིགས་ཆོས་ལུགས་ལས་དོན་ཨུ་ཡོན་ལྷན་ཁང་གིས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་པ་དང་། རང་རྒྱལ་གྱི་ཆོས་ལུགས་ཀྲུང་གོ་ཅན་གྱི་ཁ་ཕྱོགས་རྒྱུན་འཁྱོངས། བདེན་སྲུང་གསར་གཏོད་དང་འབད་འབུངས་ཡར་བརྩོན།  ཁག་ཁུར་ཕོད་པ་དང་འབད་འཐབ་མདུན་སྐྱོད་བཅས་བྱས་ཏེ། ཞིང་ཆེན་ཡོངས་ཀྱི་མི་རིགས་ཆོས་ལུགས་ལས་དོན་སྣ་ཚོགས་ལ་འཕེལ་རིམ་གསར་པ་དང་གྲུབ་འབྲས་གསར་པ་བླངས་ནས། རྒྱལ་ཡོངས་ཀྱི་སྔོན་ལ་གྲོང་ཁྱེར་དང་ཁུལ་ཡོངས་དང་རྫོང93%གྱིས་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་སྟོན་ཁུལ་གསར་འཛུགས་བྱེད་པ་མངོན་འགྱུར་བྱས།

གྲངས་ཉུང་མི་རིགས་འཕེལ་རྒྱས་ཀྱི་ལས་འགན་དོན་འཁྱོལ་བྱེད་པའི་མ་དངུལ་གྱིས་ལོ་རྒྱུས་ཀྱི་ཟིན་ཐོ་གསར་པ་བསྐྲུན།  གྲངས་ཉུང་མི་རིགས་འཕེལ་རྒྱས་གཏོང་བའི་ལས་འགན་དོན་འཁྱོལ་བྱེད་པར་མ་དངུལ་སྒོར་དུང་ཕྱུར་བཞི་ལྷག་བརྩོན་ལེན་བྱས་པ་དེ་དུས་མཚུངས་ལས་སྒོར་བྱེ་བ་གཅིག་ས་ཡ་གཉིས་འབུམ་བདུན་ཁྲི་དགུ་འཕར་སྣོན་བྱུང་ནས། ལོ་རྒྱུས་ཀྱི་ཟིན་ཐོ་གསར་པ་བསྐྲུན།     ལས་གཞི245ལག་བསྟར་བྱས་ཏེ།  “དམངས་འཚོའི་ལས་གཞི”དང“བདེ་སྐྱིད་བཟོ་འགོད”མང་པོ་སྒྲུབ་པ་དང་།  ཆ་རྐྱེན་འཛོམས་པའི་ཁེ་ལས28ལ་སྐྱེད་ཀ་སྤྲོད་པའི་མ་དངུལ་སྒོར་བྱེ་བ་གཅིག་ས་ཡ་ལྔ་ལྷག་དངོས་འབེབས་བྱས། མ་དངུལ་སྒོར་བྱེ་བ་གཅིག་ས་ཡ་བརྒྱད་འབུམ་གསུམ་ལྷག་བཀོད་སྒྲིག་བྱས་ཏེ། མང་ཚོགས་འབུམ་གསུམ་དང་ཁྲི་ལྔ་ལ་ཕན་ཁེ་བསྐྲུན། མ་དངུལ་སྒོར་ས་ཡ་བཞི་འབུམ་གཅིག་ཁྲི་ལྔ་བཏང་ནས་ས་གནས་མཉམ་འབྲེལ་གྱི་རོགས་སྐྱོར་སྡེ་བས་ཐོན་ལས་འཕེལ་རྒྱས་གཏོང་བ་སོགས་ཀྱི་ལས་གཞི་ལག་བསྟར་བྱེད་པའི་ཐད་བཀོལ།

མི་རིགས་སོ་སོའི་བར་གྱི་འགྲོ་འོང་དང་། བརྗེ་རེས། མཉམ་འདྲེས་བཅས་གཏིང་ཟབ་ཏུ་བཏང་། བྱ་སྤྱོད་ཁག་བཅུ་ལག་བསྟར་བྱས་པ་དང་། མཚོ་སྔོན་ལ་རོགས་སྐྱོར་བྱེད་པའི་ཞིང་ཆེན་དང་གྲོང་ཁྱེར་གྱིས་མ་དངུལ་སྒོར་དུང་ཕྱུར་གཉིས་དང་བྱེ་བ་གཅིག་ས་ཡ་ལྔ་བཏང་སྟེ། རིགས51གི“ མཉམ་འདྲེས་གསུམ”གྱི་ལས་གཞི་ལག་བསྟར་བྱས་པ་དེ་དུས་མཚུངས་ལས་སྒོར་དུང་ཕྱུར་གཅིག་དང་བྱེ་བ་གཉིས་ས་ཡ་གཉིས་འཕར་སྣོན་བྱུང་བ་དང་།  ཕྱོགས་ཡོངས་དང་གཞི་ཁྱོན་ཆེ་བ། གཏིང་ཟབ་པ་བཅས་ཀྱི་འགྲོ་འོང་བརྗེ་རེས་ཀྱི་ལག་ལེན་ཁྲོད།  མི་སེམས་གཅིག་སྒྲིལ་བྱས་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་རྒྱུན་ཆད་མེད་པར་སྲ་བརྟན་དུ་བཏང་།  “སེ་འབྲུ་དམར་པོའི་ལས་ཞུགས་འགུལ་སྐྱོད” སྤེལ་ཏེ་ལས་མི་ཁྲི་གཅིག་སྟོང་གཉིས་ལྷག་ཅང་སུའུ་རུ་ལས་ཞུགས་ལས་གཏོད་བྱེད་པར་མངགས།

དཔེ་སྟོན་ཞིང་ཆེན་བསྐྲུན་པར་གྲུབ་འབྲས་མངོན་གསལ་ཐོབ། རྒྱལ་ཡོངས་ཀྱི་ཚད་གཞི་ལས་མཐོ་བ་དང་རྒྱལ་ཡོངས་ཀྱི་བླང་བྱ་ལས་ནན་མོ་ཡིན་པའི་ངོས་ནས། 《མཚོ་སྔོན་ཞིང་ཆེན་གྱི་མི་རིགས་མཐུན་སྒྲིལ་ཡར་ཐོན་དཔེ་སྟོན་གསར་འཛུགས་ཚད་ལེན་གདེང་འཇོག་དང་དམིགས་ཚད་མ་ལག（ཚོད་ལྟའི་ལག་བསྟར）》བཏོན་ནས་ལག་བསྟར་བྱས་པ་དང་།   ཡུལ་ཚོ་དང་གྲོང་རྡལ། ལས་ཁུངས། ཁེ་ལས། སྡེ་ཁུལ། སློབ་གྲྭ ཆོས་ལུགས་བྱ་འགུལ་སྤེལ་ཡུལ་སོགས་རིགས་དབྱེའི་དཔྱད་ཞིབ་ཀྱི་དམིགས་ཚད་དྲུག་གཏན་འབེབས་བྱས་པ་དང་།  ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་པོ་འཛུགས་པའི་བྱ་བའི་བསམ་འཆར་ཞིབ་འཇུག་བྱས་ནས་གཏན་འབེབས་བྱས།

རང་རྒྱལ་གྱི་ཆོས་ལུགས་ཀྲུང་གོ་ཅན་གྱི་མཚོ་སྔོན་གྱི་ལག་ལེན་སྤེལ་བར་གོམ་པ་བརྟན་པོ་སྤོས་པ་དང་།   མཚོ་སྔོན་གྱི་ཆོས་ལུགས་ལས་དོན་དོ་དམ་ཞབས་ཞུའི་ལས་སྟེགས་འཛུགས་སྐྲུན་བྱེད་པར་སྐུལ་འདེད་བཏང་། ཆོས་ལུགས་ལས་བྱེད་མི་སྣ་དང་ཆོས་ལུགས་བྱ་འགུལ་སྤེལ་སའི“བཅའ་ཁྲིམས་ཀྱི་ཤེས་བྱ་ངེས་ཅན་ལྡན་པའི་མི་སྣའི”གསོ་སྦྱོང་འཛིན་གྲྭ་དང་། “ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་ཀྱི་སློབ་ཁང་ཆེན་པོ”སོགས་སྒྲུབ་པ་དང་། ཆོས་ལུགས་ལས་རིགས་ཀྱི་མི་སྣར་སློབ་གསོ་དང་ཁྲིད་སྟོན་བྱས་ཏེ་ཆབ་སྲིད་ཀྱི་བྱང་ཚད་མཐོ་རུ་བཏང་ནས་མཚོ་སྔོན་གྱི་སྤུས་ཚད་མཐོ་བའི་འཕེལ་རྒྱས་ལ་སྟོབས་ཤུགས་ཕུལ་ཡོད།