དབྱི་སི་རལ་གྱི་དམག་དཔུང་གིས་ཧུའུ་སེ་དྲག་ཆས་པའི་འཕུར་མདའ་བཅུ་ཕྲག་འགའ་དང་མི་མེད་གནམ་གྲུ་བརྒྱ་ལྷག་བཀག་འགོག་བྱས་པའི་ཚུལ་བསྟན།

དབྱི་སི་རལ་གྱི་རྒྱལ་སྲུང་དམག་དཔུང་གིས་ཚེས9ཉིན་གསལ་སྒྲོག་སྤེལ་ཏེ། 2023ལོའི་ཟླ10བའི་ཚེས7ཉིན་གྱི་སྐོར་ཐེངས་གསར་བའི་ཕཱ་ལེ་སི་ཐན་དང་དབྱི་སི་རལ་གྱི་འཁྲུག་རྩོད་བྱུང་བའི་ཚུན་ལ། དབྱི་སི་རལ་གྱི་དམག་དཔུང་གིས་ཡེ་མིན་གྱི་ཧུའུ་སེ་དྲག་ཆས་པས་དབྱི་སི་རལ་དུ་གཏོང་འཕེན་བྱས་པའི་འཕུར་མདའ་བཅུ་ཕྲག་འགའ་དང་མི་མེད་གནམ་གྲུ་བརྒྱ་ལྷག་བཀག་འགོག་བྱས་ཡོད་ཟེར།

གསལ་སྒྲོག་ལས་བཤད་རྒྱུར། འཁྲུག་རྩོད་བྱུང་བའི་ཚུན་ལ། ཧུའུ་སེ་དྲག་ཆས་པས་ཡེ་མིན་ནས་དབྱི་སི་རལ་དུ་འཕུར་མདའ40ཙམ་གཏོང་འཕེན་བྱས་པ་དང་། དབྱི་སི་རལ་གྱི་མཁའ་སྲུང་མ་ལག་གིས་དབྱི་སི་རལ་གྱི་མངའ་ཁོངས་སུ་ཉེ་བའི་འཕུར་མདའ་མང་ཆེ་བཀག་ཡོད། ཧུའུ་སེ་དྲག་ཆས་པས་དབྱི་སི་རལ་དུ་མི་མེད་གནམ་གྲུ320ཙམ་བཏང་བ་དང་། དབྱི་སི་རལ་གྱི་དམག་དཔུང་གིས་མི་མེད་གནམ་གྲུ100ལྷག་བཀག་ཡོད། མིག་སྔའི་བར་དུ་ཐེངས་གཉིས་ལ་ཕན་ནུས་ལྡན་པའི་རྒོལ་ལན་སྤྲད་པ་དང་། མི་མེད་གནམ་གྲུ་གཞན་པ་དག་མི་མེད་ཀྱི་ས་སྟོང་དུ་ལྷུང་བའམ་དབྱི་སི་རལ་གྱི་མངའ་ཁོངས་སུ་བསླེབས་མེད་པས། གྱོང་གུད་ཚབས་ཆེན་བཟོས་མེད་ཟེར།

གསལ་སྒྲོག་ལས་བཤད་རྒྱུར། ཉེ་བའི་ཟླ་ངོ་འགའི་རིང་ལ་ཧུའུ་སེ་དྲག་ཆས་པས་འཕུར་མདའ་དང་མི་མེད་གནམ་གྲུ་བཀོལ་ནས་དབྱི་སི་རལ་ལ་བར་སྣང་འཇབ་རྒོལ་ཐེངས་བཅུ་ཕྲག་འགའ་སྤེལ་ཡོད་ཟེར།