དིང་རི། རིགས་ཀྱི་འཕར་རྩ་གཅིག་པའི་དིང་རི། ཁམས་པ་རབ་དབྱངས། ཡུལ་ཤུལ།

དིང་རི།  རིགས་ཀྱི་འཕར་རྩ་གཅིག་པའི་དིང་རི། 

ཁམས་པ་རབ་དབྱངས། ཡུལ་ཤུལ། 

མི་ཡུལ་གྱི་ནམ་མཁའ་དྭངས་མོ་དེ།

རྡུལ་འཚུབ་སྐྱ་ལམ་ལམ། 

སྟོང་ཞིང་འཇགས་པའི་རི་གྲོང་འདི་ནས། 

སྐྱོ་གདུང་གི་མིག་ཆུ་རེ་རེའང་།

ས་གཞི་འདིའི་པང་དུ་འཐོར་དགོས་བྱུང་། 

གདུང་སེམས་ཀྱི་འཁྲི་བ་འདི།

ཁྱོད་དང་ང་ཡི་སེམས་ལ་ལྷུང་དུས།

ཧི་མ་ལའི་རི་རྒྱུད་དུ་བབས་སོང་།

ཡར་འབྲོག་གཡུ་མཚོའི་རླབས་སྒྲ་ལ་འཕྱོ་སོང་།

དིང་རི། ལ་སྟོད་ཉི་མའི་བྱང་ཕྱོགས་སུ། 

རིགས་ཀྱི་འཕར་རྩ་གཅིག་ཏུ་སྦྲེལ་བའི་དིང་རི།

སྐྱེ་འཆི་ཟློས་གར་གྱི་རླུང་འཚུབ་འདི།

ཁྱེད་ཀྱི་མགོ་ཐོག་ཏུ་ལྷུང་དགོས་དོན་གང་ཡིན་ནམ། 

སྐྱོ་གདུང་གི་ན་བུན་དེ་དག

རི་རབ་ལས་ཀྱང་ལྕི་སོང་།  

གངས་རིའི་ཉེ་འདབས་ཀྱི་ཁྱོད་དང་ང་ཡི་གཞིས་ཀ

ལྷིང་འཇགས་ཀྱི་གནས་ལམ་དྲོད་མོ་དེ།

དོ་ནུབ་ས་རྡུལ་གྱི་མུན་པ་འཐིབས་སོང་།

ང་ཡི་ཤ་ཁྲག་ཁྱོད་དང་འབྲེལ་ཡོད།

ང་ཡི་སེམས་པ་ཁྱོད་དང་འབྲེལ་ཡོད།

མི་ཡུལ་འདི་ནས་བྲལ་ཟིན་པའི་ཁྱོད་ཚོ།

གཏན་དུ་གནས་མལ་འདི་ནས་བྲལ་བ་ཡིན་ནམ།

ང་ཡི་དིང་རི་བའི་སྤུན་ཟླ་དག 

               2025.1.7ཉིན།