ལེ་པཱ་ནུན་གྱི་དམག་དཔུང་གི་སྤྱི་ཁྱབ་དམག་སྤྱི་ཨོ་ཨིན་གྱིས་ལེ་པཱ་ནུན་གྱི་ཙུང་ཐུང་གི་འགན་ཁུར།

ལེ་པཱ་ནུན་རྒྱལ་ཁབ་འཕྲིན་གཏོང་ཁང་གིས་བསྒྲགས་པ་ལྟར་ན། ལེ་པཱ་ནུན་གྱི་དམག་དཔུང་གི་སྤྱི་ཁྱབ་དམག་སྤྱི་ཨོ་ཨིན་གྱིས་ཚེས9ཉིན་སྐབས་བཅུ་བཞི་བའི་ཙུང་ཐུང་གི་འགན་ཁུར་ཟེར།

ཨོ་ཨིན་གྱིས་དམ་བཅའ་བཞག་སྟེ་ལས་འགན་ཁུར་བའི་སྐབས་སུ་བསྟན་དོན། མ་འོངས་པར་བཅོས་བསྒྱུར་བྱེད་ཐབས་རབ་དང་རིམ་པ་བཏོན་ནས། ལེ་པཱ་ནུན་མི་དམངས་ཀྱི་ཁེ་དབང་ལ་སྲུང་སྐྱོབ་དང་རྒྱལ་ཁབ་ཀྱི་འཕེལ་རྒྱས་ལ་སྐུལ་འདེད་གཏོང་རྒྱུ་ཡིན་ཟེར།

ཨོ་ཨིན་གྱིས་བཤད་རྒྱུར། ཁོས་རྒྱལ་ཁབ་ལས་ཁུངས་ཀྱི་སྙན་གྲགས་སླར་གསོ་བྱེད་པར་འབད་འབུངས་བྱེད་རྒྱུ་ཡིན་ལ། བདེ་འཇགས་དམག་དཔུང་གི་ནུས་པར་ཤུགས་སྣོན་པ་དང་རྒྱལ་ཁབ་ཀྱི་བདག་དབང་ལ་སྲུང་སྐྱོབ་བྱེད་རྒྱུ་མ་ཟད། ལེ་པཱ་ནུན་དང་ཁྱིམ་མཚེས་རྒྱལ་ཁབ་བར་གྱི་འབྲེལ་བར་གསོན་ཤུགས་གསར་བ་རྒྱས་སུ་འཇུག་རྒྱུ་ཡིན་ཟེར།

ཨོ་ཨིན་གྱིས་བསྟན་དོན། ལེ་པཱ་ནུན་གྱིས་སྒོ་འབྱེད་དང་འདྲ་མཉམ་གྱི་རྩ་དོན་གྱིས་ཤར་ནུབ་ཕྱོགས་ཀྱི་རྒྱལ་ཁབ་བར་ཡིད་ཆེས་མཉམ་ལས་འཛུགས་རྒྱུ་ཡིན་ཟེར། ཁོས་བཤད་རྒྱུར། ང་ཚོས་དབུས་གནས་ཀྱི་རྣམ་འགྱུར་བཟུང་སྟེ་ཨ་རབ་རྒྱལ་ཁབ་བར་འབྲེལ་བ་བཟང་བོ་འཛུགས་རྒྱུ་ཡིན་པ་དང་། ཞོར་དུ་རྒྱལ་ཁབ་ཀྱི་སྣང་བརྙན་སླར་གསོ་བྱེད་རྒྱུ་ཡིན་ཟེར།

དབྱི་སི་རལ་གྱི་ཕྱི་འབྲེལ་པུའུ་ཀྲང་སཱ་ཨར་གྱིས་ཚེས9ཉིན་དྲ་ཐོག་ཏུ་རྩོམ་ཡིག་སྤེལ་ནས། ལེ་པཱ་ནུན་གྱིས་དུས་ཡུན་རིང་བོའི་ཆབ་སྲིད་ཉམས་ཉེན་གྱི་རྗེས་སུ་ཙུང་ཐུང་གསར་བ་བདེ་བླག་ངང་བདམས་ཐོན་བྱུང་བར་རྟེན་འབྲེལ་ཞུས་པ་དང་། གདམ་གསེས་དེས་གཏན་འཇགས་ལ་སྐུལ་འདེད་བཏང་སྟེ། ལེ་པཱ་ནུན་དང་དེའི་མི་དམངས་ཀྱིས་སྔར་ལས་མཛེ་སྡུག་ལྡན་པའི་མ་འོངས་པར་གསར་བསྐྲུན་བྱེད་པ་དང་ཁྱིམ་མཚེས་རྒྱལ་ཁབ་བར་གྱི་འབྲེལ་བ་བཟང་བོར་ཡར་སྐུལ་བྱེད་ཐུབ་པའི་སྨོན་འདུན་ཞུས།