མཚོ་སྔོན་གྱིས་ལུགས་གསར་དང་ལུགས་རྙིང་ལོ་གསར་སྐབས་ཀྱི་དམིགས་བསལ་སྒྲིག་ཆས་བདེ་འཇགས་བྱ་བར་ལྟ་ཞིབ་བྱས།

ཟླ1པོའི་ཚེས6ཉིན། མཚོ་སྔོན་ཞིང་ཆེན་ཁྲོམ་རའི་ལྟ་སྐུལ་དོ་དམ་ཅུའུ་ཡི་འབྲེལ་ཡོད་འགན་ཁུར་མི་སྣས་ངོ་སྤྲོད་བྱས་རྒྱུར། ད་ལོའི་ལོ་མཇུག་དང་སང་ལོའི་ལོ་མགོ། ལུགས་གསར་དང་ལུགས་རྙིང་སྐབས་ཀྱི་དམིགས་བསལ་སྒྲིག་ཆས་བདེ་འཇགས་ལྟ་སྐུལ་དོ་དམ་ལ་སྔར་ལས་ཤུགས་སྣོན་བྱེད་ཆེད། ཉེ་སྔོན། ཞིང་ཆེན་ཁྲོམ་རའི་ལྟ་སྐུལ་དོ་དམ་ཅུའུ་ཡི་འགན་ཁུར་བློ་མཐུན་གྱིས་རུ་ཁག་ཁྲིད་དེ་ཟི་ལིང་གྲོང་ཁྱེར་དང་མཚོ་ཤར་གྲོང་ཁྱེར་ལ་སོང་ནས་དམིགས་བསལ་སྒྲིག་ཆས་བདེ་འཇགས་བྱ་བར་ལྟ་སྐུལ་ཞིབ་བཤེར་བྱས་ཤིང་། ལྟ་ཞིབ་ཚན་ཆུང་སྔ་ཕྱིར་དམིགས་བསལ་སྒྲིག་ཆས་བེད་སྤྱོད་ལས་ཁུངས་འགའ་དང་བཟའ་བཏུང་ཁེ་ལས་ཆུང་གྲས་སུ་སོང་ནས་གློག་སྐས་དང་འབར་རླངས། ཁྲོ་ཐབ། ལྗིད་འདེགས་འཕྲུལ་ཆས། གཤེར་གཟུགས་རྡོ་སྣུམ་སོགས་ཀྱི་བེད་སྤྱོད་དོ་དམ་གནས་ཚུལ་ལ་ཞིབ་བཤེར་བྱས་པ་དང་། དམིགས་བསལ་སྒྲིག་ཆས་བདེ་འཇགས་བྱ་བར་ཤུགས་སྣོན་པར་ཞིབ་ཕྲའི་བླང་བྱ་བཏོན།

ལྟ་ཞིབ་ཚན་ཆུང་གིས་ནན་གྱིས་བསྟན་དོན། ད་ལོའི་ལོ་མཇུག་དང་སང་ལོའི་ལོ་མགོའི་དུས་མཚམས་གལ་ཆེན་ལ་བདེ་འཇགས་ཐོན་སྐྱེད་ཉེན་ཁའི་མི་མངོན་པའི་རྐྱེན་ངན་རིགས་མང་པོ་ཡོད་པས། བདེ་འཇགས་ཐོན་སྐྱེད་ཀྱི་གནས་བབ་སྔར་ལས་ཛ་དྲག་ཆེ། ཞིང་ཆེན་ཡོངས་ཀྱི་རིམ་པ་སོ་སོའི་ཁྲོམ་རའི་ལྟ་སྐུལ་དོ་དམ་སྡེ་ཁག་གིས་ས་གནས་དེའི་དམིགས་བསལ་སྒྲིག་ཆས་ཀྱི་བདེ་འཇགས་གནས་བབ་ལ་དབྱེ་ཞིབ་བརྡར་གཅོད་ནན་མོ་བྱེད་ཅིང་། ལག་བསྟར་བྱེད་ཐུབ་པའི་དོ་དམ་ཚོད་འཛིན་བྱེད་ཐབས་དབྱེ་ཞིབ་དང་གཏན་འབེབས་བྱེད་པ་དང་། དམིགས་བསལ་སྒྲིག་ཆས་ཐོན་སྐྱེད་བེད་སྤྱོད་ལས་ཁུངས་སོ་སོས་ཐོན་སྐྱེད་འགན་འཁྲི་གཙོ་བོ་དངོས་འབེབས་ནན་མོ་བྱེད་པར་ལྟ་སྐུལ་བྱས་ཏེ། བདེ་འཇགས་ཉེན་ཁའི་མི་མངོན་པའི་རྐྱེན་ངན་ལ་རང་འགུལ་སྒོས་ཞིབ་བཤེར་བྱེད་པ་དང་། ཉེན་ཁ་དང་བདེ་འཇགས་ཀྱི་མི་མངོན་པའི་རྐྱེན་ངན་དུས་ཐོག་ཏུ་སེལ་ནས། ནུས་ཤུགས་ཡོད་རྒུས་ད་ལོའི་ལོ་མཇུག་དང་སང་ལོའི་ལོ་མགོའི་དམིགས་བསལ་སྒྲིག་ཆས་བདེ་འཇགས་བྱ་བ་ལེགས་པོར་བསྒྲུབ་དགོས།

ལྟ་ཞིབ་ཚན་ཆུང་གིས་ད་ལོའི་ལོ་མཇུག་དང་སང་ལོའི་ལོ་མགོ་དང་དུས་ཆེན་སྐབས་ཀྱི་དམིགས་བསལ་སྒྲིག་ཆས་བེད་སྤྱོད་ཀྱི་ཁྱད་ཆོས་ལ་དམིགས་ནས། ཞིང་ཆེན་ཡོངས་ཀྱི་རིམ་པ་སོ་སོའི་ཁྲོམ་རའི་ལྟ་སྐུལ་དོ་དམ་སྡེ་ཁག་གིས་ཁྱབ་ཁོངས་གཙོ་བོ་དང་ཁེ་ལས་གཙོ་བོ། སྒྲིག་ཆས་གཙོ་བོ་བཅས་ལ་དམ་པོར་དམིགས་པ་དང་། དམིགས་བསལ་སྒྲིག་ཆས་བདེ་འཇགས་ཀྱི་མི་མངོན་པའི་རྐྱེན་ངན་གྲལ་བཤེར་བཅོས་སྐྱོང་ལ་རྒྱུན་མཐུད་སྒོས་སྐུལ་འདེད་གཏོང་དགོས། དམིགས་བསལ་སྒྲིག་ཆས་ཐོན་སྐྱེད་བེད་སྤྱོད་ལས་ཁུངས་ཀྱིས་ཁྲིམས་ལུགས་ཁྲིམས་སྲོལ་དང་དམིགས་བསལ་སྒྲིག་ཆས་ཀྱི་ཆག་སྒོ་ཚབས་ཆེན་འབྱུང་བའི་མི་མངོན་པའི་རྐྱེན་ངན་བརྡར་གཅོད་ཚད་གཞི་ལྟར་རང་འགུལ་སྒོས་མི་མངོན་པའི་རྐྱེན་ངན་གྲལ་བཤེར་བྱ་བ་བསྒྲུབ་པར་ལྟ་སྐུལ་མཛུབ་སྟོན་བྱེད་པ་དང་། དུས་ཆེན་སྐབས་ཀྱི་དམིགས་བསལ་སྒྲིག་ཆས་བདེ་འཇགས་འགན་སྲུང་ལ་ཤུགས་སྣོན་པ། མི་ཚོགས་འདུས་སྡོད་ཆེ་སའི་ཉེན་ཁའི་མི་མངོན་པའི་རྐྱེན་ངན་གྲལ་བཤེར་བྱེད་ཚད་ལ་ཤུགས་སྣོན་པ། དམིགས་བསལ་སྒྲིག་ཆས་འཁོར་རྒྱུག་བེད་སྤྱོད་ལས་ཁུངས་ཀྱིས་གློག་སྐས་དང་རོལ་རྩེད་སྒྲིག་ཆས་ཆེ་ཤོས། ཡུལ་སྐོར་ལྟ་སྐོར་རླངས་འཁོར་སོགས་དམིགས་བསལ་སྒྲིག་ཆས་ལ་སྐོར་ཞིབ་བྱེད་པར་ཤུགས་སྣོན་པ། བྱེད་ཐབས་ནུས་ལྡན་སྤྱད་དེ་དྲོད་ཚད་དམའ་བའི་ནམ་ཟླའི་རྐྱེན་གྱིས་སྒྲིག་ཆས་འཁོར་རྒྱུག་རྒྱུན་ལྡན་མིན་པར་སྔོན་འགོག་བྱེད་པ། དམིགས་བསལ་སྒྲིག་ཆས་ཀྱི་འཕྲལ་བསྟུན་ཐག་གཅོད་བྱ་བར་ཤུགས་སྣོན་པ། མགོ་ཁྲིད་ལས་བྱེད་པས་ལས་གནས་སྲུང་བ་དང་། ལས་གནས་གཙོ་བོའི་ཆུ་ཚོད་ཉེར་བཞིའི་རིང་གི་ལས་རེས་ལམ་ལུགས་ལག་བསྟར་བྱེད་པ། གླེང་ཕྱོགས་ལྟ་ཞིབ་དང་ཆ་འཕྲིན་བརྒྱུད་བསྐུར་ལ་ཤུགས་བསྣན་ནས། གློ་བུར་དོན་རྐྱེན་དུས་ཐོག་ཏུ་ཐག་གཅོད་འོས་འཚམ་བྱེད་དགོས་པའི་བླང་བྱ་བཏོན།