ཀྲང་གོ་ཆིང་བོད་ལྗོངས་སུ་སོང་ནས་ཡོམ་འགོག་རྒུད་སྐྱོབ་བྱ་བར་མཛུབ་སྟོན་བྱས།
སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་དང་ཙུང་ལི་ལིས་ཆང་གི་རེ་བ་ལྟར། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཀྲང་གོ་ཆིན་གྱིས་ཚེས7ཉིན་འབྲེལ་ཡོད་སྡེ་ཁག་གི་འགན་ཁུར་བློ་མཐུན་ཁྲིད་དེ་བོད་ལྗོངས་གཞིས་ཀ་རྩེའི་ས་ཡོམ་གནོད་ཐེབས་ས་ཁུལ་གྱི་ཡུལ་དངོས་སུ་སོང་ནས་འཕྲལ་བསྟུན་རོགས་སྐྱོབ་ཐག་གཅོད་བྱ་བར་མཛུབ་སྟོན་བྱས།
ཀྲང་གོ་ཆིང་གཞིས་ཀ་རྩེ་ལ་ཐོན་མ་ཐག་མྱུར་དུ་གནོད་པ་ཐེབས་ཚད་ཆེ་ཤོས་དིང་རི་རྫོང་གྲམ་སོ་ཡུལ་ཚོའི་གནོད་སྐྱོབ་ཐག་གཅོད་ཡུལ་དངོས་དང་གནས་སྐབས་བཀོད་སྒྲིག་ཡུལ་དངོས། སྨན་ཁང་བཅས་ལ་སོང་ནས། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཚབ་བྱས་ཏེ་གནོད་ཐེབས་མང་ཚོགས་དང་རྨས་མ་རྣམས་ལ་འཚམས་འདྲི་བྱས་པ་དང་། མི་སྣ་འཚོལ་སྐྱོབ་དང་སྨན་བཅོས་སྐྱོབ་བཅོས། དངོས་ཟོག་འགན་སྲུང་། འཚོ་བའི་བཀོད་སྒྲིག གནོད་ཐེབས་སྒྲིག་ཆས་ཉམས་གསོ་སོགས་ཀྱི་གནས་ཚུལ་ལ་ཞིབ་ལྟ་བྱས། དེའི་རྗེས་སུ་མགོ་འཛིན་བྱས་ནས་གྲོས་ཚོགས་བསྡུས་ཏེ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་དང་ཙུང་ལི་ལིས་ཆང་གི་རེ་བ་བརྒྱུད་སྒྲོག་བྱས་པ་དང་། གོ་རིམ་རྗེས་མའི་གནོད་འགོག་རྒུད་སྐྱོབ་བྱ་བར་ཞིབ་འཇུག་དང་བཀོད་སྒྲིག་བྱས། ཀྲང་གོ་ཆིང་གིས་བསྟན་དོན། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་བོད་ལྗོངས་གཞིས་ཀ་རྩེའི་ས་ཡོམ་གནས་ཚུལ་ལ་ཧ་ཅང་མཐོང་ཆེན་གནང་བཞིན་ཡོད་པ་དང་། གནོད་ཐེབས་མང་ཚོགས་ལ་ཐུགས་ཁྲལ་ཆེན་པོ་གནང་བཞིན་ཡོད་ལ། ས་ཡོམ་བྱུང་རྗེས་མྱུར་བ་མྱུར་དུ་མཆན་བཀོད་མཛུབ་སྟོན་གལ་ཆེན་གནང་བ་དང་། ཙུང་ལི་ལིས་ཆང་གིས་ཉེན་སེལ་རོགས་སྐྱོབ་དང་ས་ཡོམ་གནས་ཚུལ་ལྟ་ཞིབ། གནོད་ཐེབས་མང་ཚོགས་ཀྱི་འཚོ་བའི་འགན་སྲུང་སོགས་ཐད་བཀོད་སྒྲིག་བཟང་བོ་མཛད་པ་དང་། རེ་བ་གསལ་བོ་བཏོན་ཡོད། བོད་ལྗོངས་དང་འབྲེལ་ཡོད་ཕྱོགས་སོ་སོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་དང་ཙུང་ལི་ལིས་ཆང་གི་རེ་བ་མཐའ་གཅིག་ཏུ་ལག་ལེན་དོན་འཁྱོལ་བྱེད་པ་དང་། བླ་ན་མེད་པ་གཉིས་རྒྱུན་འཁྱོངས་བྱེད་པ། མུ་མཐུད་དུ་ནུས་ཤུགས་ལྡན་པ་དང་གོ་རིམ་ལྡན་པའི་སྒོ་ནས་འཕྲལ་བསྟུན་རོགས་སྐྱོབ་སྤེལ་བ་དང་། ཚད་ཆེས་ཆེ་བའི་སྒོ་ནས་མི་སྣ་འཆི་རྨས་འབྱུང་ཚད་དང་གནོད་འཚེའི་གྱོང་གུན་ཐེབས་ཚད་ཇེ་ཉུང་དུ་གཏོང་ཐབས་བྱེད་དགོས།
ཀྲང་གོ་ཆིང་གིས་ནན་གྱིས་བསྟན་དོན། མུ་མཐུད་དུ་སྟོབས་ཤུགས་ཡོད་ཚད་བཏོན་ནས་མི་སྣ་འཚོལ་སྐྱོབ་བྱས་ཏེ། མི་གཅིག་ཀྱང་མི་ལུས་པར་ཁག་ཐེག་བྱེད་དགོས། སྟོབས་ཤུགས་གང་ཡོད་ཀྱིས་རྨས་མར་སྐྱོབ་བཅོས་བྱེད་པ་དང་། འབད་བརྩོན་ལྷོད་མེད་ཀྱིས་རྨས་ཕོག་ནས་དབང་བོ་སྐྱོན་ཅན་དུ་འགྱུར་ཚད་ཇེ་ཉུང་དུ་གཏོང་དགོས། མགྱོགས་མྱུར་གཟབ་ནན་སྒོས་དྲོད་འཛིན་དྲོད་འདོན་བྱ་བ་བཟང་བོར་སྒྲུབ་པ་དང་། མགྱོགས་མྱུར་སྒོས་དྲོད་འཛིན་དྲོད་འདོན་སོགས་ཀྱི་འཚོ་བའི་དངོས་ཟོག་འདང་ཚད་བསྡུ་རུབ་བྱས་ནས། གནོད་ཐེབས་མང་ཚོགས་ཚང་མའི་གཞི་རྩའི་འཚོ་བ་བཀོད་སྒྲིག་བྱེད་དགོས། ཡོམ་འཕྲོའི་ལྟ་ཞིབ་ཉེན་བརྡར་ཤུགས་སྣོན་པ་དང་། གནོད་རྗེས་བསྐྱར་འཛུགས་བྱ་བ་མྱུར་མོར་སྤེལ་ནས། འཕྲལ་བསྟུན་བར་བརྒལ་དུས་སྐབས་སུ་གནོད་ཐེབས་མང་ཚོགས་ཚང་མ་དུས་ཐོག་ཏུ་སྦྲ་གུར་ནང་སྡོད་ཐུབ་པར་ཁག་ཐེག་བྱེད་དགོས། འབྲེལ་ཡོད་སྡེ་ཁག་གིས་མུ་མཐུད་དུ་རྒྱབ་སྐྱོར་བྱེད་ཤུགས་ཇེ་ཆེར་གཏོང་བ་དང་བྱ་བ་སྤེལ་ཚད་ཇེ་མགྱོགས་སུ་བཏང་ནས། གནོད་ཐེབས་མང་ཚོགས་སྔ་མོ་ནས་བདེ་འཇགས་དྲོད་ལྡན་གྱི་ཁང་བའི་ནང་འདུག་ཐུབ་པར་ཁག་ཐེག་བྱེད་དགོས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注