མཚོ་སྔོན་མི་རིགས་སློབ་ཆེན་དུ་སློབ་གླིང་གཉིས་གསར་དུ་བཙུགས་པ།

 ཟླ་དང་པོའི་ཚེས6ཉིན་དེང་རབས་མཐོ་སྒང་སྐྱེ་དངོས་སྨན་རྫས་ཐོན་ལས་སློབ་གླིང་དང་གྲངས་འཛིན་རིག་གནས་ཡུལ་སྐོར་ཐོན་ལས་སློབ་གླིང་དངོས་སུ་བཙུགས་པ་དང་། དེས་མཚོ་སྔོན་མི་རིགས་སློབ་ཆེན་གྱིས་སློབ་གསོ་དང་སློབ་ཁྲིད་བཅོས་བསྒྱུར་ལ་སྐུལ་འདེད་གཏོང་བ་དང་། ཐོན་སྐྱེད་དང་སློབ་གསོ་མཉམ་འདྲེས་གཏིང་ཟབ་ཏུ་གཏོང་བའི་ཐད་གོམ་པ་བརྟན་པོ་ཞིག་སྤོས་ཤིང་། སློབ་གྲྭ་དང་ཁེ་ལས་མཉམ་ལས། ཚན་རིག་ཞིབ་འཇུག་གསར་གཏོད་ཀྱི་དུས་རབས་ཀྱི་བླང་བྱ་དང་མཐུན་པ་མཚོན།

སློབ་གླིང་གཉིས་ཀྱིས་རང་ཞིང་གི་མཐོ་སྒང་སྐྱེ་དངོས་སྨན་རྫས་དང་གྲངས་འཛིན་རིག་གནས་ཡུལ་སྐོར་ཐོན་ལས་འཕེལ་རྒྱས་ཐད་ཀྱི་འགག་གནད་དང་དཀའ་གནད་བཅས་ཀྱི་གནད་དོན་གཙོ་བོར་སྔོག་འདོན་གཏིང་ཟབ་བྱས་ཏེ། བརྟག་དཔྱད་ཞིབ་འཇུག་དང་ཚན་རིག་ཞིབ་འཇུག་གསར་གཏོད་སོགས་ཀྱི་ལས་དོན་སྤེལ་བ་དང་།　ཐོན་སྐྱེད་དང་སློབ་གསོ་མཉམ་འདྲེས་སྔར་ལས་གཏིང་ཟབ་ཏུ་བཏང་ནས་ཧུར་ཐག་སྒོས་ཞིང་ཆེན་ཕྱི་ནང་གི་ཁེ་ལས་དང་མཉམ་ལས་བྱས་ཐོག དགོས་མཁོ་དངོས་ཁྲིད་སྟོན་དུ་བྱེད་པ་དང་།　དངོས་སུ་ལག་བསྟར་བྱས་ནས་བེད་སྤྱོད་བྱ་རྒྱུ་དམིགས་འབེན་དུ་བྱས་ཏེ།　སློབ་གྲྭ་དང་ཁེ་ལས་མཉམ་ལས་ཀྱི་སྤུས་ཚད་དང་ཕན་འབྲས་ལ་ཤུགས་སྣོན་པ།　ཤེས་ལྡན་མི་སྣ་གསོ་སྐྱོང་བྱེད་སྟངས་གསར་གཏོད་དང་ཤེས་ལྡན་མི་སྣ་གསོ་སྐྱོང་གི་སྤུས་ཚད་མཐོ་རུ་གཏོང་བ།　དགེ་རྒན་དཔུང་ཁག་འཛུགས་སྐྱོང་བྱེད་ཤུགས་ཆེ་རུ་གཏོང་བ།　མི་མངོན་པའི་སྟོབས་ཤུགས་དང་རྨང་གཞི།　བསམ་ཚུལ་བཅས་ཡོད་པའི་གཞོན་ནུ་ཤེས་ལྡན་མི་སྣའི་དཔུང་ཁག་སྔོག་འདོན་བྱ་རྒྱུར་མཐོང་ཆེན་བྱས་ཏེ། ཆུ་ཚད་མཐོ་བའི་སློབ་ཁྲིད་ཚན་རིག་ཞིབ་འཇུག་ཚོགས་པ་རིམ་བཞིན་གསར་སྐྲུན་བྱ་རྒྱུ་རེད།

མཚོ་སྔོན་མི་རིགས་སློབ་ཆེན་གྱི་སློབ་གཙོ་ཀྲའོ་ཧའེ་ཞིན་གྱིས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཡང་དག་པའི་མགོ་ཁྲིད་འོག མཚོ་སྔོན་མི་རིགས་སློབ་ཆེན་གྱིས་སྔོན་དུ་ཇུས་འགོད་བྱེད་པ་དང་བློ་ཁོག་ཆེན་པོས་གསར་གཏོད་བྱས་ཏེ་མདུན་གྲལ་རིག་ཚན་འཛུགས་སྐྱོང་དང་ཚན་རིག་ཞིབ་འཇུག་ལས་དོན་ཧུར་ཐག་སྒོས་སྤེལ་བ་དང་། གཞོན་ནུ་ཤེས་ལྡན་མི་སྣ་གསོ་སྐྱོང་དང་རྩེར་སོན་ཤེས་ལྡན་མི་སྣ་ནང་འདྲེན་སོགས་ཀྱི་ལས་དོན་ལ་སྐུལ་འདེད་བཏང་སྟེ་གྲུབ་འབྲས་ངེས་ཅན་ཞིག་ཐོབ། མཚོ་སྔོན་མི་རིགས་སློབ་ཆེན་གྱིས་སྐྱེ་ཁམས་དཔལ་ཡོན་གྱི་མཐོ་ས་དང་ཐོན་ལས་ཀྱི“གནས་བཞི”འཛུགས་སྐྲུན་ལ་སྔར་ལས་ལྷག་པར་ཁ་ཕྱོགས་ནས། ཤེས་ལྡན་མི་སྣ་གསོ་སྐྱོང་དང་ཚན་རིག་ཞིབ་འཇུག ལག་རྩལ་གསར་གཏོད།　ཁེ་ལས་ཞབས་ཞུ།　སློབ་མའི་ལས་གཏོད་སོགས་ཀྱི་ལས་དོན་ལ་ཁྱོན་ཡོངས་ནས་ཤུགས་སྣོན་པ་དང་།　བརྒྱུད་རིམ་ཧྲིལ་པོར་གཞི་གཅིག་ཅན་དང་དཔེ་སྟོན་རང་བཞིན་གྱི་ཤེས་ལྡན་མི་སྣ་གསོ་སྐྱོང་གི་དངོས་ཚན་འཛུགས་སྐྱོང་ལས་དོན་ཆེ་རུ་གཏོང་བ་དང་།　ཐོན་ལས་དང་སློབ་གསོ་མཉམ་འདྲེས་ཀྱི་ཐབས་ལམ་གསར་པ་འཚོལ་ཞིབ་བྱས་པ་བརྒྱུད། ཐོན་ལས་ཀྱི་དགོས་མཁོ་དང་མཐུན་ཞིང་། གསར་གཏོད་ཀྱི་སྙིང་སྟོབས་དང་ལག་ལེན་ནུས་པ་ལྡན་པའི་ཕུལ་དུ་བྱུང་བའི་ཤེས་ལྡན་མི་སྣ་དེ་བས་མང་བ་གསོ་སྐྱོང་བྱ་རྒྱུ་ཡིན་པར་བསྟན།  །