པར་འདི་ནི་གཞིས་ཀ་རྩེ་གྲོང་ཁྱེར་གྲོ་མོ་རྫོང་ཕག་རི་གྲོང་རྡལ་སྡེ་ཁུལ་བཞི་བའི་ལོ70ཡན་གྱི་རྒན་འཁོགས་ཀྱི་དྲན་རྟེན་མཉམ་པར་རེད། 

པར་འདི་ནི་བོད་ལྗོངས་དང་ཁྲུང་ཆིན་ས་ཁུལ་གཉིས་ཀྱི་སློབ་མའི་མཛའ་མཐུན་རོགས་རེས་ཀྱི་རྣམ་པ་རེད།

བོད་ལྗོངས་ནི་མི་རིགས་མང་པོ་འདུས་སྡོད་ཀྱི་ས་ཁུལ་ཞིག་ཡིན་པས་མི་རིགས་མཐུན་སྒྲིལ་ནི་མི་རིགས་སོ་སོའི་མི་དམངས་ཀྱི་སྲོག་རྩ་ཡིན།   བོད་ལྗོངས་ཀྱི་མི་རིགས་སོ་སོའི་མི་དམངས་ཀྱིས་ཐོག་མཐའ་བར་གསུམ་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི“རང་ཉིད་ཀྱི་མིག་ལ་གཅེས་པ་ལྟར་མི་རིགས་མཐུན་སྒྲིལ་ལ་གཅེས་སྐྱོང་བྱེད་པ་དང་། རང་ཉིད་ཀྱི་ཚེ་སྲོག་ལ་གཅེས་པ་ལྟར་མི་རིགས་མཐུན་སྒྲིལ་ལ་གཅེས་སྤྲས་བྱེད་པ”ཞེས་པའི་ངག་བཅོལ་ཟབ་མོ་ཡིད་ལ་བརྟན་པོར་བཅངས་སྟེ།  “ལས་གཞི་ཆེན་པོ་བཞི”དང“བྱ་སྤྱོད་དྲུག”ལ་དམ་པོར་དམིགས་པ་དང་།  ཀྲུང་ཧྭ་མི་རིགས་ཀྱི་གཅིག་མཐུན་ཚོགས་པའི་འདུ་ཤེས་བརྟན་པོར་འཛུགས་རྒྱུ་དེ་གཙོ་གནད་དང་འཐབ་ཇུས་རང་བཞིན་གྱི་ལས་འགན་དུ་བྱེད་པ།  མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་ཁུལ་འཛུགས་རྒྱུ་དེ་གཞི་འཛིན་ས་བྱས་ཏེ་མི་རིགས་མཐུན་སྒྲིལ་ཡར་ཐོན་དང་འཆམ་མཐུན་གྱི་ལེའུ་ནུས་ཤུགས་ཡོད་རྒུས་འབྲི་དགོས།   

མིག་སྔའི་བར། གྲོང་ཁྱེར（ས་ཁུལ）7ཚང་མ་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་གྲོང་ཁྱེར（ས་ཁུལ）དུ་བཙུགས་པ་དང་།   རྫོང（ཆུས་དང་གྲོང་ཁྱེར）30རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་རྫོང（ཁུལ་དང་གྲོང་ཁྱེར）དུ་བསྐྲུན་པ།  སྡེ་ཚན54རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་ཚན་པར་བསྐྲུན་པ།  སྡེ་ཚན8ལ་རྒྱལ་ཡོངས་མི་རིགས་མཐུན་སྒྲིལ་ཡར་ཐོན་གྱི་སློབ་གསོའི་རྟེན་གཞིའི་མིང་བཏགས་པ།   སྡེ་ཚན་དང་མི་སྒེར668ལ་རང་སྐྱོང་ལྗོངས་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་ས་ཁུལ（གྲོང་ཁྱེར）དང་།  དཔེ་སྟོན་རྫོང（ཆུས་དང་གྲོང་ཁྱེར）དཔེ་སྟོན་ཚན་པ（མི་སྒེར）བཅས་ཀྱི་མིང་བཏགས་ཡོད། མི་རིགས་མཐུན་སྒྲིལ་ཡར་ཐོན་གྱི་མེ་ཏོག་གངས་ལྗོངས་མཐོ་སྒང་གི་གང་སར་བཞད་ཡོད།   

བོད་ལྗོངས་ནི་མི་རིགས་སོ་སོས་ཐུན་མོང་ཐོག་གསར་སྤེལ་བྱས་པ་དང་བོད་ལྗོངས་ཀྱི་ལོ་རྒྱུས་ནི་མི་རིགས་སོ་སོས་ཐུན་མོང་ཐོག་བྲིས་པ་ཞིག་ཡིན་པས།  བོད་རིགས་དང་མི་རིགས་གཞན་དག་དབར་གྱི་འགྲོ་འོང་དང་སྤེལ་རེས་དེ་བོད་ལྗོངས་འཕེལ་རྒྱས་ཀྱི་ཐོག་མཐའ་བར་གསུམ་དུ་ཁྱབ་ཡོད།  

བོད་ལྗོངས་དང་མེས་རྒྱལ་དབར་གྱི་སྤེལ་རེས་ཀྱང་ཐོག་མཐའ་བར་གསུམ་དུ་རྒྱུན་མཐུད་བྱུང་ཡོད། ལྷ་ལྡན་གཙུག་ལག་ཁང་གི་མདུན་གྱི་ལོ་ངོ་སྟོང་གི་ཆར་རླུང་བརྒྱུད་པའི་ཐང་བོད་མནའ་འབྲེལ་རྡོ་རིང་སྟེང་དུ་མི་རིགས་མཐུན་སྒྲིལ་ཡར་ཐོན་གྱི་སྙན་ངག་ཟིན་ཐོར་བཀོད་ཡོད།   མི་རིགས་མཐུན་སྒྲིལ་ཡར་ཐོན་དེ་སྔ་མོ་ནས་ཡར་ཀླུང་གཙང་པོ་དང་འདྲ་བར་བོད་རིགས་མི་དམངས་ཀྱི་ཁྲག་རྒྱུད་ནང་འདྲེས་ཡོད།   

ཀྲུང་གོ་གསར་པ་དབུ་བརྙེས་རྗེས།  ཏང་གི་གཟི་བརྗིད་དང་རྒྱལ་ཡོངས་མི་རིགས་སོ་སོའི་མི་དམངས་ཀྱི་སྒེར་སེམས་མེད་པའི་རོགས་སྐྱོར་འོག བོད་ལྗོངས་ཀྱི་འཕེལ་རྒྱས་འོད་སྟོང་འཕྲོ་བའི་དུས་རབས་གསར་པར་སླེབས།   2024ལོ་ནི་བོད་ལྗོངས་ལ་ཁ་གཏད་རོགས་སྐྱོར་གྱི་ལས་དོན་སྤེལ་ནས་ལོ་འཁོར30ལོན་པའི་ལོ་ཡིན། ལོ་ངོ30ཡི་རིང་དང་ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་ནས་བཟུང་། ཕྱོགས་བཞི་མཚམས་བརྒྱད་ནས་ཡོང་བའི་བོད་སྐྱོར་ལས་བྱེད་པ་དང་ཤེས་ལྡན་མི་སྣ་ཁག་གིས་བོད་ལྗོངས་ཀྱི་མི་རིགས་ཁག་གི་ལས་བྱེད་མང་ཚོགས་དང་མཉམ་དུ་གངས་ལྗོངས་མཐོ་སྒང་དུ་མུ་མཐུད་འབད་འཐབ་བྱས་ནས་བོད་ལྗོངས་ཀྱི་འཕེལ་རྒྱས་ལ་སྒུལ་ཤུགས་ཆེན་པོ་བསྣན།   

ལོ་ངོ30ཡི་རིང་། ཁ་གཏད་རོགས་སྐྱོར་མ་ལག་རིམ་བཞིན་འཐུས་ཚང་དུ་ཕྱིན་ནས་ཞིང་ཆེན་དང་གྲོང་ཁྱེར17དང་།  ཀྲུང་དབྱང་ཁེ་ལས་དང་ཀྲུང་དབྱང་དངུལ་རྩའི་སྒྲིག་གཞི22བཅས་ཀྱིས་བོད་ལྗོངས་ཀྱི་རྫོང（ཆུས་དང་གྲོང་ཁྱེར）74ལ་ཁ་གཏད་རོགས་སྐྱོར་བྱེད་པའི་ཡོངས་ཁྱབ་ཀྱི་རྣམ་པ་ཆགས་ཡོད།   སྐོར་ཐེངས10ཡི་ལས་བྱེད་པ་དང་ཤེས་ལྡན་མི་སྣ་ཁྲི1.2ལྷག་བོད་ལྗོངས་སུ་བསྐྱོད་ནས་ཞབས་འདེགས་སྒྲུབ་པ་དང་།  བསྡོམས་པས་སྒོར་དུང་ཕྱུར643བཏང་ནས་བོད་སྐྱོར་རྣམ་གྲངས8204ལག་བསྟར་བྱས་པ།   ཁོད་ཡངས་ཤིང་དཀར་ཆ་དོད་པོའི་སློབ་ཁང་རེ་རེ་དང་དེང་རབས་ཅན་གྱི་སྨན་ཁང་རེ་རེ་བསྐྲུན་པ་དང་།  ཐོན་ལས་རྣམ་གྲངས་རེ་རེ་ཡིས་མང་ཚོགས་ཀྱི་འབབ་འཕར་ཕྱུག་འགྱུར་ལ་སྐུལ་ཁྲིད་བྱས་ཡོད།   

ཁ་གཏད་བོད་སྐྱོར་བྱ་རྒྱུ་དེ་འབྲེལ་ཐག་ཏུ་བརྩིས་པ་དང་ཆ་སྒྲིག་རོགས་སྐྱོར་སོགས་ཀྱི་བྱ་འགུལ་སྤེལ་བ་བརྒྱུད། བོད་ལྗོངས་ཀྱི་རྫོང་ཆུས་དང་ཤང་གྲོང332དང་བོད་སྐྱོར་ཞིང་ཆེན་དང་གྲོང་ཁྱེར་གྱི་རྫོང་ཆུས284དབར་ཆ་སྒྲིག་རོགས་སྐྱོར་གྱི་འབྲེལ་བ་བཙུགས་ཡོད། འཆམ་མཐུན་མཉམ་གནས་དང་སྤུན་ཟླ་ཕན་ཚུན་ཉེ་བ། ལྟ་སྲུང་རོགས་རམ་བཅས་ཀྱི་ཁྱིམ་གཞི་ཆེན་པོའི་ནང་ཀྲུང་ཧྭ་མི་རིགས་ཀྱི་སྤུན་ཟླ་གཅེན་གཅུང་རྣམས་སེ་འབྲུ་དང་འདྲ་བར་དམ་པོར་སྦྲེལ་ཡོད།  

བོད་རང་སྐྱོང་ལྗོངས་ཏང་ཨུའི་སྐབས་བཅུ་པའི་ཚང་འཛོམས་གྲོས་ཚོགས་ཐེངས་བདུན་པ་དང་ཆུས་ཏང་ཨུའི་དཔལ་འབྱོར་ལས་དོན་ཚོགས་འདུའི་ཐོག་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བའི་འཆར་གཞི་གསར་པ་བཀོད་ཡོད་ཅིང་།  བློ་མཐུན་ཞི་ཅིན་ཕིང་སྲོག་ཤིང་ཡིན་པའི་ཏང་ཀྲུང་དབྱང་གི་མགོ་ཁྲིད་བརྟན་པོ་དང་རྒྱལ་ཡོངས་མི་དམངས་ཀྱི་རོགས་སྐྱོར་ཤུགས་ཆེན་འོག ལྗོངས་ཡོངས་གོང་འོག་བར་མཐུན་སྒྲིལ་དང་དཀའ་གནད་འགག་སྒྲོལ་བྱས་ན་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་གྱི་སྙན་ངག་ཡག་པོ་འབྲི་ཐུབ་པར་ཡིད་ཆེས་བརྟན་པོ་ཡོད། །