རྐང་ཚ་རྫོང་སྤྱི་བདེ་ཅུའུ་དུག་འགོག་རུ་ཆེན་གྱིས་དུག་བཟོ་སླ་བའི་སྨན་རྫས་ཐད་ཀྱི་ཆེད་དོན་ཞིབ་བཤེར་བྱ་བ་སྤེལ།

ཉེ་སྔོན། མཚོ་བྱང་བོད་རིགས་རང་སྐྱོང་ཁུལ་རྐང་ཚ་རྫོང་སྤྱི་བདེ་ཅུའུ་དུག་འགོག་རུ་ཆེན་གྱིས་ཅུའུ་ཏང་ཨུའི་བཀོད་སྒྲིག་ལྟར། ཁོངས་གཏོགས་ས་ཁུལ་སྨན་ཁང་དུ་སོང་ནས་དུག་བཟོ་སླ་བའི་སྨན་རྫས་ཐད་ཀྱི་ཆེད་དོན་ཞིབ་བཤེར་བྱ་བ་སྤེལ།

ཞིབ་བཤེར་བྱེད་པའི་གོ་རིམ་ཁྲོད། ཉེན་རྟོག་པས་རྩིས་ཐོ་ལྟ་ཀློག་བྱེད་པ་དང་ལས་བྱེད་མི་སྣར་འདྲི་རྩད་བྱེད་པ་སོགས་ཀྱི་རྣམ་པ་བརྒྱུད་དེ། དུག་བཟོ་སླ་བའི་སྨན་རྫས་ཉོ་སྒྲུབ་བྱེད་པ་དང་ཉར་གསོག བཀོལ་སྤྱོད། ཉོ་ཚོང་དང་འབྲེལ་ཡོད་དོ་དམ་ལམ་ལུགས་ལག་བསྟར་བྱས་པའི་གནས་ཚུལ་ལ་ཞིབ་བཤེར་ཞིབ་མོ་བྱས། དེ་དང་མཉམ་དུ། འབྲེལ་ཡོད་ལས་བྱེད་མི་སྣས་དུག་བཟོ་སླ་བའི་སྨན་རྫས་ཀྱི་ཁྲིམས་འགལ་འཁོར་རྒྱུག་གི་སྤྱི་ཚོགས་གནོད་འཚེ་རང་བཞིན་ལ་ངོས་འཛིན་གང་ལེགས་བྱས་པ་དང་། སྨན་བཅོས་སྡེ་ཁག་སོ་སོའི་འགོ་ཁྲིད་མི་སྣ་གཙོ་བོས་འབྲེལ་ཡོད་བཅའ་ཁྲིམས་ཁྲིམས་སྲོལ་གཞིར་བཟུང་ནས། དུག་བཟོ་སླ་བའི་སྨན་རྫས་བཀོལ་སྤྱོད་བྱེད་པའི་ཐད་ནས་གཟབ་ནན་ཞིབ་ཕྲ་དང་ཆད་ལུས་མེད་པར་བྱེད་རྒྱུའི་སྐུལ་སློང་བཏང་བ་དང་། ཉེན་རྟོག་པས་ཡུལ་དངོས་ནས་མངའ་ཁུལ་སྨན་ཁང་གི་འབྲེལ་ཡོད་འགན་ཁུར་མི་སྣར་དག་ཐེར་ལེགས་བཅོས་བྱེད་པའི་རེ་བ་བཏོན་པ་མ་ཟད། དུག་བཟོ་སླ་བའི་སྨན་རྫས་ཀྱི་དོ་དམ་ལམ་ལུགས་ལག་བསྟར་ནན་མོ་བྱས་ཏེ། སྨན་རྫས་བདེ་འཇགས་ལ་ཁག་ཐེག་བྱས།

ཐེངས་འདིའི་ཞིབ་བཤེར་གྱིས། ཁོངས་གཏོགས་ས་ཁུལ་གྱི་སྨན་བཅོས་སྡེ་ཁག་གི་ལས་བྱེད་མི་སྣས་དུག་བཟོ་སླ་བའི་སྨན་རྫས་ཁྲིམས་མཐུན་བཀོལ་སྤྱོད་བྱེད་པའི་བདེ་འཇགས་འགོག་ཟོན་འདུ་ཤེས་ཇེ་མཐོར་བཏང་བ་དང་། འགོ་ཁུངས་ནས་དུག་འབྲེལ་ཁྲིམས་འགལ་ཉེས་བཟོ་དོན་རྐྱེན་འབྱུང་བར་བཀག་འགོག་བྱས་ནས། མངའ་ཁོང་ས་ས་ཁུལ་གྱི་མང་ཚོགས་ལ་བདེ་འཇགས་ཀྱི་འཚོ་བའི་ཁོར་ཡུག་ཅིག་བསྐྲུན།