ལྷ་ཀླུ་བརླན་སའི་སྐྱེ་ཁམས་ཁོར་ཡུག་མངོན་གསལ་གྱིས་ཇེ་ལེགས་སུ་ཕྱིན་པ།

ཉེ་བའི་ལོ་འགའི་རིང་། སྲུང་སྐྱོབ་བྱེད་ཐབས་ལ་མུ་མཐུད་ཤུགས་སྣོན་དང་སྐྱེ་ཁམས་ཁོར་ཡུག་རྒྱུན་མཐུད་ཇེ་ལེགས་སུ་ཕྱིན་པ་དང་བསྟུན་ནས་ལྷ་ཀླུ་བརླན་སའི་རྣམ་པ་གསར་བ་གསར་རྐྱང་གིས་ཕྱོགས་བཞི་མཚམས་བརྒྱད་ཀྱི་ཡུལ་སྐོར་བར་བསུ་མ་བྱེད་བཞིན་ཡོད་ལ། ལྷག་པར་དུ་དུས་བྱ་སྔར་ལས་མང་པོ་འདི་གར་འབབ་སྡོད་བྱས་ནས་མཛེས་སྡུག་ལྡན་པའི་ཡུལ་ལྗོངས་ཤིག་ཏུ་གྱུར་ཡོད། 

གསར་འགོད་པས་རྒྱུས་ལོན་བྱུང་བ་ལྟར་ན། འབྲེལ་ཡོད་སྡེ་ཁག་གིས་ལྷ་ཀླུ་བརླན་སའི་སྲུང་སྐྱོབ་ལས་དོན་ལ་ཚད་མཐོའི་མཐོང་ཆེན་བྱས་ཏེ། ལག་ལེན་བསྟར་ནས་ནུས་པ་ཐོན་པའི་བྱེད་ཐབས་རབ་དང་རིམ་པ་སྤྱད་པ་རེད། བརླན་སའི་མཐའ་འཁོར་གྱི་སྦགས་བཙོག་འབྱུང་ཁུངས་བཅོས་སྐྱོང་ལ་ཤུགས་བསྣན་ནས་བཙོག་ཆུ་ཕྱིར་འབུད་ལ་ཚོད་འཛིན་ནུས་ལྡན་ཐུབ་པ་དང་བརླན་སའི་ཆུ་སྤུས་སྦགས་བཙོག་ཇེ་ཉུང་དུ་བཏང་བ། དེ་དང་ཆབས་ཅིག ཁྲིམས་འགལ་གྱི་འཛིན་རྙབ་དང་རི་དྭགས་རྔོན་པ་སོགས་བྱ་སྤྱོད་ལ་རྡུང་རྡེག་གཏོང་ཤུགས་ཆེ་རུ་བཏང་ནས་བརླན་སའི་ནང་ཁུལ་གྱི་སྐྱེ་དངོས་ལ་བདེ་འཇགས་དང་དུས་བདེ་ཞོད་འཇགས་ཀྱི་འཚོ་གནས་ཁོར་ཡུག་ཞིག་བཏོད་ཡོད།

སྲུང་སྐྱོབ་ལས་དོན་གཏིང་ཟབ་སྤེལ་བ་དང་བསྟུན་ནས་ལྷ་ཀླུ་བརླན་སའི་སྐྱེ་ཁམས་ཁོར་ཡུག་མངོན་གསལ་ཇེ་ལེགས་སུ་ཕྱིན་ཡོད། ཆུ་སྤུས་ཉིན་བཞིན་དྭངས་གཙང་དང་རྩྭ་ཆུའི་ལོ་འདབ་རྒྱས་པས་དུས་བྱར་ཕུན་སུམ་ཚོགས་པའི་ཟས་རིགས་ཐོན་ཁུངས་མཁོ་འདོན་བྱས་ཡོད་ལ། འབབ་སྡོད་ཁོར་ཡུག་ལེགས་པོ་འདི་ཡིས་དུས་བྱ་སྔར་ལས་མང་པོས་འདི་གར་རྒྱུད་སྤེལ་བའི་ཡིད་དབང་བཀུགས་ཡོད། 2023ལོའི་བརྟག་དཔྱད་མཇུག་འབྲས་གསར་ཤོས་ལས་མངོན་པ་ལྟར་ན། ལྷ་ཀླུ་བརླན་ས་རྒྱལ་ཁབ་རིམ་པའི་རང་བྱུང་སྲུང་སྐྱོང་ཁུལ་དུ་བསྡོམས་པས་ཕྲ་ཕུང་ཆུན་ནར་གྱི་རྩི་ཤིང་རིགས435ཡོད་པ་དང་། སྒལ་ཚིགས་སྲོག་ཆགས་རིགས200ཡོད་པའི་ནང་བྱ་རིགས167ཡོད་ལ། རྒྱལ་ཁབ་ཀྱི་གཙོ་གནད་སྲུང་སྐྱོབ་སྲོག་ཆགས་རིགས40དང་རྒྱལ་ཁབ་ཀྱི་རིམ་པ་དང་པོའི་སྲུང་སྐྱོབ་སྲོག་ཆགས་རིགས8དང་རྒྱལ་ཁབ་ཀྱི་རིམ་པ་གཉིས་པའི་སྲུང་སྐྱོབ་སྲོག་ཆགས་རིགས32ཡོད། འབུ་སྦྲང་རིགས80ཡོད་པའི་ནང་རིགས10བོད་ལྗོངས་སུ་གསར་དུ་ཟིན་ཐོ་བཀོད་པ་ཡིན། 

ལྟ་དཔྱད་ཚད་འཇལ་གྱི་གཞི་གྲངས་གསར་ཤོས་ལས་མངོན་པ་ལྟར་ན། ད་ལོར་ལྷ་ཀླུ་བརླན་སའི་དུས་བྱའི་གྲངས་འབོར་ལོ་སྔོན་མ་དག་དང་བསྡུར་ན་མངོན་གསལ་ཇེ་མང་དུ་ཕྱིན་ཡོད། རིགས་མང་པོའི་དུས་བྱ་དག་གིས་རང་དབང་ངང་འཕུར་ལྡིང་དང་རོལ་རྩེད། ཟས་འཚོལ། སེམས་ལྷོད་བག་གཡེང་ངང་འབབ་སྡོད་བྱེད་པ་བཅས་ཀྱིས་གསོན་ཉམས་ལྡན་ལ་འཆམ་མཐུན་གྱི་རང་བྱུང་རི་མོ་ཞིག་གྲུབ་ཡོད། དེའི་ཁྲོད་ཁྲུང་ཁྲུང་སྐེ་ནག་དང་ཁྲུང་ཁྲུང་མགོ་ཁྲ་སོགས་རྒྱུན་མཐོང་དུས་བྱའི་གཟུགས་བརྙན་ལྷ་ཀླུ་བརླན་སའི་ལྟ་ན་སྡུག་པའི་མཛེས་ལྗོངས་ཞིག་ཏུ་གྱུར་ཡོད། 

ལྷ་ཀླུ་བརླན་སའི་དུས་བྱའི་གྲངས་འབོར་ཇེ་མང་དུ་ཕྱིན་པ་དེ་སྐྱེ་ཁམས་ཁོར་ཡུག་ཇེ་ལེགས་སུ་ཕྱིན་པའི་བདེན་དཔང་ཡིན་པ་མ་ཟད། མི་དང་རང་བྱུང་ཁམས་འཆམ་མཐུན་མཉམ་གནས་ཀྱི་གསོན་ཉམས་ལྡན་པའི་མཚོན་ཚུལ་ཡིན། གྲུབ་འབྲས་འདི་དག་བླངས་པ་དེ་བརླན་ས་སྲུང་སྐྱོང་མཁན་དག་གི་དཀའ་སྤྱད་ཁྱད་བསད་ཀྱི་སྡུག་རུས་དང་ཁ་བྲལ་ཐབས་མེད་ལ། རྒྱ་ཆེའི་གྲོང་མིའི་ཁོར་ཡུག་སྲུང་སྐྱོབ་འདུ་ཤེས་མུ་མཐུད་ཇེ་དྲག་ཏུ་ཕྱིན་པ་ལའང་འབྲལ་ཐབས་མེད། །