ཞི་ཅིན་ཕིང་དང་ལྕམ་མོ་ཕིན་ལིས་ཡོན་གྱིས་ཨ་མེ་རི་ཁའི་ཝ་ཧྲིན་ཐོན་མངའ་སྡེའི་སློབ་འབྲིང་དགེ་སློབ་ཀྱི་འཐུས་མིར་ལོ་གསར་གྱི་རྟེན་འབྲེལ་ཤོག་བྱང་གནང་།

2025ལོའི་ཟླ1པོའི་ཚེས1ཉིན། རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་ལྕམ་མོ་ཕིན་ལིས་ཡོན་གྱིས་ཨ་མེ་རི་ཁའི་ཝ་ཧྲིན་ཐོན་མངའ་སྡེའི་སློབ་འབྲིང་དགེ་སློབ་ཀྱི་འཐུས་མིར་ཕྱིར་ལོ་གསར་གྱི་རྟེན་འབྲེལ་ཤོག་བྱང་གནང་ནས་ལོ་གསར་བའི་སྨོན་འདུན་ཞུས་ཤིང་། 2025ལོ་ནི་ཀྲུང་གོ་མི་དམངས་ཀྱི་འཇར་འགོག་དམག་འཁྲུག་དང་འཛམ་གླིང་གི་ཧྥ་ཞི་སི་ངོ་རྒོལ་དམག་འཁྲུག་ལ་རྒྱལ་ཁ་བླངས་ནས་ལོ80འཁོར་བའི་ལོ་ཡིན་ལ། འཛམ་གླིང་གི་འཁྲུག་ཆེན་ཐེངས་གཉིས་པའི་སྐབས་སུ། ཀྲུང་གོ་དང་ཨ་མེ་རི་ཁས་མཉམ་དུ་ཞི་བདེ་དང་དྲང་བདེན་གྱི་ཆེད་དུ་དམག་འཁྲུག་བྱས་ཏེ། རྒྱལ་ཁབ་གཉིས་ཀྱི་མི་དམངས་ཀྱི་མཛའ་བརྩེ་ཡིས་དཀའ་སྡུག་གི་ཉམས་སད་ཐེག་པར་བྱས་ལ་སྔར་ལས་ལྷག་པའི་གསོན་ཤུགས་རྒྱས་ཡོད་པའི་ཚུལ་བསྟན་ཞིང་། ཀྲུང་གོ་དང་ཨ་མེ་རི་ཁ་རྒྱལ་ཁབ་གཉིས་ཀྱི་ན་གཞོན་རྣམས་མ་འོངས་པའི་ལོ་ལྔའི་རིང་ཨ་མེ་རི་ཁའི་ན་གཞོན་ཁྲི་ལྔ་ཀྲུང་གོར་ཡོང་ནས་བརྗེ་རེས་སློབ་སྦྱོང་བྱེད་པའི་གྲོས་གཞིའི་ནང་མུ་མཐུད་ཧུར་ཐག་གིས་ཞུགས་ཏེ། བརྗེ་རེས་འབྲེལ་འདྲིས་ལ་ཤུགས་སྣོན་དང་ཕན་ཚུན་གྱི་རྒྱུས་ལོན་ཇེ་ཟབ་ཏུ་གཏོང་བ་། སྲོལ་རྒྱུན་མཛའ་འབྲེལ་རྒྱུན་འཛིན་བཅས་བྱས་ནས། ཀྲུང་གོ་དང་ཨ་མེ་རི་ཁའི་འབྲེལ་བའི་འཕེལ་རྒྱས་ལ་སྐུལ་འདེད་གཏོང་བ་དང་འཛམ་གླིང་གི་ཞི་བདེ་ལ་སྐུལ་འདེད་གཏོང་ཆེད་སྟོབས་ཤུགས་འབུལ་རྒྱུའི་རེ་བ་ཡོད་ཅེས་བསྟན།

ཉེ་སྔོན། ཨ་མེ་རི་ཁའི་ཝ་ཧྲིན་ཐོན་མངའ་སྡེའི་ན་གཞོན་ལོ་ཆུང་སློབ་མའི་བརྗེ་རེས་མཐུན་ཚོགས་དང་ལིན་ཁིན་སློབ་འབྲིང་། ལུས་རྩལ་སློབ་འབྲིང་བཅས་ཀྱི་སྔོན་ཆད་ལོ་ལྔའི་རིང་ཨ་མེ་རི་ཁའི་ན་གཞོན་ཁྲི་ལྔ་ཀྲུང་གོར་ཡོང་ནས་བརྗེ་རེས་སློབ་སྦྱོང་བྱེད་པའི་གྲོས་གཞིའི་ཁྲོད་ཞུགས་པའི་དགེ་སློབ་ཀྱི་འཐུས་མིས་ཀྲུའུ་ཞི་ཅི་ཕིང་དང་ལྕམ་མོ་ཕིན་ལིས་ཡོན་གཉིས་དང་། ཀྲུང་གོའི་མི་དམངས་ཡོངས་ལ་ལོ་གསར་བའི་རྟེན་འབྲེལ་ཤོག་བྱང་ཕུལ་བ་དང་། དགེ་རྒན་དང་སློབ་མ་བརྒྱ་ལྷག་གིས་རྟེན་འབྲེལ་ཤོག་བྱང་སྟེང་མིང་བཀོད་ཡོད། དགེ་སློབ་རྣམས་ཀྱིས་རྟེན་འབྲེལ་ཤོག་བྱང་སྟེང་། འཇར་འགོག་དམག་འཁྲུག་ལ་རྒྱལ་ཁ་བླངས་ནས་ལོ་ངོ80འཁོར་བར་རྗེས་དྲན་ཞུ། འཛམ་གླིང་གི་ཧྥ་ཞི་སི་ངོ་རྒོལ་དམག་འཁྲུག་ལ་རྒྱལ་ཁ་བླངས་ནས་ལོ80འཁོར་བར་རྗེས་དྲན་ཞུ། ལོ་གསར་བར་བསུ་མ་བྱེད། ཞི་བདེ་ཁྲི་ལོར་ཤོག ཀྲུང་གོ་དང་ཨ་མེ་རི་ཁའི་མཛའ་བརྩེ་རྟག་ཏུ་བརྟན་པར་སྨོན་ཞེས་རྒྱ་ཡིག་གིས་བྲིས་ཡོད།