མཚོ་སྔོན་གྱིས་འཇིགས་སྐུལ་རིང་ལུགས་ལ་ངོ་རྒོལ་བྱེད་པའི་བཅའ་ཁྲིམས་ཁྱབ་སྒྲོག་ལག་བསྟར་བྱས་ནས་ལོ་དགུ་འཁོར་བའི་དྲིལ་སྒྲོག་བྱེད་སྒོ་སྤེལ།

མཚོ་སྔོན་གྱིས་འཇིགས་སྐུལ་རིང་ལུགས་ལ་ངོ་རྒོལ་བྱེད་པའི་བཅའ་ཁྲིམས་ཁྱབ་སྒྲོག་ལག་བསྟར་བྱས་ནས་ལོ་དགུ་འཁོར་བའི་དྲིལ་སྒྲོག་བྱེད་སྒོ་སྤེལ།

2024ལོའི་ཟླ12པའི་ཚེས27ཉིན་ནི་རང་རྒྱལ་གྱི་དམངས་ཡོངས་ཀྱིས་འཇིགས་སྐུལ་ལ་ངོ་རྒོལ་བྱེད་པའི་དྲིལ་སྒྲོག་ཉིན་མོ་ཐེངས་དགུ་པ་ཡིན། ཉིན་དེར་མཚོ་སྔོན་ཞིང་ཆེན་འཇིགས་སྐུལ་ལ་ངོ་རྒོལ་བྱེད་པའི་གཞུང་སྒྲུབ་ཁང་གིས《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འཇིགས་སྐུལ་རིང་ལུགས་ལ་ངོ་རྒོལ་བྱེད་པའི་བཅའ་ཁྲིམས》ཁྱབ་སྒྲོག་ལག་བསྟར་བྱས་ནས་ལོ9འཁོར་བ་གོ་སྐབས་སུ་བྱས་ཏེ། འཇིགས་སྐུལ་ལ་ངོ་རྒོལ་བྱེད་པའི་དྲིལ་སྒྲོག་སློབ་གསོའི“མདུན་དུ་བསྐྱོད་དགོས་པ་དྲུག”སྔར་ལས་ཟབ་སྤེལ་བཏང་བ་དང་།  ཞིང་ཆེན་སློབ་གསོ་ཐིན་དང་ཞིང་ཆེན་འཕྲོད་བསྟེན་བདེ་ཐང་ཨུ་ཡོན་ལྷན་ཁང་། ཟི་ལིང་གྲོང་ཁྱེར་གྱི་འཇིགས་སྐུལ་ལ་ངོ་རྒོལ་བྱེད་པའི་གཞུང་སྒྲུབ་ཁང་བཅས་དང་མཉམ་འབྲེལ་བྱས་ཏེ། དུས་རབས་གསར་པའི་ལས་རིགས་ལག་རྩལ་སློབ་གླིང་དང་ཧུའུ་ཀྲུའུ་ཞང་སྨན་ཁང་དུ། “དམངས་ཡོངས་ཀྱིས་འཇིགས་སྐུལ་ལ་ངོ་རྒོལ་བྱས་ནས་བདེ་འཇགས་མཉམ་སྐྲུན་བྱེད”ཅེས་པ་བརྗོད་དོན་དུ་བཟུང་ནས་འཇིགས་སྐུལ་ལ་ངོ་རྒོལ་བྱེད་པའི་དྲིལ་སྒྲོག་སློབ་གསོ་སྤེལ་ནས། འཆམ་མཐུན་བརྟན་བརླིང་གི་སྤྱི་ཚོགས་བདེ་འཇགས་སྒྲིག་ལམ་འབད་པས་བསྐྲུན།

བྱེད་སྒོ་སྤེལ་ཡུལ་དུ་ཉེན་རྟོག་པའི་མཚོན་ཆ་དང་སྒྲིག་ཆས་འགྲེམས་སྟོན་ཁུལ་བཙུགས་པ་དང་། བློ་རིག་རྒྱས་པར་ཕན་པའི་རོལ་རྩེད་དང་འཇིགས་སྐུལ་ལ་ངོ་རྒོལ་བྱེད་པའི་དངོས་འཐབ་སློབ་ཚན་ཆུང་ཆུང་སྤེལ་བ་དང་། ཉེན་རྟོག་པས་སློབ་གྲྭ་དང་སྨན་ཁང་གི་ཐལ་དྲགས་པའི་དོན་རྐྱེན་དང་གྱོད་དཔེ་གཞིར་བཟུང་ནས། དགེ་སློབ་དང་སྨན་བྱེད་མི་སྣར་འཇིགས་སྐུལ་ལ་ངོ་རྒོལ་དང་དྲག་ཤུགས་འགོག་པའི་སྒྲིག་ཆས་བེད་སྤྱོད་དང་གཞི་རྩའི་རང་སྲུང་རང་སྐྱོབ་ཀྱི་རྩལ་ནུས་བཅས་སྐོར་གྱི་ཤེས་བྱ་བརྒྱུད་སྤྲོད་གང་ལེགས་བྱས་པར་བརྟེན། རྒྱ་ཆེའི་དགེ་སློབ་དང་སྨན་བྱེད་མི་སྣས་འཇིགས་སྐུལ་བྱ་སྤྱོད་ཀྱི་གནོད་འཚེ་ལ་ངོས་འཛིན་ཐུབ་པར་མ་ཟད། ད་དུང་འཇིགས་སྐུལ་དོན་རྐྱེན་ལ་ཁ་གཏད་འཇལ་བའི་ནུས་པ་ཇེ་མཐོར་བཏང་སྟེ། དམངས་ཡོངས་འཇིགས་སྐུལ་ལ་ངོ་རྒོལ་བྱེད་པའི་ལས་སྒོའི་ཁྲོད་ཞུགས་པའི་རྣམ་པ་བཟང་པོ་བསྐྲུན།

ཞིང་ཆེན་འཇིགས་སྐུལ་ངོ་རྒོལ་གཞུང་སྒྲུབ་ཁང་གི་འབྲེལ་ཡོད་འགན་འཁུར་བས་བཤད་རྒྱུར། འབྲེལ་ཡོད་སྡེ་ཁག་གི་འགན་འཁྲི་གཙོ་བོ་སྔར་ལས་ཇེ་དམ་དུ་བཏང་ནས། འགན་འཁྲི་འཁུར་རྒྱུ་དང་འགན་འཁྲི་བསྒྲུབ་རྒྱུར་རྩེ་གཅིག་ཏུ་གཞོལ་ཏེ། གཙོ་གནད་ས་ཁོངས་དང་ས་གནས་ཀྱི་འཇིགས་སྐུལ་དང་འབྲེལ་བ་ཡོད་པའི་ཉེན་ཁ་ལ་མུ་མཐུད་བརྟག་དཔྱད་ནན་མོ་གཏོང་བ་དང་། འཇིགས་སྐུལ་ལ་ངོ་རྒོལ་བྱེད་པའི་སྔོན་འགོག་བྱེད་ཐབས་ཁག་དོན་འཁྱོལ་བྱེད་རྒྱུར་ཤུགས་བསྣན་ནས། སྐྱོན་ཆ་ཅི་རིགས་ཡོ་བསྲང་བྱེད་དགོས། འཇིགས་སྐུལ་ལ་ངོ་རྒོལ་བྱེད་པའི་བཅའ་ཁྲིམས་ཁྱབ་བརྡལ་དང་་དྲིལ་སྒྲོག་གི་ལས་དོན་ལ་མུ་མཐུད་སྐུལ་འདེད་གཏོང་བ་དང་། མང་ཚོགས་ལ་སྐུལ་སློང་གང་ལེགས་བྱེད་པ། དྲིལ་སྒྲོག་བྱེད་སྟངས་གསར་གཏོད་བྱེད་པ། དྲིལ་སྒྲོག་གི་ཐབས་ལམ་རྒྱ་སྐྱེད་གཏོང་བ་བཅས་བྱས་ཏེ། འཇིགས་སྐུལ་ལ་ངོ་རྒོལ་བྱེད་པའི་དྲིལ་སྒྲོག་སློབ་གསོའི་བྱེད་སྒོ་འདི་ཉིད་སློབ་གྲྭ་དང་ཁེ་ལས། ལས་ཁུངས། སྡེ་ཁུལ། ཁྱིམ་ཚང་བཅས་སུ་ནུས་ཤུགས་ཡོད་རྒུས་སྐུལ་འདེད་བཏང་སྟེ། རྒྱ་ཆེའི་མང་ཚོགས་ཀྱི་འཇིགས་སྐུལ་ཤེས་རྟོགས་དང་འཇིགས་སྐུལ་འགོག་པ། འཇིགས་སྐུལ་ལ་ངོ་རྒོལ་བྱེད་པའི་ནུས་པ་དང་ཆུ་ཚད་མཐོ་རུ་གཏོང་གང་ཐུབ་བྱས་ནས། དེང་རབས་ཅན་གྱི་མཚོ་སྔོན་གསར་པ་འཛུགས་སྐྲུན་བྱེད་པར་བདེ་འཇགས་ཀྱི་འགན་ལེན་བརྟན་པོ་ཞིག་འདོན་སྤྲོད་བྱེད་དགོས་ཟེར།