ཧུའུ་སེ་དྲག་ཆས་པས་ཨ་མེ་ར་ཁ་དང་དབྱིན་ཇིའི་མཉམ་འབྲེལ་དམག་དཔུང་གིས་ཡེ་མིན་གྱི་རྒྱལ་ས་སཱ་ནཱ་རུ་བར་སྣང་འཇབ་རྒོལ་བྱས་པའི་ཚུལ་བསྟན།
ཡེ་མིན་གྱི་ཧུའུ་སེ་དྲག་ཆས་པས་ཚོད་འཛིན་བྱེད་པའི་མཱ་ཞི་ལཱ་བརྙན་འཕྲིན་ཁང་གིས་ཚེས27ཉིན་བསྒྲགས་པ་ལྟར་ན། ཨ་མེ་རི་ཁ་དང་དབྱིན་ཇིའི་མཉམ་འབྲེལ་དམག་དཔུང་གིས་ཉིན་དེར་ཡེ་མིན་གྱི་རྒྱལ་ས་སཱ་ནཱ་རུ་བར་སྣང་འཇབ་རྒོལ་བྱས་པ་དང་། བར་སྣང་འཇབ་རྒོལ་བྱེད་པའི་དམིགས་འབེན་ནི་ཧུའུ་སེ་དྲག་ཆས་པའི་ཁྲབ་ལྡན་འཁོར་ལོའི་ཁྲི་ཤོག་དང་པོའི་སྒར་ས་ཡིན་པ་རེད་ཟེར།
སཱ་ནཱའི་ས་གནས་སྡོད་དམངས་ཀྱིས་ཞིན་ཧྭ་གསར་འགྱུར་ཁང་གི་གསར་འགོད་པར་བཤད་རྒྱུར། བར་སྣང་འཇབ་རྒོལ་གྱི་འགས་གཏོར་གྱི་སྒྲ་ཆེན་པོ་གྲགས་པ་དང་། དེའི་རྗེས་སུ་མྱུར་སྐྱོབ་རླངས་འཁོར་མང་བོ་འཇབ་རྒོལ་ཐེབས་སར་བགྲོད་བཞིན་ཡོད་ཟེར།
ཨ་མེ་རི་ཁ་དང་དབྱིན་ཇིའི་མཉམ་འབྲེལ་དམག་དཔུང་གིས་དོན་དེའི་ཐད་ནས་དཔྱད་འཇོག་ཅི་ཡང་སྤེལ་མེད།
ཉིན་དེའི་སྔ་དྲོར། མཱ་ཞི་ལཱ་བརྙན་འཕྲིན་ཁང་གིས་བསྒྲགས་པ་ལྟར་ན། ཧུའུ་སེ་དྲག་ཆས་པས་སྒྲའི་མྱུར་ཚད་བརྒལ་བའི་འཕུར་མདའི་བེད་སྤྱད་དེ་དབྱི་སི་རལ་གྱི་ཐི་ལཱ་ཝེ་ཧྥུའུ་ཡི་པིན་ཀུའུ་ལི་ཨན་རྒྱལ་སྤྱིའི་གནམ་གྲུ་ཐང་དུ་འཇབ་རྒོལ་བྱས་པར་མ་ཟད། དབྱི་སི་རལ་དུ་བགྲོད་པའི་གྲུ་གཟིངས་ཤིག་ལ་འཇབ་རྒོལ་བྱས་ཟེར། དབྱི་སི་རལ་གྱི་རྒྱལ་སྲུང་དམག་དཔུང་གིས་གསལ་སྒྲོག་སྤེལ་ཏེ། དབྱི་སི་རལ་གྱི་དམག་དཔུང་གིས་ཧུའུ་སེ་དྲག་ཆས་པས་ཉིན་དེའི་ཞོགས་པར་དབྱི་སི་རལ་དབུས་ཕྱོགས་སུ་གཏོང་འཕེན་བྱས་པའི་འཕུར་མདའ་ཞིག་བདེ་བླག་ངང་བཀག་ཡོད་ཟེར། ཞིན་ཧྭ་གསར་འགྱུར་ཁང་གི་གསར་འགོད་པས་གནམ་གྲུ་ཐང་གི་ལས་བྱེད་མི་སྣ་ལས་རྒྱུས་ལོན་བྱུང་བ་ལྟར་ན། པིན་ཀུའུ་ལི་ཨན་རྒྱལ་སྤྱིའི་གནམ་གྲུ་ཐང་གི་འཁོར་སྐྱོད་རྒྱུན་ལྡན་ཡིན་པ་རེད།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注