སི་ལོ་ཝ་ཁིའི་ཙུང་ལི་ཡིས་ཝུའུ་ཁི་ལན་གྱི་གློག་ཤུགས་མཁོ་འདོན་མཚམས་གཅོད་སྲིད་པའི་ཚུལ་བསྟན།

སི་ལོ་ཝ་ཁིའི་ཙུང་ལི་ཡིས་ཝུའུ་ཁི་ལན་གྱི་གློག་ཤུགས་མཁོ་འདོན་མཚམས་གཅོད་སྲིད་པའི་ཚུལ་བསྟན།

སི་ལོ་ཝ་ཁིའི་ཙུང་ལི་ཧྥེ་ཙོ་ཡིས་ཚེས27ཉིན་བཤད་རྒྱུར། གལ་ཏེ་སང་ལོའི་ཟླ་དང་པོའི་ཚེས་གཅིག་ཉིན་ཝུའུ་ཁི་ལན་གྱིས་ཨུ་རུ་སིའི་རང་བྱུང་སོལ་རླངས་རང་གི་མངའ་ཁོངས་བརྒྱུད་ནས་སྐྱེལ་འདྲེན་བྱེད་མཚམས་བག་ན། སི་ལོ་ཝ་ཁི་ཡིས་ཝུའུ་ཁི་ལན་གྱི་གློག་ཤུགས་མཁོ་འདོན་མཚམས་འཇོག་སྲིད་ཟེར།

ཧྥེ་ཙོ་ཡིས་ཉིན་དེར་བརྙན་རིས་གཏམ་བཤད་སྤེལ་ཏེ། ཝུའུ་ཁི་ལན་གྱིས་ཨུ་རུ་སིའི་རང་བྱུང་སོལ་རླངས་རང་གི་མངའ་ཁོངས་བརྒྱུད་དེ་སྐྱེལ་འདྲེན་བྱེད་མཚམས་བཞག་ན། མ་འོངས་པའི་ལོ་གཉིས་ནང་ཡོ་རོབ་གླིང་མནའ་འབྲེལ་ལ་ཡོ་སྒོར་ཁྲག་ཁྲིག་གཅིག་དང་ཐེར་ཆེན་གཉིས་ཀྱི་དཔལ་འབྱོར་གྱོང་གུད་བཟོ་སྲིད་པ་དང་། སི་ལོ་ཝ་ཁི་ལ་ལོ་རེར་ཡོ་སྒོར་དུང་ཕྱུར་ལྔའི་ཞབས་ཞུའི་གྲོན་དངུལ་གྱི་གྱོང་གུད་བཟོ་སྲིད། གལ་ཏེ་དགོས་པ་ཡོད་ན། སི་ལོ་ཝ་ཁི་ཡིས་ཝུའུ་ཁི་ལན་ལ་གློག་ཤུགས་མཁོ་འདོན་བྱེད་མཚམས་འཇོག་པའམ་ཡང་ན་བྱེད་ཐབས་གཞན་པ་སྤྱོད་སྲིད་ཟེར།

ཧྥེ་ཙོ་ཡིས་ད་རུང་བསྟན་དོན། སི་ལོ་ཝ་ཁི་ཡིས་ཝུའུ་ཁི་ལན་གྱི་གནད་དོན་ལ་ཞི་བའི་གྲོས་མོལ་བྱེད་འདོད་ཡོད། གལ་ཏེ་སི་ལོ་ཝ་ཁི་ནས་ཞི་བའི་གྲོས་མོལ་བྱེད་པར་རྩ་འཛུགས་བྱེད་འདོད་ན། ང་ཚོས་གྲ་སྒྲིག་གང་ལེགས་བྱས་ནས་དེར་བརྩེ་བས་སྣེ་ལེན་བྱེད་ངེས་ཡིན་ཟེར།

ཨུ་རུ་སིའི་རང་བྱུང་སོལ་རླངས་ཝུའུ་ཁི་ལན་གྱི་མངའ་ཁོངས་བརྒྱུད་དེ་ཡོ་རོབ་གླིང་དུ་སྐྱེལ་འདྲེན་བྱེད་པའི་གྲོས་མཐུན་གྱི་ཡུན་ཚད་ཟླ12པའི་ཚེས31ཉིན་ལོངས་པ་རེད། ཝུའུ་ཁི་ལན་གྱི་ཙུང་ཐུང་ཙེ་ལེན་སི་ཅི་ཡིས་ཉེ་སྔོན་ཨུ་རུ་སིའི་བར་གྱི་འབྲེལ་ཡོད་གྲོས་མཐུན་གྱི་ལག་བསྟར་ཡུན་ཚད་ཇེ་རིང་དུ་གཏོང་མི་སྲིད་པའི་ཚུལ་བསྟན་པས། སི་ལོ་ཝ་ཁི་དང་ཧང་ག་རི་སོགས་ཡོ་རོབ་གླིང་མནའ་འབྲེལ་གྱི་ཁོངས་གཏོགས་རྒྱལ་ཁབ་དག་གིས་ནུས་ཁུངས་མཁོ་འདོན་ཐད་སེམས་ཁུར་བྱེད་བཞིན་ཡོད་པ་རེད།