མཚོ་སྔོན་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གཞུང་སྒྲུབ་ཐིན་གྱིས་གསར་འགྱུར་སྒྲོག་སྤེལ་ཚོགས་འདུ་འཚོགས་ཏེ།《མཚོ་སྔོན་ཞིང་ཆེན་གྱི་འཕང་འབྲས་ཐོན་ལས་འཕེལ་རྒྱས་ལ་སྐུལ་འདེད་གཏོང་བའི་སྲོལ་ཡིག》གི་འབྲེལ་ཡོད་གནས་ཚུལ་ངོ་སྤྲོད་བྱས།

མཚོ་སྔོན་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གཞུང་སྒྲུབ་ཐིན་གྱིས་གསར་འགྱུར་སྒྲོག་སྤེལ་ཚོགས་འདུ་འཚོགས་ཏེ།《མཚོ་སྔོན་ཞིང་ཆེན་གྱི་འཕང་འབྲས་ཐོན་ལས་འཕེལ་རྒྱས་ལ་སྐུལ་འདེད་གཏོང་བའི་སྲོལ་ཡིག》གི་འབྲེལ་ཡོད་གནས་ཚུལ་ངོ་སྤྲོད་བྱས།

ཟླ12པའི་ཚེས27ཉིན། མཚོ་སྔོན་ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་གཞུང་སྒྲུབ་ཐིན་གྱིས་གསར་འགྱུར་སྒྲོག་སྤེལ་ཚོགས་འདུ་བསྡུས་ཏེ། ཞིང་ཆེན་དམངས་ཆེན་སྐབས་བཅུ་བཞི་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅུ་གཅིག་པའི་སྟེང་གྲོས་ཞིབ་བྱས་ནས་གྲོས་འཆམ་བྱུང་བའི། 《མཚོ་སྔོན་ཞིང་ཆེན་གྱི་འཕང་འབྲས་ཐོན་ལས་འཕེལ་རྒྱས་ཡར་སྐུལ་སྲོལ་ཡིག》གི་འབྲེལ་ཡོད་གནས་ཚུལ་ངོ་སྤྲོད་བྱས།

སྒྲོག་སྤེལ་ཚོགས་འདུའི་སྟེང་དུ། ཞིང་ཆེན་དམངས་ཆེན་རྒྱུན་ལས་ཨུ་ཡོན་ལྷན་ཁང་ཁྲིམས་ལུགས་བྱ་བའི་ཨུ་ཡོན་ལྷན་ཁང་དང་ཞིང་ཆེན་ཞིང་ལས་གྲོང་གསེབ་ཐིན་གྱི་འབྲེལ་ཡོད་འགན་འཁུར་བློ་མཐུན་གྱིས། 《སྲོལ་ཡིག》གི་ཁྲིམས་འཛུགས་དམིགས་ཡུལ་དང་དོན་སྙིང་། བརྒྱུད་རིམ། དེ་བཞིན་ཁྱད་ཆོས་ཆེ་ཤོས་བཅས་ཀྱི་སྐོར་ནས་གསར་འགྱུར་སྒྲོག་སྤེལ་བྱས་པར་མ་ཟད། 《སྲོལ་ཡིག》གིས་ཐག་གཅོད་བྱེད་དགོས་པའི་གནད་དོན་གཙོ་བོ་དང་དེ་བཞིན་སློབ་སྦྱོང་ལག་བསྟར་ནན་མོ་བྱེད་དགོས་པའི་བསམ་ཕྱོགས་དང་བྱེད་ཐབས་སོགས་ཀྱི་གནས་ཚུལ་ངོ་སྤྲོད་ཞིབ་ཚགས་བྱས།

《སྲོལ་ཡིག》ལ་ཁྱོན་ལེའུ་དྲུག་དང་དོན་ཚན་ཞེ་གཉིས་ཡོད་ཅིང་། དེའི་ནང་གཙོ་བོ་སྤྱིའི་སྒྲིག་སྲོལ་དང་ཐོན་ཡུལ་སྲུང་སྐྱོབ་དང་འདེབས་འཛུགས་ལས་སྣོན། སྤུས་ཚད་བདེ་འཇགས་འགན་ལེན། སྤུས་ལེགས་ཐོན་རྫས་འཛུགས་སྐྲུན་དང་སྲུང་སྐྱོབ། རོགས་སྐྱོར་དང་ལྟ་སྐུལ། ཟུར་བཀོད་སྒྲིག་སྲོལ་བཅས་ཚུད་ཡོད། 《སྲོལ་ཡིག》ལས་སྐྱེ་ཁམས་སྲུང་སྐྱོབ་ཀྱི་འདུ་ཤེས་གཙོ་བོ་རྒྱུན་འཁྱོངས་བྱས་ཏེ། སྲིད་གཞུང་སྡེ་ཁག་གི་འགན་འཁྲི་ཁ་གསལ་བཟོས་ནས། འདེབས་འཛུགས་དང་ལས་སྣོན། ཕྱིར་ཚོང་སོགས་ཀྱི་གོ་རིམ་ཁྲོད་སྤུས་ཚད་བདེ་འཇགས་ལྟ་སྐུལ་དོ་དམ་མ་ལག་འཐུས་ཚང་དུ་བཏང་ནས། ཀྲུང་དབྱང་དང་ཞིང་ཆེན་ཏང་ཨུའི་བླང་བྱ་ཁྲིམས་སྲོལ་དོན་ཚན་ནང་ཆ་ཚང་བ་དང་ཡང་དག་པའི་སྒོ་ནས་མངོན་དུ་འཇུག་དགོས།

《སྲོལ་ཡིག》ལས་འཕང་འབྲས་ཐོན་ལས་དང་འབྲེལ་བ་ཡོད་པའི་གྲོང་ཁྱེར་དང་རྫོང་རིམ་པའི་མི་དམངས་སྲིད་གཞུང་དང་དེ་བཞིན་འབྲེལ་ཡོད་སྡེ་ཁག་ལ་གཞི་ཁྱོན་ཅན་གྱི་འཕང་འབྲས་འདེབས་འཛུགས་དང་། སོན་བཟང་གི་འཕང་འབྲས་འདེབས་འཛུགས་དང་སྐྱེ་ལྡན་འདེབས་འཛུགས་ཁྱབ་བརྡལ་གཏོང་བ། ལས་སྣོན་ཞིབ་ཚགས་བྱེད་པ་སོགས་ཐད་ཀྱི་འགན་འཁྲི་གསལ་བོ་བཟོས་ཡོད། གཏན་འབེབས་བྱས་དོན། འཕང་འབྲས་ཐོན་ལས་དང་འབྲེལ་བ་ཡོད་པའི་གྲོང་ཁྱེར་དང་རྫོང་རིམ་པའི་མི་དམངས་སྲིད་གཞུང་གིས་རྨོ་ཞིང་སྲུང་སྐྱོབ་སྲིད་ཇུས་ལག་བསྟར་ནན་མོ་བྱེད་རྒྱུ་དང་། སྐྱེ་ཁམས་ཁོར་ཡུག་གི་ཁུལ་དབྱེ་དོ་དམ་ཚོད་འཛིན་གྱི་བླང་བྱ་དོན་འཁྱོལ་ནན་མོ་བྱེད་དགོས། ས་གནས་ཀྱི་གནས་ཚུལ་དང་བསྟུན་ནས་ཕན་འབྲས་ཆེ་བའི་ཆུ་གྲོན་ཆུང་ལག་རྩལ་ཁྱབ་བརྡལ་བཏང་ནས། ཆུའི་ཐོན་ཁུངས་གྲོན་ཆུང་སྒོས་བེད་སྤྱོད་ཡག་པོ་བྱེད་དགོས། འཕང་འབྲས་ཀྱི་སྡོང་བོ་འདེབས་འཛུགས་བྱེད་པའི་གཅིག་སྡུད་ས་ཁོངས་སུ་སྲུང་སྐྱོབ་ཁྱབ་ཁོངས་དབྱེ་འབྱེད་བྱས་ཏེ། འཕང་འབྲས་ཐོན་ཡུལ་ལ་སྲུང་སྐྱོབ་བྱེད་དགོས།

《སྲོལ་ཡིག》ལས་ནང་དོན་གྱི་སྟེང་ནས་སྤུས་ལེགས་ཐོན་རྫས་འཛུགས་སྐྲུན་སྣེ་ཁྲིད་དུ་བཟུང་ནས། མཚོན་རྟགས་དོ་དམ་དང་བེད་སྤྱོད་ཚད་ལྡན་དུ་གཏོང་བ་དང་། ཐོན་ལས་མཉམ་འདྲེས་འཕེལ་རྒྱས་གཏོང་རྒྱུར་མཐོང་ཆེན་བྱས་ནས་ཐོན་ལས་ཀྱི་གསོན་ཤུགས་གསར་པ་སྐུལ་སྤེལ་གཏོང་དགོས་ལ། རོགས་སྐྱོར་འགན་སྲུང་བྱེད་ཐབས་འཐུས་ཚང་དུ་བཏང་ནས་དེང་རབས་ཐོན་ལས་འཕེལ་རྒྱས་ལ་སྐུལ་འདེད་གཏོང་དགོས། དུས་མཚུངས་སུ། “སྤུས་ཚད་བདེ་འཇགས་འགན་སྲུང་”ཞེས་པའི་ཆེད་དོན་ལེའུ་བཙུགས་ནས་ཚད་གཞིའི་མ་ལག་འཐུས་ཚང་དུ་གཏོང་བ་དང་། སྤུས་ཚད་བདེ་འཇགས་ཞིབ་བཤེར་ཞིབ་དཔྱད་མ་ལག་དང་སྤུས་ཚད་བདེ་འཇགས་རྩད་གཅོད་མ་ལག་འཐུས་ཚང་དུ་གཏོང་བ། ལྟ་སྐུལ་དང་འཐེན་བཤེར་ལ་ཤུགས་སྣོན་པ་སོགས་ཀྱི་ཐད་ནས་དེ་མཚུངས་ཀྱི་གཏན་འབེབས་བྱས་ཏེ། འཕང་འབྲས་ཀྱི་སྤུས་ཚད་བདེ་འཇགས་ལ་ཁྲིམས་སྐྱོང་གི་འགན་སྲུང་མཁོ་འདོན་བྱས།

《སྲོལ་ཡིག》དེ2025ལོའི་ཟླ2ཚེས1ཉིན་ནས་བཟུང་ལག་བསྟར་བྱ་རྒྱུ་རེད།