མཚོ་སྔོན་གྱིས་དཀའ་ཁག་ཆེ་བའི་མང་ཚོགས་དྲོད་འཁོལ་ལྡན་ཞིང་བདེ་འཇགས་ངང་དགུན་སྐྱེལ་བར་ཁག་ཐེག་བྱས།

ཟླ12པའི་ཚེས12ཉིན། ཞིང་ཆེན་དམངས་སྲིད་ཐིན་གྱི་རོགས་སྐྱོབ་ཁྲུའུ་ཡི་འགོ་གཙོ་ཝང་ཝེ་ཡིས་མཚོ་སྔོན་གྱིས་དཀའ་ཁག་ཆེ་བའི་མང་ཚོགས་ཀྱིས་དྲོད་འཁོལ་ལྡན་ཞིང་བདེ་འཇགས་ངང་དགུན་སྐྱེལ་བའི་འབྲེལ་ཡོད་གནས་ཚུལ་ངོ་སྤྲོད་བྱེད་སྐབས་བཤད་རྒྱུར།  དགུན་ཁ་སླེབས་པ་ནས་བཟུང་། ཞིང་ཆེན་དམངས་སྲིད་ཐིན་གྱིས་ཀྲུང་དབྱང་དང་ཞིང་ཆེན་ཏང་ཨུ། ཞིང་ཆེན་སྲིད་གཞུང་། དེ་མིན་དམངས་སྲིད་སྡེ་ཁག་གིས་དཀའ་ཁག་ཆེ་བའི་མང་ཚོགས་ཀྱིས་དྲོད་འཁོལ་ལྡན་པའི་ངང་དགུན་སྐྱེལ་བ་དང་བདེ་འཇགས་ངང་དགུན་སྐྱེལ་བའི་སྐོར་གྱི་བཀོད་སྒྲིག་བླང་བྱ་ཕྱོགས་ཡོངས་ནས་དོན་འཁྱོལ་བྱས་ཏེ། དཀའ་ཁག་ཆེ་བའི་མང་ཚོགས་ཀྱིས་དྲོད་འཁོལ་ལྡན་ཞིང་བདེ་འཇགས་ངང་དགུན་སྐྱེལ་བའི་ཆབ་སྲིད་ཀྱི་འགན་འཁྲི་ཕྲག་ཏུ་བླངས་པ་དང་། སྔར་ལས་ཤུགས་ཚད་ཡོད་པ་དང་དྲོད་ཚད་ཡོད་པའི་རོགས་སྐྱོར་བྱེད་ཐབས་བརྒྱུད་དེ། ཞིང་ཆེན་ཡོངས་ཀྱི་དཀའ་ཁག་མང་ཚོགས་ཀྱིས་དྲོད་འཁོལ་ལྡན་ཞིང་བདེ་འཇགས་ངང་དགུན་སྐྱེལ་བར་ཁག་ཐེག་བྱས།

རྒྱུས་ལོན་བྱུང་བ་ལྟར་ན། ཞིང་ཆེན་ཡོངས་ཀྱི་དམངས་སྲིད་སྡེ་ཁག་གིས་ཕྱོགས་ཡོངས་ནས་དྲ་ངོས་དང་ཡུལ་དངོས་བརྒྱུད་དེ་ཡོང་འབབ་དམའ་བའི་མང་ཚོགས་ལ་མཐིལ་རྟོགས་གྲལ་བཤེར་བྱས་པ་དང་། གཙོ་བོ་དམའ་སྲུང་ཁྱིམ་ཚང་དང་འགྲོ་སོང་མང་པའི་དཀའ་ཁག་ཆེ་བའི་ཁྱིམ་ཚང་། ཉེ་བའི་ལོ་གཉིས་ཀྱི་ནང་སྐྱོབ་རོགས་རེ་ཞུ་བྱས་ཀྱང་མོས་མཐུན་བྱུང་མེད་པའི་ཁྱིམ་ཚང་སོགས་དཀའ་ཁག་ཆེ་བའི་མང་ཚོགས་ལ་ཞིབ་བཤེར་བྱས་ཏེ། ཆ་རྐྱེན་འདང་བའི་ཁྱིམ་ཚང་དང་མི་སྣ་དག་དུས་ལྟར་སྐྱོབ་རོགས་ཁྱབ་ཁོངས་ནང་བཞག ས་གནས་སོ་སོས་གཞི་གྲངས་ཆེན་མོའི་རྐྱེན་སྲོལ་བརྒྱུད་ནས་མི་ཐེངས་འབུམ་གསུམ་དང་ཁྲི་དྲུག་སྟོང་ལྔ་དང་ལྔ་བརྒྱར་གྲལ་བཤེར་བྱས་པ་དང་། གྲལ་བཤེར་བརྒྱུད་དེ་དཀའ་ཁག་ཡོད་པའི་མང་ཚོགས་ཁྲི་བརྒྱད་དང་སྟོང་གསུམ་སུམ་བརྒྱ་དུས་ལྟར་དམའ་སྲུང་དང་དཀའ་ཁག་ཆེ་བ་སོགས་ཀྱི་རོགས་སྐྱོབ་ཁྱབ་ཁོངས་ནང་འཇོག་རྒྱུ་རེད།

ས་གནས་སོ་སོའི་དམངས་སྲིད་སྡེ་ཁག་གིས་དོན་དག་གཅིག་ལ་གྲོས་གཞི་གཅིག་དང་རྫོང་རིམ་པའི་དཀའ་ཁག་མང་ཚོགས་ཀྱི་གྲོས་དོན་མཐུན་སྦྱོར་རྐྱེན་སྲོལ་སྤྱད་དེ། འགན་སྲུང་དང་རོགས་སྐྱོབ་ལས་ལུས་པའི་གནད་དོན་གྱི་གྲལ་བཤེར་ཤུགས་ཚད་ཇེ་ཆེར་བཏང་ནས། ནད་དང་གནོད་འཚེ་སོགས་གློ་བུར་དོན་རྐྱེན་བྱུང་བའི་སྟབས་ཀྱིས་རོགས་སྐྱོབ་ཁྱབ་ཁོངས་སུ་ཚུད་མེད་པའི་དཀའ་ཁག་མི་སྣ་དུས་ལྟར་འགན་སྲུང་ཁྱབ་ཁོངས་ནང་འཇོག་པ་དང་། གཞི་རྩའི་འཚོ་བ་འགན་སྲུང་ལེགས་པོ་བྱེད་དགོས། ཟླ11པའི་ཟླ་མཇུག་བར། ཞིང་ཆེན་ཡོངས་སུ་ཡོང་འབབ་དམའ་བའི་འགུལ་རྣམ་ཚད་ལེན་མི་འབོར་ས་ཡ་གཅིག་དང་ཁྲི་བཞི་སྟོང་གཅིག་དང་དྲུག་བརྒྱ་ཡོད་ལ། ཁྱོན་བསྡོམས་གནས་སྐབས་རོགས་སྐྱོབ་ལག་བསྟར་བྱས་པའི་མི་ཐེངས་ཁྲི་དགུ་དང་སྟོང་གཉིས་དང་ཉིས་བརྒྱ་ཡོད་ཅིང་།  བསྡོམས་པས་རོགས་སྐྱོབ་མ་དངུལ་ཐེར་འབུམ་གཉིས་དང་དུང་ཕྱུར་བཞི་བྱེ་བ་བདུན་དང་ས་ཡ་བཞི་བཏང་།

ཟླ10པའི་ཚེས15ཉིན་ནས་བཟུང་། ཞིང་ཆེན་ཡོངས་ཀྱི་ཁྱབ་ཁོངས་སུ་དགུན་ཁར་དྲོད་འཁོལ་སྐྱེལ་བའི་ཆེད་དམིགས་རོགས་སྐྱོབ་འགུལ་སྐྱོད་སྤེལ་འགོ་ཚུགས། ཆེད་དམིགས་རོགས་སྐྱོབ་འགུལ་སྐྱོད་སྤེལ་བའི་ཚུན་ལ། ཁྱོན་བསྡོམས་ཡུལ་འཁྱམ་མི་སྣ་མི་ཐེངས་སྟོང་གཅིག་དང་ལྔ་བརྒྱ་ཞེ་བཞིར་རོགས་སྐྱོབ་བྱས། གྲོང་ཁྱེར་དང་ཁུལ། རྫོང་དང་ཆུས་སོ་སོའི་དམངས་སྲིད་སྡེ་ཁག་གིས་རོགས་སྐྱོབ་དྲ་ཚིགས་ཆུ་ཚོད་ཉེར་བཞིར་གེགས་མེད་ཡོང་བ་རྒྱུན་སྲུང་བྱས་པ་དང་། དྲ་ཚིགས་ཀྱི་ནུས་པ་འདོན་སྤེལ་བྱས་ནས་དཀའ་ཁག་མང་ཚོགས་ལ་སེམས་གསོ་བྱས་པ་དང་ཁོ་ཚོའི་འགལ་བ་ཐག་གཅོད་བྱས་ཏེ། དཀའ་ཁག་མང་ཚོགས་ཀྱིས་རོགས་སྐྱོབ་ཀྱི་རེ་བ་ཞུས་ན་ཞུ་ཡུལ་ཡོད་པ་དང་དུས་ལྟར་རོགས་སྐྱོབ་ཐུབ་པར་ཁག་ཐེག་བྱས།