2024ལོར་མཚོ་སྔོན་གྱིས་རོང་འབྲོག་མང་ཚོགས་མི་ཐེངས6000ལ་གསོ་སྦྱོང་བྱས།

ཟླ12པའི་ཚེས10ཉིན་གསར་འགོད་པས་མཚོ་སྔོན་ཞིང་ཆེན་ཞིང་ལས་དང་གྲོང་གསེབ་ཐིན་ནས་རྒྱུས་ལོན་བྱུང་བ་ལྟར་ན།  ད་ལོའི་ཚུན་ལ། མཚོ་སྔོན་ཞིང་ཆེན་གྱིས“སྡེ་བ་སྟོང་དཔེ་སྟོན་དང་སྡེ་བ་ཁྲི་བཅོས་སྒྲིག”གི་བཟོ་འགོད་ཉམས་མྱོང་སློབ་སྦྱོང་དང་བེད་སྤྱོད་བྱེད་པ་ཁྲིད་སྟོན་དུ་བྱས་ཏེ། ཞིང་ལས་དང་གྲོང་གསེབ་ཀྱི་སྤུས་ཚད་མཐོ་བའི་འཕེལ་རྒྱས་ཀྱི་འཇོན་མིའི་དགོས་མཁོར་དམ་པོར་དམིགས་པ་དང་། ལག་རྩལ་རྩལ་ནུས་ཀྱི་ཆུ་ཚད་མཐོ་རུ་གཏོང་བ། ཐོན་ལས་འཕེལ་རྒྱས་ཀྱི་ནུས་པ་ཆེ་རུ་གཏོང་བ། ཕྱོགས་བསྡུས་བྱང་ཚད་མཐོ་རུ་གཏོང་བ་བཅས་ལ་དམ་པོར་དམིགས་ནས། འབྲུ་རིགས་བདེ་འཇགས་ཀྱི་སྲུང་སྐྱོང་པ་དང་། ཐོན་ལས་འཕེལ་རྒྱས་ཀྱི་སྣེ་ཁྲིད་པ། གྲོང་གསེབ་དར་སྤེལ་གྱི་གཙོ་ཤུགས་དམག་བཅས་སྐྱེད་སྲིང་བྱས།  ད་ལོའི་ཟླ11པའི་ཟླ་མཇུག་བར་ས་གནས་སོ་སོས་ཞིང་ཕྱུགས་ལས་ཐོན་སྐྱེད་ཀྱི་དོན་དངོས་དང་ཟུང་འབྲེལ་བྱས་ཏེ། བྱང་ཚད་མཐོ་བའི་རོང་འབྲོག་མང་ཚོགས་གསོ་སྐྱོང་དང་། གྲོང་གསེབ་ཀྱི་འཇོན་མི་སྐྱེད་སྲིང་། “སྣེ་ཁྲིད་མཁན”གྱི་ཤེས་ལྡན་མི་སྣ་སྐྱེད་སྲིང་། རོང་འབྲོག་པའི་འབྲིང་རིམ་ལས་རིགས་སློབ་གསོའི་གསོ་སྐྱོང་བཅས་བྱས་ཤིང་། རིམ་རྩིས་བྱས་ན་གསོ་སྦྱོང་གི་མི་ཐེངས6000ཙམ་ལ་བསླེབས་ཡོད།

བྱང་ཚད་མཐོ་བའི་རོང་འབྲོག་མང་ཚོགས་གསོ་སྐྱོང་བྱེད་པའི་ཐད་གཙོ་བོ་འདེབས་འཛུགས་ལས་རིགས་དང་། གསོ་སྤེལ་ལས་རིགས། ཞིང་ལས་འཕྲུལ་ཆས།  རོང་འབྲོག་པའི་རྣམ་པ་གསར་བའི་གཉེར་སྐྱོང་བྱེད་པོ་སོགས་ལ་བརྒྱུད་རིམ་ལྡན་པའི་ངང་གསོ་སྦྱོང་བྱས་པ་དང་། གྲོང་གསེབ་ཀྱི་འཇོན་མི་གསོ་སྐྱོང་བྱེད་པའི་ཐད་སྡེ་བའི“ཨུ་ཡོན་ལྷན་ཁང་གཉིས”ཀྱི་ཚན་ཁག་དང་། སློབ་ཆེན་པའི་སྡེ་དཔོན།  སྡེ་བར་སྡོད་པའི་ལས་བྱེད་པ། སྡེ་བའི་ཕྱུག་འགྱུར་སྣེ་ཁྲིད་པ་སོགས་མི750གསོ་སྦྱོང་བྱས་པ་རེད།  སྣེ་ཁྲིད་འཇོན་མི་གསོ་སྐྱོང་བྱེད་པའི་ཐད་རྣམ་པ་གསར་བའི་ཞིང་ལས་གཉེར་སྐྱོང་གི་སྣེ་ཁྲིད་པ་གཙོ་བོ་གསོ་སྦྱོང་བྱས་པ་དང་། ཀྲུང་ཧྲན་སློབ་ཆེན་དང་ནུབ་བྱང་ཞིང་ནགས་ཚན་རྩལ་སློབ་ཆེན་གྱིས་སོ་སོར་མི60གསོ་སྐྱོང་བྱེད་པའི་འགན་འཁུར།  རོང་འབྲོག་མང་ཚོགས་ཀྱི་འབྲིང་རིམ་ལས་རིགས་སློབ་གསོའི་ཐད་ཞིང་ལས་ལོ་ཏོག་དང་སྒོ་ཕྱུགས་ཐོན་སྐྱེད་ལག་རྩལ་དང་། ཞིང་ལས་ཐོན་རྫས་གསོག་འདྲེན།  ཁྱིམ་ཚང་ཞིང་རའི་ཐོན་སྐྱེད་གཉེར་སྐྱོང་སོགས་ཀྱི་མི་སྣ200གསོ་སྐྱོང་བྱས།

རོང་འབྲོག་མང་ཚོགས་ཀྱི་གསོ་སྐྱོང་ལས་དོན་ལ་ཤུགས་སྣོན་དང་ཚད་ལྡན་དུ་གཏོང་བ་དང་། གསོ་སྐྱོང་གི་སྤུས་ཚད་མཐོ་རུ་གཏོང་བ། གསོ་སྐྱོང་གི་ཆུ་ཚད་མཐོ་རུ་གཏོང་བ་བཅས་བྱེད་ཆེད། ཞིང་ཆེན་ཞིང་ལས་དང་གྲོང་གསེབ་ཐིན་གྱིས《མཚོ་སྔོན་ཞིང་ཆེན་གྱི་རོང་འབྲོག་མང་ཚོགས་གསོ་སྐྱོང་དང་དོ་དམ་བྱེད་ཐབས》བཏོན་ནས། རོང་འབྲོག་མང་ཚོགས་ཀྱི་གསོ་སྐྱོང་ལས་དོན་ཁྲིམས་དང་སྒྲིག་སྲོལ་ལྟར་བདེ་འཇགས་ངང་སྤེལ་བར་ལམ་ལུགས་ཀྱི་འགན་སྲུང་བྱས་པ་དང་ཆབས་ཅིག སློབ་མའི་སློབ་སྦྱོང་གི་ཕན་འབྲས་ལ་དཔྱད་ཞིབ་གདེང་འཇོག་དང་རྗེས་སྙེག་ཞབས་ཞུ་བྱས་ནས། རོང་འབྲོག་མང་ཚོགས་ཀྱི་གསོ་སྐྱོང་ལས་དོན་དོན་ཐོག་ཏུ་འཁྱོལ་བར་མ་ཟད། ཞིང་ཕྱུགས་ལས་ཀྱི་ཕན་འབྲས་ཆེ་རུ་གཏོང་བ་དང་རོང་འབྲོག་པའི་ཡོང་འབབ་འཕར་སྣོན་ལ་སྐུལ་འདེད་བཏང་།