​བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཏང་ཙུའི་དེ་སྔའི་ཁོངས་མི་དང་ཀྲུའུ་རེན་གཞོན་པ་ཅི་གོ་ཀང་གིས་ལྐོག་རྔན་བླངས་པ་དང་གཞུང་ཁོངས་ཀུང་སིའི་མི་སྣས་འགན་དབང་གང་བྱུང་དུ་སྤྱད་པའི་གྱོད་གཞིའི་འདྲི་གཅོད་དང་པོའི་བཅད་ཁྲ་ཁྱབ་བསྒྲགས་བྱས་པ།

བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཏང་ཙུའི་དེ་སྔའི་ཁོངས་མི་དང་ཀྲུའུ་རེན་གཞོན་པ་ཅི་གོ་ཀང་གིས་ལྐོག་རྔན་བླངས་པ་དང་གཞུང་ཁོངས་ཀུང་སིའི་མི་སྣས་འགན་དབང་གང་བྱུང་དུ་སྤྱད་པའི་གྱོད་གཞིའི་འདྲི་གཅོད་དང་པོའི་བཅད་ཁྲ་ཁྱབ་བསྒྲགས་བྱས་པ།

ཟླ་12ཚེས་11ཉིན་སི་ཁྲོན་ཞིང་ཆེན་ཁྲེང་ཏུའུ་གྲོང་ཁྱེར་འབྲིང་རིམ་མི་དམངས་ཁྲིམས་ཁང་གིས། བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཏང་ཙུའི་དེ་སྔའི་ཁོངས་མི་དང་ཀྲུའུ་རེན་གཞོན་པ་ཅི་གོ་ཀང་གིས་ལྐོག་རྔན་བླངས་པ་དང་གཞུང་ཁོངས་ཀུང་སིའི་མི་སྣས་འགན་དབང་གང་བྱུང་དུ་སྤྱད་པའི་གྱོད་གཞིར་འདྲི་གཅོད་དང་པོ་བྱས་པའི་བཅད་ཁྲ་ཁྱབ་བསྒྲགས་བྱས་ཤིང་། ཞུ་སྦྱོར་ཕྱི་མ་ཅི་གོ་ཀང་གིས་ལྐོག་རྔན་བླངས་པའི་ཉེས་པ་བསགས་པར་དུས་བཀག་བཙོན་འཇུག་ལོ་བཅུ་གཅིག་བྱ་རྒྱུ་དང་འབྲེལ་དངུལ་ཆད་མི་དམངས་ཤོག་སྒོར་ཁྲི་སུམ་བརྒྱ་གཏོང་རྒྱུ་དང་། གཞུང་ཁོངས་ཀུང་སིའི་མི་སྣས་འགན་དབང་གང་བྱུང་དུ་སྤྱད་པའི་ཉེས་པ་བསགས་པར་དུས་བཀག་བཙོན་འཇུག་ལོ་ལྔ་བྱ་རྒྱུ་ཡིན་པ་ལས། མཐར་དུས་བཀག་བཙོན་འཇུག་ལོ་བཅུ་གསུམ་བྱ་རྒྱུ་དང་འབྲེལ་དངུལ་ཆད་མི་དམངས་ཤོག་སྒོར་ཁྲི་སུམ་བརྒྱ་གཏོང་རྒྱུའི་ཐག་བཅད་ཡོད། ཅི་གོ་ཀང་གིས་ལྐོག་རྔན་བླངས་པའི་རྒྱུ་དངོས་དང་འཕེལ་སྐྱེད་བཅའ་ཁྲིམས་ལྟར་བདའ་འདེད་བཏང་ནས་རྒྱལ་མཛོད་ལ་རྩིས་འབུལ་ཞུ་རྒྱུ་ཡིན་པ་རེད།

    ཞིབ་གཅོད་བྱས་རྗེས་གསལ་རྟོགས་བྱུང་བར། 2002ལོ་ནས་2022ལོའི་བར་ཞུ་སྦྱོར་ཕྱི་མ་ཅི་གོ་ཀང་གིས་དེ་སྔ་རྒྱལ་ཁབ་འཕེལ་རྒྱས་འཆར་འགོད་ཨུ་ལྷན་མ་འཇོག་སིའི་ལས་རོགས་སྐོར་ཞིབ་པ་དང་། རྒྱལ་ཁབ་འཕེལ་རྒྱས་དང་སྒྱུར་བཅོས་ཨུ་ལྷན་གཏན་འཇགས་རྒྱུ་ནོར་མ་འཇོག་སིའི་ལས་རོགས་སྐོར་ཞིབ་པ་དང་སི་ཀྲང་གཞོན་པ། བོད་རང་སྐྱོང་ལྗོངས་མི་དམངས་སྲིད་གཞུང་གི་ཏང་ཙུའི་ཁོངས་མི། བོད་རང་སྐྱོང་ལྗོངས་འཕེལ་རྒྱས་དང་སྒྱུར་བཅོས་ཨུ་ལྷན་གྱི་ཏང་ཙུའི་ཧྲུའུ་ཅི་དང་ཀྲུའུ་རེན། བོད་ལྗོངས་གསར་སྤེལ་མ་འཇོག་ཚོགས་པ་ཚད་ཡོད་ཀུང་སིའི་ཏུང་ཧྲི་ཀྲང་། བོད་རང་སྐྱོང་ལྗོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་སོགས་བྱེད་སྐབས་གོ་གནས་ཀྱི་སྟབས་བདེ་སྤྱད་པའམ་ཡང་ན་དེའི་འགན་དབང་དང་གནས་བབ་ལས་བྱུང་བའི་སྟབས་བདེ་སྤྱད་དེ། རྒྱལ་ཁབ་ཀྱི་ལས་དོན་མི་སྣ་གཞན་དག་གི་གོ་གནས་ཐོག་གི་བྱ་བྱེད་བརྒྱུད་ལས་གྲྭ་འགན་གཙང་ལེན་པ་དང་། རྣམ་གྲངས་ལ་ཞིབ་མཆན་འགོད་པ། རྐང་དབང་བརྒྱུད་བཤུག་གཏོང་བ་སོགས་ཀྱི་ཐད་འབྲེལ་ཡོད་ཚན་པ་དང་མི་སྒེར་ལ་ཁེ་ཕན་གཉེར་ནས་ཁྲིམས་འགལ་ངང་རྒྱུ་དངོས་བླངས་པ་མི་དམངས་ཤོག་སྒོར་ལ་ཕབ་ན་ཁྱོན་བསྡོམས་སྒོར་ཁྲི་4398ལྷག་ཟིན་ཡོད། 2016ལོ་ནས་2021ལོའི་བར་ཅི་གོ་ཀང་གིས་བོད་ལྗོངས་གསར་སྤེལ་མ་འཇོག་ཚོགས་པ་ཚད་ཡོད་ཀུང་སིའི་ཏུང་ཧྲི་ཀྲང་དང་ཁྲིམས་གཏན་འཁེལ་བའི་འཐུས་མིའི་འགན་འཁུར་རིང་། བུན་ལོར་འཚོང་འགན་གྱི་བར་གླ་སྤྲོད་པ་དང་ཆེད་སྤྱོད་མ་དངུལ་དོ་དམ་བྱེད་པ་སོགས་ཀྱི་ཐད་ཉེར་ཕྱོགས་གཡོ་ཟོལ་དང་འགན་དབང་གང་བྱུང་དུ་སྤྱད་པས་རྒྱལ་ཁབ་ཀྱི་ཁེ་ཕན་ལ་གྱོང་གུན་ཧ་ཅང་ཚབས་ཆེན་པོ་བཟོས་ཡོད་པ་རེད།