ཡུས་ཧྲུའུ་ཁུལ་གྱིས་འགྱིག་འགོག་སྙིགས་འཕྲིའི་ཆེད་དོན་འགུལ་སྐྱོད་སྤེལ།

ཟླ12འི་ཚེས4ཉིན། གསར་འགོད་པས་ཡུས་ཧྲུའུ་བོད་རིགས་རང་སྐྱོང་ཁུལ་ཚོང་ར་ལྟ་སྐུལ་དོ་དམ་ཅུའུ་ནས་རྒྱུས་ལོན་བྱུང་བ་ལྟར་ན། ད་ལོར། ཡུས་ཧྲུའུ་ཁུལ་ཚོང་ར་ལྟ་སྐུལ་དོ་དམ་ལས་ཁུངས་ཀྱིས་ཚོང་རའི་ལས་རིགས་ཁྱབ་ཁོངས་ཀྱི་འགྱིག་ཁུག་འཚོང་བར་བཅོས་སྐྱོང་བྱེད་པའི་ཆེད་དོན་འགུལ་སྐྱོད་སྤེལ་བས། འགྱིག་འགོག་སྙིགས་འཕྲིའི་བྱ་བའི་ཐད་ནས་དུས་རིམ་རང་བཞིན་གྱི་གྲུབ་འབྲས་བླངས་པ་དང་། ཡུས་ཧྲུའུ་ཁུལ་གྱི་སྐྱེ་ཁམས་ཁོར་ཡུག་ལེགས་བསྒྱུར་དང་རྒྱུན་མཐུད་འཕེལ་རྒྱས་ཐད་རྨང་གཞི་བརྟན་པོ་བཏིངས།

ལས་བྱེད་མི་སྣ་རྩ་འཛུགས་བྱས་ཏེ་རིགས་མི་འདྲ་བའི་ཚོང་ར་སོ་སོ་དང་གཞིས་ཁུལ། སློབ་གྲྭ་བཅས་སུ་སོང་ནས། ཆེད་དོན་འཆད་ཁྲིད་བྱས་པ་དང་དྲིལ་སྒྲོག་ལག་དེབ་བཀྲམས་པ། དྲིལ་སྒྲོག་སྦྱར་ཡིག་སྦྱོར་བ་སོགས་ཀྱི་རྣམ་པ་མང་པོ་སྤྱད་དེ། རྒྱ་ཆེའི་ཚོང་བ་དང་འཛད་སྤྱོད་པ། དགེ་སློབ་བཅས་ལ་འགྱིག་འགོག་སྲིད་ཇུས་དང་ཁྲིམས་སྲོལ། ཁོར་ཡུག་སྲུང་སྐྱོབ་ཐད་ཀྱི་ཤེས་བྱ་ཁྱབ་གདལ་དུ་བཏང་། དུས་མཚུངས་སུ། ཁྲིམས་འཛིན་སྟོབས་ཤུགས་ལ་ལུགས་མཐུན་སྡེབ་སྒྲིག་དང་སྒྲིག་སྦྱོར་བྱས་པ་དང་། ཡུལ་དངོས་རྩད་ཞིབ་ཚན་ཆུང་དང་དངོས་ཟོག་གྲངས་བཤེར་ཚན་ཆུང་། སྒྲིག་ལམ་སྲུང་སྐྱོབ་ཚན་ཆུང་སོགས་ཚན་ཆུང་མང་པོ་བཙུགས་ལ། འགན་ནུས་ལས་བགོས་གསལ་བོ་བྱས་ནས། འགུལ་སྐྱོད་གོ་རིམ་ལྡན་པ་དང་ནུས་པ་ལྡན་པའི་ངང་སྤེལ་བར་ཁག་ཐེག་བྱས། ནག་ཚང་ཡུལ་གནས་ལ་ཞིབ་བཤེར་ཆད་གཅོད་བྱེད་པའི་གོ་རིམ་ཁྲོད། ཁྲིམས་འཛིན་མི་སྣས་འབྲེལ་ཡོད་བཅའ་ཁྲིམས་ཁྲིམས་སྲོལ་དང་ཁྲིམས་བསྟར་སྒྲིག་ལམ་གཞིར་འཛིན་ས་བྱས། མིག་སྔའི་བར་དུ། རྩད་ཞིབ་ཐོག་པའི་དངོས་རྫས་དག་གཏན་ཁེལ་ཡུལ་གནས་སུ་བཀག་སྡོམ་ཉར་ཚགས་བྱས་ཡོད་པ་དང་། དོན་འབྲེལ་གཙོ་གཞིས་ལས་མཚམས་བཞག་ནས་ལེགས་བཅོས་བྱེད་དུ་བཅུག་པ་མ་ཟད། ཁྲིམས་སྲོལ་ལྟར་ཆད་པ་དང་ལེན་བྱས། དེ་ལས་གཞན། རྒྱུན་སྲོལ་ཅན་གྱི་གྲལ་བཤེར་རྐྱེན་སྲོལ་བཙུགས་པ་དང་། དེ་ཚོང་ར་དང་ཚོང་ཁང་ཡོངས་རྫོགས་དང་། ཞིང་ཕྱུགས་ཐོན་རྫས་ཚོང་ར། ཟ་ཁང་། སྨན་འཚོང་ས་སོགས་རིགས་མི་འདྲ་བའི་ཚོང་གཉེར་སྡེ་ཁག་ལ་ཡོངས་སུ་ཁེབས་པར་བྱས་ཡོད། གཙོ་གནད་ཁུལ་ཁོངས་དང་གཙོ་གནད་ཚོང་བ་གཙོར་བཟུང་ནས་ལྟ་སྐུལ་ཚོད་འཛིན་བྱས་ཏེ། ཡུལ་གནས་གཅིག་ཀྱང་ཆད་ལུས་མི་བྱེད་པར་ཁག་ཐེག་བྱས།