“ལམ་གཉིས”ཀྱིས་འཕེལ་རྒྱས་ཆེན་པོར་སྐུལ་འདེད་བཏང་དང་གཏོང་བཞིན་པ།

“ལམ་གཉིས”ཀྱིས་འཕེལ་རྒྱས་ཆེན་པོར་སྐུལ་འདེད་བཏང་དང་གཏོང་བཞིན་པ།

བོད་རང་སྐྱོང་ལྗོངས་དྲ་འཕྲིན་གཞུང་ལས་ཁང་། པ་སངས་སྒྲོལ་དཀར།

2024ལོ་ནི་ཁྲོན་བོད་དང་མཚོ་བོད་གཞུང་ལམ་ཤར་གཏོང་བྱས་ནས་ལོ་ངོ70འཁོར་བའི་ལོ་རེད། ལོ་ངོ70ཡི་རིང་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་བོད་ལྗོངས་གཞུང་ལམ་འཛུགས་སྐྲུན་ཆེད་སྒོར་དུང་ཕྱུར3250ལྷག་བཏང་ནས་བོད་ལྗོངས་ཀྱི་འགྲིམ་འགྲུལ་ལ་གནམ་ས་བླ་འོག་བསྒྱུར་བ་ལྟ་བུའི་འགྱུར་ལྡོག་བྱུང་དུ་བཅུག་ཡོད། བོད་ལྗོངས་རྙིང་པར་དེང་རབས་ཀྱི་གཞུང་ལམ་གཅིག་ཀྱང་མེད་པར་དངོས་ཟོག་སྐྱེལ་འདྲེན་དང་བརྗེ་རེས་བྱེད་པ་ཕྱུགས་རིགས་ལ་བརྟེན་ཀྱི་ཡོད། ལོ་ངོ70ཡི་སྔོན་ལ་ཏང་ཀྲུང་དབྱང་གི་འགོ་ཁྲིད་འོག་ལམ་བཟོའི་དམག་དམངས་ཁྲི10ལྷག་ཙམ་གྱི་དཀའ་སྤྱད་འབད་འཐབ་འོག་ཆ་སྙོམས་མཐོ་ཚད་སྨི4000ཡོད་པའི་འཛམ་གླིང་གི་ཡང་རྩེར་རི་དང་འཕྲད་ན་ལམ་གཏོད་པ་དང་ཆུ་དང་འཕྲད་ན་ཟམ་པ་བསྐྲུན་ནས་ལམ་བཟོ་དཔའ་བོ3000ལྷག་གི་ཚེ་སྲོག་ལ་ཕུལ་ཏེ་མི་རྣམས་ཧང་སངས་དགོས་པའི་ས་མཐོའི“མཁའ་ལམ”བསྐྲུན་ཡོད། 1954ལོའི་ཟླ12ཚེས25ཉིན་རིང་ཚད་ལ་སྤྱི་ལེ4360ཡོད་པའི་ཁྲོན་བོད་དང་མཚོ་བོད་གཞུང་ལམ་དུས་གཅིག་ཏུ་ལྷ་སར་རླངས་འཁོར་ཤར་གཏོང་ཐུབ་པ་དེ་ནི་འཛམ་གླིང་གཞུང་ལམ་ལོ་རྒྱུས་ཐོག་གི་ངོ་མཚར་བྱུང་བ་ཞིག་ཡིན་པ་དང་བོད་ལྗོངས་སུ་དེང་རབས་གཞུང་ལམ་མེད་པའི་ལོ་རྒྱུས་ཀྱང་མཇུག་གྲིལ་བ་རེད།

ལོ་ངོ70ཡི་རིང་། “ལམ་གཉིས”ནི་ཐོག་མཐའ་བར་གསུམ་དུ་བོད་ལྗོངས་དཔལ་འབྱོར་གྱི་སྲོག་རྩ་ཡིན་པ་དང་བོད་ལྗོངས་སུ་འགྲོ་འོང་དང་ཟོང་དབོར་ལས་འགན་གལ་ཆེན་ཁུར་ཡོད། རླངས་འཁོར་ཤར་གཏོང་ཐུབ་པ་ནས་བཟུང་བོད་ལྗོངས་སུ་བཟོ་གྲྭ་དང་པོ་དང་། སློབ་གྲྭ་དང་པོ། དེང་རབས་ཅན་གྱི་སྨན་ཁང་དང་པོ་སོགས་བྱུང་ཡོད་པར་མ་ཟད་དུས་མཚུངས་སུ་བོད་ཀྱི་ཁྱད་ལྡན་ཞིང་འབྲོག་ཐོན་རྫས་དང་མི་རིགས་ལག་ཤེས་བཟོ་རྩལ་ཐོན་རྫས་སོགས“ལམ་གཉིས”བརྒྱུད་རྒྱལ་ཡོངས་ཀྱི་ས་གནས་ཁག་ཏུ་དབོར་ནས་བོད་ལྗོངས་དང་ཕྱི་ཕྱོགས་དབར་འབྲེལ་མཐུད་བྱེད་པའི་སྒོ་མོ་ཕྱེ་ཡོད།

ལོ་ངོ70ཡི་རིང་། “ལམ་གཉིས”ནི་ལྗོངས་ཕྱི་ནང་དང་སྦྲེལ་མཐུད་སྤེལ་རེས་བྱེད་པའི་འབྲེལ་ཟམ་ལྟ་བུར་གྱུར་ནས“ལྗོངས་ཕྱིར་སྐྱོད་པའི”གོམ་སྟབས་མགྱོགས་སུ་ཕྱིན་པར་མ་ཟད། སྔར་བས་མང་བའི་མི་ས་མཐོར་ཡོང་ཐུབ་པ་བྱུང་ཡོད། བོད་ལྗོངས་སུ་འོད་སྟོང་འཕྲོ་བའི་ཕུལ་བྱུང་སྲོལ་རྒྱུན་རིག་གནས་དང་མཛེས་སྡུག་ལྡན་པའི་ས་མཐོའི་རང་བྱུང་མཛེས་ལྗོངས། ཐུན་མོང་མ་ཡིན་པའི་མི་རིགས་ཀྱི་ཡུལ་སྲོལ་གོམས་གཤིས་སོགས་ཡོད་པས་ལྗོངས་ཕྱིའི་དབར་འགྲོ་འོང་བྱེད་ཚད་ཀྱང་སྔར་བས་ཟབ་ཏུ་ཕྱིན་ཡོད།

ལོ་ངོ70ཡི་རིང་། “ལམ་གཉིས”ཀྱིས་མི་རིགས་མཐུན་སྒྲིལ་གྱི་མེ་ཏོག་གང་སར་ཁྱབ་པ་དང་ས་མཐོའི་བུ་ཕྲུག་རྣམས་རྒྱལ་ཡོངས་མི་དམངས་དང་མཉམ་དུ་ཡར་ལངས་པ་ནས་ཕྱུག་པོར་གྱུར་པ་དང་། སྟོབས་ལྡན་དུ་གྱུར་པའི་བར་གྱི་རླབས་ཆེན་མཆོང་སྐྱོད་བསུས་ཡོད།

“ལམ་གཉིས”སུ་རླངས་འཁོར་ཤར་གཏོང་ཐུབ་པ་ནི་ལམ་བཟོའི་དཔུང་སྡེ་དང་མི་རིགས་ཁག་གི་མང་ཚོགས་ཀྱིས་ཐུན་མོང་ཐོག་འབད་འཐབ་བྱས་ནས་བྱུང་བའི་གྲུབ་འབྲས་ཤིག་ཡིན་པ་དང་། དེས་མཐའ་མཚམས་སྲ་བརྟན་དུ་བཏང་བར་མ་ཟད། མི་རིགས་ས་ཁུལ་གྱི་དར་རྒྱས་གོང་འཕེལ་ལའང་སྐུལ་འདེད་བཏང་ཡོད་པ་དང་། ཁྲོན་བོད་གཞུང་ལམ་དང་མཚོ་བོད་གཞུང་ལམ་གྱིས་གངས་ལྗོངས་ས་མཐོ་དང་མེས་རྒྱལ་ཁྱིམ་ཚང་ཆེན་མོའི་དབར་འབྲེལ་བ་དམ་ཟབ་བྱས་ནས་མི་རིགས་ཁག་དབར་གྱི་འགྲོ་འོང་དང་སྤེལ་རེས། མཉམ་འདྲེས་བཅས་ལ་ཐུན་མོང་ཐོག་སྐུལ་འདེད་བཏང་ནས་མི་རིགས་མཐུན་སྒྲིལ་གྱི་མཚར་སྡུག་ལྡན་པའི་མེ་ཏོག་ཅིག་བཞད་དུ་བཅུག་ཡོད།