"རྨ་གཡང་རྟགས་མའི"ལྷུག་རྩོམ་འགྲན་སྡུར་གྱི་དཔྱད་འདེམ་མཇུག་འབྲས།

མཚོ་སྔོན་རྒྱང་སྒྲོག་བརྙན་འཕྲིན་ཁང་བོད་སྐད་རླུང་འཕྲིན་དང《མཚོ་སྔོན་བོད་ཡིག་ཁྲིམས་སྐྱོང་ཚགས་པར》 རྨ་ཆེན་རྫོང་རྨ་གཡང་རླངས་འཁོར་ཁ་ལོ་བའི་སློབ་གྲྭ་བཅས་ཀྱིས་མཉམ་འབྲེལ་སྒོས་བསྒྲུབས་པའི"རྨ་གཡང་རྟགས་མའི"འགྲིམ་འགྲུལ་བདེ་འཇགས་བརྗོད་གཞི་ཡིན་པའི་རྒྱལ་ཡོངས་བོད་ཀྱི་ལྷུག་རྩོམ་འགྲན་སྡུར་གྱི་བྱ་འགུལ་དེ་ཟླ5ལྷག་གི་རིང་སྤེལ་ནས། ཁྱོན་བསྡོམས་བརྩམས་ཆོས183འབྱོར་ལ། དེའི་ཁྲོད་བརྩམས་ཆོས45བདམས་ཐོན་བྱུང་ནས། དཔྱད་འདེམས་པ་རྣམས་ཀྱིས་དྲང་གཞག་དང་དྲང་བདེན། ལུགས་མཐུན་བཅས་ཀྱི་སྒོ་ནས་གསལ་འདེམས་བྱས་པ་བརྒྱུད། བྱ་དགའ་ཨང་དང་པོ་གཅིག་དང་གཉིས་པ་གཉིས། གསུམ་པ་གསུམ། ཕུལ་བྱུང་བྱ་དགའ་བཅུ་བཅས་རྟིང་ཐག་བཅད།

ཐེངས་འདིའི་འགྲན་སྡུར་ལ་མཚོན་ན། རྩོམ་ལུས་ལྷུག་རྩོམ་ཡིན་ཞིང་བརྗོད་བྱ་འགྲིམ་འགྲུལ་བདེ་འཇགས་ཡིན་པས། རྒྱ་ཆེའི་མི་དམངས་མང་ཚོགས་ཀྱི་འགྲིམ་འགྲུལ་བདེ་འཇགས་ཀྱི་ཤེས་བྱ་དང་འདུ་ཤེས་མཐོར་འདེགས་འབྱུང་བར་ཕན་པ་བྱུང་ལ། བོད་ཀྱི་རྩོམ་པ་པོ་རྣམས་ལ་ལྷུག་རྩོམ་གསར་རྩོམ་གྱི་སྡིངས་ཆ་གལ་ཆེན་ཞིག་འདོན་སྤྲོད་བྱས་ཡོད་པས། གོ་བསྐོན་སློབ་གསོ་དང་སྒྱུ་རྩལ་མཛེས་དཔྱོད་ཀྱི་ནུས་པ་ལྡན་པ་མ་ཟད། ཀྲུང་ཧྭའི་ཕུལ་བྱུང་སྲོལ་རྒྱུན་རིག་གནས་རྒྱུན་འཛིན་དང་དར་སྤེལ་གཏོང་པ་དང་། རྩོམ་རིག་ལ་བརྟེན་ནས་ཀྲུང་ཧྭ་མི་རིགས་ལས་སྐལ་གཅིག་མཐུན་ཚོགས་པ་འཛུགས་སྐྲུན་བྱེད་པའི་ཐད་ནུས་པ་བླ་ལྷག་ཐོན་འདུག