སྙིང་ལ་ཇི་ལྟར་སྲུང་སྐྱོབ་ལེགས་པོ་བྱེད་དགོས།

ཉེ་བའི་ལོ་འགའི་རིང་། སྙིང་ཁམས་ཁྲག་རྩའི་ནད་འབྱུང་ཚད་རིམ་བཞིན་ཇེ་མཐོར་འགྲོ་བཞིན་ཡོད་པར་མ་ཟད། ལོ་ཆུང་གཞོན་ནུ་མང་པོར་གློ་བུར་དུ་ནད་གཞི་དེ་ཕོག་པའི་ཆ་འཕྲིན་ཡང་ཡང་གོ་རྒྱུ་ཡོད་པ་ནི་མི་སེམས་སྐྱི་གཡའ་བའི་གནས་ཚུལ་ཞིག་རེད། འོ་ན་དུས་རྒྱུན་ང་ཚོས་ཡ་ཁོག་སྙིང་ལ་སྲུང་སྐྱོབ་ཇི་ལྟར་བྱེད་དགོས་པ་དང་། སྙིང་ཁམས་ཁྲག་རྩའི་ནད་རིགས་སྔོན་འགོག་ཇི་ལྟར་བྱ་དགོས་སམ་ཞེ་ན།  གཤམ་ནས་ང་ཚོས་མཉམ་དུ་དེའི་སྐོར་གྱི་བདེ་ཐང་ཤེས་བྱ་སྐོར་ཞིག་ལ་རྒྱུས་ལོན་བྱ།

གཅིག གཉིད་ཡག་པོ་ཉལ་དགོས།

མིའི་སྙིང་གི་འཕར་ལྡིང་ལ་ཚད་གཞི་ཡོད་དེ། གཉིད་ཁུག་པའི་སྐབས་སུ། སྙིང་གི་འཕར་ཚད་གཉིད་མ་ཁུག་གོང་ལས་སྐར་མ་རེར་ཐེངས10ནས30ཡིས་ཉུང་བ་རེད།  དུས་ཡུན་རིང་པོར་མཚན་སྐྱེལ་ན་ལུས་པོའི་བརྗེ་ཚབ་འཁྲུག་ཅིང་། དབང་རྩ་འགུལ་ཤུགས་ཆེ་བ། སྙིང་གི་འཕར་ཚད་མགྱོགས་པ་བཅས་ཀྱི་རྐྱེན་པས་སྙིང་ལ་གནོན་ཤུགས་ཆེན་པོ་འབྱུང་སྲིད། དེས་ན་སྙིང་ལ་སྲུང་སྐྱོབ་ཡག་པོ་བྱེད་དགོས་ན། ཐོག་མར་གཉིད་ཡག་པོ་ཉལ་དགོས།

གཉིས། ཁྲག་ཤེད་ཚོད་འཛིན་བྱེད་དགོས།

ཁྲག་ཤེད་མཐོ་ན་སྙིང་གི་འཕར་ཚད་ཇེ་མགྱོགས་སུ་འགྲོ་སྲིད། ཡུན་རིང་བོར་ཁྲག་ཤེད་བརྟན་པོ་མིན་ན། སྙིང་ཤ་ཇེ་མཐུག་ཏུ་འགྲོ་བ་དང་སྙིང་ཁམས་རྒྱགས་པོ་ཆགས་སྲིད། དེར་བརྟེན། སྙིང་ལ་སྲུང་སྐྱོབ་བྱེད་པའི་གནད་འགག་ནི་ཁྲག་ཤེད་ལ་ཚོད་འཛིན་བྱེད་དགོས་པ་དེ་ཡིན།

གསུམ། ཐ་མག་གཅོད་དགོས།

ལོ་ཚོད་ཅི་འདྲ་ལ་སླེབས་རུང་དུས་ཡུན་རིང་པོར་ཐ་མག་འཐེན་ན་སྙིང་རྩ་འགག་པའི་ཉེན་ཁ་ལྡབ7གྱིས་ཆེ་རུ་འགྲོ་སྲིད། དེར་བརྟེན། སྙིང་གི་བདེ་ཐང་གི་ཆེད་དུ། ག་དུས་ཐ་མག་བཅད་ཀྱང་འཕྱི་དྲགས་མེད་ཅིང་། གལ་ཏེ་རང་ཉིད་ཀྱིས་ཐ་མག་མི་འཐེན་ན་མི་གཞན་གྱི་ཐ་མག་གི་དུ་བ་ལས་གཡོལ་དགོས།

བཞི། འགུལ་སྐྱོད་འོས་འཚམ་བྱེད་དགོས།

གོམ་བགྲོད་དང་ལྕགས་རྟར་བཞོན་ནས་འགྲོ་བ། ཆུར་རྐྱལ་བ། སྤོ་ལོ་རྩེ་བ་སོགས་འགུལ་སྐྱོད་ཀྱིས་སྙིང་དང་གློ་བའི་བྱེད་ནུས་ཇེ་ལེགས་སུ་ཕྱིན་ཏེ། སྙིང་ཤ་ལ་གསོ་རླུང་འདང་ངེས་ཤིག་མཁོ་འདོན་བྱས་པ་དང་སྙིང་ཁམས་བདེ་ཐང་ལ་སྲུང་སྐྱོབ་བྱེད་ཐུབ།

ལྔ། བཟའ་བཏུང་ལ་ཚོད་འཛིན་བྱེད་དགོས།

ཞིབ་འཇུག་ལས་ཤེས་རྟོགས་བྱུང་བ་ལྟར་ན། བཟའ་བཏུང་ཚད་ལས་འདས་པའི་ཆུ་ཚོད་གཉིས་ཀྱི་ནང་དུ་སྙིང་ཁམས་ཁྲག་རྩའི་ནད་ཀྱི་ཉེན་ཁ་ལྡབ4ཡིས་ཇེ་མཐོར་འགྲོ་སྲིད། ཆང་བག་མེད་དུ་འཐུང་བའམ་ཞག་ཚིལ་ཆེ་བའི་ཟས་རིགས་མང་པོ་ཟོས་ན་ཁྲག་ཚིལ་ཇེ་མཐོར་འགྲོ་བ་དང་། ཁྲག་རྒྱུན་གྱི་འབྱར་བག་གར་ཚད་མཐོ་རུ་ཕྱིན་ནས་སྙིང་རྩ་འགག་པའི་ཉེན་ཁ་ཇེ་ཆེར་འགྲོ་སྲིད། དེར་བརྟེན། ང་ཚོས་ཡང་དག་པའི་བཟའ་བཏུང་གོམས་གཤིས་རྒྱུན་འཁྱོངས་དང་། འཚོ་བཅུད་དོ་སྙོམས་ཡོང་བར་བྱེད་པ། ཟས་ཀྱི་ཚ་ཚད་ཚོད་འཛིན་བཅས་བྱེད་དགོས་པ་ལས། ཚད་ལས་འདས་པའི་བཟའ་བཏུང་གི་སྦྱོར་བ་ངན་པ་སྤོངས་དགོས།