སྙིང་ཁམས་ཁྲག་རྩའི་ནད་ཡོད་ན་འདི་དག་ལ་དོ་སྣང་བྱེད་དགོས།
གནམ་གཤིས་ཇེ་འཁྱག་ཏུ་འགྲོ་བའི་སྐབས་སུ། མིའི་ལུས་ཕུང་གི་ཁྲག་རྩ་ཕྲ་མོ་དག་འཁུམ་པ་དང་སྙིང་གི་འཕར་ལྡིང་ཇེ་མགྱོགས་སུ་འགྲོ་བ། ཁྲག་ཤེད་ཇེ་མཐོར་འགྲོ་བ་བཅས་ལས་སྙིང་གི་གནོན་ཤུགས་ཇེ་ཆེར་ཕྱིན་ཏེ། སྙིང་གཟེར་རྒྱག་པའམ་ཡང་ན་སྙིང་རྩ་འགག་པ་སོགས་ཀྱི་གནས་ཚུལ་འབྱུང་སྲིད། ལུས་སྟོབས་ཞན་པའི་རྒན་པ་ཚོར་དྲོད་ཚད་ཇེ་དམའ་རུ་འགྲོ་བའི་སྐབས་སུ་རྒྱུན་དུ་ཆམ་པ་དང་ཆམ་རིམས་སོགས་དབུགས་ལམ་མ་ལག་གི་ནད་གཞི་མང་པོ་མཉམ་དུ་འབྱུང་སྲིད་ལ། གློ་བུར་དུ་སྙིང་རྩ་འགག་པའམ་གློ་བུར་དུ་རྐྱེན་ལམ་དུ་ཤོར་བ་སོགས་ཀྱི་གནས་ཚུལ་ཡང་འབྱུང་སྲིད།
སྙིང་ཁམས་ཁྲག་རྩའི་ནད་ཕོག་མཁན་ཚོས་དོ་སྣང་བྱེད་དགོས་པ་གཤམ་གསལ་ལྟར།
གཅིག དྲོད་ཚད་དང་རང་ཉིད་ཀྱི་ལུས་པོར་གཞིགས་ནས་ལྭ་བ་གྱོན་དགོས། དུས་ཚིགས་བརྗེ་དུས་གྱོན་པ་མཐུག་པོ་བཟུང་ནས་ཕྱི་ལ་སོང་ན་ལེགས།
གཉིས། ལུས་པོ་གསོ་བའི་བཟའ་བཏུང་མང་མི་རུང་། སྙིང་ཁམས་ཁྲག་རྩའི་ནད་ཕོག་མཁན་ཚོའི་ངོས་ནས་བརྗོད་ན། ཚྭ་མང་བ་དང་ཞག་ཚིལ་མང་བའི་བཟའ་བཏུང་གིས་ནད་གཞི་ཇེ་སྡུག་ཏུ་གཏོང་བས། བཟའ་བཏུང་གི་ཐད་ནས་ནད་པས་དམར་ཟས་དང་དཀར་ཟས་སྡེབ་དགོས་ལ། ཚྭ་དང་ཞག་ཚིལ་ཉུང་བའི་བཟའ་བཏུང་བསྟེན་དགོས།
གསུམ། ལུས་སྦྱོང་འོས་འཚམ་བྱེད་དགོས། ལུས་སྦྱོང་འོས་འཚམ་བྱས་ན་ཁྲག་གི་འཁོར་རྒྱུག་ཇེ་ལེགས་སུ་གཏོང་ཐུབ། དུས་ཚིགས་ལ་འགྱུར་ལྡོག་འབྱུང་བའི་སྐབས་སུའང་སྙིང་ཁམས་ཁྲག་རྩའི་ནད་ཕོག་མཁན་ཚོས་ལུས་སྦྱོང་མཚམས་འཇོག་པ་དང་ཡང་ན་ཙོག་ཡུན་རིང་བ་སོགས་བྱེད་མི་རུང་།
བཞི། ཆམ་རིམས་འགོག་སྨན་དུས་ཐོག་ཏུ་རྒྱག་དགོས། སྙིང་ཁམས་ཁྲག་རྩའི་ནད་ཕོག་མཁན་ཚོས་ལོ་རེར་ཆམ་རིམས་འགོག་སྨན་བརྒྱབ་སྟེ། ཆམ་རིམས་ལྕི་མོ་དང་དེ་ལས་ཐོན་པའི་སྙིང་ཁམས་ཁྲག་རྩའི་ནད་ཕོག་པ་སྔོན་འགོག་བྱེད་དགོས།
ལྔ། དུས་རྒྱུན་འཚོ་བའི་ཁྲོད་ཕྱོགས་མང་པོར་དོ་སྣང་བྱེད་དགོས། སྙིང་ཁམས་ཁྲག་རྩའི་ནད་ནི་དལ་གཤིས་གཅོང་ནད་ཅིག་ཡིན་པས། ནད་པས་ངེས་པར་དུ་དུས་རྒྱུན་ཁྲག་ཤེད་དང་ཁྲག་མངར་ལ་བལྟ་དགོས་པར་མ་ཟད། སྙིང་ཤུགས་ཉམས་པའི་ནད་པས་ལུས་པོའི་ལྗིད་ཚད་དང་གཅིན་པ་འབབ་ཚད་སོགས་ལ་བརྟག་དཔྱད་ཡག་པོ་བྱེད་དགོས། ནད་པས་སྨན་པའི་ངག་བཞིན་དུས་ཐོག་ཏུ་སྨན་འཐུང་དགོས་ཤིང་། སྨན་གྱི་མང་ཉུང་གང་འདོད་ལྟར་སྣོན་འཕྲི་བྱེད་པའམ་ཡང་ན་འཐུང་མཚམས་འཇོག་པ་སོགས་བྱེད་མི་རུང་། བདེ་ཐང་གི་འཚོ་བ་རོལ་སྟངས་རྒྱུན་འཁྱོངས་བྱས་ཏེ། དུས་བཅད་ལྟར་སྨན་ཁང་དུ་སོང་ནས་སྨན་བཅོས་བསྐྱར་བཤེར་བྱེད་དགོས་ལ། ནད་རྟགས་ཐོན་ཚེ་དུས་ཐོག་ཏུ་སྨན་བཅོས་བྱེད་དགོས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注