ཝང་ཏ་ནན་ཁེ་ལས་སུ་སོང་ནས་རྟོག་ཞིབ་འཚམས་འདྲི་བྱ་འགུལ་སྤེལ།

ཟླ1པོའི་ཚེས7ཉིན། མཚོ་སྔོན་ཞིང་ཆེན་ཏང་ཨུའི་རྒྱུན་ལས་ཨུ་ཡོན། དྲིལ་སྒྲོག་པུའུ་ཡི་པུའུ་ཀྲང་། ཞིང་ཆེན་སྤྱིའི་བཟོ་ཚོགས་ཀྱི་ཀྲུའུ་ཞི་ཝང་ཏ་ནན་མཚོ་སྔོན་ལིས་ཧའོ་དག་གཙང་ནུས་ཁུངས་མ་རྐང་ཚད་ཡོད་ཀུང་ཟི་དང་མཚོ་སྔོན་ཀའོ་ཅིན་ཉི་འོད་ནུས་པའི་ཚན་རྩལ་ཚད་ཡོད་ཀུང་ཟི་རུ་སོང་ནས་ཁེ་ལས་ཀྱི་བཟོ་ཚོགས་བྱ་བར་རྟོག་ཞིབ་བྱས་པ་དང་། ལས་བཟོ་བར་འཚམས་འདྲི་བྱས།

ཝང་ཏ་ནན་ཐོན་སྐྱེད་འཁོར་ཁང་དུ་སོང་ནས་ཁེ་ལས་ཀྱི་ཐོན་སྐྱེད་བདག་གཉེར་དང་ཐོན་ལས་བཟོ་བའི་དཔུང་སྡེའི་འཛུགས་སྐྲུན་བཅོས་བསྒྱུར། ལས་བཟོ་བའི་ཁེ་དབང་སྲུང་སྐྱོབ། བདེ་འཇགས་ཐོན་སྐྱེད་སོགས་ཀྱི་གནས་ཚུལ་ལ་རྒྱུས་ལོན་བྱས། ཁོས་བསྟན་དོན། འདས་པའི་ལོ་གཅིག་ནང་། རྒྱ་ཆེའི་ལས་བཟོ་བ་དང་མང་ཚོགས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་དུ་གཟིགས་ཞིབ་མཛད་སྐབས་གནང་བའི་གསུང་བཤད་གལ་ཆེན་གྱི་དགོངས་དོན་ལག་བསྟར་ནན་མོ་བྱས་པ་དང་། སྐྱེ་ཁམས་དཔལ་ཡོན་གྱི་མཐོ་ས་གསར་སྐྲུན་དང་ཐོན་ལས་གནས་བཞི་འཛུགས་སྐྲུན་བྱས་ལ། སེམས་ཤུགས་གཅིག་སྒྲིལ་གྱིས་འཕེལ་རྒྱས་ལ་སྐུལ་འདེད་བཏང་བ་དང་། ལས་གནས་ལ་རྐང་བཙུགས་ནས་བྱས་རྗེས་བཞག་སྟེ། ཀྲུང་གོའི་ལུགས་ཀྱི་དེང་རབས་ཅན་གྱི་མཚོ་སྔོན་གྱི་ལག་ལེན་ལ་སྐུལ་འདེད་གཏོང་བའི་ཁྲོད་གཙོ་ཤུགས་དམག་གི་ནུས་པ་འདོན་སྤེལ་བྱས། ངས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་། བཟོ་ཚོགས་རྩ་འཛུགས་བཅས་ཀྱི་ཚབ་བྱས་ནས་ཚང་མས་དཀའ་སྤྱད་འབད་བརྩོན་བྱས་པར་བཀའ་དྲིན་ཞུས་པ་ཡིན་ཟེར།

ཝང་ཏ་ནན་གྱིས་ནན་གྱིས་བསྟན་དོན། བསྐྱོད་ལམ་གསར་བར་ཞུགས་ན། རྒྱ་ཆེའི་ལས་བཟོ་བ་དང་མང་ཚོགས་ཀྱིས་མདེལ་གཉིས་སྐར་གཅིག་གི་སྙིང་སྟོབས་དང་ལམ་གཉིས་ཀྱི་སྙིང་སྟོབས། ངལ་རྩོལ་དཔེ་ལེགས་ཅན་གྱི་སྙིང་སྟོབས། ངལ་རྩོལ་སྙིང་སྟོབས། བཟོ་སྐྲུན་པའི་སྙིང་སྟོབས་མུ་མཐུད་དུ་དར་སྤེལ་གཏོང་བ་དང་། བདག་པོའི་འདུ་ཤེས་སྔར་ལས་ཇེ་དྲག་ཏུ་གཏོང་བ། མི་སྒེར་གྱི་འཚར་ལོངས་བརྒྱུད་རིམ་ཁེ་ལས་འཕེལ་རྒྱས་ཁྲོད་འདྲེས་པར་བྱེད་པ། གཞུང་དྲང་ངལ་རྩོལ་དང་འབད་བརྩོན་ངལ་རྩོལ། གསར་གཏོད་ངལ་རྩོལ་བྱས་ནས། མཚོ་སྔོན་དང་རྒྱལ་ཡོངས་ཀྱིས་མཉམ་དུ་དེང་རབས་ཅན་ཕལ་ཆེར་མངོན་འགྱུར་བྱེད་པར་རོགས་ཤུགས་འདོན་དགོས།

རྟོག་ཞིབ་བྱེད་སྐབས། ཝང་ཏ་ནན་གྱིས་ཁེ་ལས་ཀྱི་ལས་བཟོ་བར་འཚམས་འདྲི་བྱས་པ་དང་། ཚང་མར་དུས་ཆེན་གྱི་འཚམས་འདྲི་དང་ལྷག་བསམ་རྣམ་དག་གི་སྨོན་འདུན་ཞུས། ཁོས་རིམ་པ་སོ་སོའི་བཟོ་ཚོགས་ཀྱིས་དྲོད་ཁོལ་སྐྱེལ་བའི་ནང་དོན་སྔར་ལས་རྒྱ་སྐྱེད་པ་དང་། བཟོ་ཚོགས་ཀྱི་དྲོད་ཁོལ་སྐྱེལ་བའི་བྱ་བའི་ཚོང་རྟགས་བསྐྲུན་པ། མི་ཚོགས་གཙོ་བོ་གཙིགས་སུ་བཟུང་ནས། འཚམས་འདྲི་རྒྱ་ཆེར་བྱེད་པ་དང་། ལས་བཟོ་བ་དང་མང་ཚོགས་ཀྱི་བྲེལ་དཀའ་ཁྲལ་སྒུག་གི་གནད་དོན་ཐག་གཅོད་པར་སྐུལ་འདེད་གཏོང་རྒྱུའི་རེ་བ་བཏོན།