མཚོ་བྱང་ཁུལ་ལྗང་མདོག་སྐྱེ་ལྡན་ཞིང་ཕྱུགས་ཐོན་རྫས་ཕྱིར་གཏོང་བྱ་ཡུལ་གྱི་སྣེ་ཁྲིད་ཁུལ་སྐྲུན་རྒྱུའི་དམིགས་ཡུལ་ལ་རོགས་རམ་དང་། “མཚོ་བྱང་གི་སྤུས་ལེགས་ཐོན་རྫས་ཧྲན་ཏུང་དུ་གཏོང་བ”དང“ཧྲན་ཏུང་གི་སྤུས་ལེགས་ཐོན་རྫས་མཚོ་སྔོན་དུ་འདྲེན་པའི”ཐོན་སྐྱེད་ཚོང་གཉེར་མཉམ་ལས་བླང་བྱ་ལག་བསྟར་བྱེད་པར་སྐུལ་འདེད་གཏོང་བ་དང་། ཧྲན་ཏུང་དང་མཚོ་སྔོན་གྱི་སྐྱེ་ལྡན་ཞིང་ཕྱུགས་ཐོན་རྫས་མཁོ་ཚོང་མཁོ་སྤྲོད་འབྲེལ་ཐག་དང་ཕྱོགས་གཉིས་མཉམ་ལས་ལ་སྐུལ་འདེད་གཏིང་ཟབ་བཏང་སྟེ་རྒྱ་ཆེའི་རོང་འབྲོག་མང་ཚོགས་ཀྱི་དཔྱིད་གསར་དུས་ཆེན་རིང་གི་ཚོང་ཟོག་ཉོ་སྒྲུབ་ཀྱི་དགོས་མཁོ་སྐོང་ཆེད། ཟླ1པོའི་ཚེས7ཉིན། མཚོ་བྱང་མཁོ་ཚོང་གི“ལོ་གསར་ཉོ་བཅའི་དུས་ཆེན”བྱེད་སྒོ་དངོས་སུ་སྤེལ་མགོ་བརྩམས། ཁུལ་དཔོན་གཞོན་པ་ཀརྨ་ཚེ་རིང་མཛད་སྒོར་ཞུགས།
གསར་འགོད་པས་བྱེད་སྒོའི་ཡུལ་དངོས་སུ། ཚོང་རྫས་སྣ་ཁ་ཕུན་སུམ་ཚོགས་པས་རྒྱ་ཆེའི་རོང་འབྲོག་མང་ཚོགས་ལྟ་སྐོར་དང་ཉོ་ཚོང་ལ་ཡོང་བ་མཐོང་བས་ཡུལ་དངོས་ཀྱི་རྣམ་པ་སྤྲོ་སྣང་ཆེ་ལ་འཁྲུག་ཆ་དོད་པོ་ཡོད་པ་མཐོང་། འགྲེམས་ཚོང་ཐོན་རྫས་ནི“དྭངས་གཙང་མཚོ་སྔོན། མཐོ་སྒང་རྫས་མཆོག”གི་མཚོ་བྱང་སྤུས་ལེགས་ཐོན་རྫས་སྟེ། དཔེར་ན། ལྗང་མདོག་སྐྱེ་ལྡན་ནོར་ལུག་ཤ་དང་ནས་ཀྱི་ཐོན་རྫས། འབྲི་མོའི་འོ་མའི་ཐོན་རྫས། རང་བྱུང་སྦྲང་རྩི། ལོག་དཀར་སྣུམ་སོགས་ཁེ་ལས59ཡི་ཐོན་རྫས་རིགས520ལྷག་ཙམ་ཡོད་ལ། “ཧྲན་ཏུང་སྤུས་ལེགས”ཀྱི་དར་སྲོལ་གསར་པའི་ཐོན་རྫས་ཀྱང་ཡོད། ངོ་སྤྲོད་བྱས་པ་ལྟར་ན། ཐེངས་འདིའི“ལོ་སར་ཉོ་བཅའི་དུས་ཆེན”ཐོག་ཤ་རིགས་དང་མཚོ་ཟས་རིགས། འབྲས་ཐུག་རིགས། ཤིང་ཏོག་དང་སྔོ་ཚལ་རིགས། ཤིང་ཏོག་སྐམ་པོའི་རིགས། ཀ་རའི་རིགས། ཞོར་ཟས་ཀྱི་རིགས། ལག་རྟགས་རིགས་སོགས་ཁེ་ལས50ལྷག་ཙམ་གྱི་ཐོན་རྫས་རིགས300ལྷག་ཙམ་གྱིས་རོང་འབྲོག་མང་ཚོགས་ཀྱི་དྭངས་གཙང་དང་བདེ་ཐང་། ལྗང་མདོག་བཅས་ཀྱི་འཚོ་བ་དོན་གཉེར་བྱེད་པའི་དགོས་མཁོ་བསྐངས། ད་དུང་ཡུལ་དངོས་སུ2018ལོའི“ཀྲུང་གོའི་སྐད་སྙན”རྒྱལ་ཡོངས་སྤྱིའི་ཨང་དང་པོ་ལེན་མཁན་བསྟན་འཛིན་ཉི་མ་གདན་ཞུ་བྱས་ནས་ཐད་གཏོང་ཚོང་རྫས་དྲ་ཐོག་ནས་ཕྱིར་བཙོང་བྱས། མདའ་བཞིའི་བཟོ་ལས་ཆ་འཕྲིན་སྡེ་ཚན་གྱིས་སྒྲིག་འཛུགས་བྱས་པའི་སྒོར60ཡིས་ཚོང་བརྒྱབས་ན་འཛད་སྤྱོད་འཛིན་ཤོག་གིས་སྒོར20ཡི་ཁ་གསབ་ལེགས་སྐྱེས་སྟེར་བ་ནི་འཛད་སྤྱོད་པར་བཀའ་དྲིན་མཚོན་བྱེད་ཀྱི་བྱ་སྤྱོད་ཅིག་ཡིན་པས་དེ་གར་ཡོད་པའི་སྐུ་མགྲོན་རྣམས་ལ་དགའ་སྤྲོ་ཚད་མེད་སྐྱེས་ནས་བྱ་འགུལ་དེར་བསྔགས་བརྗོད་གང་ལེགས་གནང་།
མགོ་རྩོམ་མཛད་སྒོ་འཚོགས་རྗེས། ཀརྨ་ཚེ་རིང་གིས་ཡུལ་དངོས་སུ་ཁེ་ལས་སོ་སོའི་འགན་འཁུར་བ་རྣམས་ལ་འཚམས་འདྲི་གནང་བ་དང་། སྤྱི་ཚོགས་ཁོངས་གཏོགས་ཁེ་ལས་སོ་སོ་དང་ཧྲན་ཏུང་གི་ཁེ་ལས་སོ་སོར“ལོ་སར་ཉོ་བཅའི་དུས་ཆེན”བྱེད་སྒོར་རྒྱབ་སྐྱོར་གང་ལེགས་གནང་བར་སྙིང་ཐག་པ་ནས་ཐུགས་རྗེ་ཆེ་ཞུས་པ་དང་། ཁོས་ཐེངས་འདིའི་བྱེད་སྒོ་དེས་རྒྱ་ཆེའི་རོང་འབྲོག་མང་ཚོགས་ལ་ལོ་སར་ཚོང་རྫས་ཉོ་སྒྲུབ་ཀྱི་སྟེགས་བུ་སྤུས་ལེགས་མཁོ་འདོན་བྱས་པ་དང་དུས་མཚུངས་ཁེ་ལས་ལ་འགྲེམས་སྟོན་དང་ཁྱབ་སྤེལ་གྱི་གོ་སྐབས་ཀྱང་མཁོ་འདོན་བྱས་ཡོད། ཐེངས་འདིའི“ལོ་སར་ཉོ་བཅའི་དུས་ཆེན”གོ་སྐབས་སུ་བརྩིས་ནས་དུས་ཚོད་དམ་འཛིན་དང་ཐབས་ལམ་བེད་སྤྱོད་གང་ལེགས་བྱས་ཏེ་ཕྱོགས་ཡོངས་དང་ཟུར་མང་པོའི་སྒོ་ནས་རང་ཡུལ་གྱི་ཐོན་རྫས་ཁྱབ་གདལ་དང་ཚོང་ཟོག་འགྲེམས་སྟོན། ཕྱིར་ཚོང་གཅིག་སྡུད། མང་ཚོགས་འཛད་སྤྱོད་བཅས་ཀྱི་ཞབས་ཞུའི་སྟེགས་བུ་བསྐྲུན་ནས“མཁོ་ཚོང་ཆས་རྟགས”འཛུགས་སྐྱོང་བྱ་རྒྱུར་རྣམ་པ་གསར་བ་བསྐྲུན་དགོས་ཟེར།
རྒྱུས་ལོན་བྱུང་བ་ལྟར་ན། ཐེངས་འདིའི་བྱེད་སྒོ་དེ་སྲིད་གཞུང་གིས་སྟེགས་བུ་བསྐྲུན་པ་དང་མཁོ་ཚོང་གིས་སྣེ་ཁྲིད་པ། ཁེ་ལས་ཀྱིས་ཚོང་གཉེར་བྱས་པ་བརྒྱུད་ནས“ལོ་སར་ཉོ་བཅའི་དུས་ཆེན”གྱི་སྟེགས་བུ་དེ་བསྐྲུན་ནས་ཞིང་ལས་ཐོན་རྫས་གོང་འཕེལ་ཡོང་བར་སྐུལ་འདེད་གཏོང་བ་དང་རོང་འབྲོག་གི་འབབ་འཕར་ཕྱུག་འགྱུར་ཡོང་བར་སྐུལ་འདེད་གཏོང་ཆེད་རེད། མཁོ་ཚོང་གི“ལོ་སར་ཉོ་བཅའི་དུས་ཆེན”ནི་ཟླ1པོའི་ཚེས9ཉིན་བར་སྤེལ་རྒྱུ་ཡིན་པ་དང་། བྲིན་ཚོང་བྱེད་སྒོ་དང་མཉམ་འགུལ་ཉམས་ལེན་བྱེད་སྒོ་མང་པོ་བརྒྱུད་རྒྱ་ཆེའི་རོང་འབྲོག་མང་ཚོགས་ཀྱིས་སྤྲོ་སྣང་དང་ཞི་བདེ་ལྡན་པའི་ཁོར་ཡུག་ཁྲོད་དཔྱིད་གསར་ལ་བསུ་བའི་དབུ་ཁྱུད་འབྲི་བར་བརྩམས།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注