རྒན་གྱའི་བྲག་དཀར་གནས་མཇལ། མདོ་བ་བློ་བཟང་བསྟན་པ།

རྒན་གྱའི་བྲག་དཀར་གནས་མཇལ།

མདོ་བ་བློ་བཟང་བསྟན་པ།       ཡུལ་ཨ་མདོའི་ལྷ་ཁང་ཀ་མེད་ཅེས།།

ས་མདོ་དབུས་གཉིས་སུ་གྲགས་ཆེ་བ།།

ཕ་དམ་པ་གོང་མའི་གནས་རི་འདིར།།

དུས་དེ་རིང་མཇལ་རྒྱུའི་སྐལ་བ་ལྡན།།

ཆར་རླུང་འཚུབ་འབྲུག་སྒྲ་མཁའ་རུ་སྒྲོག།

སྤང་མེ་ཏོག་སད་ཀྱིས་བཅོམ་ན་ཡང་།།

གནས་འདི་ལ་འཁྲེང་སེམས་མ་ལྡོག་པར།།

གྲོགས་སྤུན་མཆེད་ལྷན་འཛོམས་དུས་ཀྱིས་བྱིན།།

སྐྱབས་རྒྱལ་ཀུན་གཅིག་བསྡུས་པད་མ་འབྱུང་།།

ལྷ་སྤྲུལ་བའི་བྱིན་རླབས་ཞུགས་པའི་གནས།།

ཡུལ་ཁྱད་འཕགས་རྒན་གྱའི་བྲག་དཀར་ཞེས།།

མཚན་སྙན་པའི་དབྱར་རྔ་ལྡིར་བ་དེར།།

སྔོན་མཁས་གྲུབ་དམ་པ་མང་པོ་བཞུགས།།

ཚེ་སྒྲུབ་པ་སྙོམ་པའི་བྱ་བཏང་མཁན།།

མ་མཁའ་འགྲོ་དཔའ་བོ་དཔའ་མོའི་ཚོགས།།

གནས་དེ་རུ་ཞབས་རྗེས་རིས་སུ་བཀྲ།།

ས་རྒན་གྱའི་སྤང་གཞོང་གཡུ་འབྲུག་འཁྱིལ།།

རྗེ་བླ་མ་ཀུན་མཁྱེན་འཇམ་དབྱངས་བཞད།།

སྐུ་མཚན་དཔེ་མེ་ཏོག་བཞད་པའི་གནས།།

ས་དེ་རུ་ཆོས་ཀྱི་སྦྲང་ཆར་བབས།།

ཤིང་སྣ་ཚོགས་བཀྲ་བའི་བྲག་རི་བརྗིད།།

ཆུ་དྭངས་མོ་ཤེལ་དཀར་ཐུར་དུ་འབབ།། 

སྤང་མེ་ཏོག་སྣ་ཚོགས་སྐྱེས་པའི་ཡུལ།།

ཡུལ་འདི་ན་བཀྲ་ཤིས་ལོ་ལེགས་འཕེལ།།

སེམས་རྩེ་གཅིག་དད་པའི་མཐའ་རུ་ཕྱིན།།

དཔལ་འཁོར་ལོ་སྡོམ་པའི་ཕོ་བྲང་དུ།།

ཆོས་སྐྱབས་འགྲོ་སེམས་བསྐྱེད་སྔོན་བཏང་བ།།

སྒོས་བླ་མ་མཆོད་པ་འུར་འདོན་བྱས།།

ཟས་སྣ་ཚོགས་འཛོམས་པའི་ཚོགས་འཁོར་བསྐོར།།

སེམས་སྨོན་པའི་སྐྱབས་འཇུག་ལན་མང་ཞུས།། 

སྐྱབས་བསླུ་བ་མེད་པའི་མཆོག་གསུམ་ལ།།

ཡིད་མི་འགྱུར་དམ་བཅའ་སེམས་ཀྱིས་ཕུལ།།

གཏིང་མཐའ་མེད་འཁོར་བའི་གཡང་རོང་དུ།།

ལས་ཉོན་མོངས་ནད་ཀྱིས་བཅིངས་པ་ཡི།།

མ་དྲིན་མོ་ཆེ་ཡི་སེམས་ཅན་ཀུན།།

ལམ་རྟོགས་པ་བརྙེས་པའི་སྨོན་ལམ་བཏབས།།

འགྲོ་ལམ་གྲོགས་ཆོས་མཐུན་སྤུན་གྱི་ཚོགས།།

ས་གང་དུ་གནས་ཀྱང་སྨན་གྱི་ལྗོན།།

ཡིད་མཛའ་བཤེས་བརྩེ་བ་ལྡང་བའི་ཁྱུ།།

ཡུལ་གསེར་ལྗོངས་ཕྱོགས་སུ་ཆས་ཏེ་ཡོང་།།