ལྷ་སར་ཕེབས་པའི་ནུ་བོ་གཞས་པ་ཞིག་ལ་བྲིས་པ་།(ཞར་བཀོད་གཅིག)

ཁྱོད་ཀྱི་གླུ་ངག་དང་དགོད་སྒྲ་སྦྲ་འདབས་ནས་འཕྱུར

རྩྭ་མགོའི་ཟིལ་བ་དང་རྩྭ་གསེབ་ཀྱི་བྱིའུ་ཆུང་ལ་འགྱུར་ཁུག་བཟོས

ལམ་བུ་ཕྲ་མོར་གཏམ་རྒྱུད་ཀྱི་རྡུལ་རླུང་འཚུབ་པས

ང་ཡི་མིག་ཟུང་གིས་ཁྱོད་ཀྱི་མགྱོགས་ཚད་ཚོར་མ་ཐུབ

རྐྱེན་དེའི་དབང་གིས　　སྤང་ལྗོངས་ཀྱི་བསླུ་བྲིད་ནི

ཡིད་དུ་འོང་པའི་ལྷ་སྒྲུང་ཞིག་སྟེ

ལེ་བདའ་དང་རྩིས་ཕྲེང་གིས་བསྒྱེལ་མ་ནུས

ལམ་ཁའི་མཆོད་རྟེན་ལ་ཕ་ལོའི་འགྱིང་བག་མཆིས་སམ

ལམ་ཟུར་གྱི་གཙང་པོར་མ་ལོའི་ཞི་དུལ་འདུག་གམ

གནས་དེར་སླེབས་དུས　　མི་ཚོགས་ཀྱི་ངོ་གདོང་དང

བེའུ་ཆུང་གི་རྩེད་བྲོ་གཉིས་སྡུར་ཐབས་བྲལ་མོད

གནམ་གྲུ་དེ་ཇེ་མགྱོགས་སུ་བཏང་བའི་རྟ་ཕོ་ཡིན་པར་ཐེ་མི་ཚོམ

གནས་དེར་སླེབས་དུས　　བུ་མོ་ཚོའི་དྲོད་འཇམ་དང

ཐག་རིང་གི་ཨ་མ་སྡུར་ཐབས་བྲལ་མོད

རྨི་ལམ་དེ་ཇེ་མང་དུ་བཏང་བའི་མིག་ཆུ་ཡིན་པར་ཐེ་མི་ཚོམ

མགྲིན་པ་ནས་ཤེད་ཀྱིས་གཡུག་པའི་སྨྲ་ལྕེའི་འཇོར་བུས

ཁྱོད་ཀྱི་ལང་ཚོའི་གཏེར་ཁ་ནམ་ཞིག་ལ་བརྐོས་ཚར

ཞིབ་ཏུ་གཟིགས་དང　　རྒྱབ་ཀྱི་དར་ལྕོག་ནི་དྲན་གདུང་ལ་ཚུད་པའི་ང་རང་དང

མགོ་ཐོག་གི་ཉི་མ་ནི་ལས་དོན་ལ་བྲེལ་བའི་ཁྱོད་ཉིད་རེད

སོ་སོའི་སེམས་སུ　　དབྱངས་གསལ་གྱིས་བཟོས་པའི་ལྷ་མོ་རེ་ཉར་ཞོར

རང་ཅག་གི་ཧམ་སེམས་ལ་ངལ་དུབ་དང་ཡི་ཆད་མེད

ངའི་གཏམ་རྒྱུད་ནི་ཁྱོད་ཀྱིས་རི་ལུང་ནས་བོར་བའི

རྒྱུད་མངས་ཀྱི་དབྱངས་རྟ་རིགས་ཤིག

དེའི་ཆེད་དུ　　སྤྱང་མོ་ཚོའི་ལྟོགས་སྐོམ་གྱི་ངུ་ཟུག་ལ

སྙན་ངག་གི་མཛེས་པ་ཕྲན་ཙམ་ཆགས

ཕྱི་དྲོ་རེ་རེར　　བསང་དུད་སྔོན་མོ་ལས་བྱིས་སྒྲུང་སྐྱ་བོ་ཞིག་འཕྱོ

ངས་སྤྱང་མོ་དང་བྱིས་སྒྲུང་ཁྱོད་ཀྱི་འཇིག་རྟེན་ལ་སྦྱར

འཛད་མཐའ་མེད་པའི་འཁྲུལ་སྣང་ཞིག་རོལ

ན་ཆུང་མ་ཚོ་ཁྱོད་ཀྱི་ལས་དབང་གི་ཨ་ཡིག་དང་འབྲེལ་ཆགས་པའི

དབྱངས་ཡིག་དང་རྗེས་འཇུག་ཡིན་སྲིད་ན

སྐྲ་ལོ་ཆུན་པོ་དང་ལག་ཟུང་འཇམ་པོས་ཁྱོད་ཀྱི་སྙིང་ལ་བསིལ་བ་སྟེར་རམ

རྐང་མལ་ཚུགས་སའི་བྲག་རྡོ་རེའི་རྒྱབ་ཏུ

དབྱངས་ཅན་མ་ཁེར་རྐྱང་གིས་ཡིབས་ཡོད་དམ

ཁྱོད་ཀྱི་ཁང་མིག་ཆུང་ཆུང་གཞས་མ་ཚོའི་བཞད་གད་ཀྱིས་བཏུམས་ཀྱང

ཕ་ཡུལ་གྱི་འབྲོག་མོ་ཚོའི་ཟུར་མིག་དྲན་པར་གྱིས

ཁ་བ་ལས་ཡི་གར་འོངས་པའི་སྒྲ་དབྱངས་འབབ་དུས

བྱིས་པ་ཚོས་རྩེད་འཇོར་གོམས་པའི་མི་ཞིག་དྲན་སྲིད

ཞིང་ཁ་ཆུང་ཆུང་དེ་ཁྱོད་ཀྱི་སྤང་ལྗོངས་མིན་མོད

ནས་འབྲུ་རེ་རེའི་གསེང་དུ་འོ་ཞོའི་དྲི་ངད་འཐུལ་ངེས

སྐབས་དེར　　མཚམས་སྤྲིན་དང་ཕོ་བྲང་ལྷིང་འཇགས་སུ་གནས་ལ

གླེགས་བམ་གང་རུང་གི་འོད་སྣང་ཁྲོད་ནས

ཁྱོད་ཀྱི་གཏམ་རྒྱུད་དང་འབྲེལ་བའི

ཡིག་འབྲུ་འགའ་འཐོར་ཡོང

ནུ་བོ་ཡ　　ཟླ་ཚེས་ཤིག་བསྐྱར་ཟློས་ལ་གོམས་པས

དྲེལ་ཆུང་གི་སྐེ་དྲིལ་བཙའ་ཡིས་ཟིན

དུར་ཁྲོད་ཀྱི་ངུ་ཤུམ་དང་འགྲོགས་པའི་ཤ་ཁྱི

ཐག་རིང་དུ་བྲོས་ནས་མེད་པར་གྱུར

འཇིགས་དངངས་དེ་མ་གླེང་ཐབས་མེད་ཀྱི་དབང་གིས

ངའི་སྔས་མགོར་བཏགས་པའི་ཟླ་བ་ཁྲག་ཏུ་བཞུར

དྲང་མོར་བཤད་ན　　ཀེང་རུས་ཀྱི་ཚུལ་དུ་གྲུབ་པའི་ང

ཁྱོད་ཀྱི་ཁ་སྤྲོད་དུ་སྡོད་མི་འདོད

ད་ལྟའང　　གཞུང་ལམ་དུ་དངུལ་ལོར་གྱི་རླུང་དམར་འཚུབ་ཅིང

དེས་བསྲེགས་པའི་བླ་ཤིང་གི་ལོ་འདབ་དག་དྲན་གྱིན

ཁྱོད་གཅེར་བུར་བུད་ནས་ཅི་ཞིག་བཤམས་སྟོན་ལ་བྲེལ་ན

ངའི་གཡས་སུ་བཞུགས་པའི　　གསེར་བཟོས་ཀྱི་ལྷ་སྐུའི

ཟིལ་ཤུགས་དང་རིན་ཐང་ཉམས་འགྲོ

1998／10／27　ཉིན་བྲིས།

2025／1／4　ཉིན་བཅོས།

ཚོར་བ་འདི་འདྲ་ཞིག

འཚོལ་ཡང་མི་དགོས་པར་རྙེད་ཐུབ་པའི་དངོས་པོ་ཞིག་ཡོད་ཚེ

དེ་ནི་ཁྱོད་ཀྱིས་བསམ་བཞིན་དུ་བཤད་པའི་སྐད་ཆ་དག་ལོས་ཡིན

ཕར་བལྟས་ན　　ང་ཚོ་སུས་ཀྱང་འཁོར་བ་ཆུང་ཆུང་འདིའི་ཆེད་དུ

རི་བོ་ཆེན་པོ་ཞིག་རྐོ་བཞིན་པ་ལྟར་སྣང་ཡང

དོན་དངོས་སུ　　དུས་ཚོད་དང་འགྲོགས་ཏེ་འཇིག་གིན་པ་ནི

ཚེ་སྲོག་དང་རྨི་ལམ　གཟེབ་དྲར་ཚུད་པའི་ལྗང་མདོག་བཅས་སོ

མེ་ཏོག་ལས་ཅུང་ཙམ་རྩུབ་པའི་མེ་ཏོག་འཐུ་མཁན་གྱི་གནས་མོ་དེས

རང་ལུས་ལ་མཛེས་མ་ཞེས་པའི་སྐག་ཚོས་ཤིག་བྱུགས

དེ་ནས་བཟུང　　ངའི་སྙན་ངག་གི་བརྗོད་བྱ་མུན་པས་བརྫབས

བྱིས་པ་ཞིག་སྤྲོ་སྣང་དང་བཅས་གཏམ་རྒྱུད་ལ་གསན་པར་ཡོང་ཡང

ཁོའི་ཡིད་ཀྱི་ཨུཏྤལ་དེ་ལམ་བར་ནས་སད་ཀྱིས་བཅོམས

ཁ་དོག་རེ་གཉིས་ལས་མེད་པའི་རྨི་ལམ་དེས

མི་དེའི་མིག་ཟུང་བསྲེགས་པར་གྱུར

ཁོས་མགོ་བོ་སྒུར་ཏེ་ལྐོག་ལྟ་བྱེད་དུས

སྔར་ལྟར་འགྱུར་བ་མེད་པ་ནི

སྡོད་ཁང་རེ་རེར་སྒེའུ་ཁུང་བཟོ་བཞིན་ཡོད་ནའང

སྒེའུ་ཁུང་དག་ལས་སེམས་པ་དག་ཕྱིར་འབུད་མི་ཐུབ་པ་དེ་ཡིན

སྤྲོ་རྩེད་ཀྱི་གར་སྟེགས་ལ་གོམ་སྟབས་དང་པོ་སྒྱུར་མཁན་དེ

སུ་ཡིན་ནའང་དེའི་སྐེའམ་སྒྱིད་པར་བསྟོད་ཚིག་གིས་བརྒྱན་པའི་དར་ཡུག་གཅིག་གདགས་སྲིད

མི་གླེང　　ངན་ཇུས་མཁན་དེ་དོན་དམ་སུ་ཡིན་པ་མི་གླེང

འོན་ཀྱང　ངལ་གསོ་ཐོབ་པའི་བསིལ་རླུང་གིས་རྩེད་བྲོ་རྡུང་དུས

མཁའ་དབུགས་འདི་མི་རྣམས་ཀྱི་དྲི་བསུང་རུལ་བོ་དང་འབྲལ་དགོས

མདོར་བསྡུས་ན　　ང་ལའང་རྣམ་ཤེས་ཕྲ་མོ་འདིར་འཚམས་པའི

འགྱུར་ཁུག་གསར་པ་ཞིག་ཡོད་འོས

1998／7／30　ཉིན་རྨ་ཆུ་ནས་བྲིས།

2025／1／4　ཉིན་གཙོས་ནས་བཅོས།