ཆོས་རྒྱལ་ཐུགས་ཀྱི་ནོར་བུ། །
ཡབ་ཡུམ་སྐུ་ལ་གསོལ་བའི། །
རང་ཡུལ་བོད་ཀྱི་གོས་རྒྱན། །
མེས་པོའི་སྲུང་འཁོར་བྱིན་ཅན། །
བོད་ཁམས་རྒྱན་གོས་རི་མོ། །
རི་མོ་འཇའ་རིས་དགུ་འཁོར། །
ཕྱི་མཐུན་ནང་མཐུན་མཚོན་པ། །
ལོ་རྒྱུས་ས་བཀྲའི་རྐང་རྗེས། །
ཞབས་རྗེས་གངས་ལ་འཐེན་ཡོད། །
གངས་འདབས་སྤང་ལ་འཐེན་ཡོད། །
ངོ་མཚར་བྱེ་མའི་གཞུང་ལ། །
མངའ་རིས་གུ་གེ་བཞེངས་ཡོད། །
གུ་གེའི་བུ་མོའི་རྒྱན་རིས། །
དབུ་ལ་བྱུ་རུའི་ཞྭ་མོ། །
རྒྱབ་ལ་རྨ་བྱའི་སྤུ་ཕྲུག །
གོམ་པ་དལ་གྱིས་སྤོས་དང་། །
རྐང་ལ་འཇའ་ལྷམ་ཡུ་རིང་། །
སྐེད་པར་དངུལ་གྱི་པ་ཏྲ། །
པ་ཏྲའི་སྐེད་རགས་ཡག་པ། །
མིག་གི་རྒྱང་ལ་གཟིགས་དང་། །
པང་ལ་འཇའ་གདན་རི་མོ། །
རི་མོ་རྨ་འབྲུག་ཁ་སྤྲོད། །
ཐུ་བ་གླག་སྒྲོ་ཕྱུག་མོ། །
སེམས་ལ་ལྷོད་ཅིག་ཕོབས་དང་། །
ལང་ཚོ་འཛུམ་པའི་རྗེས་ལ། །
རྨ་བྱའི་སྒྲོ་མདོངས་ཡག་པ། །
གུ་གེ་ཚེ་རིང་ལགས་ཀྱི། །
བོད་གོས་ཉམས་ཀྱིས་བཟི་བ། །
མངའ་རིས་ཁྲག་གི་ལྷག་མ། །
ས་མཐའི་བྲག་ལ་བབས་པ། །
རྒྱལ་རོང་ཕ་མཁར་རིང་མོ། །
གཟི་བྱིན་སྟོང་གི་ཁ་བཏགས། །
བྲང་ལ་དངུལ་གྱི་གའུ། །
རྣ་ལ་གཡུ་ཆུང་མུ་ཏིག །
ཐོད་ལ་རིན་ཆེན་ར་ག །
སྨུག་པོ་གོས་ལ་ལྟོས་དང་། །
ཟ་འོག་གོས་ཆེན་སྟེང་ལ། །
འཇའ་ཆེན་རི་མོ་བྲིས་པ། །
གཟི་འོད་ས་ལ་འཕྲོས་པ། །
ཉི་ཟླའི་ས་ལམ་བཟུང་བ། །
མདུན་ལ་འཇའ་རིས་མེ་ཏོག །
རྒྱབ་ལ་གཡང་དྲུང་བྲིས་པས། །
གང་ནས་འོང་བ་མཚོན་པ། །
གང་ལ་འཁོར་བ་ཤེས་ཐུབ། །
རྩག་དཀར་དྲོད་ཀྱི་ནང་ལ། །
ཞེ་འདང་བརྩེ་བ་རུམ་ཡོད། །
དགུན་གྱི་གྲང་ངར་ནང་ལ། །
ལུས་ཀྱི་གཟི་བྱིན་ངོམ་ཆོག །
གཡི་དཀར་ཞྭ་མོ་ཡག་པ། །
ཞྭ་མོའི་མཐའ་རྒྱན་རི་མོ། །
སྤུ་དཀར་རྩེ་མོ་ཤིག་ཤིག །
མདོ་ཁམས་སྨད་ཀྱི་ཞྭ་མོ། །
བལ་དང་ཁུལ་གྱི་ཕྱིང་བ། །
ཕྱིང་བའི་ཞྭ་མོ་སྣ་ཚོགས། །
ཕྱིང་གོས་སྣ་མང་ཡོད་པ། །
ཡུལ་ལུང་སྲོལ་ལ་ངེས་སོ། །
མཐོ་སྒང་ཁ་བའི་ཞིང་ན། །
རིན་ཆེན་ལུས་ལ་སྲུང་བའི། །
བོད་གོས་རིན་ཐང་ཆེ་བ། །
སེམས་སུ་ངེས་ངེས་ཡིན་པ། །
གཞལ་མེད་ནོར་བུ་རྩ་ཆེན། །
བོད་ཀྱི་མགུར་ལ་མཛེས་པ། །
མེས་པོའི་ཕྱག་ནས་ཐོན་པ། །
བུ་ཚ་ཡང་ཚའི་གཏེར་ཡིན། །
གངས་ལ་གཟི་འོད་ཡག་པ། །
གོས་ཀྱི་འབྲུག་རིས་ཡག་པ། །
རྒྱན་ཆའི་འདབ་མ་ཡག་པ། །
སྲོལ་རྒྱུན་ཆ་ལུགས་ཡག་པ། །
ཉི་ཟླའི་གསེར་ཞལ་གསལ་བ། །
སྐེ་རྒྱན་གཡུ་དཀར་གསལ་བ། །
སྐེད་ཆབ་དངུལ་མ་གསལ་བ། །
སྲོལ་རྒྱུན་གོས་འདི་གསལ་ལ། །
སྨུག་པོ་བོད་ལས་མཆེད་པ། །
དབུ་ལ་ཕྱིང་ཞྭས་མཛེས་པ། །
རྐང་པར་སག་ལྷམ་རྔམ་པ། །
བོད་གོས་ཤོམ་པའི་སྟག་ཤར། །
གོས་རྒྱན་རི་མོར་ལྟོས་དང་། །
མེས་པའི་རྐང་རྗེས་དྲན་པ། །
ཕ་ནོར་བརྗེད་དུ་མ་འཇུག །
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注