ཙན་དན་ལོ་མ། ས་དམར་གྲགས་པ། ལྷ་ས།

ཡོང་ཁུངས། མཚོ་སྡོན་བོད་ཡིག་གསར་འགྱུར། རྩོམ་སྒྲིག་པ། ཀླུ་མགོན་རྒྱལ། 2024-04-28 09:01:18 ཀློག་གྲངས།4177

ཙན་དན་ལོ་མ།

ས་དམར་གྲགས་པ། ལྷ་ས།

འགུལ་རིས་གློག་བརྙན་ཞིག་ལ་བལྟས་རྗེས།

ལག་པས་མེ་ཁ་གསོས་པ་ན།

ཙན་དན་ལོ་མར་མེ་འོད་མོ་འདུག

ཤིང་གི་རྩ་བ་རུ་རྒྱ་མཚོ་འཁྱིལ་མི་འདུག

སྤྲིན་པ་སྲབ་མོ་ཞིག་གི་ཕོ་བའི་ནང་དུ་འདུས་པའི་སྐར་ཚོགས།

ས་རུ་མ་ལྷུང་བར་གནས།

རུས་པར་མདུད་པ་བརྒྱབ་པའི་ཚོར་བ་མ་ཡལ་པས་ཡིན་འགྲོ།

མིག་གིས་འཛིན་མ་ནུས་པ་དག

རླུང་གིས་ང་ཡི་ལུས་ལ་འབྱུག

བྱིའུ་དེ་འཕུར་ཤུལ་དུ་རྩྭ་རྐང་རེ་འགའ་ངུས།

གྲོག་མ་རེ་གཉིས་ཤིག་རྩྭ་གསེང་ནས་ཡར་ལངས་ཏེ།

ཁ་ཉི་འོད་ལ་གཏད་ནས་འདུག

གློ་བུར་དུ་ས་རུབ་ཟིན་པའི་ཕོར་བ་ཞིག་གི་ནང་དུ།

ཤིང་སྡོང་ཆེན་པོ་ཞིག་སྐྱེས།

ཇི་ལྟར་བལྟས་ན་ཕོར་བ་དེར་སྙིང་ཞིག་འདུག

སྡོང་པོ་དེ་སྙིང་ཁར་སྐྱེས་འདུག

མེ་ཁ་མ་གསོས་པའི་ལོ་མ་དག

རེ་རེ་བཞིན་ཙན་དན་ལོ་མར་འདྲེས་རྗེས་ཀྱི་ཞོགས་པ་དེར།

སྒྲ་སྙན་མོ་ཞིག་གིས།

ང་རང་མི་སྣང་བའི་འཁོར་བར་བཏང་སྟེ།

ལག་སྣུམ་ཞིག་བཙལ།