ཁ་རོག་གེར། ས་དམར་གྲགས་པ། ལྷ་ས།

ཡོང་ཁུངས། མཚོ་སྔོན་བོད་ཡིག་གསར་འགྱུར། རྩོམ་སྒྲིག་པ། ཀླུ་མགོན་རྒྱལ། 2024-04-25 09:26:52 ཀློག་གྲངས།6949

ཁ་རོག་གེར།（ཞར་བཀོད་བཞི།）

ས་དམར་གྲགས་པ། ལྷ་ས།

ཁ་རོག་གེར་སྡོད་དང་།

སླ་ང་དང་ཤ་ལ་ཁྲོ་ལྕགས་ཀྱི་ཁྲག་རྩ་དགོས་པ་མི་འདུག

རྒྱ་མཚོའི་རླངས་པས་བཙོས་པའི་ཉི་འོད།

ཤ་རྡོག་རེ་རེ་དང་འདྲ་བར།

ལྕེ་རྩེའི་ནགས་ཚལ་དུ་འབུ་སྲིན་བཞིན་བཏབ་རྗེས།

ཤིང་གི་ཡལ་ག་ལས་མེ་ཏོག་གི་དྲི་མ་བཞད།

ལོ་མའི་གྲུ་ལ་བསྡད་པའི་སྣང་བ།

རིང་ནས་ཐུང་དུ་སོང་བའི་ལྷ་སྒྲུང་།

རུས་པ་ཆག་སོང་བའི་ལག་པ་ཞིག་ཏུ་འཛུལ།

མཛུབ་མོ་གནམ་ལ་ཀེར་ཏེ།

ནམ་མཁའ་ལས་ཀྱང་ཡང་བ་དང་ལྗིད་པ།

ལྷོད་པ་དང་གྲིམ་པ་དང་མཁྲེགས་པ་དེ་ནི།

ངའོ་ཞེས་སྐད་མཐོན་པོས་འཆད།

ཆུ་ནང་དུ་བཞུར་བའི་ཁ་སྣ་ཚོགས་གཞི་གཅིག་ཏུ་འདུས།

བྱིའུ་ཞིག་ལ་ཁ་ཆེན་པོ་ཞིག་བྲིས།

དེ་ལས་སྒྲ་མང་པོ་ཞིག་བཤངས།

ལག་ནང་དུ་སྦས་པའི་ངོ་མདངས་ཁྲ་ཁྲ་དག

སླ་ངའི་མཐིལ་དུ་བཏབ།

ཉི་འོད་ཀྱིས་ཕྱེ་པའི་མུན་ཁྲོད་ནས།

ཆུ་ཕོར་བ་གང་འོད་ལ་བརྗེ།