སི་ཁྲོན་ཞིང་ཆེན་རྔ་བ་ཀྲོའུ་ཧུང་ཡོན་རྫོང་གིས་ཆེད་དོན་བཅོས་སྒྲིག་བྱེད་འགོ་ཚུགས་པ།

སི་ཁྲོན་ཞིང་ཆེན་རྔ་བ་ཀྲོའུ་ཧུང་ཡོན་རྫོང་གིས་ཆེད་དོན་བཅོས་སྒྲིག་བྱེད་འགོ་ཚུགས་པ།

དགུན་དུས་ཀྱི་ཞོགས་པར། སི་ཁྲོན་ཞིང་ཆེན་རྔ་བ་བོད་རིགས་ཆའང་རིགས་རང་སྐྱོང་ཀྲོའུ་ཧུང་ཡོན་རྫོང་ལྟ་ཞིབ་ཨུ་ལྷན་གྱི་ཨུ་ཡོན་ཧོ་མིང་ཀྲེན་གྱིས་གྲང་ངར་ལ་མ་འཛེམས་པར་དུས་ཐོག་ཏུ་སྦྲ་ཆེན་གྲོང་རྡལ་རི་རྒོན་གྲོང་ཚོར་བསྐྱོད་ནས་ཤང་དང་གྲོང་ཚོ་རིམ་པ་གཉིས་ཀྱི་ལས་དོན་མི་སྣ་དང་མཉམ་དུ་གྲོང་ཚོའི་མཉམ་སྡེབ་འབྲི་གཡག་ཉོ་སྒྲུབ་རྣམ་གྲངས་ལ་སྐུལ་འདེད་གཏོང་བའི་གནས་ཚུལ་ལ་ལྟ་སྐུལ་ཞིབ་བཤེར་བྱས་ཤིང་། ཧོ་མིང་ཀྲེན་གྱིས“འབྲི་གཡག་ནི་མང་ཚོགས་ཀྱི་འབབ་ཁུངས་ཡིན་པས་ངེས་པར་དུ་རྣམ་གྲངས་རེ་རེ་བཞིན་ལ་ཞིབ་བཤེར་ནན་པོ་བྱེད་དགོས”ཞེས་བརྗོད།

ཧུང་ཡོན་རྫོང་ནི་མཚོ་བོད་ས་མཐོའི་ཤར་ལྷོའི་ཁུལ་དུ་གནས་པ་དང་། རང་བྱུང་རྩྭ་ར་མུའུ་ཁྲི་1100ཡོད། དེ་ནི་རྒྱལ་ཁབ་ཀྱི་ས་གཤིས་མཚོན་རྟགས་ཀྱི་ཐོན་རྫས་ཡིན་པའི་རྨེ་བའི་འབྲི་གཡག་ཐོན་ཁུལ་གཙོ་བོ་རེད། འབྲི་གཡག་ཐོན་ལས་ནི་རྫོང་དེའི་གཙོ་རྟེན་ཐོན་ལས་ཡིན་པ་མ་ཟད། མང་ཚོགས་ཀྱི་གཙོ་བོའི་འབབ་ཁུངས་ཤིག་ཀྱང་ཡིན་ཞིང་། ཧོ་མིང་ཀྲེན་གྱིས“2024ལོ་ཚུན་དུ། རྫོང་ཡོངས་ཀྱི་སྒྲིག་བཤེར་ལྟ་ཞིབ་ལས་ཁུངས་ཀྱིས་འབྲི་གཡག་ཐོན་ལས་རྣམ་གྲངས་ཀྱི་འོས་སྐུལ་དང་ཞིབ་བཤེར་རྩིས་ལེན་སོགས་ལྷུ་ཚིགས་ཁག་གི་བརྒྱུད་རིམ་ཧྲིལ་པོར་ཕྱོགས་ཡོངས་ནས་ཞུགས་ཏེ་འབྲི་གཡག་ཐོན་ལས་འཕེལ་རྒྱས་ལ་རྒྱུན་རྣམ་ཅན་གྱི་ལྟ་སྐུལ་དང་སྲུང་སྐྱོང་བྱས་ཡོད”ཅེས་བརྗོད།

ད་ལོའི་ལོ་འགོར་ཧུང་ཡོན་རྫོང་སྒྲིག་ཨུད་ལྟ་ཞིབ་ཨུ་ལྷན་ལ་ཚ་རུ་མ་ཤང་གི་མང་ཚོགས་ཀྱི་གོང་ཞུ་འབྱོར་ཞིང་། 2023ལོར་སྒོར་ཁྲི་20ལྷག་ཙམ་བཏང་ནས་ཉོས་པའི་ཕ་གཡག་གཉིས་ཟླ་བ་གཅིག་ཀྱང་མ་འགོར་བར་གཅིག་རྗེས་གཉིས་མཐུད་ངང་ཤི་ནས་མཉམ་སྡེབ་དཔལ་འབྱོར་ལ་གྱོང་གུན་ཚབས་ཆེན་བཟོས་སོང་ཞེས་བརྗོད།

ཧུང་ཡོན་རྫོང་སྒྲིག་བཤེར་ལྟ་ཞིབ་ཨུ་ལྷན་གྱིས་ལེབ་བཤེར་བྱས་པ་བརྒྱུད། ཚ་རུ་མ་ཤང་ཚ་ལུང་གྲོང་ཚོ་དང་སྲིབ་ལུང་གྲོང་ཚོ་སོགས་ཀྱིས་མཉམ་དུ་འབྲི་གཡག་ཉོ་བའི་རྣམ་གྲངས་ལག་ལེན་བསྟར་སྐབས་ས་ཁུལ་འདི་གའི་རང་བྱུང་ཆ་རྐྱེན་དང་ཟུང་འབྲེལ་གྱིས་འབྲི་གཡག་གསོ་སྤེལ་གྱི་ཉེན་ཁར་མཐའ་དཔྱོད་གང་ལེགས་མ་བྱས་པར་བརྟེན། ཉོས་པའི་ཕ་གཡག་ས་གནས་དེ་གའི་ཁོར་ཡུག་དང་མ་འཕྲོད་པར་ནད་ཕོག་ནས་ཤི་བ་ཤེས་རྟོགས་བྱུང་ཡོད། ཞིབ་བཤེར་གཏིང་ཟབ་བྱས་པ་བརྒྱུད་ཤང་དང་གྲོང་ཚོ་རིམ་པ་གཉིས་ཀྱི་ལས་བྱེད་པར་ད་དུང་འོས་སྐུལ་འོས་དཔོད་ཀྱི་གོ་རིམ་རྫུན་བཟོ་དང་སྒྲིག་འགལ་གྱིས་མ་དངུལ་གཡོ་ལེན་བྱས་པ་སོགས་ཀྱི་ཁྲིམས་འགལ་སྒྲིག་འགལ་གྱི་གནད་དོན་ཡོད་པ་ཤེས་རྟོགས་བྱུང་བ་རེད། མཐར་ཧུང་ཡོན་རྫོང་སྒྲིག་ཨུད་ལྟ་ཞིབ་ཨུ་ལྷན་གྱིས་ཚ་རུ་མ་ཤང་གི་ཏང་ཨུད་སྐབས་གཉིས་ཀྱི་སྔ་རྗེས་ཧྲུའུ་ཅི་གཉིས་དང་། དེ་བཞིན་ཤང་དང་གྲོང་ཚོའི་ལས་བྱེད་པ་གཞན་དག་7ལ་ཏང་གི་སྒྲིག་ཁྲིམས་དང་སྲིད་དོན་ཆད་པ་གཅོད་རྒྱུའི་ཐག་བཅད་པ་རེད།

ཧུང་ཡོན་རྫོང་སྒྲིག་ཨུད་ལྟ་ཞིབ་ཨུ་ལྷན་གྱིས་འབྲོག་ཁུལ་གྱི་དོན་དངོས་ལ་གཞི་ཚུགས་ནས་སྲིད་ཇུས་དོན་འཁྱོལ་དང་། རྣམ་གྲངས་ཞིབ་མཆན། དོན་འཁྱོལ་འཛུགས་སྐྲུན། མ་དངུལ་བེད་སྤྱོད་སོགས་ལ་དམིགས་ཏེ། 2024ལོའི་འབྲི་གཡག་ཐོན་ལས་ཀྱི་མངོན་གསལ་དོད་པའི་གནད་དོན་ཕྱོགས་ཡོངས་ནས་ཆེད་དོན་བཅོས་སྒྲིག་བྱེད་འགོ་བཙུགས་ཏེ། འབྲེལ་ཡོད་སྡེ་ཚན་དང་མཉམ་དུ་ཁུངས་སྣེ་རྩིས་སྤྲོད་དང་མཐུན་སྦྱོར་ལྟ་སྐུལ་ལམ་སྲོལ་འཐུས་སྒོ་ཚང་དུ་གཏོང་བ་དང་། གནས་གཏན་འཁེལ་གྱི་འབྲེལ་གཏུག་དང་གནད་དོན་ཚུར་ལན་ལམ་སྲོལ་བཟོས་ནས་མང་ཚོགས་ཀྱིས་གོང་ཞུ་བྱས་པའི་རེ་འདུན་འབྲེལ་ཡོད་སྡེ་ཚན་གྱིས་དུས་ཐོག་ཏུ་ཐག་གཅོད་བྱེད་པར་ལྟ་སྐུལ་བྱས་པ་རེད།

ཆེད་དོན་བཅོས་སྒྲིག་བྱས་ཚུན། ཧུང་ཡོན་རྫོང་སྒྲིག་ཨུད་ལྟ་ཞིབ་ཨུ་ལྷན་ལ་གནད་དོན་གྱི་ཁུངས་སྣེ་70ལྷག་ཙམ་ཤེས་རྟོགས་བྱུང་ཞིང་། གྱོད་གཞི་49དང་མི་49ལ་གྱོད་དོན་ཐོ་འགོད་བྱས་ནས་ཞིབ་བཤེར་ཐག་གཅོད་བྱས་ཏེ། འབྲོག་ཁུལ་མང་ཚོགས་ཀྱི་འཕྲལ་མཁོ་དང་། དཀའ་ངལ། སེམས་ཕྲལ། རེ་སྒུག་བཅས་ཀྱི་གནད་དོན་326ཐག་གཅོད་བྱས་ནས་མང་ཚོགས་ལ་གྱོང་གུན་སྒོར་ཁྲི་1600ལྷག་ཙམ་མི་ཕོག་པ་བྱས་ཡོད་པ་རེད།