༄༅།།བོད་ཀྱི་རྒྱལ་ཡོངས་ཀྱི་ཕུལ་བྱུང་སློབ་གསོའི་ལས་དོན་པ་མིག་དམར་གྱིས། མཐའ་མཚམས་སུ་གཞི་ཚུགས་ནས་གྲོང་གསེབ་ཀྱི་སློབ་གསོར་བརྩེ་བ་བཅངས་པ།

བོད་ལྗོངས་ཉིན་རེའི་ཚགས་པར་གྱི་གསར་འགོད་པ། བསྟན་འཛིན་དགའ་བ།

“པེ་ཅིང་དུ་བྱ་དགའ་ལེན་པར་བསྐྱོད་པ་ནི་རྨི་ལམ་ལྟ་བུ་རེད། ད་ལྟ་ཕྱིར་དྲན་བྱེད་སྐབས་ཀྱང་སེམས་འགུལ་ཚད་མེད་ཐེབས་ཀྱི་འདུག”ཅེས་མིག་དམར་གྱིས་མྱོང་ཚོར་ཟབ་མོས་བཤད། 2024ལོར་པེ་ཅིང་དུ་འཚོགས་པའི་དགེ་རྒན་དུས་ཆེན་ཐེངས་40པ་དང་རྒྱལ་ཡོངས་ཀྱི་སློབ་གསོའི་ཁོངས་གཏོགས་ཀྱི་སྔོན་ཐོན་མཉམ་སྡེབ་དང་སྔོན་ཐོན་མི་སྒེར་ལ་གཟེངས་བསྟོད་བྱེད་པའི་བྱེད་སྒོའི་ཐོག་མིག་དམར་ལ“རྒྱལ་ཡོངས་ཀྱི་ཕུལ་བྱུང་སློབ་གསོའི་ལས་དོན་པའི”མཚན་སྙན་ཐོབ་པ་མ་ཟད། བོད་རང་སྐྱོང་ལྗོངས་ཀྱི་འཐུས་མིའི་ངོས་ནས་སྡིངས་ཆའི་ཐོག་བྱ་དགའ་ལེན་པར་བསྐྱོད་ཡོད།

མི་རིང་བའི་གོང་གསར་འགོད་པ་མིག་དམར་གནས་སའི་བོད་རང་སྐྱོང་ལྗོངས་གཞིས་རྩེ་གྲོང་ཁྱེར་ས་དགའ་རྫོང་རོ་ཀྱོག་ཤང་ཆ་ཚང་སློབ་ཆུང་དུ་བསྐྱོད་ཅིང་། དེ་གར་ས་བབ་མཐོ་ཚད་ལ་སྨི་4700ཡོད་པ་དང་གསོ་རླུང་འདུས་ཚད་རྒྱ་མཚོའི་ངོས་ཀྱི་ཕྱེད་ཀ་ཙམ་ལས་ཟིན་གྱི་མེད། གསོ་རླུང་དཀོན་པའི་དབང་གིས་མི་ཚང་མའི་མཆུ་ཏོ་སྨུག་པོར་གྱུར་པ་དང་དབུགས་འབྱིན་རྔུབ་མགྱོགས་སུ་ཕྱིན་མོད། འོན་ཀྱང་མིག་དམར་གྱིས་དེ་གར་ལོ་17བརྟན་སྲུང་བྱས་ཏེ་མཐའ་མཚམས་སུ་གཞི་ཚུགས་ནས་གྲོང་གསེབ་ཀྱི་སློབ་གསོར་བརྩེ་བ་བཅངས་ཡོད།

ཁོང་གི་སྣེ་ཁྲིད་འོག་གསར་འགོད་པ་སློབ་གྲྭར་བསྐྱོད་པ་ཡིན། སློབ་གྲྭའི་རྒྱ་ཁྱོན་ཆེན་པོ་མེད་རུང་གང་སར་གཙང་སྦྲ་དོད་ལ་གོ་རིམ་ལྡན་པ་མ་ཟད། མི་རྣམས་ཀྱི་མིག་མདུན་དུ་སྔོ་ཐིང་ཐིང་གི་རྣམ་པ་དེ་བས་མངོན་གྱི་འདུག

“2017ལོར་སློབ་གྲྭ་བསྐྱར་སྐྲུན་བྱེད་སྐབས་འཆར་འགོད་ཀྱི་འགན་ཚང་མ་ངས་འཁུར་བ་ཡིན”ཞེས་མིག་དམར་གྱིས་ངོ་སྤྲོད་བྱས། ཁོང་གིས་སློབ་ཆེན་དུ་སྦྱངས་པའི་ཆེད་ལས་ནི་ཐོན་ཁུངས་ཁོར་ཡུག་དང་གྲོང་ཁྱེར་དང་གྲོང་གསེབ་འཆར་འགོད་ཡིན་པས་སློབ་གྲྭ་བསྐྱར་སྐྲུན་བྱེད་སྐབས་ཆེད་ལས་དེ་སྤྱོད་གོ་ཆེན་པོ་བྱུང་ཡོད། 2016ལོར་སློབ་གྲྭའི་དོ་དམ་ལས་གནས་སུ་སླེབས་རྗེས། ཁོང་གིས་དགེ་སློབ་ཚོའི་ཆུ་གློག་མཁོ་འདོན་གྱི་དཀའ་གནད་ཐག་གཅོད་བདེ་བླག་བྱས་པ་མ་ཟད། ད་དུང་སློབ་ཁྲིད་ཐོག་ཁང་དང་། སློབ་མའི་ཉལ་ཁང་། ཟ་ཁང་། དེ་བཞིན་དགེ་རྒན་དང་ལས་བཟོའི་ཉལ་ཁང་བཅས་གསར་དུ་བསྐྲུན་ནས་སློབ་གཉེར་ཆ་རྐྱེན་ལེགས་སུ་ཤུགས་ཆེན་བཏང་སྟེ་དགེ་རྒན་ཚོར་བློ་བདེའི་ངང་སློབ་ཁྲིད་བྱེད་པ་དང་སློབ་མ་ཚོ་སྤྲོ་སྣང་ལྡན་པའི་ངང་སློབ་སྦྱོང་བྱེད་པའི་ཁོར་ཡུག་བཟང་པོ་ཞིག་བསྐྲུན་ཡོད། “སློབ་གྲྭ་ནི་ང་ཚོའི་ཁྱིམ་ཚང་ཡིན་ལ། དགེ་སློབ་ཡོངས་ཀྱི་བློ་ཁ་ཕྱོགས་སའང་ཡིན”ཞེས་མིག་དམར་གྱིས་བཤད།

མིག་དམར་གྱིས་སློབ་གྲྭའི་སློབ་གསོ་ཕུད། ཁྱིམ་ཚང་གི་སློབ་གསོ་ཡང་དེ་མཚུངས་ཀྱིས་གལ་འགངས་ཆེན་པོ་ཡིན་པ་གསལ་པོ་ཤེས་ཀྱི་ཡོད། ཁྱིམ་ཚང་དང་སློབ་གྲྭའི་མཉམ་འགུལ་ལ་ཤུགས་སྣོན་རྒྱག་པ་དང་སློབ་མའི་ཕྱོགས་ཡོངས་ཀྱི་འཕེལ་རྒྱས་ལ་སྐུལ་འདེད་གཏོང་ཆེད། དགུན་ཁ་དང་དབྱར་ཁའི་གུང་གསེང་རིང་ཁོང་གིས་རང་ཉིད་ཀྱི་ངལ་གསོའི་དུས་ཚོད་སྤྱད་དེ་སློབ་སྦྱོང་གི་མཁོ་ཆས་སོ་སོས་དངུལ་བཏང་སྟེ་ཉོས་ནས་འབྲོག་ཁུལ་དུ་ཁྱིམ་ཚང་ལ་འཚམས་འདྲིར་སྐྱོད་ཀྱི་ཡོད། “འབྲོག་ཁུལ་གྱི་རྩྭ་ར་ཁ་ཐོར་ཡིན་པས། ཁྱིམ་ཚང་ཚང་མར་འཚམས་འདྲིར་སྐྱོད་ཐེངས་རེར་གཟའ་འཁོར་རེ་འགོར་གྱི་ཡོད”ཁོང་གིས་དེ་ལྟར་བྱས་ཚེ་སློབ་མ་ཚོའི་གུང་གསེང་གི་སྦྱོང་ཚན་ལེགས་འགྲུབ་བྱེད་ཚད་མཐོ་རུ་གཏོང་ཐུབ་པ་མ་ཟད། ད་དུང་ཁྱིམ་བདག་གི་སེམས་གཏིང་གི་སྐད་ཆ་ཉན་ནས་ཁྱིམ་ཚང་དང་སློབ་གྲྭའི་དབར་བསམ་ཤེས་དང་ཡིད་ཆེས་ཟབ་ཏུ་འགྲོ་ཐུབ་ཅེས་བཤད།

སློབ་གྲྭའི་ཏང་ཀྲི་པུའི་ཧྲུའུ་ཅི་ཡིན་པའི་མིག་དམར་གྱིས་ཐོག་མཐའ་བར་གསུམ་དུ་སློབ་གསོའི་ཐོག་མའི་བསམ་འདུན་མ་བརྗེད་པར་མི་སྐྱོང་གི་འགན་འཁྲི་བློ་ལ་བརྟན་པོར་འཆང་ཞིང་། ཁོང་གིས་སློབ་མའི་བསམ་བློ་ཆབ་སྲིད་སློབ་གསོར་དམ་འཛིན་ཡག་པོ་བྱས་ཏེ། རྒྱལ་དར་འོག་གི་གཏམ་བཤད་དང་། བརྗོད་དོན་གཙོ་བོའི་འཛིན་ཚོགས། སློབ་གྲྭའི་རིག་གནས་འགྲེམས་པང་། སློབ་ཚན་མ་ཁྲིད་གོང་གི་སྐར་མ་གསུམ་གྱི་ཀུན་སྤྱོད་སློབ་གསོ་སོགས་བྱེད་ཐབས་སྣ་ཚོགས་བརྒྱུད་སློབ་མར་སློབ་གསོ་གཏིང་ཟབ་ཐེབས་པར་བྱེད་པ་དང་སློབ་མ་ཚོའི་ཏང་གཅེས་རྒྱལ་གཅེས་དང་སྤྱི་ཚོགས་རིང་ལུགས་ལ་དགའ་ཞེན་གྱི་བརྩེ་སེམས་ཟབ་ཏུ་བཏང་བ་དང་། སློབ་མ་ཚོའི་ཏང་གཅེས་རྒྱལ་གཅེས་ཀྱི་བྱང་ཚད་མཐོ་རུ་བཏང་བ། ཁོང་ཚོ་བླ་ན་མེད་པའི་རྒྱལ་ཁབ་ཀྱི་ས་ཆ་སྲུང་མཁན་དང་བདེ་སྐྱིད་ལྡན་པའི་ཁྱིམ་གཞིས་སྐྲུན་མཁན་བརྩོན་ལེན་བྱེད་པར་ཁྲིད་སྟོན་བྱས་ཡོད།

མིག་དམར་གྱི་སྣེ་ཁྲིད་འོག་སློབ་གྲྭ་དེ་རྫོང་གི་མཇུག་ཤོས་ནས་དཔེ་སྟོན་སློབ་གྲྭར་གྱུར་ཡོད། སློབ་གྲྭར་སྔ་རྗེས་སུ་ལྗོངས་ཡོངས་ཀྱི་སྔོན་ཐོན་མཉམ་སྡེབ་དང་། ལྗོངས་ཡོངས་ཀྱི་ཕུལ་བྱུང་གཞི་རིམ་ཏང་རྩ་འཛུགས། ལྗོངས་ཡོངས་ཀྱི་ནར་སོ་དར་ལ་མ་བབས་པའི་མིའི་བསམ་བློ་ཀུན་སྤྱོད་འཛུགས་སྐྱོང་ལས་དོན་གྱི་སྔོན་ཐོན་ཚན་པ། ལྗོངས་ཡོངས་ཀྱི་སྐབས་གཉིས་པའི་རང་སྐྱོང་ལྗོངས་ཀྱི་ཤེས་དཔལ་སློབ་གྲྭ་སོགས་ཀྱི་མཚན་སྙན་ཐོབ་ཡོད། ཁོང་མི་སྒེར་ལ་ཡང་གཞིས་རྩེ་གྲོང་ཁྱེར་གྱི“ཇོ་མོ་གླང་མའི་དགེ་རྒན་བཟང་པོ”དང་། གཞིས་རྩེ་གྲོང་ཁྱེར་གྱི་ཕུལ་བྱུང་སློབ་སྤྱི། གཞིས་རྩེ་གྲོང་ཁྱེར་གྱི་མི་རིགས་མཐུན་སྒྲིལ་གྱི་དཔེ་བཟང་མི་སྒེར་སོགས་ཀྱི་གཟི་བརྗིད་མཚན་སྙན་ཐོབ་ཡོད།