ཤ་བོ་སྐྱབས་དང་ཀྲང་ཧྲིང་ཡོན་གྱིས་འཇུ་ལག་ཏུ་བརྟག་ཞིབ་དང་བཞུགས་མོལ་གནང་སྐབས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཁྲོད་ཁྱད་ཆོས་མངོན་ཐུབ་པར་བྱེད་དགོས་པ་ནན་གྱིས་བསྟན།
ཟླ5བའི་ཚེས15ཉིན། ཁུལ་ཨུའི་ཧྲུའུ་ཅི་ཤ་བོ་སྐྱབས་དང་ཁུལ་ཨུའི་ཧྲུའུ་ཅི་གཞོན་པའམ་ཁུལ་དཔོན་ཀྲང་ཧྲིང་ཡོན་གྱིས་འཇུ་ལག་རྫོང་དུ་བརྟག་ཞིབ་དང་བཞུགས་མོལ་གནང་སྐབས། ཏང་གི་ཚོགས་ཆེན་ཉི་ཤུ་པའི་དགོངས་དོན་ཁྱོན་ཡོངས་ནས་སློབ་སྦྱོང་དང་ལག་བསྟར་བྱས་ཏེ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཚོ་སྔོན་ལ་རྟོག་ཞིབ་གནང་སྐབས་ཀྱི་གསུང་བཤད་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ནས། འབད་འབུངས་ཡར་བརྩོན་གྱི་སྙིང་སྟོབས་མུ་མཐུད་རྒྱུན་འཁྱོངས་བྱས་ཏེ་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་བའི་ཁྲོད་ཁྱད་ཆོས་མངོན་ཐུབ་པར་བྱེད་དགོས་པ་ནན་གྱིས་བསྟན།
འཇུ་ལག་རྫོང་ཨུ་དང་རྫོང་སྲིད་གཞུང་གི་བྱ་བའི་སྙན་ཞུར་ཉན་རྗེས། ཤ་བོ་སྐྱབས་ཀྱིས་འཇུ་ལག་ནི་མདོ་ལ་རི་རྒྱུད་ཀྱི་ཆུའི་འབྱུང་ཁུངས་གལ་ཆེན་དང་སྐྱེ་དངོས་སྣ་མང་རང་བཞིན་གྱི་གཅིག་སྡུད་ས་ཁུལ་དང་མཚོ་བྱང་གི་མི་འབོར་མང་བའི་རྫོང་ཞིག་ཡིན་པས། ཁུལ་ཡོངས་ཀྱི་དཔལ་འབྱོར་འཕེལ་རྒྱས་ཀྱི“གཡུལ་ས་གཙོ་བོ”ཞིག་ཡིན་ལ་ཞིང་ཆེན་ཡོངས་ཀྱི་ཚོང་ཟོག་གི་རྟེན་གཞི་དང་བོད་རིགས་ས་ཁུལ་གྱི་ནས་ཀྱི་ས་བོན་བཟོ་བའི་རྟེན་གཞི་གལ་ཆེན་ཞིག་ཀྱང་ཡིན། འཇུ་ལག་སྣུམ་ཁྲོམ་ར་གང་སར་ཁྱབ་ཅེས་པའི་མཚན་སྙན་ཡང་ཡོད་པས་བྱ་བ་ཡག་པོ་སྒྲུབ་པར་དོན་སྙིང་གལ་ཆེན་ལྡན་ཡོད། གཅིག་ནས་སྐྱེ་ཁམས་ཁོར་ཡུག་གི་སྤུས་ཚད་རྒྱུན་མཐུད་ལེགས་སུ་འགྲོ་རྒྱུར་སྐུལ་འདེད་བཏང་ནས་མདོ་ལ་རི་བོའི་ལྷོ་རྒྱུད་ཀྱི་སྐྱེ་ཁམས་ཁོར་ཡུག་བཅོས་སྒྲིག་གི་གྲུབ་འབྲས་མུ་མཐུད་བརྟན་དུ་གཏོང་བ་དང་སྐྱེ་ཁམས་དོ་དམ་པའི་ནུས་པ་འདོན་སྤེལ་གང་ལེགས་བྱེད་པ། མདོ་ལ་རི་བོ་རྒྱལ་ཁབ་སྤྱི་གླིང་འཛུགས་སྐྲུན་ལ་སྐུལ་འདེད་ཏན་ཏིག་གཏོང་བ། འཇུ་ལག་གི་རི་ཆུ་ནགས་གསུམ་གྱི་མཛེས་པ་སྲུང་སྐྱོབ་ཡག་པོ་བཅས་བྱེད་དགོས། གཉིས་ནས་ནུས་ཤུགས་ཡོད་རྒུས་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་བཏང་སྟེ་ཐོན་ལས་ཀྱི“གནས་བཞི”འཛུགས་སྐྲུན་བླང་བྱར་དམིགས་ཏེ་ཞིང་ལས་ས་ཁུལ་གྱི་ཁྱད་ལྡན་འདེབས་འཛུགས་དང་གསོ་སྤེལ་ལས་རིགས་གོང་འཕེལ་གཏོང་བ་དང་ཞིང་ཕྱུགས་ཐོན་རྫས་ལས་སྣོན་ཞིབ་ཚགས་བྱེད་རྒྱུར་སྐུལ་འདེད་བཏང་ནས“གཅིག་ཅན་བདུན”གྱི་སྐྱེ་ཁམས་ཕྱུགས་ལས་ཀྱི་བཟོ་སྐྲུན་ཆ་ཚང་ལག་བསྟར་ཡག་པོ་བྱེད་དགོས། ལོག་དཀར་མེ་ཏོག་གི་ལྗོངས་ཁུལ་དེ5Aརིམ་པའི་ཡུལ་སྐོར་ལྗོངས་ཁུལ་གཏོད་པའི་མིང་ཐོའི་ནང་འཇུག་རྒྱུར་བརྩོན་ལེན་ཧུར་ཐག་བྱེད་པ་དང་། སྒར་འདེབས་དཔལ་འབྱོར་དང་མཚན་མོའི་དཔལ་འབྱོར་འཕེལ་རྒྱས་ཤུགས་ཆེན་གཏོང་བ། Aརིམ་པའི་ལྗོངས་ཁུལ་ལེགས་འདེམས་རེ་ཞུ་དང་གཏོད་འཛུགས་བྱ་ཤུགས་ཆེ་རུ་གཏོང་བ། གསར་བརྗེའི་སློབ་གསོ་དང་རྒྱལ་སྲུང་སློབ་གསོ་ཏན་ཏིག་ངང་སྒྲུབ་པ། ཧན་ཐའེ་དམངས་དམག་ལན་སོགས་གསར་བརྗེའི་ཐོན་ཁུངས་ཡག་པོ་སྤྱོད་པ་བཅས་བྱས་ནས་ཏང་གི་སློབ་གྲྭ་དང་དམག་ཁོངས་ནས་ཕྱིར་ལོག་པའི་དམག་མི། མང་ཚོགས་ཚོགས་པའི་རྩ་འཛུགས་བཅས་ཀྱི་འགན་ནུས་ལེགས་ཆ་འདོན་སྤེལ་གང་ལེགས་བྱས་ཏེ་ཆས་རྟགས་གཏོད་པ་དང་གསར་བརྗེའི་ཞིབ་འཇུག་སློབ་སྦྱོང་ཐད་ལེགས་སྐྱེས་དབུལ་དགོས། དཔལ་འབྱོར་གྱི་རྒྱུ་རྐྱེན་གཙོ་བོའི་འགན་སྲུང་བྱེད་ཤུགས་ཆེ་རུ་གཏོང་བ་དང་ཚོང་གཉེར་ཁོར་ཡུག་མུ་མཐུད་ལེགས་སུ་གཏོང་བ། བེད་མེད་དུ་བཞག་པའི་རྒྱུ་ནོར་གཙང་བཤེར་དང་བཀོལ་སྤྱོད་ཡག་པོ་བྱེད་པ། ནོར་སྲིད་དང་དངུལ་རྩའི་སྲིད་ཇུས་བེད་སྤྱོད་ཡག་པོ་བྱེད་པ། རྒྱལ་ཁབ་ཀྱི་མ་འཇོག་དང་གྲོང་ཁྱེར་གྱི་མ་འཇོག་སོགས་ཀྱི་མ་དངུལ་བསྡུ་རུབ་ལས་སྟེགས་སྟོབས་ཆེར་གཏོང་བ། ཁ་གཏད་རོགས་སྐྱོར་གྱི་སྟོབས་ཤུགས་ལ་བརྟེན་པ། དམངས་ཕན་ཞབས་ཞུའི་ལྟེ་གནས་སོགས་རྨང་གཞིའི་སྒྲིག་བཀོད་གང་མགྱོགས་སྒོས་བསྐྲུན་དགོས། གསུམ་ནས་དམངས་འཚོའི་བྱ་བ་དངོས་རྒྱུན་མཐུད་ངང་ཡག་པོར་སྒྲུབ་པ་དང་། དུས་རབས་གསར་བའི་དཔལ་ཡོན་ལག་ལེན་ལྟེ་གནས་འཛུགས་སྐྲུན་དང་བེད་སྤྱོད་ཡག་པོ་བྱེད་པ། སྡེ་བའི་མཉམ་སྡེབ་དཔལ་འབྱོར་འཕེལ་རྒྱས་དང་སྟོབས་ཆེར་གཏོང་བ། གེགས་རྗེས་བསྐྱར་སྐྲུན་ལ་ནུས་ཤུགས་ཡོད་རྒུས་སྐུལ་འདེད་གཏོང་བ་བཅས་བྱས་ནས་རིགས་སོ་སོའི་མང་ཚོགས་ཀྱི་ཐོབ་སྣང་དང་སྐྱིད་སྣང་ཆེ་རུ་གཏོང་དགོས། བཞི་ནས་ཀྲུང་ཧྭ་མི་རིགས་གཅིག་མཐུན་ཚོགས་པའི་འདུ་ཤེས་བརྟན་དུ་གཏོང་རྒྱུ་གཙོ་གནད་དུ་འཛིན་རྒྱུ་རྒྱུན་འཁྱོངས་ཀྱིས་ཆོས་ལུགས་དགོན་སྡེ་དོ་དམ་ལ་ཁྲིམས་ལྟར་ཤུགས་སྣོན་པ་དང་། འཇུ་ལག་གནའ་གྲོང་གི་རྗེས་ཤུལ་དང་རིག་གནས་ཤུལ་བཞག་སྤྱད་དེ་བརྗོད་དོན་སློབ་གསོ་སྤེལ་བ། སེ་འབྲུའི་ཁྱིམ་གཞིས་སོགས་སློབ་གསོའི་གཡུལ་ས་བཏོད་དེ་བདེ་འཇགས་ཐོན་སྐྱེད་བྱ་བར་དམ་འཛིན་ཡག་པོ་བྱས་ནས་ཆུ་ཚད་སྔར་ལས་མཐོ་བའི་བདེ་འཇགས་འཇུ་ལག་བསྐྲུན་དགོས། ལྔ་ནས་གཞི་རིམ་དམ་འཛིན་ཤུགས་ཆེན་བྱེད་པའི་ཁྲིད་ཕྱོགས་གསལ་བོ་རྒྱུན་འཁྱོངས་བྱས་ཏེ་གཞི་རིམ་ཏང་རྩ་འཛུགས་ཀྱི་ནུས་པ་ཆེ་རུ་གཏོང་བ་དང་། མཐའ་མཚམས་ཏང་འཛུགས་སྐྱོང་མནའ་འབྲེལ་གྱི་དཔེ་དབྱིབས་གཏོད་པ། “གཅིག་ཅན་དྲུག”གི་བྱེད་སྒོ་གཏིང་ཟབ་སྤེལ་བ། “བཅུ་ལྡན་བཟོ་སྐྲུན”འཛུགས་སྐྲུན་ལ་སྐུལ་འདེད་གཏོང་བ་བཅས་བྱས་ནས། ཏང་གི་སྲིད་སྐྱོང་རྨང་གཞི་བརྟན་དུ་གཏོང་བ་དང་དཔེ་གཞིར་བརྟེན་ནས་ལེགས་བཅོས་ལ་སྐུལ་འདེད་གཏོང་བའི་ཆེད་དོན་སློབ་གསོ་བཅོས་སྐྱོང་གཏིང་ཟབ་ཏུ་སྤེལ་བ། “རྣམ་པ་དང་པོ”གནད་སྨིན་བེད་སྤྱོད་བྱས་ཏེ། ཕྱོགས་ཡོངས་ནས་ཏང་དོ་དམ་དང་ཏང་ནན་སྐྱོང་བྱ་རྒྱུ་དེ་གཏིང་ཟབ་ཏུ་འཕེལ་རྒྱས་འགྲོ་བར་སྐུལ་འདེད་གཏོང་དགོས། དྲུག་ནས་དམངས་གཙོའི་ཆབ་སྲིད་འཛུགས་སྐྱོང་ལ་ཤུགས་བསྣན་ནས་དམངས་ཆེན་དང་སྲིད་གྲོས་ཀྱིས་ཁྲིམས་ལྟར་འགན་འཁྲི་སྒྲུབ་པ་དང་སྲིད་ཞུགས་སྲིད་གླེང་། དམངས་གཙོའི་ལྟ་སྐུལ་བཅས་ལ་ནུས་ཤུགས་ཡོད་རྒུས་རྒྱབ་སྐྱོར་བྱས་ཏེ་དམངས་ཆེན་དང་སྲིད་གྲོས། མང་ཚོགས་ཚོགས་པའི་རྩ་འཛུགས་བཅས་ཀྱིས་འགན་ནུས་ཀྱི་ལེགས་ཆར་གཞི་ཚུགས་ཏེ། རྫོང་ཡོངས་ཀྱི་གཙོ་གནད་བྱ་བའི་ནང་ཧུར་ཐག་ཞུགས་ནས་འཕེལ་རྒྱས་ལ་སྐུལ་འདེད་གཏོང་བའི་སྟོབས་ཤུགས་གཅིག་ཏུ་སྒྲིལ་དགོས་པ་ནན་གྱིས་བསྟན།
ཀྲང་ཧྲིང་ཡོན་གྱིས་གསུང་བཤད་གནང་སྐབས་འཇུ་ལག་རྫོང་གིས་ལོ་ཧྲིལ་བོའི་དཔལ་འབྱོར་བྱ་བའི་དམིགས་འབེན་ལ་དམ་པོར་དམིགས་ཏེ་ཁེ་ལས་ལ་ཕན་ཡོན་སྐྱེལ་བའི་དཔྱིད་རླུང་འགུལ་སྐྱོད་ཏན་ཏིག་སྤེལ་བ་དང་། དཔལ་འབྱོར་འཁོར་སྐྱོད་ལ་མགྱོགས་མྱུར་སྐུལ་འདེད་གཏོང་བ། རིག་གནས་དང་ཡུལ་སྐོར་གྱི་འཛད་སྤྱོད་ཁྱོན་ཡོངས་ནས་སླར་གསོ་ཡོང་རྒྱུར་སྐུལ་འདེད་གཏོང་དགོས་ཤིང་། ཐོན་ལས་གཞན་སྒྱུར་རིམ་སྤོར་ལ་སྐུལ་འདེད་ཤུགས་ཆེན་གཏོང་བ་དང་རྒྱལ་ཁབ་ཀྱི་འཕེལ་རྒྱས་འཐབ་ཇུས་གལ་ཆེན་ལ་རང་འགུལ་ངང་ཞབས་འདེགས་ཞུ་བ་དང་མཉམ་འདྲེས་བྱེད་པ། ཐོན་ལས་ཀྱི“གནས་བཞི”འཛུགས་སྐྲུན་བྱེད་པ་འདེགས་སྐྱོར་གལ་ཆེན་དུ་བྱས་ནས་ཐོན་ལས་དང་པོ་དང་གཉིས་པ། གསུམ་པ་བཅས་མཉམ་འདྲེས་གཏིང་ཟབ་ཡོང་རྒྱུར་སྐུལ་འདེད་གཏོང་དགོས། གྲོང་གསེབ་ཁྱོན་ཡོངས་ནས་དར་སྤེལ་ཡོང་རྒྱུར་ཤུགས་བསྣན་ཏེ་དབུལ་ཐར་གྱི་གྲུབ་འབྲས་སྲ་བརྟན་དུ་གཏོང་རྒྱུར་བརྟེན་ནས་ཐོན་ལས་དར་སྤེལ་ཡོང་རྒྱུར་དམ་འཛིན་བྱས་ཏེ་རོང་འབྲོག་མང་ཚོགས་ཀྱི་ཡོང་སྒོ་འཕར་རྒྱུར་སྐུལ་འདེད་གཏོང་དགོས། སྐྱེ་ཁམས་དཔལ་ཡོན་འཛུགས་སྐྱོང་ལ་སྐུལ་འདེད་གཏོང་རྒྱུར་ཤུགས་བསྣན་ནས་རྒྱལ་ཁབ་སྤྱི་གླིང་གཙོ་བྱས་པའི་རང་བྱུང་སྲུང་སྐྱོབ་ཁུལ་གྱི་མ་ལག་འཛུགས་སྐྲུན་བྱེད་པའི་ཁྲོད་འཇུ་ལག་གི་བྱས་རྗེས་འཇོག་དགོས་ལ། དམངས་འཚོ་ལེགས་སུ་གཏོང་རྒྱུར་སྐུལ་འདེད་ཤུགས་ཆེན་བཏང་ནས་མང་ཚོགས་ཀྱི་སེམས་ཁྲལ་ནུས་ཤུགས་ཡོད་རྒུས་ཐག་གཅོད་བྱེད་པ་དང་། ཡར་རྒྱས་བརྟན་བརླིང་གི་རྣམ་པ་མུ་མཐུད་སྲ་བརྟན་དུ་གཏོང་བ་དང་མཁོ་བསྟུན་དོ་དམ་ལམ་སྲོལ་དོན་འཁྱོལ་བྱེད་པ། ཉེན་ཁའི་མངོན་མེད་རྐྱེན་ངན་བཙལ་འཚོལ་ཡང་དག་བཅས་བྱས་ཏེ་བཅོས་སྒྱུར་འཕེལ་རྒྱས་ལ་སྤྱི་ཚོགས་ཀྱི་རྣམ་པ་བཟང་བོ་ཞིག་གཏོད་དགོས་པའི་བླང་བྱ་བཏོན།
མཉམ་སྤྱོད།
སྐད་འཕྲིན་སྤྱི་སྟེགས་ཨང་གྲངས།
微信扫一扫加关注