མཚོ་བྱང་ཁུལ་ནས་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྐབས་བརྒྱད་པ་བསུས།

མཚོ་བྱང་ཁུལ་ནས་རྒྱལ་ཡོངས་བོད་ཀྱི་ཡིག་གཟུགས་དུས་ཆེན་སྐབས་བརྒྱད་པ་བསུས།

ཟླ4བའི་ཚེས29ཉིན། མཚོ་བྱང་ཁུལ་མདོ་ལ་ཚགས་པར་ཁང་གིས་གཙོ་སྒྲུབ་བྱས་ཤིང་མདོ་ལ་རི་བོ་སློབ་འབྲིང་དང་ནུབ་མཚོ་མི་རིགས་བཅའ་སྡོད་སློབ་ཆུང་གཉིས་ཀྱིས་འགན་སྒྲུབ་བྱས་ཏེ“མི་རིགས་མཐུན་སྒྲིལ་ལ་སྐུལ་འདེད་བཏང་ནས་ཡིག་གཟུགས་ཀྱི་ཉམས་འགྱུར་མངོན་པར་བྱེད”ཅེས་པའི4.30བོད་ཀྱི་ཡིག་གཟུགས་འགྲན་སྡུར་སྐབས་བརྒྱད་པ་མདོ་ལ་རི་བོ་སློབ་འབྲིང་དུ་སྤེལ།

མཚོ་བྱང་མདོ་ལ་བོད་ཡིག་ཚགས་པར་ཁང་དང་མདོ་ལ་རི་བོ་སློབ་འབྲིང་། ནུབ་མཚོ་མི་རིགས་བཅའ་སྡོད་སློབ་ཆུང་བཅས་ཀྱི་འགན་འཛིན་པ་དང་དགེ་སློབ་དག་བྱ་འགུལ་ལ་ཞུགས།

བྱ་འགུལ་འདི་ལས་སློབ་མ་ཡོངས་ལ་བོད་ཡིག་ཡིག་གཟུགས་ཀྱི་གལ་ཆེན་རང་བཞིན་དང་། ཡིག་གཟུགས་ལ་དགའ་བའི་འདུན་པ་སོགས་ཕྱོགས་མང་བོ་ནས་གོ་སྐོན་བློ་འགུག་གི་ཕན་ཐོགས་ཆེན་པོ་བྱུང་ཡོད་ལ། སློབ་མ་རྣམས་ཀྱིས་དུས་རབས་ཀྱི་འབོད་པ་ངག་ལ་གྱེར་ནས་མེས་རྒྱལ་ལ་དགའ་བའི་སྦྱོར་བ་ཡིས་མཚོ་བྱང་ཁུལ་གྱི་མི་རིགས་སློབ་གསོའི་འཕེལ་རྒྱས་དང་ཏང་གི་མི་རིགས་སློབ་གསོའི་སྲིད་ཇུས་ཀྱི་གཡུར་དུ་ཟ་བའི་གྲུབ་འབྲས་མངོན་པར་མཚོན་ཡོད།

ཐེངས་འདིའི་འགྲན་སྡུར་ལ་དགེ་སློབ40ལྷག་ཞུགས་ཡོད་ཅིང་། དགེ་སློབ་དག་གིས་བྲིས་ལ་ཡིག་ནོར་ཤོར་མི་ཆོག་ལ་ཤོག་ངོས་གཙང་མ་ཡིན་དགོས་པ་དང་། ཡིག་གཟུགས་དྲང་དགོས་པ། ཡི་གེར་མངོན་གསལ་གྱི་ཆེ་ཆུང་མེད་པ་བཅས་ཀྱི་བླང་བྱ་ལྟར་འགྲན་སྡུར་དངོས་ལ་ཞུགས་ནས་དག་གཙང་གི་ཤོག་དཀར་གྱི་འཇིག་རྟེན་དུ་ཡིག་གཟུགས་སྒྱུ་རྩལ་གྱི་རྣམ་ཤེས་སོར་རྩེ་ལས་འཁྲུངས་པར་བྱས། 

འགྲན་སྡུར་གྱི་བྱ་དགའི་ཨང་རིམ་ལ་འདྲ་མཉམ་དང་དྲང་བདེན་ཡོང་ཆེད། ཐོག་མར་མདོ་ལ་རི་བོ་སློབ་འབྲིང་གི་དགེ་རྒན་དུ་མས་ཐེངས་འདིའི་ཡིག་གཟུགས་འགྲན་སྡུར་གྱི་བརྩམས་ཆོས་ལས་ཡིག་གཟུགས་ལེགས་ཤོས་དག་ལོགས་སུ་བདམས་ཐོན་བྱུང་རྗེས། བདམས་ཐོན་བྱུང་བའི་ཡིག་གཟུགས་བརྩམས་ཆོས་དག་དཔྱད་འདེམས་པས་བློ་ཞིབ་མོས་དཔྱད་འདེམས་ཡང་ཡང་བྱས་མཐར།  སློབ་གྲྭ་རེ་ནས་ཨང་དང་པོ་གཅིག་དང་ཨང་གཉིས་པ་གསུམ། ཨང་གསུམ་པ་གསུམ། ཕུལ་བྱུང་གསུམ་བཅས་བྱ་དགའ་ཐོབ་པའི་སློབ་གྲོགས་དག་ལ་རིམ་པ་བཞིན་བྱ་དགའི་དཔེ་དེབ་དང་གཟི་བརྗིད་དཔང་ཡིག་གནང་། 

མཇུག་མཐར། ཐེངས་འདིའི་འགྲན་སྡུར་གྱི་མཇུག་འབྲས་སྤྱི་བསྒྲགས་བྱས་པ་དང་འབྲེལ་བྱ་དགའ་སྟེར་བའི་གོ་རིམ་ལ་ཞུགས་ནས་བྱ་འགུལ་བཀྲ་ཤིས་བདེ་ལེགས་ངང་མཇུག་བསྡུས།