2023ལོའི“མཚོ་བྱང་དགུན་གྱི་སྤྲོ་འཆམ་དང་མཐུན་མཛེས་ཡུལ་ཚོ”ཞེས་པའི་མཚོ་བྱང་ཁུལ་གྱི་ཡུལ་ཚོའིBAསླེ་གྲུག་འགྲན་བསྡུར་སྤེལ་མགོ་བརྩམས།

ཏང་གི་ཚོགས་ཆེན་ཉི་ཤུ་པའི་དགོངས་དོན་ཁྱོན་ཡོངས་ནས་དོན་འཁྱོལ་དང་དམངས་ཡོངས་ཀྱི་ལུས་སྦྱོང་རྒྱལ་ཁབ་ཀྱི་འཐབ་ཇུས་ལག་ལེན་གཏིང་ཟབ་བསྟར་བ། དམངས་ཡོངས་ཀྱི་ལུས་སྦྱོང་འགྲན་བསྡུར་བྱེད་སྒོ་ཕུན་སུམ་ཇེ་ཚོགས་སུ་གཏོང་བ།“མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བའི”དུས་རབས་གསར་པའི་འཕེལ་རྒྱས་ཀྱི་ལྟ་བ་དར་སྤེལ་གཏོང་བ། ལུས་རྩལ་དང་ལེན་ཧུར་ཐག་བཅས་བྱས་ནས་གྲོང་གསེབ་དར་སྤེལ་གཏོང་བའི་འཆར་གཞི་ལག་ལེན་བསྟར་ཆེད།ཟླ11པའི་ཚེས20ཉིན་ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུས་དང་ཁུལ་ལུས་རྩལ་སྤྱི་ཁྱབ་ལྷན་ཚོགས་ཀྱིས་གཙོ་སྒྲུབ་དང་། ཁུལ་མང་ཚོགས་ལུས་རྩལ་མཛུབ་ཁྲིད་ཞབས་ཞུ་ལྟེ་གནས་དང་ཁུལ་སླེ་གྲུག་མཐུན་ཚོགས་ཀྱིས་འགན་སྒྲུབ་གནང་བའི2023ལོའི“མཚོ་བྱང་དགུན་གྱི་སྤྲོ་འཆམ་དང་མཐུན་མཛེས་ཡུལ་ཚོ”ཞེས་པའི་མཚོ་བྱང་ཁུལ་གྱི་ཡུལ་ཚོའིBAསླེ་གྲུག་འགྲན་བསྡུར་མཚོ་བྱང་ཁུལ་ནུབ་མཚོ་གྲོང་དུ་སྤེལ་མགོ་བརྩམས།

ཁུལ་དཔོན་གཞོན་པ་མ་རུའུ་ཞང་སླེ་གྲུག་འགྲན་བསྡུར་གྱི་མགོ་རྩོམ་མཛད་སྒོར་ཕེབས་ནས་འགྲན་བསྡུར་མགོ་བརྩམས་པ་ཁྱབ་བསྒྲགས་བྱས། ཞིང་ཆེན་ལུས་རྩལ་ཅུས་མང་ཚོགས་ན་གཞོན་ཁྲུའུ་ཡི་ཁྲུའུ་ཀྲང་ཀའོ་ཆོན་ཚའེ་དང་། ཁུལ་རིག་གནས་ལུས་རྩལ་ཡུལ་སྐོར་རྒྱང་སྒྲོག་བརྙན་འཕྲིན་ཅུས། ཁུལ་མང་ཚོགས་ལུས་རྩལ་མཛུབ་ཁྲིད་ཞབས་ཞུ་ལྟེ་གནས་ཀྱི་འགན་འཁུར་བ་དང་སྐུ་མགྲོན་བཅས་མགོ་རྩོམ་མཛད་སྒོར་ཞུགས།

ཐེངས་འདིའི་སླེ་གྲུག་འགྲན་བསྡུར་དེ་ཁུལ་མེ་ཟོན་རོགས་སྐྱོབ་ཡན་ལག་རུ་ཁག་དང་ཁུལ་མི་རིགས་གླུ་གར་ཚོགས་པས་ངོ་མཚར་ཆེ་བའི་རིག་རྩལ་འཁྲབ་སྟོན་བྱས་རྗེས་དངོས་སུ་མགོ་བརྩམས་ཤིང་། ཁུལ་ཡོངས་ཀྱི་ཡུལ་ཚོ་དང་གྲོང་རྡལ15ནས་ཐོན་པའི་རོང་འབྲོག་པའི་སླེ་གྲུག་འཐུས་ཚབ་རུ་ཁག་གི་ལུས་རྩལ་པ180ཡིས་དུས་ཡུན་ཉིན5རིང་འགྲན་བསྡུར་བྱ་རྒྱུ་རེད།

རྒྱུས་ལོན་པ་ལྟར་ན། ཉེ་བའི་ལོ་ཤས་རིང་ཁུལ་ཨུ་དང་ཁུལ་སྲིད་གཞུང་གིས་མི་རིགས་ཀྱི་ལུས་རྩལ་བྱ་གཞག་ལ་ཚད་མཐོའི་མཐོང་ཆེན་བྱས་ནས་དམངས་ཡོངས་ཀྱི་ལུས་སྦྱོང་ལུས་རྩལ་ལ་སྐུལ་འདེད་གཏིང་ཟབ་བཏང་བ་དང་། ལུས་རྩལ་གྱི་རྨང་གཞིའི་སྒྲིག་བཀོད་འཛུགས་སྐྲུན་ལ་ཤུགས་སྣོན་པ། ལུས་རྩལ་གྱི་ཤེས་ལྡན་མི་སྣའི་དཔུང་ཁག་སྟོབས་ཆེར་གཏོང་བ་བཅས་དང་ལྷག་པར་དུ་ལུས་རྩལ་གྱི་ཤེས་ལྡན་མི་སྣ་སྐྱེད་སྲིང་ཐད་གཡུར་དུ་ཟ་བའི་གྲུབ་འབྲས་བླངས་ནས་ཁུལ་ཡོངས་དང་ཞིང་ཆེན་ཡོངས། ཐ་ན་རྒྱལ་ཡོངས་ཀྱི་ལུས་རྩལ་འཕེལ་རྒྱས་བྱ་གཞག་ཆེད་ལེགས་སྐྱེས་ཧུར་ཐག་ཕུལ་ཡོད། ཐེངས་འདིར་བདེ་བླག་ངང་སླེ་གྲུག་འགྲན་བསྡུར་སྤེལ་བ་དེ་ནི་མཚོ་བྱང་ཁུལ་གྱི་ལུས་རྩལ་འཕེལ་རྒྱས་ཀྱི་བྱེད་ཐབས་གལ་ཆེན་ཞིག་ཡིན་པ་དང་དམངས་ཡོངས་ཀྱི་ལུས་སྦྱོང་ལུས་རྩལ་ཁྱབ་གདལ་གཏོང་བ་དང་མི་རིགས་མཐུན་སྒྲིལ་འཆམ་མཐུན་ལ་སྐུལ་འདེད་གཏོང་རྒྱུར་དོན་སྙིང་གལ་ཆེན་ལྡན་ཡོད།