ཟླ11པའི་ཚེས17ཉིན། ཁུལ་ཨུའི་བརྗོད་དོན་སློབ་གསོའི་མགོ་ཁྲིད་ཚན་ཆུང་གི་ཚོགས་འདུ་འཚོགས་ལ། བློ་མཐུན་ཚའེ་ཆི་ཡིས་ཀྲུང་དབྱང་གི་བརྗོད་དོན་སློབ་གསོའི་མགོ་ཁྲིད་ཚན་ཆུང་གི་ཚོགས་འདུ་ཐེངས་དྲུག་པའི་ཐོག་གནང་བའི་གསུང་བཤད་དང་། བློ་མཐུན་ལི་ཀན་ཅེ་ཡིས་ཀྲུང་དབྱང་གི་བརྗོད་དོན་སློབ་གསོའི་བྱ་བར་སྐུལ་འདེད་གཏོང་བའི་ཚོགས་འདུའི་ཐོག་གནང་བའི་གསུང་བཤད། བློ་མཐུན་ཀྲའོ་ཡོས་ཞ་ཡིས་ཞིང་ཆེན་ཡོངས་ཀྱི་སྐོར་ཐེངས་གཉིས་པའི་བརྗོད་དོན་སློབ་གསོའི་བྱ་བར་སྐུལ་འདེད་གཏོང་བའི་ཚོགས་འདུའི་ཐོག་གནང་བའི་གསུང་བཤད་བཅས་བརྒྱུད་སྒྲོག་དང་སློབ་སྦྱོང་བྱས་ཤིང་། ཁུལ་ཡོངས་ཀྱི་བརྗོད་དོན་སློབ་གསོའི་བྱ་བ་སྤེལ་ཚུལ་གྱི་སྙན་ཞུར་གསན་པ་དང་འབྲེལ་ཡོད་ཡིག་ཆར་ཞིབ་འཇུག་དང་གྲོས་ཞིབ་གནང་།  ཁུལ་ཨུའི་ཧྲུའུ་ཅིའམ་ཁུལ་ཨུའི་བརྗོད་དོན་སློབ་གསོའི་མགོ་ཁྲིད་ཚན་ཆུང་གི་ཚན་གཙོ་ཤ་བོ་སྐྱབས་ཀྱིས་གཙོ་སྐྱོང་བྱས་ནས་གསུང་བཤད་གནང་ལ། ཞིང་ཆེན་ཏང་ཨུའི་སྐོར་སྐྱོད་ལྟ་སྐུལ་མཛུབ་ཁྲིད་ཚན་ཆུང་ལྔ་པའི་ཚན་གཙོ་ཞུའེ་ཅན་ཧྭ་གདན་ཞུས་ལྟར་ཚོགས་འདུར་ཕེབས་ནས་མཛུབ་སྟོན་གནང་།

ཤ་བོ་སྐྱབས་ཀྱིས་ཁུལ་ཡོངས་སུ་བརྗོད་དོན་སློབ་གསོ་སྤེལ་བ་ནས་བཟུང་། ཞིང་ཆེན་ཏང་ཨུའི་སྐོར་སྐྱོད་ལྟ་སྐུལ་མཛུབ་ཁྲིད་ཚན་ཆུང་ལྔ་པས་ཚད་གཞི་མཐོན་པོ་དང་བླང་བྱ་ནན་མོ། ནན་སྐུལ་དངོས་ཁྲིད། བརྗོད་དོན་གཅིག་པར་ཐུན་མོང་ཐོག་ལན་འདེབས་པ་བཅས་རྒྱུན་འཁྱོངས་བྱས་ནས་ཁུལ་ཡོངས་ཀྱི་བརྗོད་དོན་སློབ་གསོ་གཏིང་ཟབ་དང་ཏན་ཏིག་ངང་སྤེལ་རྒྱུར་སྐུལ་འདེད་ཏན་ཏིག་བཏང་ལ། རིམ་པ་སོ་སོའི་ཏང་རྩ་འཛུགས་ཀྱིས་ཞིང་ཆེན་ཏང་ཨུའི་བཀོད་སྒྲིག་དང་ཁུལ་ཨུའི་བྱ་བའི་བླང་བྱ་ལག་བསྟར་གཏིང་ཟབ་བྱས་ཏེ་རིགས་པའི་གཞུང་ལུགས་སློབ་སྦྱོང་དང་བརྟག་དཔྱད་ཞིབ་འཇུག འཕེལ་རྒྱས་ལ་སྐུལ་འདེད། ཞིབ་བཤེར་དག་ཐེར་བཅས་ཟུང་འབྲེལ་དམ་ཟབ་དང་གཅིག་གྱུར་ཐོག་སྐུལ་འདེད་གཏོང་རྒྱུར་སྐུལ་འདེད་ཤུགས་ཆེན་བཏང་ནས་ཁུལ་ཡོངས་ཀྱི་བརྗོད་དོན་སློབ་གསོ་ནུས་ལྡན་དང་གོ་རིམ་ལྡན་པའི་སྒོ་ནས་སྤེལ་དགོས་པར་བསྟན།      

ཤ་བོ་སྐྱབས་ཀྱིས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་འབྲེལ་ཡོད་བརྗོད་དོན་སློབ་གསོའི་སྐོར་གྱི་གསུང་བཤད་གལ་ཆེན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་སློབ་སྦྱོང་དང་ལག་བསྟར་གཏིང་ཟབ་བྱས་ནས། ཁུལ་ཡོངས་ཀྱི་བརྗོད་དོན་སློབ་གསོ་ཏན་ཏིག་ངང་སྤེལ་བ་དང་བྱ་སྤྱོད་དངོས་ཀྱི་ཐོག་ནས་ཕན་འབྲས་ཐོན་རྒྱུར་རྒྱུན་མཐུད་ངང་སྐུལ་འདེད་གཏོང་དགོས་ཏེ། གཅིག་ནས་སློབ་སྦྱོང་དང་བརྟག་དཔྱད་ཞིབ་འཇུག དངོས་སྒྲུབ་ཀྱིས་ལས་མགོ་རྩོམ་པ་བཅས་མཉམ་འདྲེས་ངང་སྐུལ་འདེད་གཏོང་རྒྱུ་རྒྱུན་འཁྱོངས་བྱས་ཏེ་ཇི་མ་ཇི་བཞིན་དང་། ཡིག་འབྲུ་རེ་རེ་བཞིན་ཀློག་པ། ཞིབ་ཀློག་གཏན་འཁེལ་བཅས་ཀྱི་དཀར་ཆག་དང་རིགས་པའི་གཞུང་ལུགས་སློབ་སྦྱོང་། བརྟག་དཔྱད་ཞིབ་འཇུག འཕེལ་རྒྱས་ལ་སྐུལ་འདེད། ཞིབ་བཤེར་དང་བཅོས་སྒྲིག་བཅས་ཀྱི་ཁྲོད་ཤེས་རྟོགས་གཏིང་ཟབ་ཡོང་བ་བྱས་ནས་ཏང་གི་གསར་གཏོད་རིགས་པའི་གཞུང་ལུགས་སྤྱད་དེ་གནད་དོན་ཞིབ་འཇུག་དང་ཐག་གཅོད་བྱེད་དགོས། གཉིས་ནས་དམིགས་འབེན་གྱི་ཁྲིད་ཕྱོགས་དང་གནད་དོན་གྱི་ཁྲིད་ཕྱོགས། ལག་ལེན་གྱི་ཁྲིད་ཕྱོགས་བཅས་གཅིག་གྱུར་དམ་ཚགས་བྱ་རྒྱུ་རྒྱུན་འཁྱོངས་དང་། གནད་དོན་གྱི་ཞིབ་ཐོ་དང་གཏན་ཁེལ་བྱས་པའི་བརྟག་དཔྱད་ཞིབ་འཇུག་བྱ་གཞིར་ནན་མོར་གཞིགས་ནས་འགག་གནད་སྒྲོལ་ས་དང་ཤར་བགྲོད་ཐུབ་པར་བཟོས་ཏེ་སྤུས་ཚད་མཐོ་བའི་འཕེལ་རྒྱས་ཀྱི་ཕན་འབྲས་གསར་པར་བརྟེན་ནས་བརྗོད་དོན་སློབ་གསོའི་གྲུབ་འབྲས་ལ་ཞིབ་བཤེར་བྱ་དགོས། གསུམ་ནས་མཛུབ་ཁྲིད་ལེགས་གཏོང་དང་སྐུལ་འདེད་ཏན་ཏིག་གཏོང་བ། བརྗོད་དོན་གཅིག་པར་ལན་འདེབས་པ་བཅས་རྒྱུན་འཁྱོངས་ཀྱིས་མགོ་ཁྲིད་ལས་བྱེད་པས“1+10”གཞི་རིམ་ལ་འབྲེལ་གཏུག་བྱས་ནས་མང་ཚོགས་ལ་ཞབས་འདེགས་ཞུ་བའི་ལམ་སྲོལ་དང“4+1+N”གྲོང་གསེབ་དར་སྤེལ་མཉམ་འབྲེལ་གྱི་ལམ་སྲོལ་དོན་འཁྱོལ་ནན་མོ་བྱས་ནས་སྐུལ་འདེད་གཏོང་བ་དང་།  རྫོང་རིམ་པའི་མགོ་ཁྲིད་ཚན་ཁག་གི“འགག་རྩའི་ཉུང་ཤས”ལ་དམ་འཛིན་ཡག་པོ་བྱེད་པ།  ཁྱབ་ཁོངས་བདུན་གྱི“ཡོངས་ཁྱབ་མང་ཆེ་བར”སྤྱི་འདོམས་སྐུལ་འདེད་གཏོང་དགོས།  བཞི་ནས་ཕྱི་ཚུལ་རིང་ལུགས་དང་དཔོན་ཉམས་རིང་ལུགས་ལ་ངོ་རྒོལ་མཐའ་གཅིག་ཏུ་བྱས་ནས“དམའ་རིམ་དམར་པོ་དང་མཐོ་རིམ་ནག་པོ”བཀག་འགོག་བྱེད་པ་དང་། མང་ཚོགས་ཞུགས་རྒྱུ་རྒྱ་ཆེ་རུ་གཏོང་བ།  མང་ཚོགས་ཀྱི་ལྟ་སྐུལ་དང་ལེན་བྱེད་པ། བྱ་བ་དངོས་སྒྲུབ་པ་དང་དམངས་ཀྱི་སེམས་ཁྲལ་སེལ་བ། ལྟེ་བའི་བྱ་བར་སྐུལ་འདེད་གཏོང་བ། ལོ་འཁོར་གྱི་དམིགས་ཚད་ལེགས་སྒྲུབ་བཅས་བྱ་རྒྱུ་དེ་ཐོག་མཐའ་བར་གསུམ་དུ་ཁྱབ་པར་བྱས་ནས་སྤྱོད་ཚུལ་ནན་མོ་དང་ཏན་ཏིག་སྒོས་བརྗོད་དོན་སློབ་གསོའི་ཆབ་སྲིད་རང་བཞིན་དང་གཟབ་ནན་རང་བཞིན་འགན་ལེན་བྱེད་དགོས་པ་ནན་གྱིས་བསྟན།

ཞུའེ་ཅན་ཧྭ་ཡིས་སྐོར་ཐེངས་གཉིས་པའི་བརྗོད་དོན་སློབ་གསོ་སྤེལ་བ་ནས་བཟུང་། མཚོ་བྱང་ཁུལ་ཨུས་ཚད་མཐོའི་མཐོང་ཆེན་དང་རྩ་འཛུགས་ཀྱི་འགན་ལེན་ནུས་ལྡན། བརྗོད་དོན་གྱི་གཙོ་རྐང་མངོན་གསལ་དོད་པ།  བྱ་ཐབས་དངོས་གཉེར་བཅས་བྱས་ནས“སློབ་སྦྱོང་ལ་བརྟེན་ནས་བླ་སྲོག་གཏོད་པ་དང་སློབ་སྦྱོང་ལ་བརྟེན་ནས་བློ་གྲོས་འཕེལ་བ། སློབ་སྦྱོང་ལ་བརྟེན་ནས་སྤྱོད་ཚུལ་ལེགས་སུ་གཏོང་བ། སློབ་སྦྱོང་ལ་བརྟེན་ནས་བྱ་བར་སྐུལ་འདེད་གཏོང་བ”བཅས་ཀྱི་ཐད་དགེ་མཚན་ལྡན་པའི་ཕན་འབྲས་ཐོན་ཡོད། ཁོང་གིས“སྔར་བས་སྣང་ཆེན་ལྔ”དང“ཏན་ཏན་ཏིག་ཏིག་གསུམ”གྱི་བླང་བྱ་གལ་ཆེན་གནད་ལ་འཁེལ་བའི་སྒོ་ནས་ཁོང་དུ་ཆུད་པར་བྱས་ཏེ་བརྗོད་དོན་སློབ་གསོའི“ལེའུ་རྗེས་མའི”བྱ་བར་དམ་འཛིན་ཏན་ཏིག་བྱེད་དགོས་ཤིང་། བསམ་བློའི་ངོས་འཛིན་རྒྱུན་མཐུད་ངང་གཏིང་ཟབ་ཏུ་གཏོང་བ་དང་དུས་ཚོད་བཀོད་སྒྲིག་ལུགས་མཐུན་བྱས་ཏེ་རིགས་པའི་གཞུང་ལུགས་སློབ་སྦྱོང་དང་གནད་དོན་དག་ཐེར། བརྟག་དཔྱད་ཞིབ་འཇུག འཕེལ་རྒྱས་ལ་སྐུལ་འདེད་གཏོང་བ་བཅས་ལ་དམ་འཛིན་ནན་མོ་བྱས་ནས“ཆད་ལྷག”མི་ཡོང་བ་བྱེད་དགོས།  “གཞི་རིམ་དུ་བསྐྱོད་པ་བཞིའི”ལམ་ལུགས་ཁྱབ་གདལ་དང་བེད་སྤྱོད་ཤུགས་ཆེན་བྱས་ནས་གནད་དོན་གཅིག་སྡུད་དང་མང་ཚོགས་ཀྱིས་གླེང་མང་བའི་གནད་དོན། བྱ་བའི་རྣམ་པ་གཏོད་ཐབས་བྲལ་བ་བཅས་ཀྱི་གནས་སུ་བསྐྱོད་དེ་བརྟག་དཔྱད་ཞིབ་འཇུག་བྱས་ནས་མང་ཚོགས་ཀྱི་བྲེལ་དཀའ་སྡུག་སྨོན་གྱི་གནད་དོན་བློ་རྩེ་གཅིག་སྒྲིམ་གྱིས་ཐག་གཅོད་ཡག་པོ་བྱས་ཏེ་མང་ཚོགས་ཀྱི་ཐོབ་སྣང་དང་ཚོར་སྣང་ལ་བརྟེན་ནས་བརྗོད་དོན་སློབ་གསོའི་གྲུབ་འབྲས་ཏན་ཏིག་སྒོས་ར་སྤྲོད་བྱེད་དགོས། རིགས་དབྱེ་ནས་མཛུབ་ཁྲིད་བྱ་རྒྱུར་ཤུགས་བསྣན་ཏེ“ཕྱིར་མིག་ལྟ་བ”དང“ཟླ་རེའི་དཔྱད་དཔོག”བྱ་བ་ཡག་པོར་སྤེལ་ནས་མགོ་ཁྲིད་ལས་བྱེད་པས“1+10”གཞི་རིམ་ལ་འབྲེལ་གཏུག་བྱས་ནས་མང་ཚོགས་ལ་ཞབས་འདེགས་ཞུ་བའི་བྱ་བའི་ལམ་སྲོལ་དང“4+1+N”གྲོང་གསེབ་དར་སྤེལ་མཉམ་འབྲེལ་ལམ་སྲོལ་གྱི་ལྟ་སྐུལ་སློབ་སྟོན་དང་འབྲེལ་གཏུག་མཛུབ་སྟོན་གྱི་ནུས་པ་འདོན་སྤེལ་ཡག་པོ་བྱས་ཏེ་གཞི་རིམ་ཏང་རྩ་འཛུགས་ལ་ཞན་ཆ་འཚོལ་བ་དང་ཞན་ཆ་གསབ་རྒྱུར་མཛུབ་སྟོན་དང་རོགས་རམ་བྱེད་པ་དང་། བསམ་ཕྱོགས་དང་བྱ་ཐབས་ཤུགས་ཆེར་བཏང་ནས་བརྗོད་དོན་སློབ་གསོའི་ཕན་འབྲས་འགན་ལེན་བྱེད་དགོས་པར་བསྟན།             

ཁུལ་དུ་བསྡད་ཡོད་པའི་ཁུལ་རིམ་པའི་མགོ་ཁྲིད་དང་ཁུལ་ཨུའི་སྡེ་ཁག་སོ་སོ། ཁུལ་སྲིད་གཞུང་གི་ལས་ཁུངས་སོ་སོ། མང་ཚོགས་ཚོགས་པ་སོ་སོ་བཅས་ཀྱི་འགན་འཁུར་བློ་མཐུན་གཙོ་བོ་ཞུགས།